Froetrow na ini wan onvolmaakti grontapoe

„A BOEN di mi wani doe, mi no e doe, ma na ogri di mi no wani doe, na dati mi e doe.” Joe e feni taki disi de so nanga joe? Teki deki-ati foe di na apostel Paulus ben abi a srefi problema; ma tokoe a ben de wan man nanga wan toemoesi aparti kresten soifri retifasi. Disi a no wan sani di de kontrari makandra? Na ini en brifi gi den kresten na Rome, Paulus ben taki finifini foe a problema: „Efoe now mi e doe san mi no e winsi, dan a sma di e doe en a no mi moro, ma a sondoe di de ini mi.” Foe sortoe sondoe a ben taki, èn fa a ben man wini dati so taki a kon tron wan man foe soifri retifasi? — Romesma 7:19, 20.

Moro na fesi na ini en brifi, Paulus ben skrifi: „Nanga wàn man, sondoe ben kon na grontapoe èn nanga sondoe dede kon, èn na so dede panja go na ala libisma, foe di den alamala ben sondoe.” A „wàn man” ben de Adam (Romesma 5:12, 14). A sondoe foe Adam — a sondoe foe a fosi libisma, — na a reide foe san ede a libisma famiri kisi onvolmaaktifasi na den geborte èn wan prenspari reide foe san ede a de wan troetroe tjalensi foe hori soifri retifasi.

A fasi fa Paulus ben si a „fosi sondoe”, soleki fa den ben kari dati fosi, no de wan sani di sma e erken na ala presi na ini a ten disi, bika a bijbel tori foe a kria di Gado ben kria sani, na wan sani di theoloogsma no erken èn dati e horibaka gi den evolutie leri. „Den sabiman poesoe a heri pisi dati poti na wan sei”, na so wan komentaar foe disiten na tapoe Romesma 5:12-14 e taki. Ma wan hondro jari pasa kaba, bijbel komentaar ben froeklari nomonomo taki „di Adam ben sondoe . . . a ben kon flaka nanga a sondoe dati èn ala den pikin foe en leki wan bakapisi foe dati”.a

A fosi sma di lasi en soifri retifasi

Neleki fa foeroe sma no e erken taki Adam, a fosi libisma, ben bèsta, na so foeroe sma e si Satan Didibri, soso leki wan anansitori.b Ma no wan sma moro leki a toemoesi aparti sabiman, Jesus Krestes, e taigi wi taki Satan „no ben tanapoe steifi na ini waarheid”, nanga tra wortoe, a no ben de foe froetrow (Johanes 8:44). Èn a ben de a soetoe di Satan ben soetoe faja gi Adam nanga Eva, taki den ben opo densrefi teige Jehovah èn ben broko den soifri retifasi na ondro tesi. — Genesis 3:1-19.

Bika wi alamala kon foe Adam, meki wi alamala kisi a firi foe sondoe. A koni man Salomo ben taki: „No wan regtfardiki sma no de na grontapoe, di e tan doe boen èn di no e sondoe” (Preikiman 7:20). Tokoe iniwan libisma kan tron wan sma di wi kan froetrow. Fa dati kan? Bika foe hori soifri retifasi no wani taki dati wan sma moesoe de volmaakti.

A fondamenti foe soifri retifasi

Kownoe David foe Israèl ben meki foeroe fowtoe, èn wan foe den fowtoe ben de so srefi a soetadoe matifasi di a ben abi nanga Batseiba, foe san foeroe sani skrifi (2 Samuèl 11:1-27). Den foeroe fowtoe di David ben meki ben tjari kon na krin taki a no ben volmaakti srefisrefi. Ma san Jehovah ben si na ini a man disi? Di a ben taki nanga Salomo, a manpikin foe David, Jehovah ben taki: „Waka na mi fesi, neleki fa David, joe papa, ben waka, nanga soifri retifasi na ati èn nanga retifasi” (1 Kownoe 9:4). Ala di David ben meki foeroe fowtoe, tokoe Jehovah ben si a de di David ben de foe froetrow. Foe san ede?

David ben gi a piki di a ben taigi Salomo: „Jehovah e ondrosoekoe ala ati, èn a sabi ibri firi foe den prakseri” (1 Kroniki 28:9). David ben meki fowtoe, ma a ben abi sakafasi, èn a ben wani foe doe san boen. A ben tan teki piri-ai nanga froemane — ija, a ben aksi gi dati. „Ondrosoekoe mi, o Jehovah, èn tesi mi; krin den niri foe mi nanga na ati foe mi” a ben aksi (Psalm 26:2). Èn David ben kon krin troetroe. Foe eksempre, den sani di a no ben man doe bika foe a sondoe di a ben doe nanga Batseiba, ben tan te na a kaba foe en libi. Tokoe noiti David ben proeberi foe soekoe reide foe tapoe a fowtoe di a ben doe (2 Samuèl 12:1-12). Moro prenspari, noiti a ben drai baka gi a troe anbegi. Foe dati ede, èn bika foe a troetroe sari èn opregti berow foe David, meki Jehovah ben wani foe gi en pardon foe den sondoe foe en èn ben si en leki wan man foe soifri retifasi. — Loekoe so srefi Psalm 51.

