Epafras — „Wan getrow bedinari foe Krestes”

SOEMA ben opo den kresten gemeente na Korente, Efeise, nanga Filipi? Kande joe no ben sa draidrai foe piki: ’Paulus, na „apostel foe den nâsi”’ (Romesma 11:13). Joe ben sa abi leti.

Ma soema ben seti den gemeente na Kolose, Hièrapolis, nanga Laodisea? Ala di wi no man de seiker, a ben kan de wan man di nen, Epafras. Ma, kande joe ben sa wani sabi moro foe a preikiman disi, foe di den e kari en „wan getrow bedinari foe Krestes”. — Kolosesma 1:7.

Preikiman foe a Lykos Lagipresi

A nen Epafras na wan sjatoe nen foe a nen Epafroditus. Ma wi no moesoe broeja Epafras nanga a Epafroditus foe Filipi. Epafras ben de foe Kolose, wan foe den dri centrum foe den kresten gemeente na a Lykos Liba lagipresi, na Pikin Asia. Kolose ben didon 18 kilometer foe Laodisea èn 19 kilometer foeHièrapolis, na a owroeten kontren foe Frigia.

Bijbel no e taki krinkrin fa a boen njoensoe foe Gado Kownoekondre ben doro Frigia. Ma Frigiasma ben de na Jerusalem na tapoe a dei foe a Pinksterfesa na ini 33 G.T., èn kande wan toe foe den ben kon foe Kolose (Tori foe den Apostel 2:1, 5, 10). Na a ten foe Paulus en diniwroko na Efeise (wan sani foe 52-55 G.T.), a kotoigi di ben e gi na a kontren dati ben de so fajafaja èn ben abi so foeroe boen bakapisi, taki no wawan den Efeisesma ma so srefi „ala den sma di ben libi na a distrikt Asia, ben jere a wortoe foe a Masra, den djoe nanga den Grikisma” (Tori foe den Apostel 19:10). A ben sa gersi taki Paulus no ben preiki a boen njoensoe na a heri kontren foe a Lykos Lagipresi, foe di foeroe sma di ben kon tron kresten na ini a kontren dati noiti no ben si en. — Kolosesma 2:1.

Soleki fa Paulus ben taki, a sma di ben leri den Kolosesma foe „a no-froedini boen-atifasi foe Gado na ini waarheid”, ben de Epafras. A troetori taki Paulus ben kari a kompe wrokoman disi „wan getrow bedinari foe Krestes gi a boen foe wi”, e sori taki Epafras ben de wan fajafaja evangelie preikiman na ini a kontren. — Kolosesma 1:6, 7.

Na apostel Paulus èn so srefi Epafras ben broko den ede srefisrefi gi a gosontoe na jejefasi foe den kompe bribiman na a Lykos Lagipresi. Leki na „apostel foe den nâsi”, Paulus ben moesoe breiti foe kisi njoensoe taki den e gro. Ija, a ben de foe Epafras di Paulus ben jere foe a jeje situwâsi foe den Kolosesma. — Kolosesma 1:4, 8.

A verslag foe Epafras

Den Kolosesma ben ondrofeni nofo serjoesoe problema taki a no ben de fanowdoe foe overtoigi Epafras foe teki a langa waka go na Rome nanga a spesroetoe marki foe taki foe den afersi disi nanga Paulus. A finifini verslag di Epafras ben meki, seiker ben de a sani di ben boeweigi Paulus foe skrifi toe brifi gi den brada dati di a no ben sa sabi na wan tra fasi. Wán ben de a brifi gi den Kolosesma. A tra brifi, di soleki fa a sori a no hori na baka, ben seni go gi den Laodiseasma (Kolosesma 4:16). A de reidelek foe denki taki den sani di ben skrifi na ini den brifi dati, ben de foe doe wan sani na tapoe den sani di den kresten dati ben abi fanowdoe soleki fa Epafras ben si dati. San a ben si taki den ben abi fanowdoe? Èn san disi e taigi wi foe a sma di a ben de?

