De ini wánfasi nanga makandra ini a volmaakti banti foe lobi

„Tai kon de wán nanga makandra ini lobi.” — KOLOSESMA 2:2.

1, 2. Sortoe krakti di e tjari pratifasi kon, wi e ondrofeni spesroetoe ini a ten disi?

ARKI! Wan tranga sten de foe jere na hemel èn a e taki: „Heloe foe grontapoe èn foe a se, bika Didibri saka kon na oenoe, èn a abi bigi atibron, foe di a sabi taki a abi wan sjatoe pisi ten” (Openbaring 12:12). Ibri jari di e pasa, moro nanga moro a boskopoe dati e kon tron wan sani di e frede sma di e libi na grontapoe.

² Langa ten sma ben sabi a bigi feanti foe Jehovah leki wan gensman (Satan) nanga wan ogri-ati leiman (Didibri). Ma now a sma disi di e kori sma, teki wan tra ogri-ati ròl — a kon tron wan gado di de nanga atibron! Foe san ede? Foe di Mikaèl nanga den engel foe en ben trowe en komoto na hemel ini na orlokoe di ben bigin na hemel ini 1914 (Openbaring 12:7-9). Didibri sabi taki a abi wan sjatoe pisi ten nomo foe boeweisi a tjalensi foe en, taki a kan meki ala libisma drai den baka gi Gado foe no anbegi En (Job 1:11; 2:4, 5). Foe di en nanga den ogri jeje foe en no man go na no wan presi foe kisi kibri, meki den de neleki wan ipi onifrei di e atibron èn di e saka a faja atibron foe den na tapoe den ipi-ipi foe a libisma famiri di e broeja. — Jesaja 57:20.

3. San na a bakapisi foe a lagi di den lagi Satan ini a ten foe wi?

³ Den sani disi di e pasa sondro foe libisma ai man si den, e tjari kon na krin foe san ede na ala sei a libi di libisma moesoe libi akroederi boen gwenti nanga wet, e go na baka now. Den e tjari kon na krin toe, a proeberi di libisma esi-esi e proeberi foe meki den nâsi kon na wán na wan broejafasi. Den nâsi disi prati na pisipisi, èn den no man libi ini wánfasi nanga makandra kwetikweti. Lo nanga groepoe foe difrenti ras e go feti nanga makandra na wan ogri-atifasi, èn den e meki taki miljoenmiljoen sma e tron sma di lasi den tanpresi èn di moesoe gowe foe a presi pe den e libi. A no de foe froewondroe, taki moro leki iniwan ten na fesi, ogridoe e kon moro nanga moro! Leki fa Jesus ben froeteri na fesi, dan ’a lobi foe a moro bigi pisi foe a libisma famiri e kon kowroe’. Na ala sei pe joe e loekoe, joe e si taki a de di sma no de na ini wánfasi nanga makandra èn a de di den de sondro lobi, na wan eigifasi foe a broeja libisma famiri ini a ten disi. — Mateus 24:12.

4. Foe san ede a pipel foe Gado de ini spesroetoe kefar?

⁴ Nanga a grontapoe situwâsi na prakseri, a begi foe Jesus gi den bakaman foe en e kon de moro prenspari: „Mi e aksi joe, foe no teki den poeroe foe grontapoe, ma foe loekoe den foe na ogriwan ede. Den no de wan pisi foe grontapoe, neleki fa mi no de wan pisi foe grontapoe” (Johanes 17:15, 16). Ini a ten disi, „na ogriwan” e saka en atibron spesroetoe kon na tapoe denwan „di e doe den komando foe Gado èn di abi a wroko foe gi kotoigi foe Jesus” (Openbaring 12:17). Efoe Jehovah no ben sorgoe gi den getrow Kotoigi foe en nanga wan srapoe ai èn na wan lobifasi, dan den ben sa dede. A libi foe wi e anga foe efoe wi e meki boen gebroiki foe ala den sani di Gado seti gi wi efoe no, so taki wi e kisi kibri na jeje fasi èn sani e waka boen nanga wi. Dati wani taki toe, dati wi e doe boen foeroe moeiti akroederi a fasi fa a krakti foe En e wroko nanga jepi foe Krestes, so leki fa na apostel ben gi tranga na Kolosesma 1:29.

