Libi gi a ten disi noso gi wan têgo tamara?
„Wi ben kisi froeloesoe na ini a howpoe disi.” — ROMESMA 8:24.
1. San den Epicuriasma ben leri trawan, èn fa a filosofia dati ben abi krakti na tapoe wan toe kresten?
NA APOSTEL Paulus ben skrifi gi den kresten di ben libi na ini Korente: „Fa a doe kon taki son wan foe oenoe e taki dati wan opobaka foe den dedewan no de?” (1 Korentesma 15:12) Soleki fa a sori, dan a kefalek takroe filosofia foe a Griki koniman Epicurus ben abi boen foeroe krakti na tapoe a prakseri foe den fosi jarihondro kresten. Dati meki Paulus ben poti prakseri na tapoe na Epicuria leri: „Meki wi njan èn dringi, bika tamara wi o dede” (1 Korentesma 15:32). Den bakaman foe a filosoofman ben wisiwasi ala howpoe foe wan libi baka dede, èn den ben bribi taki prisiri na skinfasi na a wan-enkri noso a moro prenspari boen sani na ini libi (Tori foe den Apostel 17:18, 32). A filosofia foe Epicurus ben poti prakseri na tapoe a sma srefi, a no ben bribi na ini na opregtifasi foe sma èn a ben pori krinkrin.
2. (a) Foe san ede a ben de so wan ogri sani foe taki dati na opobaka no de? (b) Fa Paulus ben tranga a bribi foe den kresten na Korente?
2 A taki disi di sma ben taki dati na opobaka no ben de, ben abi boen foeroe bakapisi. Paulus ben taki: „Efoe troetroe wan opobaka foe den dedewan no de, dan Krestes no opo baka toe. Ma efoe Krestes no opo baka, dan a preiki foe wi seiker de foe soso, èn a bribi foe wi de foe soso. . . . Efoe na ini a libi disi nomo wi howpoe tapoe Krestes, dan foe ala sma wi de a wan di de foe sari moro ala sma” (1 Korentesma 15:13-19). Ija sondro a howpoe tapoe wan têgo tamara, a krestendom ben o de „foe soso”. A ben o de sondro wan marki. Foe dati ede, a no de foe froewondroe taki na ondro a krakti foe a heiden prakseri disi, a gemeente na Korente ben tron wan presi pe problema ben lai (1 Korentesma 1:11; 5:1; 6:1; 11:20-22). Foe dati ede, Paulus ben wani foe tranga a bribi di den ben bribi na ini na opobaka. Nanga a gebroiki di a ben gebroiki wan krakti èn logis fasi foe denki di abi foeroe krakti, tekst na ini bijbel, nanga agersitori, a ben boeweisi sondro foe sma ben man tweifri na dati, taki na opobaka howpoe no ben de wan anansitori, ma wan troe sani di ben o kon troe seiker. Foe dati ede, a ben kan gi den kompe bribiman foe en tranga: „Kon de kánkan, no beifi, abi ala ten foeroe foe doe na ini a wroko foe Masra, foe di oenoe sabi taki a wroko foe oenoe no de foe soso ini a tori foe Masra.” — 1 Korentesma 15:20-58.
„Tan hori wakti”
3, 4. (a) Sortoe takroe prakseri, sma ben sa kan kisi na ini den lasti dei, soleki fa Petrus e taki? (b) Na sortoe sani wi moesoe tan memre wisrefi?
3 Na ini a ten disi, foeroe sma abi wan fasi di e sori taki den no abi howpoe gi a tamara, èn den e libi soso gi a dei foe tide (Efeisesma 2:2). A de soleki fa na apostel Petrus ben taki na fesi. A ben taki foe „spotoeman . . . nanga den spotoe foe den . . . [di] e taki: ’Pe a denoja disi foe en de di den ben pramisi? Bika sensi den dei di den afo foe wi fadon na sribi ini dede, ala den sani ben tan soifri leki fa a ben de sensi di Gado bigin kria sani’” (2 Petrus 3:3, 4). Efoe troe anbegiman ben broko kindi gi so wan prakseri, dan den ben sa kan tron sma di „de inaktief noso di no e tjari froktoe” (2 Petrus 1:8). Kolokoe taki dati no de so nanga a moro bigi pisi foe Gado en pipel na ini a ten disi.
