Fa kresten herder e dini joe
NA FOEROE presi joe man si fa herder e wroko nanga wan ipi skapoe. Den e tjari den skapoe, den e kibri den gi kefar, èn e sorgoe gi den. Disi na wan prenspari sani gi kresten owroeman, foe di a wroko foe den wani taki toe dati den moesoe doe herder-wroko. Ija, a de a frantiwortoe foe den „foe wei a gemeente foe Gado” èn foe ’poti prakseri na tapoe a heri ipi’. — Tori foe den Apostel 20:28.
Efoe joe na wan memre foe a kresten gemeente, dan fa den herder na jejefasi kan dini joe? Èn fa joe moesoe handri nanga a moeiti di den e doe gi joe? Foe san ede a gemeente abi a jepi foe den fanowdoe?
Kibri wi gi san?
Na owroeten, lew nanga tra werdri meti ben de wan kefar gi den ipi èn den ben onti na tapoe skapoe di no ben de nanga trawan. Skapoeman ben moesoe kibri den gi kefar (1 Samuèl 17:34, 35). We, Satan Didibri „e waka lontoe leki wan krasi lew, di e soekoe foe njan wan sma” (1 Petrus 5:8). Nanga bigi atibron a no e feti nomo nanga a heri organisâsi foe Jehovah na grontapoe, ma so srefi nanga ibri foetoeboi foe Gado aparti. San Satan abi na prakseri? A wani taki Jehovah en pipel lasi-ati èn a wani tapoe den srefi foe „e hori den komando foe Gado” èn doe „a wroko foe gi kotoigi foe Jesus”. — Openbaring 12:17.
Jehovah ben gi den tiriman-herder foe Israèl foe owroeten a fowtoe, taki den ben abi wan mi-no-kefasi, bika den skapoe foe en ben tron „njanjan gi ibri werdri meti na boesi” (Esekièl 34:8). Ma kresten owroeman abi wan troetroe angri foe kibri den wan di de na ini a gemeente gi kefar, so taki no wan sma e lasi foe wan mi-no-kefasi ede, noso foe a krakti di Satan, grontapoe, noso den „wolfoe” di fadon komoto na bribi, kan abi na tapoe den (Tori foe den Apostel 20:29, 30). Fa den herder e jepi ala den memre foe na ipi foe no lasi densrefi èn foe de na ai? Wán fasi na foe di den e hori lezing di abi den gron na tapoe bijbel èn di sreka boen, èn disi den e doe na tapoe a podium foe a Kownoekondre zaal. Wan tra fasi na foe taki nanga sma foe positief sani di e gi deki-ati, na fesi èn na baka den konmakandra. Ete wan tra fasi di e wroko boen, na te densrefi e fisiti den „skapoe” na den oso. (Teki gersi Psalm 95:7.) Ma san na wan herder fisiti? Fa so wan fisiti moesoe tjari? Èn na soema den moesoe tjari wan fisiti?
San na wan herder fisiti?
Wan herder fisiti a no soso wan prisiri takimakandra pe sma e taki foe den aladei sani. Wán owroeman ben taki: „Moro foeroe preikiman lobi en srefisrefi te wan tekst e leisi gi den noso te wi e taki foe wan sma na ini bijbel. A no de foe taki, dati a no a owroeman wawan e taki nomo. A Kownoekondre preikiman di den e fisiti, moro foeroe lobi foe taki fa a e denki foe bijbel, èn te a e doe disi, dan dati e tranga en eigi bribi. Na owroeman ben sa kan tjari wan Waktitoren noso wan Ontwaakt! nanga en, so taki a kan taki foe wan artikel di e bow a sma. Kande a taki disi di den e taki foe jeje afersi, e meki wan herder fisiti de wan tra sani leki wan prisiri takimakandra.”
Wan tra owroeman nanga ondrofeni, ben taki: „Fosi wan owroeman e go fisiti wan sma, dan a e teki ten foe prakseri foe a preikiman di a sa go fisiti. San kan bow a preikiman? Foe prèise wan sma na wan opregti fasi na wan prenspari sani di moesoe doe na wan herder fisiti, bika a e tranga wan sma foe horidoro.” Ija, wan herder fisiti de moro leki foe go fisiti wan sma nomo leki wan mati, wan sani di ibriwan sma na ini a gemeente ben sa kan doe.
Foe san ede wan herder e kon fisiti joe?
Te wan owroeman e go fisiti wan osofamiri, dan a de srekasreka foe gi kompe bribiman deki-ati èn foe jepi den foe de tranga ini a bribi (Romesma 1:11). So boen, te wán noso toe owroeman wani foe fisiti joe, san joe e doe? Wan opziener di e rèis, ben taki: „Efoe herder fisiti e tjari soso te wan sani no boen, dan a fosi sani di wan sma kan taki te joe e aksi en foe kon fisiti en, na: ’San mi doe?’” Lobi herder na jejefasi e waka na baka Jehovah, di ben sorgoe gi a psalm singiman èn ben ’gi en sili kowroe-ati’ ala ten, spesroetoe na ten foe banawtoe èn te a ben de na nowtoe. — Psalm 23:1-4.