Froetrow na ondro tesi

Satan Didibri ben tesi Jesus foe proeberi foe broko en soifri retifasi. Jesus ben moesoe hori en soifri retifasi na ondro problema nanga pina, èn disi ben de heri tra fasi nanga Adam, di leki wan volmaakti man, ben kisi tesi soso nanga a komando di a ben kisi foe gi jesi na wan wet foe Gado. Boiti dati, a hebi ben de na tapoe Jesus taki a ben sabi taki a froeloesoe foe a libisma famiri ben anga foe a soifri retifasi foe en. — Hebrewsma 5:8, 9.

Satan di ben abi a fasti bosroiti foe broko a soifri retifasi foe Jesus, ben go na en tapoe wan foe den moro swaki momenti foe Jesus — na baka di Jesus ben gebroiki 40 dei foe prakseri dipi èn foe faste na ini a sabana. Dri tron a ben tesi Jesus — foe meki ston tron brede; foe djompo foe a tempel skotoe nanga a froewakti taki den engel ben sa jepi en èn taki na so fasi a ben sa gi wan wondroe marki foe boeweisi taki en na a Mesias; èn foe teki a tirimakti foe ala kownoekondre foe a grontapoe disi, te a ben sa doe soso wán „sani foe anbegi” Satan. Ma Jesus ben kakafoetoe gi ibri tesi, èn na so fasi a ben tan hori en soifri retifasi na Jehovah. — Mateus 4:1-11; Lukas 4:1-13.

A soifri retifasi foe Job

A situwâsi pe Job ben de na ini di a ben hori en soifri retifasi na ondro tesi, na wan sani di foeroe sma sabi. Wan moi sani na taki Job no ben froestan foe san ede rampoe ben kon na en tapoe. A no ben sabi taki Satan ben taki dati a ben abi falsi prakseri, di Satan ben gi leki reide taki Job ben dini Gado soso gi en eigi gridi prakseri èn a ben froeklari taki Job ben sa wani foe broko en soifri retifasi foe kibri en eigi libi. Gado ben gi pasi meki Job ondrofeni wan toe kefalek takroe sani foe sori taki Satan no ben abi leti. — Job 1:6-12; 2:1-8.

Dri falsi mati ben kon na ini a tori toe. Foe espresi den ben taki na wan fowtoefasi foe den markitiki nanga den prakseri foe Gado. Srefi a wefi foe Job di no ben man froestan na afersi toe, no ben gi en masra deki-ati na tapoe a ten di a ben abi dati tranga fanowdoe (Job 2:9-13). Ma Job ben tanapoe kánkan. „Te leki mi lasti bro, mi no sa libi mi soifri retifasi! Na mi geregtighèit mi tan hori, èn mi no sa meki a gowe; mi ati no sa spotoe mi gi iniwan foe den dei foe mi.” — Job 27:5, 6.

A toemoesi boen eksempre foe Job, makandra nanga a soifri retifasi foe foeroe tra getrow mansma nanga oemasma, soleki fa dati skrifi na ini bijbel, e sori taki Satan na wan leiman.

Soifri retifasi èn a kresten diniwroko

Soifri retifasi na wan eigifasi di Jehovah e warderi soso gi en eigi satisfaksi? Nôno. Soifri retifasi abi wan toemoesi bigi waarde gi wi leki libisma. A ben de gi a boen foe wi taki Jesus ben froemane wi foe ’lobi Jehovah wi Gado, nanga wi heri ati èn nanga wi heri sili èn nanga wi heri froestan’. Foe troe, disi na „a moro bigi èn fosi komando”, èn soso wan man, wan oema, nanga wan pikin di abi soifri retifasi kan gi jesi na a komando disi (Mateus 22:36-38). Nanga san soifri retifasi abi foe doe, èn san na den boen pai?