4 A no de wan fowtoe sani foe abi belangstelling gi a kaba foe a disiten godelowsoe seti foe sani, di de na pasi. Prakseri baka foe a belangstelling di Jesus en eigi apostel ben abi: „Masra, na ini a ten disi joe e opo a kownoekondre gi Israèl baka?” Jesus ben piki: „A no de wan sani foe oenoe foe kon sabi den ten noso pisi ten di a Tata poti na ondro en eigi makti” (Tori foe den Apostel 1:6, 7). Den wortoe dati abi a fondamenti boskopoe na ini di a ben taki foe dati na tapoe na Olijfbergi: „Oenoe no sabi sortoe dei oen Masra e kon. . . . A Manpikin foe libisma e kon na wan joeroe di oenoe no ben prakseri” (Mateus 24:42, 44). Wi moesoe tan memre wisrefi na a rai dati! A prakseri disi: ’Kande mi moesoe doe sani safrisafri pikinso, èn no poti someni prakseri na tapoe a kaba di e kon’, kan kori son sma. Dati ben o de wan bigi fowtoe! Loekoe Jakobus nanga Johanes, den „Manpikin foe dondroe”. — Markus 3:17.
5, 6. Sortoe sani wi kan leri foe den eksempre foe Jakobus nanga Johanes?
5 Wi sabi taki Jakobus ben de wan apostel di ben de fajafaja troetroe (Lukas 9:51-55). Di a kresten gemeente ben opo kaba, dan a moesoe de so taki a ben plèi wan prenspari ròl. Ma di Jakobus no ben owroe ete, dan Herodes Agripa I ben meki sma kiri en (Tori foe den Apostel 12:1-3). Joe denki taki Jakobus, di a ben si taki a libi foe en ben e kon na wan kaba onfroewakti, ben sari taki a ben de nanga faja na so wan fasi, taki a ben span ensrefi na ini a diniwroko foe en? Kwetikweti! Seiker a ben breiti taki a ben gebroiki den moro boen jari foe en sjatoe libi, te joe teki disi gersi di foe trawan, na ini a diniwroko foe Jehovah. We, no wan foe wi kan sabi efoe a libi foe wi ben sa kon na wan kaba onfroewakti. (Preikiman 9:11; teki gersi Lukas 12:20, 21.) So boen, a de wan koni sani krinkrin foe tan de fajafaja troetroe èn foe wroko tranga na ini a dini di wi e dini Jehovah. Na a fasi dati wi sa tan hori a boen nen di wi abi na en èn tan libi nanga wi têgo tamara na prakseri. — Preikiman 7:1.
6 Wan tra lès de, di abi foe doe nanga na apostel Johanes, di ben drape di Jesus ben gi tranga fajafaja: „Tan hori wakti” (Mateus 25:13; Markus 13:37; Lukas 21:34-36). Johanes ben teki a rai dati, èn a ben dini fajafaja foeroe tenti jari langa. Foe taki en leti, a gersi leki a dede leki lastiwan foe ala den tra apostel. Di Johanes ben owroe moi kaba, èn a ben man loekoe baka na den someni tenti jari foe getrow wroko, dan a ben si en leki wan fowtoe di a ben meki, leki wan libi di a no ben seti boen, noso di no ben de na ini balansi? Nôno, kwetikweti! A ben tan froewakti a tamara fajafaja ete. Di Jesus, di ben kisi wan opobaka, ben taki: „Ija, mi e kon esi-esi”, dan Johanes ben piki wantewante: „Amen! Kon, Masra Jesus” (Openbaring 22:20). Johanes no ben libi gi a dei foe tide kwetikweti, e angri foe doe sani safrisafri èn libi wan ’normaal libi’ sondro toemoesi foeroe broeja. A ben abi a fasti bosroiti foe tan dini en heri libi langa èn nanga ala en krakti, awansi o ten Masra ben o kon. Fa a de nanga wi?
