Na sortoe tafra joe e njan?
„Oenoe no kan teki prati na a ’tafra foe Jehovah’ nanga na a tafra foe den ogri jeje.” — 1 KORENTESMA 10:21.
1. Osortoe tafra de na fesi wi èn sortoe warskow na apostel Paulus e gi wi foe den tafra dati?
DEN santa wortoe disi foe na apostel Paulus, e sori taki a libisma famiri abi toe agersi tafra na fesi den. Sma kan sabi na sortoe tafra den de, foe a simbôlis njanjan di de na tapoe den tafra, èn ibriwan foe wi e njan foe a wán noso a trawan. Ma, efoe wi wani foe plisi Gado, dan wi no kan njan na a tafra foe en èn na a srefi momenti, wi e go beti-beti ibritron foe a njanjan na a tafra foe den ogri jeje. Na apostel Paulus ben warskow: „Den sani di den nâsi e tjari leki slakti-ofrandi, den e ofrandi gi den ogri jeje, èn no gi Gado; èn mi no wani taki oenoe moesoe de sma di e teki prati nanga den ogri jeje. Oenoe no kan dringi a beker foe Jehovah nanga a beker foe den ogri jeje; oenoe no kan teki prati na a ’tafra foe Jehovah’ nanga na a tafra foe den ogri jeje.” — 1 Korentesma 10:20, 21.
2. (a) Osortoe tafra foe Jehovah ben de ini a ten foe a fositen Israèl èn soema ben teki prati na den makandra ofrandi di den ben ofrandi? (b) San a wani taki foe teki prati na a tafra foe Jehovah ini a ten disi?
2 Den wortoe foe Paulus e memre wi foe den makandra ofrandi di den fositen Israèlsma ben ofrandi, na ondro a Wet foe Jehovah. Den ben kari na altari foe Gado wan tafra, èn den ben taki foe a sma di ben tjari a meti leki ofrandi, dati a ben abi demakandra nanga Jehovah èn nanga den priester. Fa so? Di foe wan, Jehovah ben teki prati na a ofrandi, foe di a broedoe ben fadon na tapoe en altari èn a faja ondrosei ben bron a fatoe foe a meti. Di foe toe, a priester ben teki prati, foe di en (nanga a famiri foe en) ben njan a borsoe nanga a letisei bowtoe di ben losi, foe a meti di ben tjari leki ofrandi. Èn di foe dri, a sma di ben tjari na ofrandi, ben teki prati, foe di a ben njan san ben tan abra (Lefitikus 7:11-36). Ini a ten disi, a teki di wi e teki prati na a tafra foe Jehovah, wani taki dati wi e gi en a sortoe anbegi di a wani foe wi, so leki fa Jesus nanga den apostel foe en, ben gi wi na eksempre. Foe doe disi, wi moesoe njan na jeje fasi foe den sani di Jehovah e gi wi nanga jepi foe en Wortoe nanga en organisâsi. Den ben tapoe den Israèlsma di ben njanboen foe wan spesroetoe demakandra nanga Jehovah na en tafra, foe tjari ofrandi gi ogri jeje na den tafra foe den. Israèlsma na jeje fasi, nanga den „tra skapoe” kompe foe den, de na ondro a srefi verbod disi, di e kon foe Gado. — Johanes 10:16.
3. Fa wan sma kan abi fowtoe te a e teki prati na a tafra foe den ogri jeje ini a ten foe wi?
3 Fa wan sma kan abi fowtoe foe teki prati na a tafra foe den ogri jeje ini a ten foe wi? Foe di a e gi deki-ati na ala sani di de teige Jehovah. A tafra foe den ogri jeje abi toe, ala ogri jeje propaganda, di meki foe kori wi èn foe meki wi drai wi baka gi Jehovah. Soema ben sa wani taki en ati nanga en prakseri njan den sortoe wisi njanjan disi? Troe Kresten e weigri foe abi wan prati na den ofrandi di foeroe sma e tjari gi den gado foe orlokoe nanga den gado foe goedoe ini a ten disi. — Mateus 6:24.
Wai pasi gi „a tafra foe den ogri jeje”
4. Osortoe aksi de gi wi alamala now èn foe san ede wi no ben sa wani foe teki prati na a tafra foe den ogri jeje, ala di wi sabi heri boen san wi e doe?
