Meki gosontoe leri kon tron a fasi fa joe e libi
„A gi di wan sma e gi ensrefi na a dini foe Gado, boen gi ala sani.” — 1 TIMOTEUS 4:8.
1, 2. Na sortoe fasi sma e sori taki den e broko den ede nanga a gosontoe foe den, èn sortoe bakapisi disi abi?
MORO foeroe sma sa agri sondro foe tweifri, taki wan boen gosontoe na wán foe den moro prenspari sani ini a libi. Den e gi boen foeroe ten nanga moni foe meki den skin tan gosontoe èn den e sorgoe taki den e kisi boen datra-jepi, te den abi dati fanowdoe. Na ini den Verenigde Staten, foe eksempre, a ben de so, taki ini wan jari di no pasa so langa ete, den alajari kostoe di den meki nanga gosontoe-afersi, ben de moro leki 900 miljard Amerkan dala. Dati de moro leki 3000 Amerkan dala ini wán jari gi ibri mansma, oemasma nanga pikin-nengre na ini a kondre dati, èn den kostoe di den e meki gi ibriwan sma ini tra goedoe kondre de pikinmoro a srefi.
2 San a gi di sma e gi ala ten, krakti, nanga moni abi leki bakapisi? A de seiker taki no wan sma no sa taki, te joe e loekoe en ini algemeen, dati wi no abi den moro boen sani ini a ten disi foe man jepi sma na datra sei, moro leki iniwan tra ten ini historia. Ma tokoe, foe ensrefi disi no e meki taki sma e libi gosontoe. Foe taki en leti, a presidenti foe den Verenigde Staten ben hori wan lezing èn a ben taki foe den difrenti sei foe wan plan di den ben meki gi wan programa foe gosontoe afersi gi den Verenigde Staten. Ini a lezing a presidenti ben tjari kon na krin, taki boiti „den boen bigi kostoe di e meki foe ogridoe ede ini a kondre disi”, den sma di e libi na ini den Verenigde Staten „abi moro hei nomroe foe sma nanga AIDS, foe sma di e smoko èn e dringi pasa marki, foe tini di e kisi bere, foe beibi di e gebore, ala di den no hebi leki fa den moesoe de”. Èn disi de moro leki na ini iniwan tra goedoe kondre. Na sortoe bosroiti a ben kon? „Wi moesoe foe kenki den fasi foe wi, efoe wi oiti troetroe wani foe de gosontoe leki pipel.” — Galasiasma 6:7, 8.
Wan gosontoe fasi foe libi
3. Sortoe rai Paulus ben gi, nanga na owroeten koeltoeroe foe den Grikisma na prakseri?
3 Ini a fosi jarihondro, sma ben sabi den Grikisma foe a gi di den ben gi densrefi na a koeltoeroe foe meki a skin kon moro gosontoe èn moro tranga, na a bow di den ben bow a skin nanga jepi foe na oefen di den ben oefen èn nanga jepi foe spesroetoe njanjan èn na a hori foe sport-wega. Nanga den sani disi ini prakseri, na apostel Paulus ben skrifi a jonkoeman Timoteus, nanga jepi foe santa jeje: „Na oefen di wan sma e oefen a skin, boen gi pikinso sani; ma a gi di wan sma e gi ensrefi na a dini foe Gado, boen gi ala sani, foe di a abi wan pramisi foe a disiten libi èn a libi di e kon” (1 Timoteus 4:8). So boen, Paulus ben sori san sma ini a ten disi e kon erken now, dati wani taki, dati sani di seti na datra sei noso na skin sei, no de wan djaranti gi wan troetroe gosontoe fasi foe libi. Ma Paulus e gi wi a djaranti taki a sani di prenspari srefisrefi, na a kweki di wan sma moesoe kweki wan gosontoe na jeje fasi nanga a gi di a e gi ensrefi na a dini foe Gado.
