A e pasa ete taki sma e kon betre nanga wan wondroe?
„TEKI Jesus èn kon betre!” Den sortoe wortoe disi ben meki Alexandre, wan memre foe wan evangelisch kerki, bribi taki te a ben sa teki dresi gi a siki foe en, dan dati ben sa sori taki a no abi bribi. A ben kon abi na overtoigi taki soso a bribi foe en ben sa meki en kon betre nanga wan wondroe, wan sani di a ben abi fanowdoe. A ben naki na ati foe Benedita, wan fajafaja Katoliksma, srefisrefi, di a ben jere a betre di sma ben kon betre nanga wondroe na ini a santa presi foe Aparecida do Norte, na ini a staat São Paulo, Brasjonkondre. Ala di a ben gebroiki wan toe towfroe wortoe di en tanta ben leri en, Benedita ben begi Wi Oema foe Aparecida, Santa Antonius, nanga tra „santa sma” foe kisi krakti foe dresi den siki sma.
Soleki fa a sori, srefi now na a kaba foe a di foe twenti jarihondro, foeroe sma e bribi ete na ini a betre di sma e kon betre nanga wondroe — ma foe san ede? Kande son sma e broeja te datra no man doe foeroe foe poeroe a siki, pen, èn a pina di den lobiwan foe den e pina, spesroetoe den pikin foe den. Den sma di e pina foe wan langa siki di e kon ibritron baka, e denki kande taki foe di den disiten datra kostoe hei srefisrefi, a no ben sa doe ogri efoe den ben sa soekoe dresi nanga jepi foe begi nanga bribi. Son sma e si tapoe TV taki difrenti kerki èn aparti sma e pristeri dresi gi AIDS, depressie, kanker, lawman siki, hei broedoe, nanga foeroe tra siki. Awansi den e bribi na ini den sortoe froeklari disi ofoe no, kande tokoe den sma disi e go na den leki wan lasti presi pe den kan feni jepi. So srefi tra sma di e bribi taki a siki foe den kon foe ogri jeje, kan denki taki den dresi di datra e gi no abi a krakti foe jepi den.
Na a tra sei, sma de di e gens srefisrefi èn den e kroetoe srefi na idea taki den dede „santa sma” noso dresiman di de na libi, man dresi sma nanga wan wondroe. Soleki fa a Jornal da Tarde e taki, na immunoloog Dráusio Varella e denki taki a bribi na ini dresi nanga wondroe „e spotoe nanga a bribi di sma e bribi foe kon betre nanga wan wondroe èn den sma di no e loekoe boen èn den sma di no abi tra fasi foe doe”. A e taki moro fara: „Foe di den e howpoe na tapoe wondroe, foeroe sma kan trowe prenspari datra jepi foe den koriman disi ede.” Èn The New Encyclopædia Britannica e froeklari: „Fositen, den fasi fa sma dresi trawan nanga wondroe, ben abi foe doe nanga santa presi èn nanga relisi seremonia, èn a sabidensi tapoe a kontren foe datratori abi a gwenti foe froeklari taki ala den sortoe fasi disi foe dresi sma, ben de soso foe di den e meki sma denki taki den kon betre èn a e wroko na ondro boen situwâsi.” Tokoe, foeroe sma e bribi taki den ben kon betre nanga wan wondroe. Gi den, a dresi dati ben wroko!
Den sma di sabi bijbel, sabi taki Jesus ben dresi siki sma na foeroe okasi, èn a ben doe disi nanga a „krakti foe Gado” (Lukas 9:42, 43). So boen, den e aksi densrefi kande: ’A krakti foe Gado e wroko ete èn e meki sma kon betre nanga wondroe na ini a ten disi?’ Efoe a de so, dan foe san ede den moeiti di sma e doe foe dresi sma, no e waka soleki fa den ben pramisi? A de so, foe di a siki sma no abi nofo bribi noso bika a bijdrage foe en no bigi nofo? A boen te wan kresten e soekoe dresi nanga wan wondroe te a e pina foe wan siki di e gi en pen noso di no man dresi? Èn oiti a dresi di Jesus ben dresi sma nanga wondroe èn di ben wroko, sa feni presi baka? Joe kan feni den piki na tapoe den prenspari aksi disi na ini a tra artikel.