Te sondoe no de moro

„WI GEBORE na ini sondoe?” Sjatoe baka di wan studenti na Amerkankondre, di ben komoto boen na heiskoro, ben bigin studeri bijbel, a no ben man froestan na aksi dati krin. Foe di a ben abi wan Hindoe background, meki a prakseri taki sma kisi sondoe foe papa nanga mama ben de wan freimde sani gi en. Ma efoe sma troetroe kisi sondoe foe papa nanga mama, na so a ben prakseri, dan a ben sa de foe soso taki sma e taki dati sondoe no de troetroe noso taki den e loekoe pasa en. Fa wan sma ben kan feni a piki na tapoe na aksi disi?

Efoe sma kisi sondoe foe papa nanga mama, dan a ben moesoe abi wan bigin. Gado ben kria a fosi libisma leki wan godelowsoe sma, so taki a ben gi ogri eigifasi abra na den pikin foe en? Noso a fowtoe ben kon baka ten? Soifri o ten sondoe ben bigin? Na a tra sei, efoe sondoe de soso wan ogri eigifasi noso gronprakseri di dorosei foe wi skin, dan oiti wi kan howpoe foe kon fri foe en?

Soleki fa a Hindoe bribi e taki, dan pina nanga ogri na sani di e kon makandra nanga a kria foe sani. „Pina [noso ogri]”, wan Hindoe sabiman e taki, „e boeweigi soso foe a wán presi go na a trawan, ma joe no kan poeroe en dorodoro, neleki fa a de nanga a rheuma siki di e go nanga langa.” Ogri seiker ben de wan pisi foe a grontapoe foe libisma na ini a heri historia di skrifi poti na boekoe. Efoe a de bifo a ten di sma skrifi sani foe a historia foe libisma, dan piki di wi kan froetrow èn di e froeteri wi fa a ben bigin, moesoe kon foe wan fonten di hei moro leki di foe libisma. A piki moesoe kon foe Gado. — Psalm 36:9.

Libisma — Gado ben kria en sondro sondoe

Den Vedas e taki na wan agersi fasi fa libisma ben kria, na so a Hindoe filosoofman Nikhilananda e taki. Na so, moro foeroe relisi di komoto na Asia, e froeklari nanga jepi foe anansitori wawan fa sani kria. Ma tokoe reide de, di de krin foe froestan èn di sabidensi e horibaka gi, foe bribi a tori foe bijbel di e taki foe a kria di Gado kria a fosi libisma.a A fosi kapitel kaba e taki: „Gado ben go moro fara foe kria libisma leki a prenki foe en, akroederi a prenki foe Gado a ben kria en; leki man èn leki oema a ben kria den.” — Genesis 1:27.

San a wani taki dati Gado kria libisma ’leki a prenki foe Gado’? Disi nomo: Libisma ben meki na a fasi foe Gado, èn a abi den eigifasi foe Gado — soleki retidoe, koni, nanga lobi — di ben meki en de tra fasi leki meti. (Teki gersi Kolosesma 3:9, 10.) Den eigifasi disi ben meki taki a ben man bosroiti efoe a ben wani doe boen noso ogri, san ben meki en de wan sma nanga wan friwani. No wan sondoe no ben de na ini a fosi libisma, no wan ogri noso pina ben de na ini en libi, di Gado ben kria en.

Jehovah Gado ben gi a libisma Adam a komando disi: „Foe ibri bon foe a djari joe mag njan te joe bere foeroe. Ma foe a bon foe sabi boen nanga ogri, foe dati joe no moesoe njan, bika na a dei di joe sa njan foe dati, joe sa dede nomonomo” (Genesis 2:16, 17). Efoe Adam nanga en wefi, Eva, ben o froekisi foe gi jesi na Gado, dan den ben kan gi prèise nanga grani na a Kriaman foe den èn tan sondro sondoe. Na a tra sei, efoe den ben o trangajesi, dan dati ben o sori taki den no ben doro den volmaakti markitiki foe Gado èn den ben o kon de onvolmaakti — den ben o abi sondoe.