Fondamenti foe bribi na ini têgo libi
7. (a) Fa a howpoe tapoe a têgo libi „ben pramisi bifo ten di pasa someni langa kaba”? (b) Fa Jesus ben gi moro bodoi foe a howpoe tapoe a têgo libi?
7 Wi kan de seiker, taki a howpoe tapoe têgo libi no de wan dren noso wan anansitori di libisma meki. Soleki fa Titus 1:2 e taki, dan a gi di wi gi wisrefi na ini a dini foe Gado abi en gron tapoe „wan howpoe tapoe a têgo libi, di Gado, di no man lei, ben pramisi bifo ten di pasa someni langa kaba”. Biginbigin, Gado ben abi na prakseri foe meki ala libisma di e gi jesi, libi foe têgo (Genesis 1:28). Noti, srefi na oproeroe di Adam nanga Eva ben meki, no kan gens a prakseri disi. Soleki fa a skrifi na ini Genesis 3:15, dan wantewante Gado ben pramisi wan „siri” di ben o poeroe ala na ogri di ben kon na tapoe a libisma famiri. Di a „siri” noso Mesias, Jesus, ben doro, dan a ben meki a howpoe tapoe a têgo libi, de wan foe den moro prenspari sani di a ben leri sma (Johanes 3:16; 6:47, 51; 10:28; 17:3). Foe di Krestes ben gi en volmaakti libi leki wan loesoe-paiman, meki a ben kisi a reti foe gi a libisma famiri têgo libi (Mateus 20:28). Son wan foe den disipel foe en, di ala nanga ala e teki 144.000 sma, sa libi foe têgo na ini hemel (Openbaring 14:1-4). So boen, wan toe libisma di fosi ben de sma di ben man dede, sa „weri a fasi foe no man dede”! — 1 Korentesma 15:53.
8. (a) San na „a fasi foe no man dede”, èn foe san ede Jehovah e gi en na den 144.000? (b) Sortoe howpoe Jesus ben abi gi den „tra skapoe”?
8 „A fasi foe no man dede” wani taki moro leki soso foe no dede noiti moro. A wani taki „a krakti foe wan libi di no man kisi pori”. (Hebrewsma 7:16; teki gersi Openbaring 20:6.) Ma sortoe marki Gado e doro nanga a gi di a e gi sma so wan toemoesi aparti presenti? Memre a tjalensi foe Satan taki no wan foe den kriatoeroe foe Gado ben de foe froetrow (Job 1:9-11; 2:4, 5). Foe di Gado e gi den 144.000 sma a fasi foe no man dede, meki a e sori taki a e froetrow a groepoe disi dorodoro, di gi piki tapoe a tjalensi foe Satan na so wan aparti fasi. Ma fa a de nanga a tra pisi foe a libisma famiri? Jesus ben taigi den fosi memre foe a „pikin ipi” disi foe Kownoekondre erfgenaam, taki den ben o „sidon na tapoe kownoestoeroe foe kroetoe den twarfoe lo foe Israèl” (Lukas 12:32; 22:30). Disi wani taki dati tra sma sa kisi têgo libi na grontapoe leki borgoe foe en Kownoekondre. Ala di den „tra skapoe” disi no e kisi a fasi foe no man dede, tokoe den e kisi „têgo libi” (Johanes 10:16; Mateus 25:46). So boen, têgo libi, na a howpoe gi ala kresten. A no de wan anansitori, ma wan sani di „Gado, di no man lei”, pramisi serjoesoe, èn di a ben pai gi dati nanga a diri broedoe foe Jesus. — Titus 1:2.
Na ini a tamara di de farawe ete?
9, 10. Sortoe sani e sori krin taki wi de krosibei foe a kaba?