4. San na den winimarki foe a gi di wan sma e gi ensrefi na a dini foe Gado?
4 So wan fasi foe wan sma tjari ensrefi, boen gi „a disiten libi”, bika a e gi kibri gi ala den ogri sani di sma di no e dini Gado, noso den sma di abi soso „wan fasi [noso, e sori leki] foe dini Gado”, e tjari na densrefi tapoe (2 Timoteus 3:5; Odo 23:29, 30; Lukas 15:11-16; 1 Korentesma 6:18; 1 Timoteus 6:9, 10). Den sma di e meki taki a gi di den e gi densrefi na a dini foe Gado, seti a libi foe den, abi wan gosontoe lespeki gi den wet foe Gado nanga den sani di a e aksi den foe doe, èn dati e poesoe den foe meki den gosontoe leri di e kon foe Gado, kon tron a fasi fa den e libi. So wan fasi foe tjari densrefi, e tjari gosontoe na jeje fasi èn na skin sei, satisfaksi nanga kolokoe kon gi den. Èn den e „kibri gi densrefi wan toemoesi moi fondamenti leki wan goedoe gi a ten di e kon, so taki den kan graboe a troe libi steifi”. — 1 Timoteus 6:19.
5. Sortoe leri Paulus ben gi ini a di foe toe kapitel na ini a brifi di a ben skrifi gi Titus?
5 Wan libi di a gosontoe leri di e kon foe Gado, e tiri, e tjari den sortoe blesi dati kon, now èn ini a ten di de na wi fesi. Foe dati ede wi moesoe sabi, te joe e loekoe en krin, fa wi kan meki a gosontoe leri di e kon foe Gado, kon tron a fasi fa wi e libi. Na apostel Paulus ben gi a piki na ini a brifi di a ben skrifi gi Titus. Wi sa poti spesroetoe prakseri na tapoe a di foe toe kapitel foe a boekoe dati, pe a ben leri Titus foe „tan taki foe den sani di fiti gi gosontoe leri”. Foe troe, wi alamala, jongoewan nanga owroewan, mansma nanga oemasma, kan abi wini foe so wan „gosontoe leri” ini a ten disi. — Titus 1:4, 5; 2:1.
Rai gi den moro owroe mansma
6. Sortoe rai Paulus ben gi na „den man di owroe ini jari”, èn foe san ede a ben de switifasi foe en sei foe doe so?
6 Fosi, Paulus ben abi wan toe rai gi den moro owroe mansma ini a gemeente. Grantangi leisi Titus 2:2. Leki wan groepoe, „den man di owroe ini jari”, e kisi lespeki foe sma èn sma e si den leki eksempre foe bribi nanga loyaalfasi (Lefitikus 19:32; Odo 16:31). Foe disi ede, meki trawan no sa wani foe gi rai na moro owroe mansma kande, ini a tori foe afersi di no de so serjoesoe (Job 32:6, 7; 1 Timoteus 5:1). Foe dati ede, a de switifasi foe Paulus sei foe taki fosi nanga den moro owroe mansma, èn a ben sa de wan boen sani foe den e teki den wortoe foe Paulus na ati èn doe san a taki èn foe sorgoe taki, neleki Paulus, den de wan eksempre di sma kan waka na baka. — 1 Korentesma 11:1; Filipisma 3:17.
7, 8. (a) San de na ini toe foe man „dwengi wisrefi ini den gwenti foe wi”? (b) Foe san ede a de di wan sma de „serjoesoe” moesoe de ini balansi nanga a de di wan sma de „gosontoe foe froestan”?
7 Ini a fosi presi, den moro owroe kresten mansma moesoe man „dwengi densrefi ini den gwenti foe den”. Ala di a gron wortoe kan sori go na a gwenti foe dringi sopi („no de wan srafoe foe sopi”, Kingdom Interlinear), a wani taki toe foe de na ai, foe abi wan krin froestan, noso foe no broeja (2 Timoteus 4:5; 1 Petrus 1:13). So boen, efoe a de nanga a dringi foe sopi noso efoe a de nanga tra sani, den moro owroe mansma moesoe man dwengi densrefi, èn den no moesoe abi a gwenti foe doe sani pasa marki noso foe go toemoesi fara.
