„Doe joe diniwroko dorodoro”
„Mi e komanderi oenoe plegtig na fesi foe Gado nanga Kristus Jezus, di sa kroetoe den libiwan nanga den dedewan . . . doe joe diniwroko dorodoro.” — 2 TIMÓTEÜS 4:1, 5.
1. Sortoe matifasi ben de a mindri Paulus nanga Timóteüs?
DI NA apostel Paulus ben skrifi en di foe toe brifi gi Timóteüs, dan a ben feti kaba sowan dritenti jari langa baka en marki leki bedinari foe Gado. A ben kisi foeroe blesi foe Jehovah (2 Tim. 1:2). Paulus ben teki Timóteüs foe wroko krosbé nanga en makandra ini a dini foe den gemeente di a ben fisiti tapoe en reis. Foeroe jari den ben prisiri makandra na ini wan diniwroko di ben waka boen. — Tori. 16:1-5.
2. San den wortoe foe Paulus ini 2 Timóteüs 4:6-8 wani taki?
2 A ten ben doro now dati wan kaba ben kon na a diniwroko foe Paulus. A ben skrifi: „Den e trowe mi kaba leki wan dringi-ofrandi èn na faste ten foe a meki foe mi kon fri de a dromofo. Mi ben stré na toemsi boen stré, mi ben waka na pasi kon na wan kaba, mi ben kibri na bribi. Foe a ten disi now de a mi fesi na kroon foe regtvaardikifasi, di Masra, na regtvaardiki kroetoeman sa gi mi na a dé dati leki paiman, ma no wawan a mi, ma ooktoe na ala sma di ben lobi a sori di a ben kon sori ensrefi” (2 Tim. 4:6-8). Ini den wortoe disi de, dati Paulus ben ferwakti foe si dede heri esi. Sma e bribi dati den ben kiri Paulus na a ten foe na ferfolgoe ondro na tiri foe Nero foe 66 G.T. Sortoe prakseri ben kan psa ini Paulus ede di a ben tanapoe na fesi dede? Kande disi: Mi ben doe mi diniwroko boen? Mi ben tjari mi diniwroko kon na wan kaba di ben waka boen? Paulus nanga foeroe overtoigi ben kan taki dati a ben doe dati foe troe! En bribi ben de tranga sref’srefi èn a ben fertrow a tapoe data a ben sa kisi na prijs foe a kari a tapoe. Fa a ben moe abi wan satisfaksi dati a no ben meki no wan sani hari en poeroe foe en wroko di a ben kisi!
3. Sortoe boen Paulus ben kan doe gi Timóteüs bifo a ben dede?
3 Wan pikinso ten ben libi abra ete gi Paulus foe doe boen. Sortoe boen Paulus ben kan doe gi Timóteüs bifo a ben sa dede? Na ondro na krakti foe santa jeje a ben gi prenspari rai. Wi e lési en prakseri nanga wortoe ini n boekoe Toe Timóteüs. Disi de den laatste wortoe foe en anoe di de ini bijbel, di ben skrifi ooktoe foe na boen wi.
4. Paulus ben gi Timóteüs dek’ati foe doe san?
4 Timóteüs no ben klari en wroko ini na diniwroko ete, èn foe dat’ede Paulus ben skrifi: „Mi e komanderi joe plegtig na fesi foe Gado nanga Kristus Jezus, di sa kroetoe den libiwan nanga dedewan, èn di na krakti foe a sori di a sori ensrefi nanga en kownoekondre: préki a wortoe, hori joesrefi nanga en bezig leki wan tranga fanowdoe afersi, ini boen ten, ini moeilek ten, gi pir’ai, strafoe, fermane, nanga ala pasensi nanga koni foe leri sma. Bika wan pisiten sa kon dati den sma no sa man ferdrage den gesontoe leri, ma akroederi den égi lostoe sa tjari wan lo leriman kon makandra foe tigri den jesi, èn den sa drai den jesi foe na waarheid èn na presi foe dati drai go na tori di no de troe, ma na ini ala sani hori joe prakseri na wan, njan pina foe ogri, doe na wroko foe wan evangelium prékiman, doe joe wroko dorodoro.” — 2 Tim. 4:1-5.