4 Na aksi gi wi alamala de now: Foe sortoe tafra mi e njan? Wi no man lon gi a troe tori, taki wi de froeplekti foe njan foe a wán tafra noso foe a trawan. (Teki gersi Mateus 12:30.) Wi no ben sa wani foe teki prati na a tafra foe den ogri jeje, ala di wi sabi heri boen san wi e doe. Efoe wi e doe dati, dan dati sa meki wi lasi a boen di wi kan feni na a wan-enkri troe èn libi Gado, Jehovah. Na a tra sei, teki njanjan na a tafra foe Jehovah wawan, e tjari wi go na a têgo libi na ini kolokoe! (Johanes 17:3) Sma e taki, dati san wan sma e njan, na dati a de. Foe dati ede, ibriwan sma di wani foe tan gosontoe na skin fasi èn na froestan sei, moesoe foe loekoe boen sortoe sani a e njan. Neleki fa njanjan di lai fatoe, ma di no abi waarde èn di meki nanga chemis spesrei so taki a e tesi switi, no e jepi wi foe tan gosontoe na skin fasi; na so a propaganda foe a grontapoe disi, di abi switi idea foe den ogri jeje, na wan takroe simbôlis njanjan di no abi waarde èn di sa pori wi denki.
5. Fa wi kan wai pasi gi a teki di wi kan teki den leri foe den ogri jeje ini a ten disi?
5 Na apostel Paulus ben skrifi na fesi, taki na ini a ten foe den lasti dei, sma ben sa kisi fowtoe tiri nanga jepi foe „den leri foe den ogri jeje” (1 Timoteus 4:1). Den leri foe den ogri jeje no de foe feni ini a bribi foe falsi relisi wawan, ma den e meki den bekenti na ala sei tapoe foeroe tra fasi toe. Foe eksempre, wi moesoe foe ondrosoekoe èn wegi-go-wegi-kon sortoe boekoe nanga tijdschrift wi nanga den pikin foe wi, e leisi, sortoe telefisi programa wi e loekoe, èn sortoe wega nanga kino wi e loekoe (Odo 14:15). Efoe wi e leisi leki ontspanning, boekoe di no abi troe tori, dan den abi na ini den toe, ogridoe di no de fanowdoe, seks di no mag, noso sani di abi foe doe nanga obia? Efoe wi e leisi sabidensi boekoe foe wi kan kisi leri, den e tjari wan filosofia noso wan fasi foe libi, di „no de ini akroederi nanga Krestes”, kon na krin dan? (Kolosesma 2:8) Den e gi leigi prakseri, noso den e hori baka gi a denki foe teki prati ini sociaal organisâsi foe grontapoe? A e hori baka gi a fasti bosroiti foe kon goedoe srefisrefi? (1 Timoteus 6:9) A de wan poeblikâsi di e gi leri, di, na wan kibrifasi, e tjari prati kon èn di no de ini akroederi nanga kresten bribi? Efoe a piki de ija èn wi e go doro foe leisi noso loekoe den bodoi disi, dan wi de ini kefar foe njan na a tafra foe den ogri jeje. Ini a ten disi, hondrohondro doesoen poeblikâsi de di e hori baka gi den filosofia foe grontapoe, èn di gersi leki den e gi leri na sma èn foeroe sma e feni den boen (Preikiman 12:12). Ma no wan foe a propaganda disi de troetroe njoen; èn a no e meki wan sma kisi wini foe en èn meki a sma kon moro boen, na a srefi fasi fa den sani di Satan ben taigi Eva na wan trikifasi, no ben meki taki Eva ben kon moro boen foe dati. — 2 Korentesma 11:3.
6. Te Satan e gi wi wan kari foe tesi na ogri jeje njanjan foe en di no abi waarde, fa wi moesoe handri dan?
6 Foe dati ede, te Satan e gi wi wan kari foe tesi na ogri jeje njanjan foe en di no abi waarde, fa wi moesoe handri dan? Na a srefi fasi fa Jesus ben handri di Satan ben tesi en foe meki den ston tron brede. Jesus ben piki: „A skrifi: ’Sma no moesoe libi foe brede wawan, ma foe ibri wortoe di komoto na a mofo foe Jehovah.’” Di Didibri ben taigi Jesus taki a ben o gi en „ala den kownoekondre foe grontapoe nanga a glori foe den” efoe Jesus ben sa fadon èn doe wan sani foe anbegi Satan, dan Jesus ben piki: „Komoto na mi fesi, Satan! Bikasi boekoe e taki: ’Joe moesoe anbegi Jehovah, joe Gado, èn gi en wawan joe moesoe doe santa diniwroko.’” — Mateus 4:3, 4, 8-10.
