Kownoekondre preikiman e froeteri
Meki a leti foe den skèin na India
NA INDIA, 11.542 Kotoigi di e prisiri e preiki a boen njoensoe foe a Kownoekondre (Mateus 24:14). Den 1.066 sma di ben dopoe na ini a dienstjari 1991, na Kownoekondre preikiman di e meki a leti foe den skèin gi trawan. O kolokoe den alamala ben de foe si taki 28.866 sma ben de na a Memrefesa foe Krestes dede!
◻ Foeroe sma ben leri a Kownoekondre howpoe foe a fositron nanga jepi foe okasi preiki. Foe eksempel, wan Kotoigi ben taki foe a Kownoekondre nanga den wrokokompe foe en, di de temreman toe. Wan wrokokompe ben doe wan sani a tapoe èn a ben bigin foe meki a leti foe en skèin gi en famiri èn den mati foe en. Nanga prisiri den disi ben gi a toemoesi moi Kownoekondre boskopoe disi na trawan. So leki fa njoensoe e sori, dan ini wan toe jari nomo, ’moro leki 30 sma ben teki a waarheid’. Jehovah ben blesi en èn den njoen brada foe en na jeje fasi, foe di den ben meki a leti foe den skèin.
◻ Wan jongoe brada ini wan tra gemeente ben meki a leti foe en skèin, foe di a ben preiki na okasi gi kompe studenti na skoro. Wan toe foe den ben abi belangstelling gi a Kownoekondre howpoe, èn foeroe tron a ben froeklari bijbel gi den te pasa mindrineti. Wan foe den, wan lomsoe, ben teki sei gi a waarheid na wan krakti fasi, ala di a priester ben warskow en gi serjoesoe bakapisi efoe a ben o go doro foe abi demakandra nanga a Kotoigi. Ma a studenti ben overtoigi taki a Kotoigi ben leri en a waarheid foe bijbel, èn a ben go doro foe teki sabi. Te foe kaba a ben dopoe èn a e dini now leki wan dinari ini a diniwroko ini a gemeente. A e prisiri ini a howpoe di e kon nanga a toemoesi moi leti foe waarheid! — Romesma 12:12.
◻ Wan trawan di ben arki a jongoe studenti disi, ben de wan studenti di sma ben sabi boen, wan sma di no ben bribi ini Gado, èn di ben abi a gwenti foe spotoe den wan di ben sori bribi ini Gado. Wan dei a ben teki prati na a takimakandra èn a ben poti foeroe aksi. A ben froewondroe di a ben kisi piki di a ben man froestan tapoe ala den aksi foe en èn a ben si taki bijbel na a Wortoe foe Gado. A ben kon sabi moro foe bijbel èn te foe kaba a ben dopoe. A papa foe en di ben de wan Hindoe, ben gens en so fara taki a ben o poti en na doro. Ma a jonkoeman disi, di ben teki sei foe a waarheid na wan krakti fasi, ben kisi pai di toe foe en brada na skin fasi èn toe mati foe en ben teki a waarheid èn ben dopoe. Wan foe den brada foe en e dini now na a bijkantoro na India.
◻ Wan orgaman foe studenti ben teki prati toe na den takimakandra nanga a jongoe Kotoigi. A man disi ben de wan hebi smokoman nanga wan sopiman. Wan leisi a ben wani foe fon toe kompe studenti di ben leri a waarheid foe a Kotoigi. Foe di den ben teki a waarheid, den ben weigri foe go makandra ini wan staking na a universiteit èn den no ben wani foe gi broedoe toe na wan kampagne foe soekoe broedoe, di na orgaman foe den studenti ben teki fesi na ini. A jonkoeman disi breiti now foe de wan Kotoigi foe Jehovah di e tjari leti.
◻ Ala nanga ala, dan a studenti di fosi ben meki a leti foe en skèin, ben de wan jepisani foe jepi 15 foe den kompe foe en foe gi densrefi abra èn teki dopoe, foe di a ben preiki na okasi gi den.
A de wan prisiri foe si taki foeroe sma ini a bigi kondre dati e teki a bijbel howpoe foe a njoen grontapoe foe Gado èn e go makandra nanga a bradafasi na heri grontapoe di Jehovah Gado e tjari kon na wán foe libi foe têgo na ondro en Kownoekondre.