5. Foe san-ede meki a rai foe Paulus de spesroetoe foe belang gi wi?
5 Na toemsi moi rai dati ben moe tjari foeroe boen gi Timóteüs, ma wi ooktoe kan njan boen foe en? Wi e libi na ini den „laatste dé” foe san Paulus e skrifi foe den. Foeroe sma ini a ten disi abi ’wan fasi foe gi densrefi na Gado, ma den e sori dati den no abi na krakti foe en’ (2 Tim. 3:1-5). Den sortoe foe sma disi wani arki wawan na „leriman” di sa tigri den jesi. Tokoe troe kristen, na sé a préki foe a wortoe na inisé a gemeente, abi ooktoe na plekti foe préki gi ala sma na ini publiki èn foe go soekoe na den sma di sa teki „na wortoe” na wan boen fasi. A wortoe disi te na a dé foe tide soboen de wan sani di fiti gi kristen kotoigi foe Jehovah.
Fa foe doe a diniwroko dorodoro
6. (a) Foe san-ede meki wi moe ’préki a wortoe’? (b) Sortoe boen a abi foe poti prakseri a tapoe na fasi fa wi e doe wi diniwroko?
6 A diniwroko abi ala sortoe pisi èn a bedinari abi foeroe foe doe. Na ini a fosi presi a moesoe ’préki a wortoe’, soleki Paulus e taki. Disi na a wortoe di Jehovah ben ferkisi foe tjari kon na krin gi en dienstknegti. A de a wortoe foe waarheid foe san Jezus ben e taki foe en. Jehovah e meki bekenti san tapoe wan bepaalde pisi ten de en boskopoe gi na libismafamiri, foe di ai meki en kotoigi dja na grontapoe tjari kon na krin en sé foe na stré-aksi. Jehovah e meki sma jere alaten wan warskow boskopoe bifo a opo doe wan sani (2 Kron. 36:15, 16; Jes. 42:9; 43:12; Jona 3:2-4). En boskopoe sa tjari boen kon gi den sma di e arki en; den kan feni veiligheid ofoe tanboen. Den sma di no e poti prakseri a tapoe, moesoe tjari den bakapisi te Jehovah opo doe wan sani èn tjari en kroetoe kon. Den moe tjari den égi frantwortoe (Tori. 20:20, 21, 26, 27). Tokoe wan bedinari foe Gado e doe boen foe tjari den wortoe di e kon now kon ini praktijk: „Poti alaten prakseri na joesrefi èn na joe leri. Tan na den sani disi, bika te joe e doe disi, dan joe sa jepi joesrefi èn den sma di e arki joe.” — 1 Tim. 4:16.
7. Foe san-ede meki a de wan tranga fanowdoe wroko, awinsi den omstandigheden e gersi leki den no boen?
7 Den omstandigheden na ondro san na prékiwroko e doe no de na ala presi a srefi, ma a wroko moe go doro. „Hori joesrefi nanga dati leki wan tranga fanowdoe afersi, ini boen ten ini moeilek ten”, Paulus ben skrifi. Na boskopoe kan wani taki libi gi sma. Na ini sortoe omstandigheid wan getrow bedinari de toe. tokoe e a e si na boskopoe leki wan tranga fanowdoe sani èn a e soekoe pasi foe meki sma jere a wortoe, aladi sma e gens a prékiwroko. Disi e kon na krin gi wi ini a eksempre foe Jezus èn na tori foe na bijbelboekoe Tori foe den Apostel.
8. (a) San wawan kan jepi na bedinari foe préki na wortoe? (b) Foe san-ede meki pirai kan de wan pisi foe na diniwroko?
8 Efoe wan bedinari wani foe tan préki a wortoe, efoe a de now inisé ofoe dorosé foe a gemeente, dan a moe sabi a wortoe foe Gado di a meki wan studie foe en. Na ini na moeiti foe en foe ferstan en boen, dan a moe poti ten gi studie, go denki abra den sani èn meditatie a wan sé. Na prékiwroko moe abi en roetoe a tapoe wan boen ferstan foe e leri foe a waarheid. Paulus e skrifi gi Titus taki ’na opziener moe hori stéfi na a getrow wortoe na ini a tori foe en koni foe leri sma, sodati a man foe fermane nanga na gesontoe leri èn foe piri-ai gi den sma di e taki tégen’ (Titus 1:9). A wortoe foe Gado e dini leki wan wrokosani foe piri-ai gi den sma di ben drifi komoto foe den marki foe Jehovah; a e poti na sma di psa wet na pasi foe en égi tanboen. Ala den sani disi de ini a tori foe doe a diniwroko dorodoro.