5, 6. San na apostel Paulus ben denki foe den kresten foe Kolose, èn foe san ede wi jaritekst gi a jari 1995 fiti?

⁵ Ala di Paulus noiti no ben miti den brada foe en na Kolose kande, tokoe a ben lobi den. A ben taigi den: „Mi e winsi taki oenoe ben kan froestan, omeni mi e broko mi ede foe oenoe ede” (Kolosesma 2:1, The New Testament in Modern English, di J. B. Phillips skrifi). Foe di den bakaman foe Jesus no de wan pisi foe grontapoe, meki „na ogriwan” ben sa tan proeberi foe broko a wánfasi foe den brada, foe di a e meki a fasi fa grontapoe e denki èn e doe, kon na den mindri. A njoensoe di Epafras ben tjari kon foe Kolose, ben sori taki disi ben e pasa na mindri den na wan seiker marki.

⁶ Wan foe den moro prenspari broko-ede di Paulus ben abi ini a tori foe den kresten brada foe en, wi ben kan taki sjatoe nanga den wortoe: „Tai kon de wán nanga makandra ini lobi.” Den wortoe foe en spesroetoe wani taki wan sani ini a ten disi, ini wan grontapoe di foeroe nanga a de di sma no de ini wánfasi nanga makandra èn a de di sma de sondro lobi. Efoe wi e waka troetroe na baka a rai foe Paulus, dan wi sa njanboen foe a sorgoe di Jehovah e sorgoe gi wi. Wi sa ondrofeni a krakti toe foe en jeje na ini wi libi èn a sa jepi wi foe kakafoetoe gi a druk foe grontapoe. Fa a rai disi na koni rai! Dati meki, Kolosesma 2:2 sa de wi jaritekst gi a jari 1995.

7. Sortoe wánfasi moesoe de foe feni na mindri troe kresten?

⁷ Ini wan brifi di na apostel ben skrifi fosi na den Korentesma, a ben gebroiki a libisma skin leki wan agersitori. A ben skrifi taki „no wan pratifasi moesoe de” ini a gemeente foe den salfoe kresten, ma taki „den memre foe en moesoe abi a srefi sorgoe gi makandra” (1 Korentesma 12:12, 24, 25). Fa dati de wan moi agersitori! Den memre foe wi skin e wroko nanga makandra, èn ibriwan foe den fasi na a tra pisi foe wi skin. A srefi gronprakseri e fiti wi brada demakandra na heri grontapoe, di abi salfoewan èn miljoenmiljoen sma na ini di e howpoe foe libi na wan grontapoe paradijs. Wi no moesoe poti wisrefi aparti foe a skin foe kompe kresten foe go libi sondro den! A jeje foe Gado di e wroko nanga jepi foe Krestes Jesus, e kon na wi bogobogo, foe di wi abi demakandra nanga den brada foe wi.

Wánfasi nanga makandra abi foe doe nanga sabi

8, 9. (a) San de prenspari te wi e jepi foe tjari wánfasi nanga makandra kon ini a gemeente? (b) Fa joe kisi sabi di abi foe doe nanga Krestes?

⁸ Wan foe den moro prenspari sani di Paulus ben abi na prakseri, ben de taki a kresten wánfasi abi foe doe nanga sabi, spesroetoe a sabi di abi foe doe nanga Krestes. Paulus ben skrifi taki kresten ben moesoe „tai kon de wán nanga makandra ini lobi èn nanga ini prakseri a kisi di [den] kan kisi ala goedoe foe a troetroe djaranti foe a froestan di [den] e froestan, èn nanga ini prakseri a kisi di [den] kan kisi wan soifri sabi foe a santa kibritori foe Gado, dati wani taki, Krestes” (Kolosesma 2:2). Wi kisi sabi — troetori — foe sensi a ten di wi ben bigin studeri a Wortoe foe Gado. Leki wan pisi foe a froestan di wi kon froestan fa foeroe foe den troetori disi e fiti ini a prakseri foe Gado, wi e kon si a prenspari ròl di Jesus abi. „San kibri boen na ini en na ala den goedoe foe a koni èn foe a sabi.” — Kolosesma 2:3.