7. Foe san ede wi e kori wisrefi, te wi e denki taki wi kan njan nanga boen bakapisi na a tafra foe Jehovah nanga na a tafra foe den ogri jeje?
7 A tafra foe Jehovah nanga a tafra di den ogri jeje feanti foe en poti, noiti kan kroederi nanga makandra! Oh, ija, sma ben proeberi dati kaba. Memre den fositen Israèlsma ini den dei foe a profeiti Elia. A pipel ben froeklari taki den ben anbegi Jehovah, ma den ben bribi taki tra gado, so leki Ba-al, ben pramisi boen ten. Elia ben kon na a pipel èn a ben taki: „Olanga oenoe sa tingatinga na tapoe toe difrenti prakseri? Efoe Jehovah de a troe Gado, go waka na en baka; ma efoe a de Ba-al, dan go waka na en baka.” Tweifri no de, taki den Israèlsma ben e tingatinga, „fosi na tapoe a wan foetoe dan tapoe a trawan” (1 Kownoe 18:21; The Jerusalem Bible). Elia ben tjalensi den priester foe Ba-al foe boeweisi taki a gado foe den na wan troetroe gado. A Gado di ben sa man tjari faja kon foe hemel na tapoe wan slakti-ofrandi, ben sa boeweisi taki na en na a troe Gado. Ala di den ben doe foeroe moeiti, tokoe den priester foe Ba-al ben misi foe doe dati. Dan Elia ben begi nomo: „O Jehovah, piki mi, so taki a pipel disi kan sabi taki joe, Jehovah, na a troe Gado.” Wantewante faja foe Jehovah ben soetoe kon foe hemel èn ben bron a meti slakti-ofrandi di ben nati pete-pete. Na overtoigi demonstrâsi disi, taki Jehovah de wan troetroe gado, ben wiki a pipel, èn ben meki taki a pipel ben gi jesi na Elia èn ben kiri ala den 450 profeiti foe Ba-al (1 Kownoe 18:24-40). So boen, ini a ten disi, wi moesoe erken Jehovah leki a troe Gado èn wi moesoe teki a fasti bosroiti foe drai go njan na a tafra foe en wawan, efoe wi no ben doe dati kaba.
’A getrow srafoe’ e poti njanjan nanga dringi tapoe a tafra foe Jehovah
8. Sortoe srafoe Jesus ben taki na fesi, taki a ben sa gebroiki foe gi den disipel foe en jeje njanjan ini a ten foe en denoja, èn fa sma kan sabi soema na a srafoe?
8 Masra Jesus Krestes ben taki na fesi, taki ini a ten foe en denoja wan „getrow nanga koni srafoe” ben sa sorgoe gi jeje njanjan gi den disipel foe en: „Kolokoe a srafoe dati de, te en masra sa kon èn miti en e doe so. Foe troe mi e taigi oenoe, A sa poti en foe loekoe ala den goedoe foe en” (Mateus 24:45-47). A srafoe disi ben sori kaba, taki a no de wán enkri sma nomo, ma a de a groepoe foe salfoe kresten, di gi densrefi abra. A groepoe disi poti a moro switi jeje njanjan kaba na tapoe a tafra foe Jehovah gi a salfoe fikapisi nanga gi a „bigi ipi”. Now, di den de nanga moro leki fo miljoen sma, a bigi ipi teki a fasti bosroiti makandra nanga a salfoe fikapisi, foe tanapoe baka na universeel soevereiniteit foe Jehovah Gado èn foe tanapoe baka en Kownoekondre, di sa jepi foe santa a santa nen foe Jehovah. — Openbaring 7:9-17.
9. Osortoe wrokosani a srafoe groepoe ben gebroiki foe gi jeje njanjan na Jehovah Kotoigi èn fa a jeje fesa foe den ben skrifi na fesi ini profeititori?