Gado no ben kria Adam nanga Eva foe de leki wan gado. Ma den ben abi wan toe eigifasi foe Gado èn den ben man teki bosroiti na moreel sei. Foe di den ben de a kriatoeroe foe Gado, meki den ben de sondro sondoe, noso volmaakti (Genesis 1:31; Deuteronomium 32:4). Na ini ala den jarihondro te leki a ten dati a de di den ben kon de, no ben pori a wánfasi di ben de na mindri Gado nanga na universum. Ma fa sondoe ben bigin dan?

Fa sondoe ben bigin

Sondoe ben kon de fosi na ini a jeje kondre. Bifo Gado ben kria grontapoe nanga libisma, a ben kria koni jeje kriatoeroe — den engel (Job 1:6; 2:1; 38:4-7; Kolosesma 1:15-17). Wan foe den engel disi ben prakseri boen foeroe foe a moi di a ben moi èn foe a koni foe en. (Teki gersi Esekièl 28:13-15.) Na a komando di Gado ben gi Adam nanga Eva foe kisi pikin, na engel disi ben kan si taki heri esi heri grontapoe ben o foeroe nanga regtfardiki sma, di alamala ben o anbegi Gado (Genesis 1:27, 28). A jeje kriatoeroe disi ben wani na anbegi foe den gi ensrefi (Mateus 4:9, 10). Foe di a ben tan poti prakseri na tapoe a lostoe disi, meki a go waka wan pasi di no ben boen. — Jakobus 1:14, 15.

Di na oproeroe engel disi ben taki nanga Eva nanga jepi foe wan sneki, dan a ben taki dati foe di Gado no ben gi sma pasi foe njan foe a froktoe foe a bon foe sabi boen nanga ogri, meki A ben hori sabi di Eva ben moesoe abi, gi Ensrefi (Genesis 3:1-5). A sani dati di a ben taki, ben de wan ogri-ati lei — wan sondoe. Foe di na engel ben taki a lei disi, dan a ben meki ensrefi tron wan sondari. A bakapisi ben de taki den ben kari en Didibri, wan ogri-ati leiman, nanga Satan, wan gensman foe Gado. — Openbaring 12:9.

Den sani di Satan ben taki foe overtoigi Eva ben abi wan takroe bakapisi gi Eva. Foe di Eva ben froetrow tapoe den wortoe foe a Tesiman, dan a meki a disi kori en èn a ben njan pikinso foe a froktoe foe a bon di a no ben mag njan. En masra, Adam, ben njan foe a froktoe toe, èn na a fasi dati den ala toe ben tron sondari (Genesis 3:6; 1 Timoteus 2:14). A de krin taki, foe di wi fosi papa nanga mama ben froekisi foe trangajesi Gado, meki den ben misi a marki foe volmaaktifasi èn ben meki densrefi tron sondari.

Fa a de nanga den bakapikin foe Adam nanga Eva? Bijbel e tjari kon na krin: „Nanga wán man, sondoe ben kon na grontapoe èn nanga sondoe dede kon, èn na so dede panja go na ala libisma, foe di den alamala ben sondoe” (Romesma 5:12). A wet di abi foe doe nanga a kisi di sma e kisi eigifasi foe papa nanga mama bifo den gebore, ben e wroko kaba. Adam no ben man gi wan sani na den pikin foe en di a no ben abi (Job 14:4). Foe di a fosi trowpaar ben lasi volmaaktifasi, meki den ben de sondari di den ben kisi den pikin foe den. A bakapisi de, taki wi alamala — sondro foe libi wán sma — kisi sondoe foe papa nanga mama (Psalm 51:5; Romesma 3:23). Sondoe foe en sei, tjari noti moro leki ogri nanga pina kon. Boiti dati, na foe disi ede meki wi alamala e kon owroe èn dede, „bika a pai foe sondoe na dede.” — Romesma 6:23.