Wan sma di abi soifri retifasi de foe froetrow, no soso gi en kompe libisma, ma moro prenspari, gi Gado. A soifrifasi foe en ati de foe si na den sani di a e doe; a no abi hoigrifasi. A no e bidrigi noso e doe kroektoedoe. Na apostel Paulus ben taki en na a fasi disi: „Wi gowe libi den lagi sani gi san wi ben moesoe sjen, foe di wi no e waka nanga trikifasi, èn no e meki a wortoe foe Gado falsi, ma foe di wi e meki a waarheid kon de foe si, meki wi e rikomanderi wisrefi na a konsensi foe ibri sma, na fesi na ai foe Gado.” — 2 Korentesma 4:2.

Loekoe taki Paulus e kari eigifasi di abi foe doe nanga a kresten diniwroko. Fa wan kresten bedinari kan dini tra sma te en eigi anoe no krin, efoe a no de wan sma di abi soifri retifasi? Na edeman foe wan relisi groepoe na Ierland, di ben saka en wroko no so langa pasa, de wan boen eksempre foe a tori. A ben erken taki a „ben gi pasi meki wan pedofilie priester tan wroko nanga pikin-nengre langa ten na baka di a mesbroiki di a ben mesbroiki pikin-nengre na seks sei ben kon bekènti”, na so The Independent koranti skrifi. A verslag ben tjari kon na krin taki a ben mesbroiki pikin-nengre na seks sei moro leki 24 jari langa. A priester ben sroto fo jari na ini strafoe-oso, ma prakseri foe a pina di a tjari na tapoe den pikin di a ben doe ogri na ini den jari dati, bika en edeman no ben abi moreel soifri retifasi foe doe wan sani!

Soifri retifasi — Den pai

Na apostel Johanes ben de wan man di no ben e frede. Foe di den ben abi so wan faja fasi foe doe sani, Jesus ben kari en nanga en brada, Jakobus, „Manpikin foe dondroe” (Markus 3:17). Johanes, wan man di abi toemoesi aparti soifri retifasi, makandra nanga Petrus, ben tjari kon na krin gi den djoe tiriman taki a „no ben kan tapoe foe taki” foe den sani di a ben si èn ben jere di a ben de nanga Jesus. Johanes ben de so srefi wan foe den apostel di ben taki: „Wi moesoe gi jesi na Gado leki tiriman moro leki na libisma.” — Tori foe den Apostel 4:19, 20; 5:27-32.

A sori taki di Johanes ben doro pikinmoro 100 jari den ben seni en gowe na ini katibo na a èilanti Patmos ’foe di a ben e taki foe Gado èn ben e gi kotoigi foe Jesus’ (Openbaring 1:9). Nanga a jari di a ben abi, a ben kan prakseri kande taki en diniwroko ben kon na wan kaba. Ma soso wan man di abi so wan soifri retifasi leki en ben kan kisi a wroko foe skrifi a span fisjoen foe Openbaring. Johanes ben de getrow na ini a wroko disi. Dati ben de wan bigi grani gi en srefisrefi! Èn moro grani ben de na pasi e kon. Baka ten, soleki fa a sori, na ini a birti foe Efeise, a ben skrifi na Evangelie-tori foe en èn dri brifi. Den sortoe grani disi ben de a heimarki foe 70 jari getrow diniwroko!

Foe de wan sma di abi soifri retifasi, e gi foeroe satisfaksi. Te wan sma de foe froetrow na ini Gado ai dan dati e tjari tego pai kon. Na ini a ten disi „wan bigi ipi” foe troe anbegiman e sreka foe go na ini wan njoen grontapoe foe vrede èn wánfasi, nanga a froewakti foe têgo libi (Openbaring 7:9). Soifri retifasi na ini prenspari afersi foe moraliteit nanga foe anbegi, moesoe hori hei, awansi tesi foe a seti foe sani disi èn den foeroe tjalensi di Satan kan tjari kon na wi tapoe, de. Abi a djaranti taki nanga a krakti di Jehovah e gi, joe kan abi boen bakapisi! — Filipisma 4:13.

Di a psalm singiman David ben taki foe nownowde èn foe a ten di e kon, a ben gi wi alamala a djaranti di a e taki na ini wan begi foe tangi gi Jehovah: „Foe mi sei, bika foe a soifri retifasi foe mi, joe horibaka gi mi, èn joe sa poti mi na joe fesi te ten di no skotoe. Blesi foe Jehovah . . . Amen èn Amen.” — Psalm 41:12, 13.

[Foetoewortoe]

[Prenki na tapoe bladzijde 4]

Ala di a ben meki fowtoe, David ben sori taki a warti foe froetrow

[Prenki na tapoe bladzijde 5]

Jesus ben gi wi a moro moi eksempre foe wan sma di de foe froetrow

[Prenki na tapoe bladzijde 7]

Te wi de foe froetrow, dan dati e gi foeroe satisfaksi