Waktitoren LIBRARY TAPU INTERNET
Waktitoren
LIBRARY TAPU INTERNET
Sranantongo
  • BIJBEL
  • BUKU
  • KONMAKANDRA
  • w96 1/8 blz. 3-4
  • A sili no man dede?

Felem no de na a pisi disi.

Sorry, wan sani no go bun di wi pruberi fu drai a felem.

  • A sili no man dede?
  • A Waktitoren—A e taki fu Yehovah Kownukondre 1996
  • Edeprakseri
  • A srefi sortu tori
  • Wan toe aksi di sma e broko den ede nanga dati
  • Libi de, baka te wan sma dede?
    San e pasa nanga wi te wi dede?
  • Libi de, baka te wan sma dede — San sma e bribi?
    A Waktitoren—A e taki fu Yehovah Kownukondre 1999
  • O tranga a bribi foe joe de na ini na opobaka?
    A Waktitoren—A e taki fu Yehovah Kownukondre 1998
  • A sili e libi doro baka dede?
    A Waktitoren—A e taki fu Yehovah Kownukondre 1990
Moro sani
A Waktitoren—A e taki fu Yehovah Kownukondre 1996
w96 1/8 blz. 3-4

A sili no man dede?

SAFRI, mati nanga famiri e waka pasa na opo dedekisi. Nanga froewondroe den e loekoe a skin, a di foe wan boi foe 17 jari. Den mati foe en foe skoro pikinmoro no sabi en moro. Foeroe foe en wiwiri fadon foe di den dresi en nanga chemotherapie; kanker meki taki a ben kon mangri srefisrefi. Disi troetroe kan de a mati foe den? Soso wan toe wiki na fesi, a ben de nanga someni prakseri, someni aksi, someni krakti — someni libi! Ala di a mama foe a boi e krei, a e taki ibritron baka: „Tommie de moro kolokoe now. Gado ben wani taki Tommie de nanga en na hemel.”

A mama disi di e sari troetroe, e kisi pikinso howpoe nanga trowstoe foe a prakseri taki na wán noso tra fasi en manpikin e libi ete. Na kerki a mama leri taki a sili no man dede, taki a de a pisi foe a skin pe a persoonlijkheid, den prakseri, den sani di sma e memre, e tan — a „sma srefi”. A sili foe en manpikin, na so a mama e bribi, no dede kwetikweti; foe di a sili na wan libi jeje sma, meki a ben gowe libi en skin di a dede èn ben go na hemel foe tan nanga Gado èn nanga den engel.

Te sari de, dan a libisma ati e hori tranga na ibri pikinso howpoe, so boen a no moeilek foe froestan foe san ede a bribi disi e hari sma so. Loekoe, foe eksempre, a fasi fa a theoloog J. Paterson-Smyth e taki na ini The Gospel of the Hereafter: „Dede na wan pikin sani nomo te joe e teki en gersi san e kon baka dati — a toemoesi moi, toemoesi moi, toemoesi moi presi dati pe Dede e tjari wi go na ini.

Na heri grontapoe èn na ini foeroe relisi nanga koeltoeroe, sma e bribi taki libisma abi wan sili na ini den di no man dede, wan jeje di de sabisabi èn di e tan na libi baka te a skin dede. A bribi de na ini pikinmoro ala den doesoendoesoen relisi nanga sekte foe krestenhèit. A de wan officieel leri ini a djoe bribi toe. Hindoesma e bribi taki na atman, noso sili, ben meki na a bigin foe ten, a no man komoto na ini a skin te wan sma e gebore, èn te wan sma dede, a e go abra na wan tra skin foe di doronomo èn ibritron baka a e tan go ini wan tra libisani. Moslimsma e bribi taki a sili e kon na ini a skin te wan sma e gebore èn e libi go doro baka te a skin dede. Tra bribi — na Afrikan animist bribi, a Sjinto bribi, èn srefi a Boeda bribi na a wán noso tra fasi — e leri difrenti fasi foe a srefi tori disi.

Wan toe aksi di sma e broko den ede nanga dati

Ala di a denki foe wan sili di no man dede, sondro misi e hari sma prakseri na pikinmoro heri grontapoe, tokoe a e meki wan toe aksi kon di sma e broko den ede nanga dati. Foe eksempre, sma e aksi densrefi pe a sili foe wan lobiwan e go te a wan dati no libi wan boen libi. A sa go abra na wan sortoe libi di de moro lagi? Noso den e seni en go na a vagevuur, pe den sa krin en nanga jepi foe faja te leki den feni en warti nofo foe go na hemel? Moro ogri ete, a sa kisi têgo skin-ati na ini wan hèl di e bron? Noso a de, neleki san foeroe animist relisi e leri sma, wan jeje di sma moesoe satisferi?

Den sortoe idea dati e meki den libiwan abi wan froewakti di de wan hebi gi den. Wi moesoe satisferi a jeje foe wi lobiwan di dede, foe di wi frede taki den o teki refensi? Wi moesoe jepi den foe komoto na wan ogri vagevuur? Noso wi moesoe beifi nomo foe frede ede sondro foe man doe wan sani na dati te wi e prakseri foe a pina di den e pina na ini hèl? Noso wi moesoe handri nanga son libi meti leki den e tjari a sili foe libisma di dede?

Den aksi di e kon ini a tori foe Gado srefi no e gi wan sma trowstoe toe. Foe eksempre, foeroe papa nanga mama, soleki a mama di wi ben kari na a bigin, e kisi trowstoe fosi foe a denki taki Gado „ben teki” a pikin en sili di no man dede, go na hemel foe de nanga en. Ma gi foeroe sma a no e teki langa fosi den e bigin aksi densrefi sortoe Gado ben o pina wan pikin di no doe noti, nanga wan ogri sortoe siki, e poeroe a lobiwan dati wantronso foe a papa nanga mama di e sari srefisrefi, soso foe kan teki a pikin dati tjari en go na hemel bifo a ten doro di a moesoe dede. Pe a retidoe, a lobi, nanga a sari-ati de na ini so wan Gado? Son sma e tweifri srefi na a koni foe so wan Gado. Foe san ede, den e aksi, wan koni Gado ben sa poti ala den sili disi na grontapoe fosi, efoe tokoe den alamala ben sa moesoe go libi na hemel te foe kaba? Dati no ben sa wani taki, dati a meki di Gado meki grontapoe, troetroe ben de lasiten srefi? — Teki gersi Deuteronomium 32:4; Psalm 103:8; Jesaja 45:18; 1 Johanes 4:8.

Foe dati ede a de krin, taki a leri foe a libisma sili di no man dede, awansi na sortoe fasi den e leri sma a sani disi, e meki aksi kon di e broeja sma, srefi prakseri di no de akroederi makandra. Foe san ede? A moro bigi pisi foe a problema disi abi foe doe moro foeroe nanga a bigin foe a leri disi. Joe kan feni en wan froelekti foe ondrosoekoe a bigin foe a leri disi sjatoe; èn joe sa froewondroe kande foe leri san bijbel srefi e taki foe a sili. A e gi wan moro betre howpoe gi libi baka dede, leki san den relisi foe grontapoe nofotron e leri sma.

    Sranantongo buku (1978-2025)
    Log Out
    Log In
    • Sranantongo
    • Seni en gi wan sma
    • Settings
    • Copyright © 2025 Watch Tower Bible and Tract Society of Pennsylvania
    • Gebruiksvoorwaarden
    • Privacybeleid
    • Privacyinstellingen
    • JW.ORG
    • Log In
    Seni en gi wan sma