Pikinmoro djaroesoefasi pori mi libi

DI MI ben trow nanga Marka, a tweede masra foe mi, dan djaroesoefasi bigin teki mi srefisrefi. Makandra, wi ben abi foe doe nanga wan toe kwekipikin èn nanga den fosi patna foe wi. Son tron a situwâsi ben moro mi. Iniwan famiri trobi di ben de, a ben gersi leki Mark no ben e djompo gi mi. Mi ben kisi a firi taki a ben lobi en fosi oema ete. Na presi foe basi a djaroesoefasi foe mi, mi ben gi pasi foe a basi mi libi. Ibri leisi di a fosi oema foe Mark ben de na ini a birti, mi ben e broko sweti.

Mi ben meki en tron wan gwenti foe hori Mark na ai doronomo, èn foe loekoe srefi en ai foe si pe a ben e loekoe go. Mi ben si sani na ini en ai di a no ben prakseri srefisrefi. Son tron, mi ben taigi en taki a lobi en fosi oema ete. Na wan okasi a ben mândi sote foe dati, taki a ben opo gowe libi wan kresten konmakandra. Na fesi Jehovah mi ben firi taki mi abi a fowtoe. Mi ben meki mi osofamiri libi kon takroe, bikasi te foe kaba den pikin srefi ben ondrofeni a bakapisi foe dati. Mi no ben lobi misrefi foe san mi ben doe, ma awansi o foeroe mi ben proeberi, a gersi leki mi no ben man basi mi djaroesoefasi.

Na presi foe jepi mi, Mark ben bigin teki wraak. Te mi ben taigi en taki a fowtoe, a ben lobi e bari gi mi: „Joe djaroesoe joe, na djaroesoe nomo joe e djaroesoe so.” A ben gersi srefi leki foe espresi a ben proeberi foe meki mi djaroesoe. Kande a ben prakseri taki disi ben sa tapoe a djaroesoe firi foe mi, ma a ben meki a sani kon moro takroe. A ben bigin loekoe tra oema èn ben bigin taki fa den moi. Disi ben meki mi firi srefi moro lagi èn leki no wan sma no lobi mi. A ben kon so fara taki wan tra firi, bita-ati, ben opo en ede kon. Di a ben kon so fara mi ben broeja so foeroe, taki a sani di mi ben wani nomo na taki en nanga den pikin foe en no ben moesoe de moro na ini mi libi.

Te bijbel e taki dati „djaroesoefasi na pori gi den bonjo”, dan dati de leti so (Odo 14:30). Mi skin bigin firi den bakapisi now. Mi bigin kisi maagzweer di ben teki langa foe kon betre. Mi tan go doro foe pori mi libi foe di mi no ben froetrow noti san Mark ben doe. Mi ben meki en kon tron wan gwenti foe go na ini en broekoesaka, èn efoe mi ben feni papira nanga telefonnummer foe tra sma na tapoe, dan ala leisi baka mi ben bèl foe jere soema ben sa teki a telefon. Ma dipi na ini mi ati, mi ben sjen èn ala leisi baka mi ben krei foe di mi ben sjen na fesi Jehovah. Tokoe mi no ben man tapoe nanga dati. Mi ben de mi eigi takroe feanti.

A jejefasi foe mi ben saka go so fara taki mi no ben man begi moro. Mi ben lobi Jehovah èn troetroe ben wani foe doe san reti. Mi ben sabi ala den tekst di e taki foe masra nanga wefi, ma mi no ben man fiti den na ini mi libi. Fositron ini mi libi mi no ben wani libi moro, ala di mi ben abi pikin di ben boen srefisrefi.

Den owroeman foe a kresten gemeente ben de wan bigi deki-ati gi mi èn ben proeberi foe doe ala san den man foe jepi mi. Ma te den ben bigin taki foe a tori foe a djaroesoefasi foe mi, dan ala leisi baka mi ben taki dati a no ben de so foe di mi ben sjen, èn mi no ben wani erken taki mi abi so wan problema.

Te foe kaba, a gosontoe foe mi ben go so foeroe na baka taki mi ben moesoe go na ati-oso foe koti. Di mi ben de drape mi ben kon si taki a libi no ben kan go so doro leki fa a ben de. Mark nanga mi ben teki a bosroiti foe prati dri moen foe ondrosoekoe a situwâsi foe wi, sondro foe meki wi firi kon na mindri. Na a srefi pisi ten disi wan prisiri sani pasa. Ini na Ontwaakt! tijdschrift wan artikel ben kon na doro nanga a nen: „Hulp voor volwassen kinderen van alcoholisten.”b

Mi ma ben de wan sma di ben dringi pasa marki. Ala di den no ben meshandri mi na skinsei, tokoe mi mama nanga papa noiti ben sori firi foe lobi gi makandra noso gi mi. Mi no kan memre no wan leisi taki mi mama taigi mi taki a lobi mi noso taki a brasa mi. So boen, mi ben gro kon sondro foe sabi fa foe gi lobi, noso san de prenspari toe, foe sabi fa foe doe foe kisi lobi.

Foeroe tron, mi mama ben taigi mi foe a waka-libi foe mi papa èn taki a no ben man froetrow en. So boen, mi denki taki mi gro kon sondro foe man froetrow mansma. Foe a fasi fa mi ben kweki ede, ala ten mi ben firi misrefi lagi moro trawan, spesroetoe mi ben firi dati nanga tra oemasma. Di mi leisi na Ontwaakt! artikel dati, dan a ben jepi mi foe froestan san den sani disi wani taki. Disi ben de a fosi tron di mi ben froestan a roetoe foe a problema foe den djaroesoe firi foe mi.

Mi ben sori mi masra Mark, na Ontwaakt! artikel èn a ben jepi en so srefi foe froestan mi moro betre. Sjatoe baka dati, mi nanga en ben man foe waka baka den bijbel rai gi trowpaar di e prakseri foe prati. Wi ben meki en boen baka (1 Korentesma 7:10, 11). Now a trowlibi foe wi boen moro leki a ben de oiti bifo. Wi e doe moro foeroe sani makandra, spesroetoe te a abi foe doe nanga den kresten aktiviteit. Mark abi troetroe firi gi mi èn e poti ensrefi moro na ini mi presi. Pikinmoro ibri dei a e taigi mi omeni a lobi mi èn now mi e bribi en troetroe.

Te mi sabi taki wi o miti a fosi oema foe Mark, dan mi e begi Jehovah foe gi mi krakti èn e aksi en foe jepi mi foe tjari misrefi na wan lepi kresten fasi. Èn a e go. Srefi den firi foe feantifasi di mi abi gi en, e gowe safri-safri. Mi no e prakseri takroe sani moro noso mi no e meki taki mi denki lasi pasi.

Te nanga now mi e kisi wan toe djaroesoe firi di no joisti. Soso wan volmaakti libi na ini a njoen grontapoe foe Gado sa poeroe ala den djaroesoe firi foe mi di no joisti. Disiten, mi leri foe basi djaroesoefasi na presi foe en basi mi. Ija, pikinmoro djaroesoefasi pori mi libi, ma tangi foe Jehovah nanga en organisâsi, mi de now wan moro kolokoe sma èn mi gosontoe kon boen baka. Now, mi abi wan krosibei matifasi baka nanga mi Gado, Jehovah. — Ingezonden.

[Foetoewortoe]