Tapoe foe tjari kolokoe kan kibri joe?

WAN pisi kristal di wan Brasion man e tjari na ini en saka. Wan pisi moni foe wan Amerkan sportman foe tjari kolokoe gi en. Wan santa Brigita kroisi di e anga na tapoesei foe wan bedi ini na oso foe wan osofamiri ini Ierland. Miljoenmiljoen sma e gebroiki den sortoe sani disi leki tapoe foe tjari kolokoe.a Den e bribi taki efoe den abi den tapoe disi, dan dati kan kibri den foe ogri no miti den èn e tjari kolokoe gi den.

Loekoe Brasionkondre foe eksempre. So leki fa a tijdschrift Veja e taki, dan foeroe Brasionsma e weri „pisi ston èn diri ston di no abi foeroe waarde, na den skin èn den e taki foe den taki den abi a krakti foe hari kolokoe nanga skin krakti èn a krakti foe a froestan kon, na a sma di abi den ston dati”. Foe di trawan ini a kondre dati frede foe wisiwasi den obiakrakti, den e poti wan kerki simbôl noso wortoe di skrifi na seiplanga foe na oso foe den. Son sma e gebroiki srefi bijbel leki wan santa tapoe; den e poti en na tapoe tafra pe ala sma kan si en èn a e tan opo na Psalm 91.

Ini den kontren na zuidsei foe Afrika, den e gebroiki muti noso dresi di sma foe den presi drape gwenti foe teki foe doe den fanowdoe na a srefi fasi, no soso foe di a e dresi sma, ma foe kibri den foe ogri sani no miti den. Nofotron sma e prakseri taki siki, dede, lasi na monisei èn srefi prati-lobi, na sani di e kon, foe di feanti poti wisi gi den noso foe di den no ben plisi den dede afo foe den. Muti den e kisi moro foeroe foe wan obiaman foe boitipresi, di e meki wan dringi foe den prani, bon noso foe pisi foe a skin foe meti. Ma a de wan moi sani foe si, taki muti pikinmoro no de foe feni na boitipresi wawan; a de wan sani di sma e doe na ini ala den foto foe Zuid-Afrika. Bisnisman nanga sma di kisi skoro na universiteit, de na mindri den sma di e froetrow na tapoe muti.

A soekoe di sma e soekoe kolokoe de toe na alasei na ini kondre foe Europa. A boekoe Studies in Folklife Presented to Emyr Estyn Evans e froeteri wi: „Pikinmoro no wan dorpoe noso foto no de na Ierland, pe sma no sa si isri foe asifoetoe di den fasi na den doro noso na tapoe den doro foe wan toe oso noso maksin.” Wan sani di de srefi wan moro aladei sani ini a kondre dati, na kroisi di den meki foe na adroe prani, di den e anga na tapoesei foe bedi nanga doro foe tjari kolokoe kon. Sma di e si den sani disi e taki dati te joe e loekoe en frafra, dan foeroe foe den sma foe Ierland e si den sortoe kroektoe bribi dati leki wan sani di no de so serjoesoe. Ma tokoe a no foeroe sma de, di no e boemoei nanga den sortoe kroektoe bribi dati kwetikweti.

A soekoe di sma e soekoe kibri

San na a sani di e hari sma so na den sortoe kroektoe bribi dati? So leki fa a sori, dan den de foe satisferi den fondamenti sani di sma abi fanowdoe foe kisi kibri. Troetroe, omeni sma abi a firi taki noti no kan pasa nanga den na ini den oso, èn srefi moro mendri ete te den e waka na strati te neti? Poti na dati toe a feti di sma e feti foe wroko moni èn foe sorgoe gi pikin. Ija, wi e libi na ini san bijbel e kari „wan ten foe problema” (2 Timoteus 3:1, The New English Bible). A de foe dati ede wan natuurlijk sani taki sma abi a tranga firi foe kisi kibri.

Disi kan de spesroetoe so ini koeltoeroe pe difrenti fasi foe afkodrei nanga obia pôpi. A frede di sma e frede gi den so-kari jeje foe den dedewan noso taki den na sma di feanti floekoe den, kan meki taki a so-kari kibri di wan tapoe e gi, gersi wan sani di den moesoe abi. Awansi fa no fa, The World Book Encyclopedia e taki: „Moro foeroe sma abi frede di e meki taki den no de seiker foe sani. Kroektoe bribi e jepi den foe wini den sortoe frede dati, foe di den e gi den seikerfasi. Den kroektoe bribi e gi sma a djaranti baka taki den sa kisi san den wani èn den sa tan farawe foe moeilekhèit.”

A krakti foe tapoe di sma kan tweifri na dati

Dati meki na heri grontapoe sma e weri, e tjari nanga den èn e meki trawan si difrenti sortoe nanga fasi foe tapoe. Ma a de wan reidelek sani foe bribi taki wan tapoe di libisma meki, kan gi troetroe kibri? Foeroe foe den pôpi sani di sma e gebroiki leki tapoe, na sani di bisnis e meki bogobogo. Disi no e dwengi wan sma foe gebroiki en krin froestan, foe bribi taki wan sani di meki ini wan fabriki kan abi obiakrakti? Èn srefi efoe wan obiaman foe boitipresi sreka wan spesroetoe sani foe dringi, a no de noti moro leki wan moksi foe gewoon sani di de na ini — roetoe, wiwiri èn go so doro. Foe san ede a moksisani dati moesoe abi obiakrakti? Boiti dati, troetroe boeweisi de taki sma di e tjari tapoe nanga den e libi moro langa — noso de moro kolokoe — leki sma di no e doe dati? A no den sma srefi di e meki den sortoe tapoe dati, e siki èn e dede?

Na presi foe gi sma troetroe kibri èn a firi taki den kan tiri a libi foe den, dan a gebroiki di sma e gebroiki tapoe foe di den abi kroektoe bribi, troetroe e meki sma lasi-ati foe loesoe den problema foe den nanga den froestan èn e gi den deki-ati foe si kolokoe leki wan sani di e loesoe ala problema. Wan sma di e gebroiki den sani disi kan kisi wan falsi firi foe seikerfasi, te a e froetrow na tapoe a krakti foe den tapoe. Wan man di dringi sopi kan taki dati a man handri esi-esi èn na wan boen fasi na tapoe sani, ma efoe a e proeberi foe rèi oto, dan so leki fa a sori, a sa gi ensrefi noso trawan mankeri. Na so wan sma di e poti en froetrow na tapoe a krakti foe wan tapoe, kan doe ensrefi ogri toe. Foe di a sma e prakseri taki a abi kibri, dan a kan abi a firi foe teki don tjans noso foe teki don bosroiti.

Foe bribi ini a krakti foe tapoe e tjari ete tra serjoesoe kefar kon, di miljoenmiljoen sma di e gebroiki den no e si. San na den kefar disi, èn wan joisti fasi de foe tan farawe foe ogri? A tra artikel sa taki foe den aksi disi.

[Foetoewortoe]