9 A getrow srafoe-groepoe disi gebroiki a Watch Tower Bible and Tract Society foe gi njanjan na jejefasi na ala den Kotoigi foe Jehovah. Ala di krestenhèit nanga a tra pisi foe a seti foe sani disi, e dede foe angri, foe di den e misi a jeje njanjan di e gi libi, tokoe a pipel foe Jehovah e njan prisiri (Amos 8:11). Disi na a kontroe foe a profeititori na Jesaja 25:6: „Jehovah foe den legre seiker sa poti gi ala pipel, na a bergi disi, wan fesa tafra nanga njanjan di lai nanga oli, wan fesa tafra foe win di kon krin tapoe a sakasaka foe en, foe njanjan di lai nanga oli nanga fatoe ini bonjo, foe win di kibri tapoe a sakasaka foe en, di kon krin.” So leki fa vers 7 nanga 8 e sori, a fesa disi sa go doro foe têgo. Fa a de now kaba wan blèsi gi alamala ini Jehovah organisâsi di sma man si, èn fa a sa tan de wan blèsi ini a ten di e kon!
Loekoe boen gi a njanjan di wisi tapoe a tafra foe den ogri jeje
10. (a) Osortoe njanjan e kon foe a takroe srafoe groepoe èn san e troesoe den? (b) Fa a takroe srafoe groepoe e handri nanga den fosi kompe srafoe foe den?
10 Njanjan di de na tapoe a tafra foe den ogri jeje, abi wisi. Loekoe, foe eksempre, a njanjan di e kon foe a takroe srafoe groepoe nanga denwan di fadon komoto na bribi. A no e gi njanjan di e bow sma; a no gosontoe. A no kan de so, foe di denwan, di fadon komoto na bribi, ben tapoe nanga a njan di den ben njan na a tafra foe Jehovah. Leki wan bakapisi foe dati, ala san den ben kweki foe a njoen sma di den ben kon de, gowe foe den. San e troesoe den, a no santa jeje, ma den sani di den e taki, na sani di e hati sma. Den no man loesoe a wán firi — foe e naki den fosi kompe srafoe foe den, so leki fa Jesus ben taki dati na fesi. — Mateus 24:48, 49.
11. San C. T. Russell ben skrifi foe a teki di wan sma kan teki osortoe jeje njanjan a sma e froekisi èn fa a ben skrifi foe denwan di e gowe libi a tafra foe Jehovah?
11 Foe eksempre, langa ten pasa, ini a jari 1909, a presidenti foe a Waktitoren Genootschap ini a pisi ten dati, C. T. Russell, ben skrifi foe denwan di drai den baka gi a tafra foe Jehovah èn baka dati ben bigin foe no handri boen nanga den fosi kompe srafoe foe den. A Waktitoren foe 1 oktober 1909 (Ingrisitongo), ben taki: „Ala sma di e gowe libi a Genootschap nanga a wroko foe a Genootschap, na presi foe densrefi go na fesi èn na presi foe den bow trawan ini a bribi èn ini a kweki di sma kan kweki den froktoe foe a jeje, a gersi taki den e doe a kontrari foe dati — den e proeberi foe foefoeroe a Mekiman di den ben dini fosi èn na wan spesroetoe poebliki fasi den e soengoe gowe safrisafri na ini a froegiti di sma e froegiti den, ala di na soso ogri den e doe densrefi nanga trawan di abi a srefi sortoe jeje foe meki trobi. . . . Efoe son sma e denki taki den kan kisi a srefi boen noso moro betre njanjan na tra tafra, noso taki densrefi kan meki a srefi boen njanjan noso moro betre wan — dan meki denwan disi doe san den firi foe doe. . . . Ma, ala di wi e meki trawan go pe den wani foe feni njanjan èn feni leti di e gi den satisfaksi, tokoe a de wan toemoesi froewondroe sani dati denwan di e kon de gensman foe wi, e teki wan heri tra fasi foe waka nanga libi. Na presi foe taki leki fa wan man foe grontapoe e taki: ’Mi feni wan sani di mi lobi moro; adjosi!’, den disi e sori atibron, trobi, den e mandi nanga sma, den no wani si sma na ai, ’wroko na skinfasi èn wroko foe didibri’, na wan fasi di noiti wi si srefi na grontapoe sma. A gersi leki donfasi stampoe go na ini den ede, wan siki foe Satan leki a siki di e meki sma nanga meti law, bifo den e dede gowe. Sonwan foe den e naki wi èn baka dati den e froeklari taki na wi ben naki den. Den de klariklari foe taki èn skrifi lagi leitori èn lagi densrefi foe doe takroe sani.”