⁹ Na so joe e denki foe Jesus nanga a ròl di a abi ini a prakseri foe Gado? Foeroe sma ini krestenhèit esi-esi e taki foe Jesus, foe di den e taki dati den teki en èn taki den kisi froeloesoe. Ma den sabi en troetroe? Kwetikweti, bika moro foeroe foe den e bribi a leri foe a Dri-wánfasi di no abi en gron tapoe bijbel. No wawan joe sabi a waarheid foe a tori disi, ma kande joe sabi foeroe foe san Jesus ben taki èn ben doe. Miljoenmiljoen sma ben kisi jepi foe kisi sabi ini a tori foe Jesus Krestes, foe di den ben studeri a boekoe De grootste mens die ooit heeft geleefd (A moro bigi man di oiti ben libi) foe kisi bodoi foe en. Tokoe wi moesoe tan meki a sabi kon moro foeroe di wi abi foe Jesus nanga den fasi foe en.

10. Na sortoe fasi wi kan kisi a sabi di kibri?

¹⁰ A froeklari taki „ala den goedoe foe a koni èn foe a sabi” „kibri boen” ini Jesus, no wani taki dati wi no kan froestan so wan koni nanga sabi. Na presi foe dati, a de pikinso leki wan mijn di opo. Wi no abi foe go soekoe ini wan boen bigi kontren, e aksi wisrefi pe wi moesoe bigin diki. Wi sabi dati kaba — troetroe sabi e bigin nanga san bijbel e tjari kon na krin ini a tori foe Jesus Krestes. Te wi e kon froestan moro boen sortoe ròl Jesus abi ini a kontroe foe a prakseri foe Jehovah, dan wi e kisi den goedoe foe a troe koni nanga soifri sabi. So boen, san wi moesoe doe na foe tan diki moro dipi, e poeroe moro diri ston noso warti sani di de foe kisi foe a fonten disi pe wi diki kaba. — Odo 2:1-5.

11. Fa wi kan meki a sabi nanga a koni foe wi kon moro foeroe, foe di wi e prakseri dipi foe Jesus? (Agersi disi nanga a wasi di Jesus ben wasi den foetoe foe den disipel, noso nanga tra eksempre.)

¹¹ Foe eksempre, kande wi sabi taki Jesus ben wasi den foetoe foe den apostel foe en (Johanes 13:1-20). Ma wi prakseri dipi kaba foe a sani di a ben leri drape èn na eigifasi di a ben sori? Te wi e doe disi, dan wi kan tjari wan goedoe foe koni kon na tapoesei di e meki wi man — ija, di e boeweigi wi — foe kenki a fasi fa wi e handri nanga wan brada noso wan sisa di a persoonlijkheid foe en tanteri wi wan langa pisi ten kaba. Noso te wi e kisi wan wroko foe doe di wi no lobi someni, dan wi kan handri na wan tra fasi, baka te wi kon froestan heri boen san Johanes 13:14, 15 wani taki. Dati na fa a sabi nanga a koni abi krakti na wi tapoe. Sortoe bakapisi a kan abi na tapoe tra sma, te wi waka moro soifri na baka na eksempre foe Krestes, foe di wi kisi moro sabi foe en? So leki fa a sori, dan na ipi sa ’tai kon de wán moro nanga makandra ini lobi’.a

Sani di e poeroe wi prakseri foe prenspari sani, kan pori a wánfasi nanga makandra

12. Nanga sortoe sabi wi moesoe loekoe boen?

¹² Efoe soifri sabi e meki ’a tai di wi e tai kon de wán nanga makandra ini lobi’ moro makriki, dan san e kon foe a sani di de a „sokari falsi ’sabi’”? Wan heri tra sani — kesekese, haritaki nanga a hari di sma e hari densrefi poeroe foe a bribi. So boen, wi moesoe kibri wisrefi gi a sortoe falsi sabi dati, so leki fa Paulus ben warskow Timoteus (1 Timoteus 6:20, 21). Paulus ben skrifi toe: „Disi mi e taki, dati no wan sma moesoe kori oenoe nanga boeweisi di den e tjari kon na fesi foe overtoigi oenoe. Loekoe boen: kande wan sma de, di sa tjari oenoe gowe leki wan sma di a kisi nanga den filosofia nanga soso bidrigi fasi akroederi den gwenti foe libisma, akroederi a fosi bigin foe grontapoe èn no akroederi Krestes.” — Kolosesma 2:4, 8.

13, 14. (a) Foe san ede den brada foe Kolose ben de ini kefar ini a tori foe sabi? (b) Foe san ede wan toe sma ini a ten disi ben sa kan denki taki den no de ini a srefi kefar?