8 Dan den moesoe de „serjoesoe” èn „gosontoe foe froestan” toe. Leki fa a gwenti de, dan te wan sma serjoesoe noso e tjari ensrefi na wan fasi di fiti, e dwengi lespeki foe sma èn de warti foe kisi lespeki, dan dati e kon nanga den jari. Ma son sma kan abi a firi foe de toemoesi serjoesoe, èn den e tron sma di no e froedrage a fasi fa den jongoewan de nanga faja (Odo 20:29). Dati meki „serjoesoe” de ini balansi nanga „gosontoe foe froestan”. Den moro owroe mansma moesoe tan hori a serjoesoefasi di de ini akroederi nanga a jari foe den, ma na a srefi ten den moesoe de ini balansi, èn den moesoe man dwengi den firi foe den nanga san e poesoe den foe doe sani, dorodoro.
9. Foe san ede den moro owroe mansma moesoe de gosontoe ini bribi nanga lobi èn spesroetoe ini horidoro?
9 Te foe kaba, moro owroe mansma moesoe de „gosontoe ini bribi, ini lobi, ini horidoro”. Foeroe leisi te Paulus ben skrifi, dan a ben kari bribi nanga lobi makandra nanga howpoe (1 Korentesma 13:13; 1 Tesalonikasma 1:3; 5:8). Dja a ben poti „horidoro” ini a presi foe „howpoe”. Kande a de, foe di te wan sma e kon grani, makriki a kan kisi a firi foe libi sani leki fa den de (Preikiman 12:1). Ma so leki fa Jesus ben tjari kon na krin, dan „a sma di horidoro te na a kaba, en sa kisi froeloesoe” (Mateus 24:13). Boiti dati, owroe sma na warti eksempre gi den trawan, no soso foe di den owroe noso foe di den abi ondrofeni, ma foe den tranga jeje eigifasi foe den — bribi, lobi nanga horidoro.
Gi den moro owroe oemasma
10. Sortoe rai Paulus e gi na „den oemasma di owroe ini jari”, na ini a gemeente?
10 Baka dati Paulus ben poti en prakseri na tapoe den moro owroe oemasma ini a gemeente. Grantangi leisi Titus 2:3. „Den oema di owroe ini jari” na den owroe memre na mindri den oemasma ini a gemeente, pe wefi foe „den man di owroe ini jari” de na ini toe, nanga mama nanga granmama foe tra memre. Foe di disi de so, meki den kan abi foeroe krakti na sma tapoe, efoe a de na wan boen fasi noso efoe a de na wan takroe fasi. Dati meki Paulus ben bigin den wortoe foe en nanga „so srefi”, san wani taki dati „den oema di owroe ini jari” abi seiker frantiwortoe toe di den moesoe tjari, so taki den kan doe a ròl di den abi ini a gemeente na wan boen fasi.
11. San na a tjari di wan sma e tjari ensrefi na wan lespekifasi?
11 Na a fosi presi, „meki den oema di owroe ini jari tjari densrefi na wan lespekifasi”, Paulus ben taki. „A fasi fa wan sma e tjari ensrefi”, na san e sori na dorosei fa na inisei fasi foe wan sma de nanga a persoonlijkheid foe en, so leki fa a de foe si ini a fasi fa a e tjari ensrefi èn a fasi fa a e sori na dorosei (Mateus 12:34, 35). San dan, moesoe de a fasi noso a persoonlijkheid foe wan kresten oema di owroe ini jari? Foe taki en sjatoe, „na wan lespekifasi”. Den wortoe disi den vertaal foe wan Griki wortoe di wani taki „a sani di fiti sma, doe noso sani di gi abra na Gado”. Disi troetroe na boen rai te wi e loekoe a krakti di den owroe oemasma abi na tapoe trawan, spesroetoe na tapoe den moro jongoe oemasma ini a gemeente. — 1 Timoteus 2:9, 10.
