Den ben doe a wani foe Jehovah

Wan papa di de klariklari foe gi pardon

DEN ben kari en a moro boen sjatoe tori di oiti ben skrifi — èn nanga reti den e kari en so. Na agersitori foe Jesus, foe a lobi di wan papa abi gi en manpikin di ben lasi, de leki wan fensre pe wi kan si a kefalek moi fasi fa Gado e sori sari-ati gi sondari di abi berow.

A ben lasi èn den ben feni en baka

Wan man ben abi toe boi. A moro jongoewan ben taigi en: ’Mi wani mi erfenis nownow, na presi foe wakti te leki joe dede fosi.’ A papa ben doe soleki fa a boi ben wani, èn soleki fa a sori, a ben gi en wán di foe dri pisi foe den sani di a ben abi — a reti pisi gi a moro jongoewan foe toe manpikin (Deuteronomium 21:17). Esi-esi a jongoewan teki den goedoe foe en èn ben rèis go na wan farawe kondre pe a ben gebroiki ala en moni, ala di a ben e libi wan jajolibi. — Lukas 15:11-13.

Ne wan hebi angriten ben kon de. Na ini nowtoe, a jonkoeman ben teki wan wroko foe loekoe den agoe — wan tegoe wroko gi wan djoe (Lefitikus 11:7, 8). Njanjan ben pina so kefalek taki a ben bigin angri gi den redi bonki di ben de agoe njanjan! Te foe kaba, a jonkoeman ben kisi ensrefi baka. ’Den foetoeboi foe mi papa e njan moro boen leki mi!’, a ben prakseri na ensrefi. ’Mi sa go baka na oso, tjari den sondoe foe mi kon na doro, èn begi foe kon leki wan foe den wrokoman di mi papa joeroe.’a — Lukas 15:14-19.

A jonkoeman ben waka a langa pasi go baka na oso. Seiker a fasi fa a ben gersi, ben kenki foeroe. Tokoe en papa ben sabi soema a ben de „ala di a ben de farawe ete”. Nanga sari-ati, a papa ben lon go na en manpikin, a ben brasa en, èn „bosi en na wan safoe fasi”. — Lukas 15:20.

A switifasi disi fa a ben teki a jonkoeman, ben meki a moro makriki gi a jonkoeman foe poeroe a hebi na en tapoe. „Papa,” a ben taki, „mi sondoe teige hemel èn teige joe. Mi no warti moro foe joe kari mi joe manpikin. Meki mi leki wán foe den wrokoman foe joe di joe joeroe.” A papa ben seni kari den srafoe foe en. „Go esi!”, a ben komanderi. „Tjari wan langa krosi kon, a moro boen wan, èn weri en gi en, èn weri wan linga na en anoe èn sandaal na en foetoe. Èn tjari a fatoe jongoe mankaw kon, srakti en èn meki wi njan èn prisiri, bika a manpikin disi foe mi ben dede èn a ben kon na libi baka; a ben lasi èn mi ben feni en baka.” — Lukas 15:21-24.

Wan bigi fesa ben bigin, so srefi pokoe nanga dansi. A moro bigi manpikin ben jere a djoegoedjoegoe di a ben drai kon baka foe a gron. Di a ben jere taki en brada ben kon na oso èn taki na foe dati ede wan fesa ben de, a ben kon atibron. ’Mi ben wroko tranga gi joe someni jari, èn noiti mi ben trangajesi joe, ma tokoe noiti joe ben gi mi wan jongoe krabita foe kan meki prisiri nanga mi mati’, a ben kragi na en papa. ’Ma now di joe manpikin di ben froemorsoe joe goedoe drai kon baka, joe meki wan fesa gi en.’ ’Pikin,’ en papa ben piki en na wan safoe fasi, ’ala ten joe ben de nanga mi, èn ala den sani di de foe mi, na foe joe. Ma wi ben moesoe breiti, bika a brada foe joe ben dede èn ben kon na libi baka. A ben lasi èn wi ben feni en baka.’ — Lukas 15:25-32.

Lès gi wi

A papa na ini na agersitori foe Jesus, e prenki wi sari-ati Gado, Jehovah. Leki a manpikin di ben lasi, son sma e gowe libi a seikerfasi foe na osofamiri foe Gado gi wan pisi ten, ma baka ten den e kon baka. Fa Jehovah e prakseri foe den sortoe sma disi? Den sma di e drai kon baka na Jehovah nanga opregti berow, kan abi a djaranti taki „a no ala ten a sa tan feni fowtoe, èn a no sa atibron toe te ten di no skotoe” (Psalm 103:9). Na ini na agersitori, a papa ben lon go foe teki en manpikin baka. Na a srefi fasi, a no wani Jehovah wani wawan foe gi sondari di abi berow pardon, ma a de fajafaja toe foe doe dati. A de „klariklari foe gi pardon”, èn a e doe dati „foeroe”. — Psalm 86:5; Jesaja 55:7; Sakaria 1:3.

Na ini na agersitori foe Jesus, a troetroe lobi foe a papa ben meki a de moro makriki gi a manpikin foe teki deki-ati foe drai kon baka. Ma prakseri: San ben sa pasa te a papa ben drai en baka gi a boi, noso nanga atibron ben taigi a boi taki a no abi foe kon baka noiti moro? So wan fasi foe handri kande ben sa meki a boi abi wan feantifasi gi en. — Teki gersi 2 Korentesma 2:6, 7.

Te joe prakseri en, dan a papa ben grati a pasi di a manpikin ben gowe, foe meki a manpikin kon baka. Son tron, kresten owroeman na ini a ten disi moesoe poeroe sondari di no abi berow foe a gemeente (1 Korentesma 5:11, 13). Te den e doe dati, dan den kan grati a pasi foe meki a sondari drai kon baka, foe di na wan lobi fasi den e sori san na den sani di a kan doe foe den kan teki en baka na ini a ten di e kon. A memre di den sma di ben lasi na jejefasi ben e memre den sortoe opregti aksi disi foe den owroeman, ben boeweigi foeroe foe den foe abi berow èn a gi den a deki-ati foe drai kon baka na a osofamiri foe Gado. — 2 Timoteus 4:2.

A papa ben sori sari-ati toe di en manpikin ben drai kon baka. A no ben teki langa ten bifo a ben si na opregti berow foe a boi. Dan, na presi taki a ben wani nomonomo taki a boi ben moesoe froeteri en finifini foe ala den sondoe di a ben doe, a ben gi en wan switi kon nomo, èn a ben sori bigi prisiri foe doe dati. Kresten kan waka na baka na eksempre disi. Den moesoe prisiri taki wan sma di ben lasi, feni baka. — Lukas 15:10.

A fasi fa a papa ben tjari ensrefi e sori krinkrin taki a ben froewakti langa ten kaba taki en manpikin di ben lasi, ben sa drai kon baka. A no de foe taki, dati na soso wan skaduw foe na angri di Jehovah e angri gi ala sma di gowe libi en osofamiri. A „no wani taki wan sma e kisi pori, ma a wani taki ala sma moesoe abi berow” (2 Petrus 3:9). Foe dati ede, den sma di abi berow foe den sondoe foe den kan abi a djaranti taki den sa kisi blesi foe „ten di e gi kowroe-ati . . . [di e] kon foe Jehovah”. — Tori foe den Apostel 3:19.

[Foetoewortoe]