Joe e memre disi ete?

Joe ben warderi en foe leisi den uitgave foe A Waktitoren foe den moen di pasa? We, loekoe efoe joe kan gi piki tapoe den aksi di e kon now:

▫ Foe san ede den fosi kresten no ben hori a fesa foe a geborte foe Jesus?

Ini akroederi nanga The World Book Encyclopedia, „den Fosi Kresten no ben hori a fesa foe a geborte [foe Jesus] foe di den ben si a fesa foe a geborte foe iniwan sma leki wan heiden gwenti”. — 1/12, bladzijde 4.

▫ San kan jepi wi foe dini Jehovah nanga wan prisiri ati?

Wi moesoe kweki wan positief loekoe nanga warderi gi den blesi foe wi nanga den grani ini a diniwroko di Gado gi wi, èn noiti wi no moesoe frigiti taki te wi e doe san a Wortoe foe Gado e taki, dan wi e plisi en. — 1/1, bladzijde 26, 27.

▫ Foe san ede a „bigi ipi” abi „palmtaki na ini den anoe foe den”? (Openbaring 7:9)

A wai di den ben wai nanga den palmtaki e sori taki a „bigi ipi” e prèise a Kownoekondre foe Jehovah nanga en salfoe Kownoe, Jesus Krestes, nanga prisiri. (Loekoe Lefitikus 23:39, 40.) — 1/2, bladzijde 16.

▫ Foe san ede den owroeman e loekoe den aksi di ben sreka na fesi, nanga den njoenwan di gi densrefi abra na Gado?

Den e doe disi, foe kon sabi seiker efoe ibriwan sma di sa teki dopoe e froestan den gronleri foe bijbel krinkrin èn efoe den e froestan san a wani taki foe de wan Kotoigi foe Jehovah. — 1/3, bladzijde 16.

▫ Fa wi kan kisi wini foe den begi di de na ini bijbel?

Foe di wi e ondrosoekoe den begi di de na ini bijbel finifini, meki wi kan si den begi di sma ben begi na ini situwâsi di gersi a di foe wi. Te wi e feni den begi disi, e leisi den, èn e prakseri dipi foe den, dan dati kan jepi wi foe meki wi komunikâsi nanga Jehovah kon moro boen. — 1/3, bladzijde 3, 4.

▫ San na frede gi Gado?

Frede gi Gado na wan dipi lespeki gi Jehovah, makandra nanga wan gosontoe frede foe doe wan sani di no e plisi en (Psalm 89:7). — 1/3, bladzijde 22.

▫ Fa bijbel e sori tapoe dri fasi, taki wi warti foeroe ini den ai foe Gado?

Bijbel e leri taki ibriwan foe wi abi waarde ini den ai foe Gado (Lukas 12:6, 7); a e tjari kon na krin san Jehovah e si leki warti na ini wi (Maleaki 3:16); èn a e froeteri san Jehovah doe gi wi foe sori a lobi di A lobi wi (Johanes 3:16). — 1/4, bladzijde 10-13.

▫ Foe san ede Hebrewsma 10:24, 25 de moro leki soso wan komando taki kresten moesoe kon makandra?

Den wortoe disi foe Paulus e gi wan markitiki di kon nanga jepi foe a santa jeje foe Gado gi ala kresten konmakandra — foe troe, gi ibri okasi te kresten abi demakandra. — 1/4, bladzijde 14, 15.