Troetroe kolokoe — San na a sroto?

A BEN de a prakseri taki libisma ben moesoe de kolokoe. Foe san ede wi kan de seiker taki a de so? We, loekoe a bigin foe libisma.

Jehovah Gado ben kria a fosi libisma paar so, taki den ben kan de kolokoe. A ben poti Adam nanga Eva na ini wan paradijs, wan djari foe prisiri, di den ben kari Eden. A Kriaman ben gi den ala sani di den ben abi fanowdoe na ini a libi. A djari ben abi „ibri sortoe bon di ben de wan lostoe gi na ai èn boen foe njan” (Genesis 2:9). Adam nanga Eva ben de gosontoe, tranga, èn moi — den ben de volmaakti èn troetroe kolokoe.

Ma san ben de a sroto gi a kolokoe foe den? A ben de a paradijs pe den ben libi na ini noso kande a volmaakti skin di den ben abi? Den presenti disi foe Gado ben jepi troetroe taki den ben prisiri foe a libi. Ma a kolokoe foe den no ben anga foe den sortoe sani dati di sma kan si. A djari foe Eden ben de moro leki wan moi park. A ben de wan santa presi, wan presi foe anbegi Gado. A sroto foe meki den de kolokoe foe têgo ben de, taki den ben man abi wan lobi-ati matifasi nanga a Kriaman. Efoe den ben wani de kolokoe, dan den ben moesoe abi jejefasi fosi. — Teki gersi Mateus 5:3.

Jejefasi e tjari kolokoe kon

Ini a bigin, Adam ben abi wan jeje matifasi nanga Gado. A ben de wan lobi-ati, switi matifasi leki a wan di wan manpikin abi nanga wan papa (Lukas 3:38). Na ini a djari foe Eden, Adam nanga Eva ben abi a joisti situwâsi di ben meki taki den man satisferi na angri di den ben angri foe anbegi Gado. Te den ben o de klariklari foe gi jesi na Jehovah na wan lobi-ati fasi, dan den ben o gi Gado grani nanga glori moro leki san wan meti ben kan doe. Nanga a froestan foe den, den ben kan prèise Gado foe den moi eigifasi foe en èn den ben kan horibaka gi a soevereiniteit foe en. Jehovah ben kan tan sorgoe gi den toe na wan lobi-ati fasi èn nanga switifasi.

A krosibei matifasi disi nanga a Kriaman èn a gi di den ben gi jesi na den wet foe en, ben tjari troetroe kolokoe kon gi a fosi papa nanga mama foe wi (Lukas 11:28). Adam nanga Eva no ben moesoe ondrofeni foeroe jari foe lasi nanga sjen, fosi den ben kon si san na a sroto foe man feni kolokoe. Den ben de kolokoe sensi a momenti di Gado ben kria den. A vrede di den ben abi nanga Gado èn a saka di den ben saka densrefi na ondro a makti foe en, ben meki den de kolokoe.

Ma a momenti di den ben trangajesi Gado, a kolokoe dati ben kon na wan kaba. Foe di Adam nanga Eva ben meki oproeroe, dan den ben lasi a jeje matifasi di den ben abi nanga Jehovah. Den no ben de mati foe Gado moro (Genesis 3:17-19). A sori leki sensi a dei di Jehovah ben jagi den poeroe foe a djari, a no ben abi no wan enkri komunikâsi nanga den moro. Den ben lasi a volmaaktifasi foe den, a froewakti foe libi foe têgo, èn a djari di ben de a tanpresi foe den (Genesis 3:23). Ma a moro prenspari sani ben de, taki foe di den ben lasi a matifasi di den ben abi nanga Gado, meki den ben lasi a sroto foe de kolokoe.

A man di wi man bosroiti san wi wani

Bifo Adam nanga Eva dede, den ben gi libisma den eigifasi foe den, a konsensi di den ben gebore nanga dati, èn a man di den man abi jejefasi, abra na den bakapikin foe den. A libisma famiri no ben kon lagi leki meti. Wi kan kon na ini wan boen matifasi baka nanga a Kriaman (2 Korentesma 5:18). Libisma di de kriatoeroe di abi froestan, tan abi a makti foe bosroiti efoe den wani gi jesi na Gado efoe no. Disi ben de foe si someni jarihondro baka dati di Jehovah ben gi a njoen nâsi Israèl na okasi foe bosroiti efoe den ben wani libi noso dede. Nanga jepi foe en takiman Moses, Gado ben taki: „Tide mi e poti troetroe libi nanga boen na joe fesi, èn dede nanga ogri.” — Deuteronomium 30:15-18.

Srefi now, doesoendoesoen jari baka di a fosi Paradijs ben lasi gowe, wi libisma man teki a joisti bosroiti ete. Wi abi wan konsensi di e wroko èn wan fondamenti fasi foe man gi jesi na den wet foe Gado. Bijbel e taki foe „a sma di wi de na inisei” èn foe „na inisei” sma (2 Korentesma 4:16; Romesma 7:22). Den wortoe disi e froeteri wi foe a fasi di wi alamala abi èn di wi e gebore nanga dati foe man sori a persoonlijkheid foe Gado, foe prakseri na a fasi fa en e prakseri, èn foe abi jejefasi.