9 Na apostel Paulus ben taki na fesi dati „moeilek ten di tranga foe pasa” ben o sori taki wi ben doro na ini „den lasti dei” troetroe. Ala di a libisma libimakandra di de lontoe wi, e saka go na ini wan situwâsi pe sma no abi lobi, den gridi, den e soekoe foe satisferi densrefi nomonomo, èn den de nanga godelowsoefasi, wi no e froestan taki a dei foe Jehovah foe tjari en kroetoe kon na tapoe a godelowsoe grontapoe disi, e kon krosibei esi-esi? Ala di ogri di e doe nanga tranga, nanga bitafasi, e kon moro takroe, wi no e si na ala sei lontoe wi taki den tra wortoe foe Paulus e kon troe: „Godelowsoe sma nanga bedrigisma sa kon moro ogri”? (2 Timoteus 3:1-5, 13) Son sma kan bari nanga foeroe howpoe, sani leki „vrede nanga seikerfasi”, ma ala froewakti di sma abi taki vrede o kon, sa lasi gowe, bika „wantronso wan pori sa kon na den tapoe ini wán momenti, neleki fa banawtoe pen e miti wan bere-oema di de foe meki, èn den no sa man lowe kwetikweti”. A no de so, taki wi no sabi san a ten foe wi wani taki. So boen, „meki wi tan na ai èn hori wisrefi”. — 1 Tesalonikasma 5:1-6.
10 Moro fara, bijbel e sori taki den lasti dei de „wan sjatoe pisi ten”. (Openbaring 12:12; teki gersi 17:10.) Soleki fa a sori, dan moro foeroe foe a „sjatoe pisi ten” dati pasa gowe kaba. A profeititori foe Danièl, foe eksempre, e taki soifri foe a feti na mindri „a kownoe foe noordsei” nanga „a kownoe foe zuidsei” di go doro te na ini a jarihondro disi (Danièl 11:5, 6). A sani di moesoe kon troe ete na a lasti feti foe „a kownoe foe noordsei”, soleki fa Danièl 11:44, 45 e taki foe dati. — Loekoe A Waktitoren foe 1 juli 1987, nanga 1 november 1993, di e taki foe a profeititori disi.
11. (a) Te o fara Mateus 24:14 kon troe kaba? (b) San den wortoe foe Jesus di skrifi na ini Mateus 10:23 e sori?
11 Joe abi so srefi den sani di Jesus ben taki na fesi, dati „a boen njoensoe disi foe a kownoekondre sa preiki na heri grontapoe pe sma e libi, leki wan kotoigi gi ala nâsi, èn dan a kaba sa kon” (Mateus 24:14). Na ini a ten disi, Jehovah Kotoigi e doe a wroko foe den na ini 233 kondre, èilanti, nanga kontren. A troe, taki kontren de di no wroko ete, èn kande na Jehovah en reti ten, wan doro sa opo di e gi na okasi foe disi (1 Korentesma 16:9). Tokoe den wortoe foe Jesus di skrifi na ini Mateus 10:23 e meki sma prakseri serjoesoe: „Oenoe no sa kaba waka lontoe a kontren foe den foto foe Israèl kwetikweti, bifo a Manpikin foe libisma doro.” Ala di a boen njoensoe sa meki bekènti na heri grontapoe seiker, tokoe wisrefi no sa doro ala pisi foe grontapoe nanga a Kownoekondre boskopoe bifo Jesus „doro” leki a Sma di e tjari strafoe kon.
12. (a) Foe sortoe ’wroko foe poti seigelmarki’ den e taki na ini Openbaring 7:3? (b) San a wani taki dati a nomroe foe den salfoewan na grontapoe e kon moro pikin?
12 Loekoe a tekst na ini Openbaring 7:1, 3, di e taki dati den e hori den „fo winti” di e tjari pori kon, na baka „te baka wi poti wan seigelmarki na tapoe a fesi-ede foe den srafoe foe wi Gado”. Disi no e sori go na a fosi leisi di seigelmarki e poti, san e pasa te den 144.000 e kisi wan hemel kari (Efeisesma 1:13). A e sori go na a lasti leisi taki sma e poti seigelmarki, te den kon sabi den krinkrin leki sma di kisi tesi èn di de getrow „srafoe foe wi Gado”. A nomroe foe den troetroe salfoe manpikin foe Gado di de na libi ete na grontapoe, kon pikin srefisrefi. Moro fara, bijbel e taki krin dati a de „foe den wan di Gado froekisi ede” taki a bigin foe a bigi banawtoe sa „koti sjatoe” (Mateus 24:21, 22). Moro foeroe foe den sma di e taki dati den na salfoewan, kon owroe moi kaba. Èn agen, disi no ben sa sori taki a kaba de krosibei?