Fermane de fanowdoe
9. Foe san-ede meki kristen fermane de fanowdoe?
9 Sontron fermane de fanowdoe gi den sma di kande no e doe ala sani san den moe doe ofoe di e misi ini warderi nanga faja gi Jehovah anbegi. Sma di abi lobi gi Jehovah e warderi fermane di gi na kristen srefsrefi. Den e jere nanga ala prisiri san Jehovah e taki èn den e si en leki boen gesontoe jeje njanjan (Jes. 55:3; Hebr. 12:5, 6). Wi e bewijsi wi kompe-wrokoman èn ooktoe trawan di e firi foe anbegi Jehovah foe dat’ede wan boen dienst te wi e fermane den nanga jepi foe a Wortoe foe Gado. Paulus srefi ben gi foeroe fermane. — Rom. 15:30; 16:1; 1 Kor. 1:10, 11; 1 Tim. 4:13; 6:11, 12; Hebr. 10:24.
10. Foe san ede langa pasensi de fanowdoe na ini na gi foe fermane?
10 Wan bedinari di gi ensrefi abra moe sabi toe fa a moe kweki a froktoe foe a jeje foe Gado. Foe proberi foe fermane den sma di e draidrai foe handri, kan aksi foeroe pasensi nanga horidoro. Wantoe foe den ben sa kan sori srefi pikinso warderi gi den moeiti di e doe foe fermane den èn foe gi den dek’ati. Tokoe a moe doe, spesroetoe den kristen owroeman. Na koni foe leri sma e kon ooktoe ini a tori. O moro wan sma e gebroiki a Wortoe foe Jehovah o moro a e koni foe gebroiki en. Te wan leriman e leri sabi wan studenti, dan a moe man foe gi sabi abra na en. Paulus e gi na ini 1 Thessalonikasma 5:14 wan moi fasi foe na joisti methode: „Wi [e fermane] oenoe brada, pir’ai gi den sma di no e waka boen, taki foe gi dek’ati na den sili di broko saka, asisteri den swakiwan, abi pasensi nanga ala sma.”
Drai baka gi den sma di fa don komoto foe bribi
11. San moe de a fasi foe oenoe ini a tori foe sma di fadon komoto foe bribi?
11 Paulus ben wani dati Timóteüs ben sa kibri en balans, ofoe ini ala sani ben moe hori en ferstan a wan. A ben moe loekoe boen taki a no ben sa doe, soleki den sma di no ben ferdrage na gesontoe leri èn ben drai den jesi poeroe foe na waarheid. Na troe bedinari foe Gado ini a ten disi no e broko en ede psa marki èn meki ongorostoefasi basi en na ini en wroko te ai si dati son sma e drai baka gi na Wortoe foe Gado, èn na gesontoe leri, di de na ini. Wi kisi a fesi warskow kaba dati sma ben sa de di ben o fadon komoto na bribi nanga sma di wani soso nomo foe den tigri den jesi. Na rai di skrifi na ini 2 Johannes 9-11, 1 Korintesma 5:11-13 nanga 2 Timoteüs 3:5 no e opo pasi gi na abi foe demakandra nanga sma di drai baka gi na waarheid. Ooktoe wi no e bai ofoe lési san den skrifi. Foeroe trawan de di nanga ala prisiri wani jere na waarheid èn leki kristensma wi e abi demakandra nanga den sma dati. — 1 Tim. 6:20, 21.