¹³ Na ala sei lontoe den kresten foe Kolose, joe ben abi a triki krakti foe san den ben kari troetroe falsi sabi. Foeroe sma na Kolose èn krosibei foe a foto dati, ben abi foeroe lespeki gi den Griki filosofia. Joe ben abi den Judaïst-sma toe, di ben wani, taki den kresten ben moesoe hori a Wet foe Moses, so leki den fesadei nanga san a wet ben aksi foe sma ini a tori foe njanjan (Kolosesma 2:11, 16, 17). Paulus no ben gens den brada foe en foe den kisi a troe sabi, ma den ben moesoe loekoe boen taki no wan sma ben sa tjari den gowe leki wan sma di den kisi. Den sma ben sa kan doe disi, foe di den ben gebroiki boeweisi di den e tjari kon na fesi foe overtoigi den, so taki den ben kan teki a fasi fa libisma ben denki nomo ini a tori foe a libi nanga sani di den ben doe. Joe kan froestan taki, efoe wan toe sma ini a gemeente meki den sortoe prakseri dati nanga den fasi dati foe si a libi, di no abi den gron tapoe bijbel, tiri a denki nanga den bosroiti foe den, dan a ben sa wroko teige a wánfasi nanga makandra èn a lobi na mindri den memre foe a gemeente.

¹⁴ ’Ija’, joe ben sa kan denki, ’mi e si a kefar di den Kolosesma ben tanapoe na fesi, ma den Griki prakseri no man abi krakti na mi tapoe, so leki a prakseri foe wan sili di no man dede noso wan dri-wánfasi gado; èn mi no e si toe fa den heiden fesadei foe a falsi relisi di mi ben komoto na ini, ben sa kan kori mi.’ Dati de heri boen. A boen foe abi a fasti overtoigi foe a moro hei waarde foe a fondamenti waarheid di ben tjari kon na krin nanga jepi foe Jesus èn di de foe feni ini den Boekoe foe bijbel. Ma a ben sa kan, taki tra filosofia noso fasi fa moro foeroe sma e denki ini a ten disi, e tjari wi kon ini kefar?

15, 16. Sortoe prakseri ini a tori foe a libi ben sa kan abi krakti na tapoe a denki foe wan kresten?

¹⁵ Wan foe den fasi dati fa sma e denki, de wan langa ten kaba: „Pe a pramisi de now taki a sa kon? Den papa foe wi ben go rostoe kaba, ma te now ete ala sani e go doro soifri leki fa a ben de ala ten” (2 Petrus 3:4, The New English Bible). Sma kan gebroiki tra wortoe foe taki foe a fasi dati foe firi, ma a prakseri de a srefi. Foe eksempre, wan sma ben sa kan denki: ’Di mi ben leri a waarheid someni tenti jari pasa kaba, dan a kaba ben de „leti na wi fesi”. Ma a no kon ete, èn no wan sma sabi oten a o kon.’ A troe, taki no wan sma no sabi oten a kaba sa doro. Ma tokoe, loekoe a fasi foe denki di Jesus ben gi wi tranga foe abi: „Tan loekoe, tan na ai, bika oenoe no sabi oten a reti ten de.” — Markus 13:32, 33.

¹⁶ Fa a ben sa de wan kefalek sani foe teki a fasi foe denki abra taki, foe di wi no sabi oten a kaba sa kon, wi moesoe meki plan foe abi ala san wi wani ini a libi èn e libi san den e kari wan „gewoon” libi! A fasi dati foe denki ben kan de foe si ini a prakseri: ’A ben sa de wan heri boen sani gi mi foe seti sani di sa meki mi (noso den pikin foe mi) abi wan heri boen wroko pe mi e kisi boen foeroe moni èn di sa meki taki mi kan njanboen foe wan libi pe mi abi ala sani. A no de foe taki, dati mi sa go na den kresten konmakandra èn abi wan prati pikinso na a diniwroko, ma no wan reide no de gi mi foe doe boen foeroe moeiti noso foe tjari bigi ofrandi.’ — Mateus 24:38-42.

17, 18. Sortoe fasi foe denki Jesus nanga den apostel foe en ben gi wi tranga foe abi?