Wan getrow waktiman
13, 14. San na a frantiwortoe foe a waktiman-groepoe?
13 Disiten, a de wan koni sani te wi e poti prakseri na tapoe a tiri di a ’getrow srafoe’ e gi (Mateus 24:45). Moro leki wan hondro jari kaba, a disiten „srafoe” dini getrow leki wan „waktiman” (Esekièl 3:17-21). A Waktitoren foe 1 april 1984 ben tjari kon na krin: „Na waktiman disi e loekoe boen a den sani di e psa dja na grontapoe leki wan kontroe foe bijbel profétitori, e meki na warskow go na doro taki wan ’bigi benawtoe soleki sensi na bigin foe grontapoe no ben kon’, e kon moro krosbé èn e meki ’boen njoensoe bekenti foe wan moro betre sani.’” — Mateus 24:21; Jesaja 52:7.
14 Memre: A de a wroko foe a waktiman foe bari taki „soifri san a e si” (Jesaja 21:6-8). Na ini bijbel ten wan waktiman ben o gi wan warskow srefi te a sani di ben kan de wan kefar, ben de toemoesi fara foe sabi krin san na en (2 Kownoe 9:17, 18). Falsi warskow ben gi seiker na ini a ten dati. Ma wan boen waktiman no ben o tapoe foe taki, foe di a ben o frede taki a ben o kisi sjen. Efoe joe oso ben de na ini faja, dan fa joe ben o firi te den brandweerman no ben o kon foe di den ben prakseri taki a ben sa kan de wan falsi warskow? Nôno, wi e froewakti taki den man dati e handri esi-esi na tapoe iniwan sani di e sori taki kefar de! Na a srefi fasi, a waktiman-groepoe taki, te dati ben de fanowdoe.
15, 16. (a) Foe san ede kenki e kon na ini a fasi fa wi e froestan profeititori? (b) San wi kan leri foe getrow foetoeboi foe Gado di no ben froestan son profeititori boen?
15 Ma ala di sani e pasa, wi kon froestan profeititori moro krin. A historia e sori taki a no e pasa foeroetron, noso noiti, taki sma e froestan den profeititori foe Gado dorodoro, bifo den kon troe. Gado ben taigi Abraham soifri o langa a siri foe en ben o de „wan doroseisma di [ben o] tan na ini wan kondre di no de foe den”, dati wani taki, 400 jari (Genesis 15:13). Ma Moses ben pristeri ensrefi toemoesi froekoe leki a sma di ben o froeloesoe den. — Tori foe den Apostel 7:23-30.
16 Loekoe so srefi den profeititori di e taki foe a Mesias. Te joe loekoe a ten di pasa, dan a sori so krin taki den ben taki na fesi foe a dede nanga na opobaka foe a Mesias (Jesaja 53:8-10). Tokoe Jesus en eigi disipel no ben man froestan a tori disi krin (Mateus 16:21-23). Den no ben si taki Danièl 7:13, 14 ben o kon troe na ini a ten foe Krestes en pa·rou·siʹa, noso „denoja”, wan sani di ben o pasa na ini a tamara (Mateus 24:3). Dati meki den ben bereken sani pikinmoro 2000 jari toemoesi froekoe, di den ben aksi Jesus: „Masra, na ini a ten disi joe e opo a kownoekondre gi Israèl baka?” (Tori foe den Apostel 1:6) Srefi baka di a kresten gemeente ben seti boen, fowtoe prakseri nanga falsi froewakti ben tan kon (2 Tesalonikasma 2:1, 2). Ala di wan toe kresten ben abi fowtoe prakseri wanwan leisi, tokoe a ben de seiker, taki Jehovah ben blesi a wroko foe den fosi jarihondro bribiman!
17. Fa wi moesoe denki foe den kenki na ini a fasi fa wi e froestan bijbel?
17 So srefi a waktiman-groepoe foe a ten disi ben moesoe meki a prakseri foe en kon moro soifri toe wanwan leisi. Ma wan sma kan tweifri taki Jehovah blesi a ’getrow srafoe’? Boiti dati, te joe loekoe nanga san a abi foe doe, dan a no de so taki moro foeroe foe den kenki di ben kon, na pikinpikin sani te joe teki den gersi tra sani? A fondamenti fasi fa wi e froestan bijbel, no kenki. Na overtoigi di wi abi taki wi e libi na ini den lasti dei, tranga moro leki oiti!
