Miti moro sma nanga a boen njoensoe

TE MI ben prakseri foe den sma na ini a kondre pe mi e libi, dan mi ben froestan taki foeroe sma sabi Jehovah Kotoigi soso nanga jepi foe njoensoe. Mi moesoe meki kontakti nanga den sma disi, mi ben prakseri, so taki den ben sa kan leri soema na Jehovah Kotoigi èn san den e bribi troetroe. Ma fa mi ben kan jepi? Mi masra na wan kresten owroeman, èn a ben gi mi koni jepi nanga rai.

Wi ben feni wan prenspari penti na ini na artikel „Tijdschriften vol troost en praktische raad” di tjari kon na doro na ini na Ontwaakt! foe 8 januari 1995. Foe a wroko foe wan Kotoigi, na artikel e taki: „A meki a tron wan gwenti foe teki den moro owroe eksemplaar foe bepaalde Ontwaakt! di tra Kotoigi lai na oso. Dan a e fisiti organisâsi di a denki ben sa kan abi spesroetoe belangstelling gi wan toe foe den tori foe na Ontwaakt!”

Nanga a jepi foe mi masra, heri esi mi ben abi wan toe hondrohondro eksemplaar foe den tijdschrift. Foe den disi mi ben man teki difrenti tori di ben sa fiti gi den sma di mi ben sa proeberi foe kontakti.

Foe di mi gebroiki telefon boekoe èn poebliki papira, mi ben man meki wan lijst foe ati-oso, presi pe jongoesma di e rèis e tan gi wan sjatoe pisi ten, èn presi pe sma e sorgoe trawan. Mi ben poti so srefi presi di e seti beri tori, edeman foe skoro èn sma di e gi rai na tapoe skoro, datra, nanga sma di e wroko na strafoe-oso nanga kroetoebangi. A lijst foe mi ben abi so srefi den driktoro foe organisâsi gi sma di de srafoe foe sopi nanga drug, organisâsi foe tori di abi foe doe nanga a milieu, gi sma di malengri èn di kisi mankeri na ini orlokoe, èn organisâsi di e ondrosoekoe sani di abi foe doe nanga gosontoe njanjan. Mi no ben frigiti den edeman foe den welzijn kantoro toe, den kantoro foe sociaal afersi, nanga den kantoro foe osofamiri tori.

San mi ben sa taki?

A fosi sani di mi ben doe te mi ben tjari wan fisiti na foe taki krinkrin soema mi de. Dan mi ben taki dati a fisiti foe mi ben sa moesoe de wan toe miniti nomo.

Te mi miti kaba nanga a sma di abi a frantiwortoe, dan mi ben sa taki: „Mi na wán foe den Kotoigi foe Jehovah. Ma mi no kon djaso foe taki foe relisi tori, foe di dati no ben sa fiti na wroko joeroe.” Foeroetron a spanning ben e broko. Dan, te mi fiti den sani di mi abi foe taki na a situwâsi, mi ben sa go doro foe taki: „Toe reide de foe san ede mi e fisiti joe. Fosi, mi wani taki mi warderi gi a wroko di a kantoro foe joe e orga. Boiti dati, wi no moesoe si en leki wan gewoon sani taki wan sma e gebroiki en ten nanga en krakti gi a boen foe a poebliki. Seiker joe moesoe kisi prèise gi den moeiti foe joe.” Na ini foeroe kefal, a sma nanga soema mi ben taki na so wan fasi ben froewondroe.

Na a ten dati, dan pikinmoro seiker a sma ben sa aksi ensrefi san ben sa de a di foe toe reide foe san ede mi fisiti en. Mi ben sa go moro fara: „A di foe toe reide foe mi fisiti na disi: Na ini na Ontwaakt! tijdschrift foe wi, di e tjari kon na doro na heri grontapoe, mi teki wan toe artikel di e taki spesroetoe foe a sortoe wroko foe joe èn den problema di abi foe doe nanga dati. Mi de seiker taki joe ben sa wani sabi fa wan internationaal tijdschrift e prakseri foe den problema disi. Mi ben sa prisiri foe libi den eksemplaar disi gi joe.” Foeroetron den ben taigi mi taki den e warderi den moeiti di mi e doe.