Na apostel Paulus ben skrifi foe a fasi di wi abi foe libi akroederi boen gwenti nanga wet èn foe a konsensi foe wi, taki: „Ibri leisi te sma foe den nâsi di no abi wet, e doe den sani foe a wet, foe densrefi, dan den sma disi, ala di den no abi wet, de wan wet gi densrefi. Den na joisti den sma di e sori taki san de na ini a wet, skrifi na ini den ati, ala di a konsensi foe den e gi kotoigi nanga den èn den eigi prakseri na ini den, e gi den a fowtoe noso e regtfardiki den.” — Romesma 2:14, 15.

A koni foe Gado èn a gi di wi moesoe jesi — Dati na a sroto

Ma wan sma ben sa kan aksi: ’Efoe wi alamala abi a firi na ini wi foe anbegi Gado èn, leki bakapisi foe disi, wi kan de kolokoe troetroe, dan foe san ede someni sma de di no de kolokoe?’ A de foe di efoe wi wani de kolokoe, dan ibriwan foe wi moesoe kweki jejefasi. Ala di biginbigin, Gado ben kria libisma na a prenki foe en, tokoe libisma kon tron freimdesma gi a Kriaman foe en (Efeisesma 4:17, 18). Foe dati ede, ibriwan foe wi moesoe doe wan sani foe kan kisi wan jeje matifasi nanga Gado, èn foe tan hori na dati toe. So wan matifasi no sa kon foe ensrefi.

Jesus ben tjari kon na krin san na toe prenspari gronprakseri foe kan kisi jejefasi. Wán gronprakseri na taki wi moesoe kisi soifri sabi foe Gado, èn wan trawan na taki wi moesoe saka wisrefi na a wani foe en foe di wi e gi jesi (Johanes 17:3). Jesus ben teki sani di skrifi na ini a Wortoe foe Gado, taki: „A skrifi na Boekoe: ’Libisma no moesoe libi foe brede wawan, ma foe ibri wortoe di e kon foe Jehovah en mofo’” (Mateus 4:4). Na wan tra okasi, Jesus ben taki: „Mi njanjan de, foe mi doe a wani foe en di ben seni mi kon èn foe kaba a wroko foe en” (Johanes 4:34). Wi no abi foe ondrofeni foeroe jari foe lasi nanga sjen nanga a soekoe di wi e soekoe kolokoe. Ondrofeni no de a sroto foe man feni kolokoe. Na presi foe dati, a de soso a koni foe Gado èn a gi di wi e gi jesi na wi Kriaman, di kan tjari troetroe prisiri kon na ini libi. — Psalm 19:7, 8; Preikiman 12:13.

A de krin, taki kolokoe di e kon foe di wan sma e sori a koni foe Gado èn foe di a abi wan boen posisi na fesi foe Gado, no de wan sani di wi no man kisi (Tori foe den Apostel 17:26, 27). Ala sma kan kon sabi Jehovah nanga a prakseri foe en. Bijbel, di miljardmiljard eksemplaar foe disi de foe kisi na ini someni tongo, tan de a boekoe di panja na grontapoe moro leki iniwan boekoe. Bijbel kan jepi joe foe tron a mati foe Gado èn abi troetroe kolokoe, bika den Boekoe foe bijbel e froeteri wi: „Kolokoe foe a pipel di en Gado na Jehovah!” — Psalm 144:15.

[Faki na tapu bladzijde 6]

San wan sma moesoe doe foe de kolokoe

1. Froestan san na jejefasi èn san meki a jejefasi disi gro. Jesus ben taki: „Kolokoe foe den sma di e jere a wortoe foe Gado èn e doe en!” — Lukas 11:28.

2. Si taki a feni di Gado feni wan sma boen, de moro prenspari leki goedoe noso moimoi sani na ini a libi. Paulus ben skrifi: „Seiker a de wan jepisani foe kisi foeroe wini, a gi di sma e gi densrefi na ini a dini foe Gado makandra nanga a tevrede di sma tevrede nanga den sani di den abi. . . . Te wi abi njanjan, krosi nanga wan presi foe tan, dan wi sa de tevrede nanga den sani disi.” — 1 Timoteus 6:6-8.

3. Doe moeiti foe kweki wan konsensi di kisi bijbel-leri èn handri akroederi dati. — Romesma 2:14, 15.

4. Abi a fasti bosroiti foe gi jesi na Jehovah Gado, èn na so fasi doro den markitiki foe kon de wan sma foe en toe. David foe owroeten, ben skrifi: „Kolokoe foe a pipel di en Gado na Jehovah!” — Psalm 144:15.

[Prenki na tapoe bladzijde 7]

„Kolokoe foe den sma di sabi den jeje nowtoe.” — Mateus 5:3