A gersi taki a brifi gi den Kolosesma e sori taki Epafras ben broko en ede taki den kresten na Kolose ben de na ini kefar foe den heiden filosofia di abi foe doe nanga a strak di wan sma strak toemoesi gi ensrefi, foe abi prisiri, afkodrei, nanga kroektoe bribi di abi foe doe nanga na anbegi foe kroektoe gado. Moro fara, a leri di den djoe ben gi taki sma no moesoe gebroiki njanjan èn taki den moesoe hori spesroetoe dei, kande ben abi krakti na tapoe wan toe memre foe a gemeente. — Kolosesma 2:4, 8, 16, 20-23.

Taki Paulus e skrifi foe den tori disi, e sori wi fa Epafras ben de na ai èn o boen a ben man si den sani di en kompe kresten ben abi fanowdoe. A ben sori taki a e broko en ede na wan lobi fasi gi a gosontoe foe den na jejefasi, foe di a sabi den kefar foe a kontren pe den ben libi na ini. Epafras ben soekoe a rai foe Paulus, èn disi e sori taki a ben abi sakafasi. Kande a ben firi taki a ben abi rai fanowdoe foe wan sma di abi moro ondrofeni leki en. Awansi fa, Epafras ben handri na wan koni fasi. — Odo 15:22.

Wan man di ben warderi begi

Na a kaba foe a brifi di a ben seni gi den kresten foe Kolose, Paulus e taki: „Epafras, di kon foe oenoe, wan srafoe foe Krestes Jesus, e seni oenoe den odi foe en, èn ala ten a e meki tranga moeiti gi oenoe na ini den begi foe en, so taki te foe kaba, oenoe kan tanapoe dorodoro èn nanga tranga overtoigi na ini a heri wani foe Gado. Mi e gi kotoigi foe en troetroe taki a e doe foeroe moeiti gi a boen foe oenoe èn gi den sma na Laodisea èn den sma na Hièrapolis.” — Kolosesma 4:12, 13.

Ija, srefi ala di a ben de wan „kompe strafoeman” nanga Paulus na Rome, Epafras ben e prakseri den lobi brada foe en na Kolose, Laodisea, nanga Hièrapolis èn a ben e begi gi den (Fileimon 23). Foe taki en leti, ’a ben feti’ gi den na ini begi. Akroederi a sabiman D. Edmond Hiebert, a Griki wortoe di gebroiki djaso e sori go na „wan boen tranga wroko èn wan wroko pe foeroe òfer moesoe tjari”, wan sani di de a srefi leki a „hebi banawtoe” na froestan sei di Jesus Krestes ben ondrofeni di a ben begi na ini a djari foe Getsemane (Lukas 22:44). Epafras ben wani srefisrefi taki den brada nanga sisa foe en na jejefasi ben moesoe tanapoe steifi èn kon lepi dorodoro leki kresten. Wan brada di ben abi so wan jejefasi ben moesoe de wan bigi blesi gi den gemeente!

Foe di den ben kari Epafras wan „lobi kompe srafoe”, a ben de seiker so, taki a ben meki den kompe kresten ben lobi en (Kolosesma 1:7). Te a kan, dan ala memre foe a gemeente moesoe gi densrefi nanga den heri ati, na wan waran fasi èn nanga lobi. Foe eksempre, wi kan prakseri foe jepi den sikisma, den owroesma, noso tra sma di abi spesroetoe jepi fanowdoe. Kande difrenti frantiwortoe de foe sorgoe na ini a gemeente, noso a kan foe man jepi theokrasia bow wroko.

Foe begi gi tra sma, soleki fa Epafras ben doe, na wan fasi foe doe santa diniwroko di ala sma kan doe. Den sortoe begi disi kan abi wortoe na ini di e sori taki joe e broko joe ede gi den anbegiman foe Jehovah di abi foe miti difrenti kefar noso moeilekhèit na jeje sei noso na skin sei. Te wi e doe tranga moeiti na a fasi disi, wi kan de leki Epafras. Ibriwan foe wi kan abi a grani èn prisiri foe sori taki wi de wan „lobi kompe srafoe” na ini a famiri foe den getrow foetoeboi foe Jehovah.