12. (a) Fa denwan di fadon komoto na bribi, e naki den kompe srafoe foe den? (b) Foe san ede a de wan kefarlek sani foe wani sabi sani nomonomo, so taki wi e go njan foe den sani di denwan di fadon komoto na bribi, e skrifi?
12 Ija, denwan di fadon komoto na bribi, e tjari poeblikâsi kon na doro, di e tjari sma go taki sani na wan heri tra fasi, e taki afoe lei nanga afoe troe, èn e taki troetroe leitori. Den e meki leki den na stonfoetoe foe den kongres foe Kotoigi, e proeberi foe fanga denwan di no e loekoe boen. Foe dati ede, a ben sa de wan kefarlek sani foe meki a wani di wi wani foe sabi sani nomonomo, troesoe wi foe njan foe den sortoe skrifi disi, noso foe arki a grofoe kosikosi foe den! Ala di kande wi no e si en leki wan sani di de kefarlek gi wisrefi, a kefar e tan. Foe san ede? A fosi sani de, taki son foe den poeblikâsi foe denwan di fadon komoto na bribi, e pristeri „grati taki” nanga „falsi wortoe” (Romesma 16:17, 18; 2 Petrus 2:3). A no disi joe ben sa froewakti foe a tafra foe den ogri jeje? Ala di denwan di fadon komoto na bribi, kan pristeri son troe tori toe, tokoe foeroe foe den poeroe den tori komoto foe a kontekst, nanga a marki foe hari trawan poeroe foe a tafra foe Jehovah. Ala san den skrifi na soso foe kroetoe sani èn foe taki takroe sani! No wan sani foe den e bow sma.
13, 14. San na den froktoe foe denwan di fadon komoto na bribi nanga a propaganda foe den?
13 Jesus ben taki: „Na den froktoe joe sa kon sabi den” (Mateus 7:16). We, san na den froktoe foe denwan di fadon komoto na bribi nanga den poeblikâsi foe den? Fo sani e marki a propaganda foe den. (1) Den ede srapoe foe teki sani, ma a koni no beri go dipi èn a no gosontoe. Efeisesma 4:14 e taki dati den „koni foe kori sma”. (2) Heimemre koni. (3) A mankeri di den e mankeri lobi. (4) Difrenti fasi foe oneerlijkfasi. Disi na den prenspari sani di de ini a njanjan di de tapoe a tafra foe den ogri jeje, di meki foe swaki a bribi foe Jehovah pipel.
14 Dan wan tra sani de ete. Na san denwan di fadon komoto na bribi, drai go baka? Ini foeroe kefal, den go baka ini a doengroe foe krestenhèit nanga den leri foe den, so leki a bribi taki ala kresten e go na hemel. Boiti dati, foeroe foe den no e teki moro langa wan fasti bosroiti di abi en gron tapoe bijbel, ini den tori foe broedoe, neutraliteit, èn a fanowdoe foe kotoigi foe Gado Kownoekondre. Ma, wi ben lowe komoto na a doengroe foe Babilon a Bigiwan èn noiti wi wani foe drai go baka drape (Openbaring 18:2, 4). Foe san ede wi, leki loyaal foetoeboi foe Jehovah, sa wani foe iti wan ai go tapoe a propaganda foe denwan di e weigri foe njan na a tafra foe Jehovah èn di e teki wortoe foe naki denwan di e jepi wi foe teki „gosontoe wortoe” ini wi? — 2 Timoteus 1:13.
15. Osortoe bijbel gronprakseri e jepi wi foe waka nanga koni, te wi e jere den kragi foe denwan di fadon komoto na bribi?