A konsensi ’e gi sma a fowtoe’ noso a ’e regtfardiki den’

Loekoe ete wan tra fasi fa sondoe ben abi krakti na tapoe a fasi fa a fosi libisma paar ben tjari ensrefi. Den ben tapoe pisi foe den skin èn ben proeberi foe kibri densrefi gi Gado (Genesis 3:7, 8). Na so fasi, sondoe gi den a firi taki den ben fowtoe, a ben broeja den, èn a ben meki den firi sjen. Libisma na ini a ten disi sabi den firi disi heri boen.

Soema no ben firi froeferi foe di a no ben sori boen-atifasi na wan sma di ben de na ini nowtoe noso soema no ben sari foe di a taki sani di noiti a no ben moesoe taki? (Jakobus 4:17) Foe san ede wi abi den sortoe firi dati di e trobi wi? Na apostel Paulus e tjari kon na krin taki ’a wet skrifi na ini wi ati’. Efoe a konsensi foe wi no kon tranga, dan ibriwan sani di wi e doe kontrari a wet dati, e meki taki wi e firi broeja. So boen, a de a sten foe a konsensi di ’e gi wi a fowtoe’ noso di ’e regtfardiki’ wi (Romesma 2:15; 1 Timoteus 4:2; Titus 1:15). Efoe wi sabi disi efoe no, na inisei wi abi wan sani di e taigi wi taki wi e doe ogri, taki wi e sondoe!

Paulus ben sabi den sondoe firi foe en heri boen. „Te mi winsi foe doe san boen, dan takroe de na ini mi,” a ben taki. „Mi e prisiri troetroe foe a wet foe Gado akroederi a sma di mi de na inisei, ma na ini den memre foe mi skin mi e si wan tra wet e feti nanga a wet foe mi froestan èn di e tjari mi go na ini katibo foe a wet foe a sondoe di de na ini den memre foe mi skin.” So boen Paulus ben aksi: „Soema sa froeloesoe mi foe a skin di e ondrofeni a dede disi?” — Romesma 7:21-24

Kon fri foe sondoe — Fa?

„Na ini a Hindoe leri,” wan sabiman e taki, „fri na te wan sma e kon fri foe a gebore di a kon gebore èn a dede di a e dede ibritron baka.” Leki wan loesoe, a Boeda bribi e sori so srefi na tapoe Nirvana — wan fasi pe wan sma e frigiti krinkrin san e pasa na en lontoe. A Hindoe bribi, di no kon froestan a leri di abi foe doe nanga sondoe di sma kisi foe papa nanga mama, e pramisi nomo taki sma man lowe komoto na a de di wan sma de na libi.

Na a tra sei, a fasi fa bijbel e taki dati fri sa kon, abi leki bakapisi taki sondoe fasi o poeroe na pasi. Baka di na apostel Paulus e aksi fa a kan kon fri foe sondoe, a e go doro foe piki: „Tangi foe Gado nanga jepi foe Jesus Krestes, wi Masra!” (Romesma 7:25) Ija, froeloesoe e kon foe Gado nanga jepi foe Jesus Krestes.

Soleki fa na Evangelie foe Mateus e taki en, dan „a Manpikin foe libisma”, Jesus Krestes ben kon „foe gi en sili leki wan loesoe-paiman ini a presi foe foeroe sma” (Mateus 20:28). Soleki fa a skrifi na ini 1 Timoteus 2:6, dan Paulus ben skrifi taki Jesus „ben gi ensrefi leki wan srefi sortoe loesoe-paiman gi ala sma”. A wortoe „loesoe-paiman” wani taki foe pai a moni foe froeloesoe wan sma di den tjari go sroto. Taki disi na wan srefi sortoe loesoe-paiman e sori tapoe a krakti di a prijs abi foe tjari a reti wegi foe retidoe kon ini balansi. Ma fa a dede foe wán man ben kan de leki „wan srefi sortoe loesoe-paiman gi ala sma”?