12. Gi sortoe fowtoe fasi foe gebroiki a tongo, ala sma moesoe tan farawe foe dati?
12 Toe eigifasi e kon now di no e bow sma: „den no moesoe taki ogri-ati lei foe pori sma nen, èn den no moesoe gi densrefi pasa marki toe na a dringi foe win”. A de wan moi sani foe si, taki den toe sani disi e poti makandra. „Ini owroeten, di win ben de a wan-enkri sortoe sopi”, na so professor E. F. Scott e taki, „dan a ben de na den pikin win-fesa foe den, taki den owroe oemasma ben e taki ogri-ati lei foe pori a nen foe den sma ini a birti foe den.” Oemasma e broko den ede moro foeroe nanga sma leki mansma e doe, san na wan sani di warti foe kisi prèise. Tokoe, a broko di wan sma e broko en ede nanga sma, kan kon tron gongosa èn srefi ogri-ati lei di e pori sma nen, spesroetoe te a tongo kon loesoe foe di a dringi sopi (Odo 23:33). Foe troe a sa de wan boen sani, te ala sma di e feti na baka wan gosontoe fasi foe libi, mansma nanga oemasma, e loekoe boen nanga a trapoe disi.
13. Na sortoe fasi moro owroe oemasma kan de sma di e gi leri?
13 Foe den moro owroe oemasma gebroiki a ten di den ben abi, na wan boen fasi, meki den e kisi deki-ati foe de „sma di e leri tra sma san boen”. Na wan tra presi, Paulus e gi krin bodoi taki oemasma no moesoe de sma di e gi leri ini a gemeente (1 Korentesma 14:34; 1 Timoteus 2:12). Ma disi no e tapoe den foe prati a diri sabi di den abi foe Gado, nanga na osofamiri foe den èn nanga a poebliki (2 Timoteus 1:5; 3:14, 15). Den kan doe foeroe boen toe, foe a de di den de kresten eksempre gi den moro jongoe oemasma ini a gemeente, so leki fa den vers di e kon now e sori.
Gi den jongoe oemasma
14. Fa moro jongoe kresten oemasma kan sori balansi ini a sorgoe di den e sorgoe gi den wroko foe den?
14 Di Paulus ben gi den moro owroe oemasma deki-ati foe de „sma di e leri tra sma san boen”, a ben taki spesroetoe foe den moro jongoe oemasma. Grantangi leisi Titus 2:4, 5. Ala di foeroe foe a leri e poti prakseri na tapoe afersi di abi foe doe nanga na osofamiri-libi, tokoe den moro jongoe kresten oemasma no moesoe go toemoesi fara, èn e meki broko-ede na skin fasi basi a libi foe den. Na presi foe dati, den moesoe de „gosontoe foe froestan, krin, . . . boen”, èn na tapoe foe dati, den moesoe de klariklari foe hori baka gi a seti foe a kresten edeman-wroko, „so taki sma no e taki na wan skempifasi foe a wortoe foe Gado”.
15. Foe san ede foeroe foe den moro jongoe oemasma na ini a gemeente warti foe kisi prèise?
15 Ini a ten disi, na osofamiri-libi kenki boen foeroe foe san a ben de ini a ten foe Paulus. Foeroe osofamiri prati tapoe a kontren foe bribi, èn trawan abi soso a papa noso a mama. Srefi na ini den osofamiri pe papa, mama nanga pikin de, èn pe papa de na edeman foe na osofamiri, moro nanga moro a kon de wan gwenti taki a wefi noso a mama no de misi-foe-oso dorodoro. Ala den sani disi e poti boen bigi druk noso frantiwortoe na tapoe jongoe kresten oemasma, ma disi no e poeroe den foe den no doe den froeplekti foe den di skrifi na ini bijbel. A de wan bigi prisiri, foe dati ede, foe si taki foeroe getrow jongoe oemasma e wroko tranga foe hori den foeroe wroko foe den ini balansi. Tokoe den man foe poti Kownoekondre afersi na a fosi presi, ala di sonwan foe den de ini a foeroeten diniwroko srefi leki jepipionier noso gewoon pionier (Mateus 6:33). Den troetroe warti foe kisi prèise!