A prakseri foe wan herder fisiti, na foe ’bow, no foe broko saka’ (2 Korentesma 13:10). San e gi troetroe deki-ati, na foe taigi a sma di den e fisiti taki den abi warderi gi a e hori di a horidoro, gi a faja foe di a abi, nanga a getrow wroko di a e doe. Wan owroeman ben taki: „Te joe e tjari wan herder fisiti, dan a no boen foe gi a sma a firi taki joe kon foe feni problema èn foe taki foe den. A no de foe taki, dati a preikiman srefi ben sa wani taki foe wan toe spesroetoe problema. Èn efoe wan skapoe e tingatinga noso e hari ensrefi poeroe foe den tra memre foe na ipi, dan na owroeman moesoe doe wan sani foe gi en jepi.”
Tweifri no de, taki kresten herder sa sorgoe spesroetoe gi iniwan sma di de leki den wan di den wortoe disi e taki foe den: „Mi [Jehovah] sa soekoe a wan di lasi, èn a wan di drifi komoto, mi sa tjari kon baka, èn mi sa tai a wan di broko èn mi sa tranga a wan di abi jepi fanowdoe” (Esekièl 34:16). Ija, a kan de fanowdoe taki den moesoe go soekoe skapoe, tjari den kon baka, tai den, èn tranga den. Den herder foe Israèl no ben teki den sortoe frantiwortoe disi. Te wan herder e doe a sortoe wroko disi, dan dati wani taki dati a moesoe kon krosibei foe wan bepaalde skapoe èn sorgoe gi san a abi fanowdoe. Moro foeroe, disi moesoe de a spesroetoe sani di moesoe de foe si na ibri herder fisiti di e tjari na ini a ten disi.
A de fanowdoe foe sorgoe gi den gosontoe skapoe
Wi moesoe kon na a bosroiti taki den disiten herder na jejefasi no moesoe sorgoe gi den gosontoe skapoe? We, te wan troetroe skapoe e kon ini problema, dan a de moro makriki foe jepi en te a e froetrow a herder. Wan handleiding e taki dati „foe densrefi, skapoe frede libisma, èn a no ala ten a de makriki foe meki den froetrow joe”. Foe eksempre, a srefi boekoe disi e gi a prenspari tirilin disi leki rai, foe meki den skapoe froetrow joe: „Taki ala ten nanga den meti. Den e kon gwenti a sten, di e meki den firi korostoe. Go loekoe den skapoe na ini den wei foeroe tron.” — Alles für das Schaf. Handbuch für die artgerechte Haltung (Ala sani gi den skapoe. Wan handleiding di e sori joe fa foe kweki den na wan boen fasi).
Foe dati ede a de fanowdoe foe miti wan skapoe persoonlijk, efoe wan matifasi moesoe de na mindri a herder nanga a skapoe. Na so a de toe na ini a kresten gemeente. Wan owroeman ben taki: „Te sma na ini a gemeente sabi wan owroeman leki wan sma di e fisiti den skapoe doronomo, dan a moro makriki foe go fisiti wan sma di abi problema.” Foe dati ede, herder na jejefasi no moesoe proeberi foe gi den skapoe njanjan èn foe sorgoe den soso na a Kownoekondre zaal. Te den omstandigheid e gi pasi foe dati, dan owroeman moesoe kon sabi den skapoe, foe di den e tjari herder fisiti na den oso foe den. Wan kresten e memre taki di a no ben de owroeman so langa ete, dan a fesiman opziener ben bèl foe aksi en efoe a ben kan fisiti wan brada foe gi en trowstoe, foe di no so langa ete a brada dati ben lasi en oemapikin foe wan takroe oto ongolokoe ede. Na owroeman e erken: „Mi ben firi froeferi troetroe, bika noiti ete mi ben go na a brada èn mi no ben sabi srefi pe a ben libi! A ben de wan froelekti di wan lepi owroeman ben aksi foe go nanga mi.” Ija, owroeman e jepi makandra foe tjari herder fisiti.
Te wan owroeman e sreka son herder fisiti èn e tjari den, dan wan dinari ini a diniwroko di e soekoe foe doe a „toemoesi boen wroko” foe wan owroeman, kan go nanga en (1 Timoteus 3:1, 13). Wan dinari ini a diniwroko e warderi en troetroe foe si fa wan owroeman e dini den skapoe na den herder fisiti. Na so fasi den owroeman nanga dinari ini a diniwroko e kon moro krosibei nanga ala den sma na ini a gemeente, èn den e tranga a banti foe kresten lobi nanga wánfasi. — Kolosesma 3:14.