15 A kan, taki son wan wani sabi nomonomo foe den kragi foe denwan di fadon komoto na bribi. Ma, wi moesoe hori a gronprakseri di skrifi na Deuteronomium 12:30, 31, na ati. Djaso, nanga jepi foe Moses, Jehovah ben warskow den Israèlsma gi den sani di den ben moesoe foe wai pasi gi, te den ben teki a Pramisi Kondre abra foe den heiden sma. „Hori na prakseri, taki oenoe no meki den kori oenoe, so taki oenoe go waka baka den, baka di den kisi pori na oen fesi èn taki oenoe no e go aksi foe den gado foe den, foe taki: ’Fa den nâsi disi ben dini den gado foe den? Èn mi, ija, mi sa doe dati na a srefi fasi.’ Oenoe no moesoe doe na a fasi dati nanga Jehovah oen Gado.” Ija, Jehovah Gado sabi fa a wani di libisma wani sabi sani, e wroko. Memre Eva, nanga a wefi foe Lot toe! (Lukas 17:32; 1 Timoteus 2:14) Noiti wi moesoe arki den sani di denwan di fadon komoto na bribi e taki, noso san den e doe. Na presi foe dati, meki wi tan bow sma èn meki wi tan njan loyaal na a tafra foe Jehovah!
Na soso a tafra foe Jehovah sa tan
16. (a) San sa pasa heri esi nanga Satan, den ogri jeje foe en, èn a simbôlis tafra pe den nâsi foe a grontapoe disi njan kaba? (b) San sa pasa nanga ala libisma di e go doro foe njan na a tafra foe den ogri jeje?
16 Heri esi, dan a bigi banawtoe sa broko kon wantronso, e boeweigi ensrefi esi-esi go na a heimarki foe „na orlokoe foe a bigi dei foe Gado na Almaktiwan” (Openbaring 16:14, 16). A sa doro wan heimarki te Jehovah e tjari pori kon, gi a seti foe sani disi èn a simbôlis tafra pe den nâsi foe a grontapoe disi ben njan kaba. Jehovah sa wai poeroe a heri organisâsi di sma no man si foe Satan Didibri makandra nanga den legre foe ogri jeje. Denwan di ben go doro foe njan na a jeje tafra foe Satan, a tafra foe den ogri jeje, sa moesoe foe go na wan tafra di abi troetroe njanjan, a no foe di den sa teki prati, ma foe di densrefi sa de a prenspari njanjan — gi a pori foe den! — Loekoe Esekièl 39:4; Openbaring 19:17, 18.
17. Osortoe blèsi e kon gi denwan di e njan soso na a tafra foe Jehovah?
17 Na soso a tafra foe Jehovah sa tan. Denwan di e njan na a tafra disi nanga warderi, sa kisi kibri èn den sa abi a grani foe njan drape foe têgo. Noiti moro den sa de ini kefar foe no abi nofo njanjan (Psalm 67:6; 72:16). Nanga wan volmaakti gosontoe den sa dini Jehovah na ini Paradijs! Te foe kaba, dan den wortoe foe Openbaring 21:4 di e gi sma deki-ati, sa abi wan toemoesi moi kontroe: „A sa figi poeroe ala watra na den ai, èn dede no sa de moro, no wan krei, no wan babari, no wan pen no sa de moro. Den fosi sani ben pasa gowe.” Foe di no wan gensman no sa de moro, meki den sa teki na universeel soevereiniteit foe Jehovah Gado na ala presi foe têgo, te santa blèsi e fadon gi a libisma famiri di kisi froeloesoe èn di sa libi na ini a Paradijs na grontapoe. Foe kisi a pai disi, meki wi alamala abi a fasti bosroiti foe teki prati soso na a tafra foe Jehovah, di lai nanga den moro boen jeje njanjan.
Fa joe ben sa piki?
◻ Fa wi kan wai pasi gi a kori di den leri foe den ogri jeje kan kori wi?
◻ Foe san ede wi no kan njan nanga boen bakapisi na a tafra foe Jehovah nanga na a tafra foe den ogri jeje?
◻ Osortoe njanjan denwan di fadon komoto na bribi e prati?
◻ Foe san ede a de wan kefarlek sani foe wani sabi nomonomo den kragi di e kon foe denwan di fadon komoto na bribi?
◻ San na den froktoe foe denwan di fadon komoto na bribi?
[Prenki na tapoe bladzijde 8]
A tafra foe Jehovah lai nanga den moro boen jeje njanjan