¹⁷ Ma wi no kan taki dati Jesus nanga den apostel foe en no ben rikomanderi taki wi moesoe libi nanga wan firi foe a tranga fanowdoe di de foe preiki a boen njoensoe, foe di wi e doe boen foeroe moeiti èn de klariklari foe tjari ofrandi. Paulus ben skrifi: „Disi mi e taki, brada, a ten di tan abra kon sjatoe. Foe dati ede, meki denwan di abi wan wefi de leki den no abi wan wefi, . . . èn denwan di e bai sani de leki denwan di no abi noti, èn denwan di e meki gebroiki foe grontapoe, de leki denwan di no e gebroiki en dorodoro; bika a fasi fa a grontapoe disi tan, e kenki.” — 1 Korentesma 7:29-31; Lukas 13:23, 24; Filipisma 3:13-15; Kolosesma 1:29; 1 Timoteus 4:10; 2 Timoteus 2:4; Openbaring 22:20.

¹⁸ Na presi foe Paulus ben gi leki rai taki wi moesoe meki wan makriki libi pe wi abi ala sani, kon tron a marki foe doro, a ben skrifi na ondro a krakti foe santa jeje: „No wan sani wi no tjari kon ini grontapoe, èn no wan sani wi kan tjari komoto na en toe. So boen, te wi abi njanjan, krosi nanga wan presi foe tan, dan wi sa de tevrede nanga den sani disi. . . . Feti a toemoesi boen feti foe a bribi, graboe a têgo libi boen steifi, foe san oenoe ben kisi wan kari èn foe san oenoe ben gi wan toemoesi boen kotoigi na poebliki, na fesi foe foeroe kotoigi.” — 1 Timoteus 6:7-12.

19. Fa a kan abi krakti na tapoe wan gemeente, te den sma foe a gemeente e teki a fasi foe denki foe a libi di Jesus ben gi deki-ati foe abi?

¹⁹ Te wan gemeente abi fajafaja kresten di e feti fajafaja foe ’gi wan toemoesi boen kotoigi na poebliki’, dan a no de foe taki, dati wánfasi nanga makandra de a bakapisi di e kon foe dati. Den no e gi abra na a fasi foe denki disi: ’Joe abi nofo boen sani gi foeroe jari ete; teki joe ten, njan, dringi, prisiri joesrefi’ (Lukas 12:19). Na presi foe dati, den de ini wánfasi nanga makandra ini a srefi moeiti di den e doe, èn den de klariklari foe tjari ofrandi, so taki, someni leki den man, den kan abi wan bigi prati na a wroko disi di no e kon noiti moro. — Teki gersi Filipisma 1:27, 28.

Wi moesoe loekoe boen nanga boeweisi di den e tjari kon na fesi foe overtoigi wi

20. San na wan tra kontren pe sma ben sa kan kori kresten?

²⁰ A no de foe taki dati tra fasi de, pe den ben sa kan ’kori kresten nanga boeweisi di den e tjari kon na fesi foe overtoigi den’, noso nanga soso bidrigi fasi di e kon na mindri ’a tai di den e tai kon de wán nanga makandra ini lobi’. A bijkantoro foe a Waktitoren Genootschap na Doisrikondre ben skrifi: „Wan kefal ben de di ben meki kesekese kon, pe preikiman èn srefi owroeman ben teki sma sei ini a tori foe den difrenti fasi di de foe dresi sma, èn di wan brada ben gebroiki.” Den ben taki moro fara: „Foe di foeroe difrenti fasi foe dresi sma de, di sma e gebroiki èn foe di boen foeroe siki sma de, meki disi na wan kontren pe foeroe difrenti prakseri de, èn efoe wan fasi foe dresi sma abi foe doe nanga afkodrei, dan a kan de wan kefar toe.” — Efeisesma 6:12.