Boen bakapisi di mi no ben froewakti èn di gi satisfaksi

Te mi ben gebroiki a fasi disi foe taki, dan moro foeroe foe den sma ben arki mi na wan switifasi; soso wán foe den 17 sma di mi ben taki nanga den, ben weigri a sani di mi ben pristeri en. Mi ben abi foeroe ondrofenitori di mi no ben froewakti èn di ben gi mi satisfaksi.

Foe eksempre, baka di mi ben proeberi fo tron èn ben wakti nanga pasensi, mi ben man miti nanga na skoro-inspektoro foe wan distrikt. A ben de wan man di ben abi foeroe foe doe. Ma tokoe a ben abi switifasi srefisrefi èn ben taki wan pisi ten nanga mi. Di mi ben e gowe, a ben taki: „Mi e warderi den moeiti foe joe troetroe, èn seiker mi sa leisi joe poeblikâsi finifini.”

Na wan tra okasi, mi ben fisiti wan kroetoebangi, èn ben miti na ede-kroetoeman, wan man di ben abi 40 te go miti 60 jari. Di mi ben go na ini en kantoro, a ben opo en ede poeroe foe den papira foe en nanga mandi.

„Kantoro joeroe de na tapoe toedewroko mamanten wawan, èn dan mi sa man gi joe iniwan bodoi”, a ben taki na wan grofoe fasi.

„Grantangi, gi mi pardon taki mi kon na wan ten di no ben fiti”, mi ben piki heri esi èn ben taki moro fara: „Seiker mi ben sa wani kon baka na tapoe wan tra ten. Ma a fisiti foe mi ben de foe taki foe wan persoonlijk sani.”

Now a kroetoeman ben wani sabi moro. A ben aksi mi san mi ben wani, na wan moro mendri feantifasi. Mi ben piki en taki mi ben sa fisiti en baka na tapoe toedewroko.

„Grantangi, sidon”, a ben tan aksi, èn dati ben froewondroe mi. „San joe wani?”

Wan fajafaja takimakandra ben opo baka dati, èn a ben aksi pardon taki a no ben handri na wan switi fasi na ini a bigin bika a ben abi troetroe foeroe foe doe.

„Joe sabi san mi lobi foe den Jehovah Kotoigi?” a kroetoeman ben aksi baka wan pisi ten. „Den abi gronprakseri di abi boen fondamenti èn den no e libi den. Hitler ben proeberi ala sani di a ben man, tokoe den Kotoigi no ben go na ini orlokoe.”

Di toe foe wi ben go na ini wan kantoro, den sekretarsi di ben drape ben sabi soema na wi. Dan a direktie sekretarsi ben taki tranga èn krinkrin na wan kowroe fasi: „Noiti a presidenti e ontfanga wan groepoe.”

„Ma a sa ontfanga wi”, mi ben piki na wan safri fasi, „bika wi na Jehovah Kotoigi. Wi no de sma di e kon begi wan sani, èn a fisiti foe wi no o tan moro langa leki dri miniti.” Na ini mi ati mi ben begi fajafaja: „O Jehovah, meki disi waka boen!”

A sekretarsi ben piki na wan mi-no-ke fasi: „A boen, mi sa proeberi.” Dan a ben waka gowe. Na baka pikinmoro toe miniti, di ben gersi wan kefalek langa pisi ten gi mi, a ben kon baka nanga a presidenti srefi na en baka. Ala di a presidenti no ben taki noti, a ben tjari wi go na en kantoro, baka di wi ben pasa toe tra kamra.

Di wi ben bigin taki a ben kon abi moro nanga moro switifasi. A ben wani teki den spesroetoe eksemplaar foe na Ontwaakt! di wi ben pristeri den. Wi ben taigi Jehovah tangi gi na okasi disi foe gi wan boen kotoigi foe a marki foe a wroko foe wi.

Te mi e prakseri baka foe den foeroe moi ondrofenitori, dan mi kon froestan moro boen san na apostel Petrus ben taki: „Now mi sabi seiker taki Gado no e teki sma partèi, ma na ini ibri nâsi a sma di e frede en èn di e wroko regtfardikifasi, de boen na en” (Tori foe den Apostel 10:34, 35). A de a wani foe Gado taki sma foe ala background, tongo, noso sociaal posisi moesoe kisi na okasi foe sabi san na a prakseri foe Gado gi a libisma famiri èn gi grontapoe. — A seni kon.