Adam ben seri a heri libisma famiri, so srefi wi, gi sondoe nanga dede. A prijs, noso strafoe, di a ben pai ben de en volmaakti libisma libi. Foe man tapoe na olo disi, wan tra volmaakti libisma libi — wan srefi sortoe loesoe-paiman — ben moesoe gi leki pai (Exodus 21:23; Deuteronomium 19:21; Romesma 5:18, 19). Foe di no wan onvolmaakti libisma no ben kan gi a loesoe-paiman disi, meki Gado, na ini en koni di no abi kaba, ben opo wan pasi foe komoto na ini a takroe situwâsi disi (Psalm 49:6, 7). A ben tjari a volmaakti libi foe en wan-enkri gebore Manpikin foe hemel abra na ini a bere foe wan njoenwenke na grontapoe, so taki a ben gebore leki wan volmaakti libisma. — Lukas 1:30-38; Johanes 3:16-18.

Efoe Jesus ben wani doe a wroko foe froeloesoe a libisma famiri, dan a ben moesoe tan sondro fowtoe a heri pisi ten di a ben de na grontapoe. Èn na dati a ben doe. Baka dati, a dede wan ofrandi dede. Na a fasi disi, Jesus ben sorgoe taki a waarde foe wan volmaakti libisma libi — en eigi libi — ben o de foe pai wan loesoe-paiman foe froeloesoe a libisma famiri. — 2 Korentesma 5:14; 1 Petrus 1:18, 19.

San a loesoe-paiman foe Krestes kan doe gi wi

A froeloesoe-ofrandi foe Jesus kan tjari wini kon gi wi nownowde. Te wi e sori bribi na ini en, dan wi kan abi wan krin posisi na fesi Gado èn kan kon ondro a lobi-ati èn safoe-ati sorgoe foe Jehovah (Tori foe den Apostel 10:43; Romesma 3:21-24). Na presi taki den sondoe di wi doe kande, e teki wi abra, wi kan aksi Gado pardon na wan fri fasi tapoe a fondamenti foe a loesoe-paiman. — Jesaja 1:18; Efeisesma 1:7; 1 Johanes 2:1, 2.

Na ini a ten di moesoe kon ete, a loesoe-paiman sa meki taki a libisma famiri e kon betre dorodoro foe a siki situwâsi di sondoe tjari kon. A lasti boekoe foe bijbel e taki foe „wan liba foe watra foe libi” di e kon foe a kownoestoeroe foe Gado. Na sei a libakanti joe abi froktoebon di e tjari froktoe bogobogo èn di abi wiwiri „foe dresi den nâsi” (Openbaring 22:1, 2). Na agersifasi, bijbel e taki djaso foe a toemoesi moi sani di a Kriaman seti foe fri a libisma famiri foe sondoe nanga dede foe têgo tapoe a fondamenti foe Jesus en froeloesoe-ofrandi.

Djonsro den fisjoen di taki nanga jepi foe profeititori na ini a boekoe Openbaring sa kon troe (Openbaring 22:6, 7). Dan ala reti-ati sma sa kon volmaakti, èn ’kon fri foe a katibo foe pori’ (Romesma 8:20, 21). Disi no moesoe boeweigi wi foe leri moro foe Jehovah Gado nanga en loyaal Manpikin, Jesus Krestes, di ben tron a loesoe-paiman? — Johanes 17:3.

[Foetoewortoe]

[Prenki na tapoe bladzijde 6]

Adam ben tjari sondoe nanga dede kon na tapoe a libisma famiri

[Prenki na tapoe bladzijde 7]

A froeloesoe-ofrandi foe Jesus e meki wi kon fri foe sondoe nanga dede