21. Fa wan kresten ben sa kan lasi a joisti fasi foe si a moro prenspari sani ini a ten disi?

²¹ Kresten wani foe tan na libi èn wani tan abi wan boen gosontoe, so taki den kan anbegi Gado. Ma tokoe, ini a sistema disi wi moesoe erken taki a bakapisi foe onvolmaaktifasi de taki wi e kon owroe èn taki wi e siki. Na presi foe poti krakti na tapoe strei-aksi ini a tori foe gosontoe, wi moesoe poti prakseri na tapoe a troetroe loesoe, gi wi èn gi trawan (1 Timoteus 4:16). Wi moesoe poti prakseri na tapoe Krestes, a moro prenspari sma foe tjari a loesoe dati, neleki fa a ben de a moro prenspari sma di Paulus ben poti prakseri na tapoe di a ben gi rai na den Kolosesma. Ma memre, Paulus ben sori taki wan toe sma kan kon nanga „boeweisi di den e tjari kon na fesi foe overtoigi [wi]”, èn e poeroe wi prakseri foe Krestes, èn kande poti wi prakseri na tapoe fasi foe kon sabi sortoe siki wan sma abi, fasi foe dresi sma, noso fasi foe njan. — Kolosesma 2:2-4.

22. Sortoe balansi fasi wi moesoe abi ini a tori foe den lo sani di sma e taki ini a tori foe fasi foe kon sabi sortoe siki wan sma abi nanga fasi foe dresi sma?

²² Na heri grontapoe den e lai sma toemoesi nanga bariwroko èn nanga froeklari di sma e gi, taki den ben kisi wini foe ala sortoe fasi foe dresi sma èn foe fasi foe kon sabi sortoe siki wan sma abi. Boen foeroe sma e gebroiki son wan foe den fasi disi èn sma e erken den; trawan e kisi a kroetoe foe foeroe sma noso sma no e froetrow den.b Ibri sma abi a frantiwortoe foe bosroiti san a sa doe ini a tori foe a gosontoe foe en. Ma den sma di e teki Paulus rai di de foe feni na Kolosesma 2:4, 8, sa kisi kibri foe sma no kori den nanga „boeweisi di den e tjari kon na fesi foe overtoigi den” noso „soso bidrigi fasi” di e tjari foeroe sma go na wan tra pasi di, foe di den no abi a Kownoekondre howpoe, e angri pasa marki foe kisi froelekti. Srefi te wan kresten abi na overtoigi taki wan bepaalde fasi foe dresi sori boen gi en, a no moesoe meki reklame gi disi ini a kresten bradafasi, foe di a ben kan tron wan tori pe sma e go taki makandra foeroe foe dati èn a ben sa kan tjari kesekese kon. Na so wan fasi a kan sori taki a abi foeroe lespeki gi a prensparifasi foe wánfasi nanga makandra ini a gemeente.

23. Foe san ede spesroetoe wi abi reide foe abi prisiri?

²³ Na apostel Paulus ben poti krakti na tapoe taki a kresten wánfasi na wan fondamenti foe troetroe prisiri. Ini a ten foe en, a nomroe foe gemeente foe troe ben de moro mendri leki ini a ten disi. Tokoe a ben kan skrifi den Kolosesma: „Ala di mi no de nanga oenoe ini skin, tokoe mi de nanga oenoe ini jeje, e prisiri èn e si a boen ordefasi nanga trangafasi foe a bribi di oenoe abi ini Krestes” (Kolosesma 2:5; loekoe toe Kolosesma 3:14.) Fa wi abi moro bigi reide foe abi prisiri! Wi man foe si troetroe boeweisi foe a wánfasi nanga makandra, boen ordefasi nanga a tranga di a bribi tranga ini wi eigi gemeente, san e sori a situwâsi ini algemeen foe Gado en pipel na heri grontapoe. So boen, ini a sjatoe ten di tan abra ini a seti foe sani disi, meki ibriwan foe wi abi a fasti bosroiti foe „kon de wán nanga makandra ini lobi”.

[Foetoewortoe]

Joe ben si disi?

◻ San na a jaritekst foe 1995 gi Jehovah Kotoigi?

◻ Foe san ede den kresten foe Kolose ben moesoe tai kon de wán ini lobi, èn foe san ede a moesoe de so toe nanga wi ini a ten disi?

◻ Nanga sortoe triki fasi foe prakseri foe a libi, spesroetoe kresten moesoe loekoe boen ini a ten disi?

◻ Foe san ede kresten moesoe de na ai foe no meki sma kori den nanga boeweisi di den e tjari kon na fesi foe overtoigi den, ini a tori foe a gosontoe nanga den fasi di sma e gebroiki foe kon sabi sortoe siki wan sma abi?

[Prenki na tapoe bladzijde 29]

Den sani di joe seti gi a tamara e poti a prakseri na tapoe a denoja foe Krestes?