Libi gi wan têgo tamara
18. Foe san ede wi moesoe loekoe boen taki wi e libi gi a ten disi wawan?
18 Grontapoe kan taki: ’Meki wi njan èn dringi, bika tamara wi dede’, ma disi no moesoe de a fasi fa wi e denki èn e tjari wisrefi. Foe san ede joe e doe moeiti foe soso foe kisi awansi sortoe prisiri na ini a libi now, ala di joe ben kan wroko gi wan têgo tamara? A howpoe dati, awansi a de wan libi na hemel sondro foe man dede noso wan têgo libi na grontapoe, no de wan dren noso wan anansitori. A de wan troe sani di a Gado „di no man lei”, ben pramisi (Titus 1:2). Boeweisi e sori krin taki a kontroe foe wi howpoe de krosibei! „A ten di tan abra kon sjatoe.” — 1 Korentesma 7:29.
19, 20. (a) Fa Jehovah e si den ofrandi di wi tjari gi a boen foe a Kownoekondre? (b) Foe san ede wi moesoe libi nanga têgo libi na prakseri?
19 A troe, taki a seti foe sani disi tan moro langa kaba leki san foeroe sma ben prakseri. Wan toe sma kan denki now taki efoe den ben sabi disi na fesi, dan den no ben sa tjari son ofrandi. Ma a no moesoe hati wan sma taki a doe dati. Te joe loekoe en boen, dan a tjari di wan sma e tjari ofrandi, na a moro prenspari sani di abi foe doe nanga a de di wan sma de wan kresten. Kresten ’e drai den baka gi densrefi’ (Mateus 16:24). Noiti wi no moesoe denki taki den moeiti di wi e doe foe plisi Gado ben de foe soso. Jesus ben pramisi: „No wan sma libi oso noso brada noso sisa noso mama noso papa noso pikin noso pranigron foe mi ede èn foe a boen njoensoe ede, di no sa kisi wan hondro tron nownow . . . èn na ini a seti foe sani di e kon, têgo libi” (Markus 10:29, 30). Wán doesoen jari foe now, o prenspari joe wroko, oso, noso a moni di joe abi na bangi sa gersi? Tokoe den ofrandi di joe tjari gi Jehovah sa wani taki wan sani, wán miljoen jari foe now — wán miljard jari foe now! „Bika Gado no de onregtfardiki, so taki a sa frigiti a wroko foe oenoe.” — Hebrewsma 6:10.
20 Foe dati ede, meki wi libi nanga têgo libi na ini prakseri, foe di wi e hori wi ai „no na tapoe den sani di wi kan si, ma na tapoe den sani di wi no kan si. Bika den sani di wi kan si, de foe wan pisi ten, ma den sani di wi no kan si, de foe têgo” (2 Korentesma 4:18). A profeiti Habakuk ben skrifi: „A fisjoen de gi a fasti ten ete, èn a e tan lon go doro te na a kaba, èn a no sa froeteri wan lei. Awansi a ben sa meki oenoe wakti srefi na en tapoe, tan froewakti en; bika a sa kon troe sondro foe misi. A no sa kon lati” (Habakuk 2:3). Fa a ’tan di wi e tan froewakti’ a kaba, abi krakti na tapoe a fasi fa wi e doe wi persoonlijk frantiwortoe nanga osofamiri frantiwortoe? A tra artikel foe wi sa taki foe den tori disi.
Penti foe loekoe sani sjatoe baka
◻ Fa a gersi di a gersi leki a kaba foe a seti foe sani disi no e kon ete, ben abi krakti na tapoe son sma na ini a ten disi?
◻ San na a fondamenti foe wi howpoe na tapoe têgo libi?
◻ Fa wi moesoe si den ofrandi di wi tjari gi den afersi foe a Kownoekondre ede?
[Prenki na tapoe bladzijde 15]
A preikiwroko di e doe na heri grontapoe moesoe kaba bifo a kaba e kon