Gi den jonkoe man
16. Sortoe rai Paulus ben abi gi den moro jongoe mansma, èn foe san ede disi e kon na a joisti ten?
16 Ne Paulus ben taki nanga den moro jongoe mansma, pe Titus ben de na ini toe. Grantangi leisi Titus 2:6-8. Foe den onfrantiwortoe nanga pori fasi ede, foe foeroe disiten jongoesma — a smoko di den e smoko, a gebroiki di den e gebroiki drug nanga sopi na wan fowtoe fasi, na abi di den abi seks di no mag, nanga tra sani foe grontapoe di den e feti na baka, so leki werdri sport nanga takroe pokoe nanga ontspanning — meki disi na rai di troetroe kon na a joisti ten gi kresten jongoewan, di wani foe abi wan gosontoe èn tevrede fasi foe libi.
17. Fa wan moro jongoe mansma kan kon „gosontoe foe froestan” èn de wan „eksempre foe toemoesi boen wroko”?
17 Na kontrari foe den jongoesma foe grontapoe, wan jongoe kresten man moesoe de „gosontoe foe froestan” èn „wan eksempre foe toemoesi boen wroko”. Paulus ben tjari kon na krin, taki a no den sma di e studeri nomo, e kisi wan gosontoe nanga lepi froestan, ma na den sma di, „foe di den e gebroiki a koni foe den foe si sani krin, e oefen [dati] foe man si san boen nanga san ogri” (Hebrewsma 5:14). Fa a de wan moi sani foe si, taki jongoe sma e gi a ten nanga a krakti foe den na wan friwani-fasi, foe abi wan dorodoro prati na den foeroe wroko di moesoe doe ini a kresten gemeente, na presi foe lasi a krakti foe den jongoe jari foe den, foe feti na baka sani gi densrefi! Te den e doe disi, dan neleki Titus, den kan tron eksempre foe „toemoesi boen wroko” ini a kresten gemeente. — 1 Timoteus 4:12.
18. San a wani taki dati wan sma de sondro flaka ini a gi di a e gi leri, de serjoesoe ini doe, èn de gosontoe ini taki?
18 Den e memre den moro jongoe mansma, taki den moesoe „sori foe de sondro flaka ini a gi di [den] e gi leri, serjoesoe, gosontoe ini taki, di sma no man kroetoe”. Leri di de ’sondro flaka’ moesoe abi wan steifi fondamenti na tapoe Gado Wortoe; foe dati ede, den moro jongoe mansma moesoe de fajafaja bijbelstudenti. Neleki den moro owroe mansma, den moro jongoe mansma moesoe de serjoesoe toe. Den moesoe si taki a de wan serjoesoe frantiwortoe foe de wan bedinari foe Gado Wortoe, èn foe dati ede den moesoe ’tjari densrefi na wan fasi di warti a boen njoensoe’ (Filipisma 1:27). So srefi, a taki foe den moro jongoe mansma moesoe de „gosontoe” èn na so wan fasi taki ’sma no man kroetoe en’, so taki den no kan gi den gensman no wan reide foe kragi. — 2 Korentesma 6:3; 1 Petrus 2:12, 15.
Gi srafoe nanga foetoeboi
19, 20. Fa den sma di e wroko gi tra sma kan „gi grani na a leri foe wi Froeloesoeman, Gado”?
19 Te foe kaba, Paulus ben taki nanga denwan di e wroko gi tra sma. Grantangi leisi Titus 2:9, 10. A no foeroe foe wi ini a ten disi na srafoe noso foetoeboi, ma foeroe sma na wrokoman di e doe wroko gi trawan. So boen, den gronprakseri di Paulus ben kari, e fiti heri boen toe ini a ten disi.
