Sori taki yu e broko yu ede nanga trawan —Fu di yu e preiki gi ala sortu sma
1 Na ini wan fisyun, na apostel Yohanes ben si wan engel di ben frei go na loktu, èn a ben abi têgo bun nyunsu di a ben e meki bekènti na sma fu „ala kondre, lo, tongo, nanga pipel” (Openb. 14:6). Wi e preiki gi ala sortu sma neleki fa na engel e du dati? Sondro fu wi sabi, wi kan bigin denki taki son sma abi fasi noso gwenti di no bun. A fasi fa wi e denki fu den sma di wi e miti, kan abi krakti tapu a fasi fa wi e prati a bun nyunsu nanga den. Fu dati ede, te wi e preiki gi sma di kweki na wan tra fasi, dan wi musu sori taki wi e broko wi ede nanga den trutru.
2 Luku a kontren fu yu: Trakondre sma e libi na ini a kontren fu yu? A kan taki wi e frigiti den sma disi. Du muiti fu suku den sma disi, èn pruberi fu kon leri sabi den moro bun. Suku fu kon sabi san den abi fanowdu èn nanga san den e broko den ede, san den lobi, èn san den no lobi, san den e frede, èn sortu fowtu denki den abi fu trawan. Du muiti fu pristeri a Kownukondre boskopu na wan fasi di fiti gi den (1 Kor. 9:19-23). Neleki na apostel Paulus, wi musu si en leki wan plekti fu prati a bun nyunsu nanga ala sma na ini a kontren fu wi, srefi sma di komoto fu wan tra kondre, sma di abi wan tra kulturu, sma di e taki wan tra tongo, èn srefi sma di gudu srefisrefi.—Rom. 1:14.
3 Ma fa yu kan gi kotoigi na wan sma di e taki wan tra tongo? Gebroiki a brochure Goed nieuws voor mensen uit alle landen (Bun nyunsu gi sma fu ala nâsi) na wan bun fasi. Kande yu wani waka sosrefi nanga wan tu traktaat noso brochure na ini den tongo di furu sma na ini a kontren fu yu e taki. (Luku Wi Kownukondre diniwroko fu yuli 2003, blz. 4, par. 2, 3). Boiti dati, son preikiman e du muiti fu taki odi, èn fu hori wan syatu takimakandra na ini tra tongo. Nofo tron sma e breiti te den e yere taki wan sma e du muiti fu taki nanga den na ini den eigi tongo, srefi efu a sma e taki wan tu sani nomo na ini a tongo fu den. Disi kan meki taki a sma disi wani kon sabi moro fu a bun nyunsu.
4 Teki na eksempre fu Yehovah: Te wi e du muiti fu miti ala sortu sma, dan wi e teki na eksempre fu Yehovah, a Gado fu wi di lobi ala sortu sma, èn di ’wani taki ala sortu sma kisi frulusu èn taki den kon sabi soifri san na a tru anbegi’.—1 Tim. 2:3, 4.