Aksi foe leisiman

Efoe wan kresten siki noso e rèis èn foe dati ede a no man de na a Memrefesa, a moesoe hori disi wan moen na baka dati?

Ini Israèl foe owroeten a Paskafesa ben hori leki fa a gwenti ben de tapoe a di foe tinafo dei foe a fosi moen, di ben nen Nisan (noso Abib). Ma wi e feni wan spesroetoe kondisi foe san ben taki na ini Numeri 9:10, 11: „Taigi den manpikin foe Israèl, taki, ’Awinsi wan man foe oenoe noso foe oen geslagti no sa de krin foe wan sili ede noso de na pasi foe meki wan fara rèis, so srefi en moesoe sreka a Paska-òfer gi Jehovah. Ini a di foe toe moen [di ben nen Ijar, noso Ziv], tapoe a di foe tinafo dei, na mindri den toe neti, den moesoe sreka en. Nanga brede sondro sroedeki nanga wiwiri di bita den ben moesoe njan en.’”

Loekoe boen taki disi no ben poti toe datum di joe kan teki foe hori a Paskafesa (14 Nisan noso 14 Ziv), di ibriwan Israèlsma noso osofamiri ben fri foe teki, foe di dati ben de moro koemakriki gi den. A seti foe a Paska njanjan ini a di foe toe moen ben skotoe. A ben de wan aparti sani gi wan Israèlsma di no ben krin tapoe 14 Nisan noso a ben de boen fara foe a presi pe den ben gwenti foe hori a fesa.

A wan enkri sani di skrifi taki na ala sei den ben doe disi, ben de ini a ten di a getrow kownoe Hiskia ben meki taki den ben bigin hori a fesa foe koekoe sondro sroedeki baka. Ten no ben de foe meki densrefi klari foe a fosi moen (den priester no ben de so fara, den no ben tjari a pipel kon na wan ete), so fasi a ben hori na a di foe tinafo dei foe a tra moen. — 2 Kroniki 29:17; 30:1-5.

Boiti den spesroetoe situwâsi disi, den djoe ben e hori a Paskafesa tapoe a dei di Gado ben poti foe dati (Exodus 12:17-20, 41, 42; Leviticus 23:5). Jesus nanga den disipel foe en ben hori a fesa so leki a wet ben aksi dati, den no ben e teki a datum disi frafra. Lukas e taki: „Now a dei foe den brede sondro sroedeki ben kon krosibei, pe a Paska-òfer meti ben moesoe srakti; èn [Jesus] ben seni Petrus nanga Johanes gowe ala di a ben taki: ’Go foe sreka a Paska foe wi kan njan dati.’” — Lukas 22:7, 8.

Na a okasi dati Jesus ben bigin nanga a ala jari fesa di kresten sabi leki a Avondmaal foe Masra. Wi no kan poti toemoesi krakti a tapoe o warti a de foe kresten fisiti a Avondmaal foe Masra. Disi na a moro prenspari fesa foe Jehovah Kotoigi ini a jari. Den wortoe foe Jesus e sori foe san ede; a e taki: „Tan doe disi leki wan memre na mi” (Lukas 22:19). So boen ibri Jehovah Kotoigi sa meki plan moen na fesi foe hori a dei foe a fesa fri èn no meki tra mofo foe a dei dati. Na Avondmaal foe Masra sa hori tapoe toedewroko 6 april 1993, baka te son dongo pe joe e libi.

Ini ongewoon kefal son situwâsi di joe no kan si na fesi, so leki siki noso problema na tapoe joe rèis, kan meki wan kresten no man foe fisiti a fesa so leki a ben meki a plan foe doe dati. San sma moesoe doe ini so wan situwâsi?

Na a ten foe a fesa den e pasa nanga brede sondro sroedeki nanga redi win èn den wan di ben salfoe nanga Gado santa jeje èn di teki foe kisi libi na hemel e teki prati (Mateus 26:26-29; Lukas 22:28-30). Efoe wan sma di e teki prati ala jari, no man opo a jari disi foe en siki bedi na oso noso ini na ati-oso, dan owroeman foe a gemeente sa sreka sani taki wan foe den tjari pikinso foe a brede èn foe a win go na a siki sma, èn taki makandra foe bijbeltekst di fiti foe a tori disi, èn gi en den simbôl. Efoe wan salfoe kresten de fara foe en gemeente, a sa seti sani foe kan fisiti wan gemeente ini a kontren pe a sa de tapoe a datum dati.

Nanga disi ini prakseri, a sa de troetroe ini wan toemoesi aparti situwâsi taki wan kresten sa moesoe hori a fesa foe na Avondmaal foe Masra 30 dei baka dati (wan moen-kenki moen), ini akroederi nanga a komando foe Numeri 9:10, 11 nanga na eksempel ini 2 Kroniki 30:1-3, 15.

Den wan di de foe a klasse foe Jesus „tra skapoe”, nanga a howpoe foe libi foe têgo ini wan grontapoe paradijs, no de ondro a komando foe teki prati na a brede nanga a win (Johanes 10:16). A de prenspari foe fisiti na ala jari fesa, ma den no e teki prati na den simbôl. So boen efoe wan foe den siki noso e rèis èn na so fasi no de ini wan gemeente a neti dati, dan a man noso oema dati kan leisi gi ensrefi den tekst di fiti (nanga so srefi a tori pe Jesus e seti a fesa disi) èn begi foe a blesi foe Jehovah na a fesa na heri grontapoe lontoe. Ma ini a kefal disi a no de fanowdoe taki wan spesroetoe sani moesoe regel foe wan konmakandra noso wan spesroetoe bijbel taki makandra wan moen na baka dati.