20 Foe „saka densrefi na ondro den eiginari na ini ala sani”, wani taki dati kresten wrokoman moesoe sori troetroe lespeki na den wrokobasi èn na den edeman foe den (Kolosesma 3:22). Den moesoe abi a boen nen toe foe de eerlijk wrokoman, foe di den e wroko ala a ten foe gi a basi foe den san a moesoe kisi. Èn na a wrokope foe den, den moesoe hori densrefi na den hei markitiki foe a fasi fa wan kresten moesoe tjari ensrefi, awansi na sortoe fasi den tra sma drape e tjari densrefi. Ala den sani disi de, „so taki den kan gi grani na a leri foe wi Froeloesoeman, Gado, na ini ala sani”. Omeni leisi wi e jere foe den boen bakapisi te opregti sma di ben e loekoe, e doe wan sani na tapoe a waarheid, foe di den Kotoigi wroko-kompe noso wrokoman foe den ben e tjari densrefi na wan toemoesi boen fasi! Disi na a pai di Jehovah e gi na denwan di e waka baka a gosontoe leri di e kon foe en, srefi na a wrokope foe den. — Efeisesma 6:7, 8.
Wan pipel di kon krin
21. Foe san ede Jehovah ben gi a gosontoe leri, èn san wi moesoe doe na tapoe?
21 A gosontoe leri di Paulus ben tjari kon na krin, a no soso wan sortoe wet foe gronprakseri foe a fasi fa sma moesoe tjari densrefi noso prakseri ini a tori foe boen gwenti nanga wet, di wi ben sa kan go na en foe soekoe rai, te wi ben sa winsi dati. Paulus ben go doro foe tjari a prakseri foe a gosontoe leri kon na krin. Grantangi leisi Titus 2:11, 12. Foe Jehovah Gado en lobi nanga en no-froedini boen-atifasi gi wi ede, meki a ben gi a gosontoe leri, so taki wi kan leri foe libi wan libi di abi wan marki èn di e gi satisfaksi ini den moeilek nanga kefarlek ten disi. Joe de klariklari foe teki a gosontoe leri èn meki a kon tron a fasi fa joe e libi? Te joe e doe disi, dan a sa wani taki dati joe sa kisi froeloesoe.
22, 23. Sortoe blesi wi e kisi, te wi e meki gosontoe leri kon tron a fasi fa wi e libi?
22 Moro leki dati, te wi e meki a gosontoe leri kon tron a fasi fa wi e libi, dan a e tjari wan toemoesi aparti grani gi wi now èn wan kolokoe howpoe gi a tamara. Grantangi leisi Titus 2:13, 14. A no de foe taki, dati te wi meki a gosontoe leri kon tron a fasi fa wi e libi, dan a e poti wi aparti foe a pori grontapoe disi di e dede gowe, leki wan pipel di kon krin. Den wortoe foe Paulus agersi den froemane foe Moses gi den manpikin foe Israèl na Sinai: „Foe a sei foe Jehovah, . . . a sa poti oenoe hei na tapoe ala den tra nâsi di a ben meki, èn a sa abi prèise nanga wan boen nen nanga moifasi leki bakapisi, ala di oenoe e sori foe de wan pipel di santa gi Jehovah, oen Gado, neleki fa a pramisi kaba.” — Deuteronomium 26:18, 19.
23 Meki ala ten wi warderi a grani foe de Jehovah en pipel di kon krin, foe di wi e meki gosontoe leri kon tron a fasi fa wi e libi! Ala ten de na ai, so taki joe no abi noti foe doe nanga wan sani di no de foe Gado nanga den lostoe foe grontapoe èn tan na so fasi krin èn gosontoe, foe Jehovah kan gebroiki joe ini a gran wroko di a e meki sma doe ini a ten disi. — Kolosesma 1:10.
Joe e memre disi ete?
◻ Foe san ede a gi di wan sma e gi ensrefi na a dini foe Gado, boen gi ala sani?
◻ Fa den moro owroe kresten mansma nanga oemasma kan feti na baka gosontoe leri foe meki a kon tron a fasi fa den e libi?
◻ Sortoe gosontoe leri Paulus ben abi gi den moro jongoe mansma nanga oemasma ini a gemeente?
◻ Sortoe grani nanga blesi wi kan kisi efoe wi e meki gosontoe leri kon tron a fasi fa wi e libi?
[Prenki na tapoe bladzijde 25]
Foeroe sma ini a ten disi e poti a rai ini Titus 2:2-4 na ini a libi foe den