12. Foe san-ede wan kristen bedinari e teki na faste bosroiti disi?
12 Paulus ben taki: „Goddelowsoesma nanga bedrigiman sa kon moro ogri, aladi den kori sma èn den e kori densrefi toe” (2 Tim. 3:13). Na ini na leti foe na warskow dati na fesi meki na kristen bedinari no e broko en ede kwetkweti nanga den sortoe sma dati. A e poti prakseri tapoe na boen rai foe na apostel: „Ma joe moe tan na ini den sani di joe ben leri èn di nanga overtoigi joe ben go bribi den, ini na sabi foe soema joe ben leri den èn dati foe pikinnengre ten joe ben sabi den santa Boekoe, di kan meki joe kon koni foe kisi koni nanga jepi foe na bribi di de ini a tori foe Kristus Jezus. Gado ben skrifi den Santa Boekoe nanga en jeje èn den de boen foe leri sma, pir’ai gi sma, poti sani reti foe gi trangaleri ini regtvaardikifasi sodati na sma foe Gado kan de bekwaam dorodoro, de srekasreka foe doe ibri boen wroko.” (2 Tim. 3:14-17). Geregelde studie foe a Wortoe foe Gado de wan blesi gi den sma di e feti foe doe den diniwroko.
Blesi di e kon foe demakandra nanga tra kristen
13. Fa a ben tjari winimarki gi Timóteüs dati a ben wrokomakandra nanga Paulus na ini na diniwroko èn fa a kan tjari winimarki gi wi?
13 A ben de wan troetroe blesi gi Timóteüs dati a ben kan waka nanga Paulus jari langa èn nanga dati ben kan loekoe fa wan getrow, lepi bedinari foe Gado e tjari ensrefi. Paulus ben gebroiki den ondrofeni foe den leki wan boen memre gi Timóteüs: „Joe ben waka soifri na mi baka ini leri, ini mi libi nanga waka, mi prakseri, mi bribi, mi langa pasensi, mi lobi, mi horidoro, mi ferfolgoe, mi pina, na sortoe foe sani di ben kon mi abra na ini Antiochië, ini Ikónium, na sortoe foe ferfolgoe di mi ben psa; ma tokoe Masra ben fri mi komoto foe ala. Foe taki leti alasma di wani gi ensrefi na Gado na ini wánfasi nanga Kristus Jezus sa kisi ferfolgoe” (2 Tim. 3:10-12. Aladi na ini a ten disi wi no abi wan langalanga kontakt nanga Paulus, tokoe na tori, di skrifi ini bijbel foe a fasi fa a ben wroko kan jepi wi ooktoe.
14. Foe san-ede meki wi moesoe sreka foe njan pina?
14 Paulus no ben ferteri wawan, dati ensrefi ben ondrofeni ferfolgoe nanga pina, ma ben gi ibri kristen bedinari ooktoe na rai foe de klari foe njan pina (2 Tim. 4:5). Nofotron na wan noso tra vorm foe ferfolgoe de wan sani di wi no kan komoto na en pasi te wi e doe wi diniwroko dorodoro. A de wan grani foe tan hori na wi soifri reti fasi na ondro tesi èn meki Jehovah abi prisiri (Odo 27:11). Wan kotoigi di de leki wan leki wan prijse foe Jehovah kan de leki wan bakapisi foe dati!
Na wroko foe wan evangeliumprékiman
15. Foe san-ede meki wi moe abi wan prati na wi prékiwroko foe doe wi diniwroko dorodoro?
15 Na préki foe na evangelium e teki wan boen pisi foe na ten foe na getrow kristen bedinari. Jezus ben taki: „Na boen njoensoe moe préki ooktoe fosi ini ala naatsi” (Mar. 13:10). A ben sori krin dati na kaba sa kon pas te na boen njoensoe ben préki nofo. Paulus ben abi na grani foe meki na boen njoensoe bekenti na foeroe libisma ini na heri kownoekondre foe Rome. Disi ben abi leki bakapisi dati njoen gemeente ben opo èn dati owroeman ben poti foe wroko. Den dati foe den sé ben teki prati foe na evangeliumwroko makandra nanga den kristen brada nanga sisa èn nanga dati na prékiwroko ben panja go na alasé. Foeroe foe na wroko e doe soleki Paulus e skrifi, foe di wi e „leri sma na ini publiki èn oso na oso” (Tori. 20:20). Na ini a ten dati boen bakapisi ben kon èn ooktoe ini a ten disi now di na kristen prékiwroko e doe abra na heri grontapoe san e tjari toemsi moi bakapisi kon. — Joh 14:12.