Loekoe fosi na sortoe ten herder fisiti sa tjari
Di wan skin foe owroeman ben gi den wan di e hori a gemeente boekoestudie a frantiwortoe foe tjari herder fisiti, dan na ini wan toe groepoe ala den preikiman ben kisi wan fisiti na ini siksi moen, ala di na ini tra groepoe no wan sma ben kisi fisiti. Disi ben meki dati wan owroeman ben taki: „A gersi leki son owroeman e doe a fosi stap èn den e tjari wan lo herder fisiti, ma tra owroeman moesoe kisi a deki-ati foe den kompe owroeman foe den foe doe disi.” Son skin foe owroeman e seti sani taki den herder kan fisiti ala preikiman na wan seiker ten di poti.
A no de foe taki dati, wan owroeman noso wan tra preikiman kan fisiti wan sma na ini a gemeente sondro foe wakti tapoe spesroetoe sani di seti. Wan owroeman e bèl fosi, bifo a e tjari wan herder fisiti èn a e taki: „Ibri moen mi e tjari wan herder fisiti na wan osofamiri. A tra moen mi kan fisiti joe foe so wan wán joeroe? O ten a ben sa de wan boen ten gi joe?”
Den blesi foe wan herder fisiti
Ala di den kwinsi foe a godelowsoe seti disi e tan kon moro hebi, tokoe a e tjari moro nanga moro wini kon te herder di e firi gi trawan, e tjari herder fisiti. Te ala den wan foe na ipi e kisi deki-ati nanga jepi, foe di den herder e go fisiti den, dan ibri skapoe abi a firi taki noti no kan pasa nanga en èn a e firi seiker.
Den ben skrifi foe wan gemeente pe den owroeman doronomo ben tjari fisiti na ala den Kownoekondre preikiman: „Den preikiman ben kon si den herder fisiti leki wan boen sani srefisrefi. A ben de wan gewoon sani te wan preikiman ben go na wan foe den owroeman foe aksi en o ten a ben o tjari wan tra herder fisiti, foe di a sma di ben aksi disi ben njan boen foe a takimakandra di ben bow en na a fosi herder fisiti. Herder fisiti ben de wan foe den reide taki a jeje foe a gemeente ben go na fesi.” Tra bericht e sori taki te owroeman e dini nanga lobi na so wan fasi, dan a gemeente kan gro ini lobi, wánfasi, nanga waran. Disi na wan blesi srefisrefi!
Kresten owroeman e fisiti den skapoe foe jepi den foe de gosontoe na jejefasi. Owroeman wani foe gi deki-ati na den kompe bribiman foe den èn tranga den. Efoe na wan herder fisiti wan serjoesoe problema e kon de foe si pe rai moesoe gi, dan a ben sa moro boen foe teki wan tra ten foe taki foe a tori, spesroetoe te wan owroeman de makandra nanga wan dinari ini a diniwroko. Awansi fa a no fa, a fiti foe tapoe a herder fisiti nanga wan begi.
A de so, taki wan herder na jejefasi wani foe fisiti joe na joe oso wan tra leisi? Efoe dati de so, dan prisiri foe a deki-ati di joe sa kisi. A e kon foe dini joe èn foe tranga joe ini a fasti bosroiti di joe abi foe tan na tapoe a pasi di e tjari joe go na têgo libi. — Mateus 7:13, 14.
[Faki tapoe bladzijde 31]
Wan toe rai ini a tori foe herder fisiti
◻ Meki wan mofo nanga a sma: Nofo tron a de boen foe meki wan mofo. Efoe na owroeman abi na prakseri foe taki foe wan serjoesoe problema, dan a ben sa boen foe taigi a preikiman fosi.
◻ Sreka joesrefi: Prakseri foe a fasi fa a sma de èn san na a situwâsi foe en. Prèise a sma opregti. Poti en leki wan marki foe gi wan „presenti na jejefasi” di e gi deki-ati èn di e tranga a bribi. — Romesma 1:11, 12.
◻ Soema sa go nanga joe: Wan tra owroeman noso wan dinari ini a diniwroko di de bekwaam.
◻ Na a ten foe a fisiti: Na owroeman no moesoe de spanspan, a moesoe de nanga lobi, a moesoe de positief, èn no moesoe de so strak. Aksi foe na osofamiri, fa a e go nanga den, èn so moro fara. Arki boen. Efoe wan serjoesoe problema e kon de foe si, dan a kan de moro boen foe tjari wan spesroetoe herder fisiti.
◻ O langa joe sa tan: Hori joesrefi na a ten di joe poti, èn te joe e gowe, dan a sma di joe ben fisiti moesoe prisiri foe a fisiti ete.
◻ Tapoe a fisiti: A e fiti foe begi, èn sma e warderi dati troetroe. — Filipisma 4:6, 7.
[Prenki na tapoe bladzijde 29]
Kresten herder e gi kibri na jejefasi
[Prenki na tapoe bladzijde 31]
Herder fisiti na moi okasi foe gi deki-ati na jejefasi