A relisi foe joe — A de wan sipi di joe no moesoe gowe libi noiti?
WAN sipi de leti na ini wan bigi winti. Den sipiman, di e feti tranga foe poeroe a sipi foe den na ini a bigi winti, moesoe teki wan toemoesi prenspari bosroiti: foe tan na tapoe a sipi noso foe gowe libi a sipi, foe kibri a libi foe den. Joe ben sabi taki sma e gebroiki a tori disi di e frede sma, leki wan agersitori foe leri sma foe Gado?
Nofotron den theoloog, spesroetoe den katolik sabiman, e teki a kerki foe den gersi nanga wan sipi di e feti foe pasa wan bigi winti. Den e taki dati a sipi disi, di abi Jesus noso Petrus foe stiri a sipi, e prenki a wan-enkri fasi foe kisi froeloesoe. A fasi fa den kerki leriman e si sani, na: ’Noiti no gowe libi a sipi. Kerki ondrofeni serjoesoe bigi problema kaba, ma a de wan sipi di pasa ala tra bigi problema.’ Son sma e taki: ’Foe san ede mi moesoe gowe libi a katolik kerki? Sortoe tra fasi de? Foe san ede mi no tan èn jepi foe stiri en go na ini moro tiri watra?’
So leki fa den agersi wortoe disi di skrifi na tapoesei e taki, dan foeroe sma di de foe ala sortoe fasi foe relisi, e denki na densrefi: ’Mi sabi taki a relisi foe mi fowtoe na ini foeroe sani, ma mi howpoe taki a sa kenki. Mi no wani foe gowe libi en. Mi ben sa wani foe abi wan prati foe jepi en pasa den problema foe en.’ Wan sma abi a sortoe fasi disi foe denki, kande foe di a sma troetroe lobi a relisi foe den fositen tata foe en, noso srefi foe di a frede foe „tori” a relisi.
Wan toemoesi aparti eksempre na di foe Hans Küng, wan katolik theoloog di e denki heri tra fasi leki a kerki foe en èn di foeroe sma sabi. A ben prakseri na ensrefi: „Mi moesoe gowe libi a boto ini a bigi winti, èn libi denwan di mi seiri nanga den te leki now foe den kakafoetoe gi a winti, foe den feti foe tapoe olo foe a boto, èn kande foe den e feti foe tan na libi?” A ben piki: „Mi no sa tapoe foe gi mi krakti na ini a kerki.” Wan tra fasi foe handri ben sa de „a broko di wan sma e broko nanga a kerki disi, foe di a no de getrow, so taki a kan kisi a lobi di abi moro hei waarde, èn kande foe de wan troetroe kresten moro.” — Die Hoffnung bewahren.
Ma wan sma kan tan ini a boto foe en eigi kerki, foe di a e howpoe taki Gado sa gi pasi taki ala relisi sa kisi wan ten di no abi skotoe foe kon kenki, foe di Gado abi sari-ati? Dati na wan serjoesoe aksi. So leki fa na agersitori e sori, dan a ben sa de wan kefalek sani foe gowe esi-esi libi wan sipi di de ini kefar, foe di joe e teki wan pikin boto foe kibri joe libi, èn di de wan kefalek sani toe. Neleki fa a ben sa de wan kefalek sani toe foe tan na ini wan sipi di e soengoe. A de wan koni sani foe tan na ini wan kerki, awansi san dati wani taki toe, awansi san na a situwâsi pe a de na ini? Sortoe froewakti de, taki den relisi na ini a ten disi sa kenki? O langa Gado sa gi pasi taki den e wroko teige a wani foe en?
[Sma di abi a reti foe a prenki na tapoe bladzijde 3]
Chesnot/Sipa Press