16. San e sori dati foeroe sma e gebroiki a rai foe Paulus ini 2 Timóteüs 4:5?
16 Foeroe sma e graboe nanga foeroe bribi den okasi foe meki na activiteit foe den ini na evangeliumwroko kon moro bigi. Doesoendoesoen foe den ben go na ini na zendingsveld èn hondro doesoendoesoen foe den abi wan prati na a wan ofoe tra vorm foe pionierwroko na ini 205 kondre joe abi moro leki 2.650.000 sma di ini moro leki 46.000 gemeente e doe dienst leki evangeliumprékiman èn a nomroe foe den e tan gro. Den wondroe sani disi de a bewijsi dati Jehovah dienstknegti di gi densrefi abra e doe nanga den heri ati na a komando di Gado ben gi den èn e doe a diniwroko foe den dorodoro.
Doe a wroko
17. San Jehovah wani si en dienstknegti doe sote na ini na tori foe a wroko di den kisi foe doe ini a ten disi?
17 Jehovah ben poti den salfoewan foe en na ini wan diniwroko èn na „bigi ipi” e wroko sé na sé nanga den makandra. Na ini Ezechiël kapitel 9 na profétifasi a wroko ben teki gersi nanga a poti foe wan marki na na fes’ede foe den sma di e soktoe èn geme. Na ini na profétitori dati wi sabi dati na ten sa kon dati na man nanga na skrifiman enkipen sa taki: „Mi ben doe joisti soleki joe ben komanderi mi”. Jehovah lobi en dienstknegti te den e doe den wroko a so wan fasi leki fa a ben komanderi den. — Ezechl. 9:4, 11; Gen. 6:22; 1 Kor. 4:2.
18, 19. San de wantoe fasi fa wi kan gebroiki den fermane foe Paulus ini 2 Timóteüs 4:1-5?
18 Te wi e si fa den toestand na ini na grontapoe e ontwikkel densrefi precies leki ini den profétitori di ben go foe den laatste dé, dan na firi no e loesoe wi, dati na prékiwroko di wi ben kisi de wan toemsi tranga fanowdoe wan. Libismalibi de ini a tori. Na tjari kon makandra e feni presi èn a de ooktoe na ten dati Jehovah e meki a psa es’esi (Jes. 60:22). Sortoe frantwortoe wi mag abi ooktoe leki wan dienstknegti foe Jehovah di gi ensrefi abra, meki wi gi en foe kan plisi en dorodoro (Kol. 1:10; 3:23, 24). Meki wi hori wi prakseri tapoe na wroko di wi ben kisi èn proberi foe doe en dorodoro. Efoe a de wroko ini a kownoekondrezaal, doe en dan finifini. Efoe a e go foe na jepi foe den activiteit foe wan gdmeente boekoestudiegroepoe, wroko krosbé nanga den makandra èn gi makandra dek’ati. Sorgoe leki pionier noso zendeling foe wroko tranga foe doro den kwotum foe na dienst dati. — Rom. 12:6-9.
19 Meki wi aksi wisrefi ooktoe: Mi kan doe moro ete foe gi jepi na tra kristensma, spesroetoe na den njoen wan na ini na gemeente, sodati mi kan bow den? Te a de wan pisi foe wi diniwroko foe de wan owroeman ini na gemeente, sabi dan fa den „pikin meti” tan èn sorgoe boen gi alamala di de wan pisi foe na gemeente. Poti prakseri na den, sodati no wan foe den kon de inactief ofoe no e meki froktoe ini a tori foe soifri sabi foe Masra Jezus Kristus (2 Petr. 1:5-8). Meki wi de moro foeroe nanga krin ai tapoe a pisi foe wi ini na evangeliumwroko, sodati wi e „doe wi diniwroko dorodoro”.
Joe e memre disi ete?
◻ Na ini sortoe situwasi Paulus ben de di a ben skrifi 2 Timóteüs?
◻ Foe san-ede meki a de toemsi prenspari foe préki a wortoe?
◻ Foe san-ede meki fermane de prenspari?
◻ Fa wi moe handri nanga falsi leriman?
◻ Foe san-ede meki na evangeliumprékiwroko de so prenspari na ini wi ten?
[Prenki na tapoe bladzijde 18]
Na di foe toe brifi foe Paulus gi Timóteüs ben jepi en foe doe en diniwroko