Waka na Baka na Eksempre di Yehovah E Gi fu No Teki Sma Partèi
1 Yehovah e broko en ede nanga libisma. Yehovah e teki ala sma di e du a wani fu en sondro fu teki sma partèi (Tori. 10:34, 35). Di Yesus ben preiki gi sma, a no ben teki sma partèi tu (Luk. 20:21). Wi musu waka na baka na eksempre fu den, neleki fa Paulus ben du dati, di a ben skrifi: „Bika a srefi Masra de na den alamala tapu, di gudu gi ala den wan di e kari en.”—Rom. 10:12.
2 Te wi e meki a bun nyunsu fu a Kownukondre fu Gado bekènti na ala sma di wi e miti, dan dati e tyari ’glori kon gi Gado.’ Wi musu go doro fu prati a tumusi moi boskopu disi nanga ala sma, sondro fu luku den ras, sortu posisi den abi na ini a libimakandra, den skoroleri di den kisi, omeni moni den abi, noso efu den de pôpi sma (Rom. 10:11-13). Disi wani taki dati wi musu preiki na ala den wan di wani arki—man, uma, yunguwan, èn owru sma. Wi musu go na ala den doro fu man gi na ososma na okasi fu yere a waarheid.
3 Sori Belangstelling gi Ala Sma: A marki fu wi na fu miti ala sma di wi man miti. Nanga disi na prakseri, wan tu preikiman abi bun bakapisi fu preiki na sma na den poli, den ati-oso, den presi pe den e luku siki sma nanga owru sma, den kantoro pe pôtisma kan go fu kisi yepi nanga den presi pe den kan yepi sma di de srafu fu drugs noso sopi. Moro fara, preikiman e gi kotoigi na sma di e sreka den sani gi a beri, edeman fu skoro, sma di e gi rai fu skoro afersi nanga krutuman. Te yu e go na den sma nanga wan hei posisi, dan a e fiti fu sori warderi gi a yepi di den e gi na ini a libimakandra. Sori lespeki, èn suku den yoisti artikel di abi fu du spesrutu nanga a wroko di ibriwan fu den e du èn den problema di abi fu du nanga dati.
4 Na ini wan kefal wan sisa ben man fu taki nanga wan krutuman na ini en kantoro. Baka wan moi takimakandra, a krutuman ensrefi gi a komentaar disi: „Yu sabi san mi lobi fu Yehovah Kotoigi? Den abi gronprakseri di abi bun fondamenti. Wan bun kotoigi ben gi na a man disi di abi wan prenspari posisi.”
5 Wi no man leisi na ati fu sma. Ma te wi e taki nanga ala sma di wi e miti, wi e sori wi bribi na ini a man di Gado man tiri a wroko fu wi. Boiti dati, disi e gi den a grani fu arki èn gi yesi na a boskopu fu howpu (1 Tim. 2:3, 4). Meki wi gebroiki a ten fu wi bun èn pruberi fu waka na baka na eksempre di Yehovah e gi fu no teki sma partèi fu di wi o suku fu miti ala sma di wi man nanga a bun nyunsu.—Rom. 2:11; Ef. 5:1, 2.