Wan prisiri okasi — A klari di den studenti foe a di foe 104 klas foe Gilead ben klari a skoro nanga boen bakapisi
„DISI na wan prisiri dei, èn wi alamala e prisiri.” Nanga den wortoe disi, Carey Barber, wan memre foe a Tiri Skin foe Jehovah Kotoigi, ben opo den prisiri programa foe a klari di den studenti foe a di foe 104 klas foe a Waktitoren Bijbelskoro Gilead ben klari a skoro nanga boen bakapisi, na tapoe 14 maart 1998. A poebliki foe 4945 sma ben kisi kari foe bigin na okasi nanga wan singi foe Kownoekondre-singi nomroe 208, di abi leki thema „Wan prisiri singi”.
Praktis rai foe tan kolokoe
A bigin pisi foe a programa, feifi sjatoe lezing di ben abi den gron tapoe bijbel èn di ben hori baka makandra, ben gi wan toe praktis rai fa foe tan hori a prisiri dati di ben de foeroe tapoe a dei di den ben klari a skoro nanga boen bakapisi.
Joseph Eames foe a Skrifi Afdeling ben hori a fosi lezing. A ben taki foe a thema „Waka na baka a jeje foe den loyaalwan”, di ben abi en fondamenti tapoe a bijbeltori na ini 2 Samuèl kapitel 15 nanga 17, pe Absalom, a manpikin foe David, ben meki wan triki plan foe teki a kownoekondre abra di en papa ben kisi foe Gado, di a ben soetoe faja gi wan oproeroe. Ma sma ben de di ben tan loyaal na Kownoe David, a salfoewan foe Jehovah. Sortoe lès den njoen zendeling ben kan leri foe disi? „Awansi pe joe e go na ini joe toewijzing leki zendeling, tan meki a jeje foe wrokomakandra èn lespeki gi theokratis tirimakti go na fesi. Jepi tra sma foe doe a srefi sani”, Brada Eames ben taki te foe kaba.
A tra brada tapoe a programa ben de David Sinclair, di ben kari tin sani di de fanowdoe foe de fisitiman na ini ’a tenti foe Jehovah’, di kari na ini Psalm 15. A lezing foe en di ben abi leki titel „Tan leki fisitiman na ini joe zendeling tenti”, ben gi den studenti di ben klari a skoro nanga boen bakapisi a deki-ati foe fiti a psalm disi na a zendeling toewijzing foe den pe den sa de fisitiman. Brada Sinclair ben tjari kon na fesi o prenspari a de foe libi ala ten akroederi den markitiki foe Gado. San ben sa de a bakapisi? Psalm 15:5 e taki: „A sma di e doe den sani disi noiti no sa degedege.”
John Barr, wan memre foe a Tiri Skin, ben kon baka dati èn ben poti prakseri na tapoe a krakti bakapisi di singi abi na den kresten konmakandra. Ma san na a moro prisiri singi di e singi na heri grontapoe na ini a ten disi? A de a boen njoensoe foe a Mesian Kownoekondre foe Gado. San na a bakapisi foe a singi disi, noso a preikiwroko foe a Kownoekondre? A di foe toe couplet foe singi nomroe 208 e taki en na wan soifri fasi: „Nanga Kownoekondre preikiwroko nanga kresten leri, foeroe sma e hari kon na Jehovah sei. Den disi e singi prisiri singi toe, e bari den, O so fara èn na ala sei!” Ija, ibri dei pikinmoro 1000 njoen disipel e teki dopoe. Brada Barr ben taki te foe kaba: „A no wan kefalek moi sani foe prakseri, brada, taki joe e seni go na kontren foe miti den sma di e wakti nomo foe jere joe prèise singi?”
„Arki den sten foe ondrofeni” ben de a titel foe a lezing di James Mantz foe a Skrifi-Afdeling ben hori baka dati. A ben sori taki son sani joe kan leri soso te joe ondrofeni en persoonlijk (Hebrewsma 5:8). Tokoe Odo 22:17 e gi wi a deki-ati foe ’poti wi jesi èn jere den wortoe foe den koni wan’, noso foe den wan di kisi ondrofeni. Den studenti di klari a skoro nanga boen bakapisi kan leri foeroe foe den wan di de na den fesi. „Den sabi fa foe doe bisnis nanga den wenkriman foe a kontren. Den sabi sortoe kontren foe a foto den no moesoe go bika den kan de ini kefar na skin sei noso na moreel sei. Den sabi san na den sani di e hati den firi foe den sma foe a kontren esi-esi. Den wan di de zendeling langaten kaba sabi san joe abi fanowdoe foe de kolokoe èn foe abi boen bakapisi na ini joe toewijzing”, Brada Mantz ben taki.
Wallace Liverance, edeman foe na administratie foe Gileadskoro, di ben taki foe a thema „Warderi joe theokratis toewijzing”, ben tjari kon na krin taki ala di wan toe zendeling soleki na apostel Paulus, Timoteus, nanga Barnabas ben kisi den toewijzing foe Gado nanga jepi foe a santa jeje noso wan tra wondroe sani di sori ensrefi, den zendeling di kisi leri na Gilead e kisi wan presi leki toewijzing na ini a veld na heri grontapoe, foe „a getrow èn koni srafoe” (Mateus 24:45-47). A ben gersi den toewijzing di den zendeling kisi, nanga den presi pe Gideon ben seni den man foe en go di ben o feti nanga den Midiansma (Kroetoebakra 7:16-21). „Warderi joe theokratis toewijzing leki zendeling. Neleki fa ’ibri wan foe den sroedati foe Gideon ben tanapoe na tapoe en eigi presi’, na so joe moesoe si joe toewijzing leki a presi pe joe moesoe de. Bribi taki Jehovah kan gebroiki joe neleki fa a ben gebroiki den drihondro man foe Gideon”, Brada Liverance ben gi leki deki-ati.
Te joe abi belangstelling gi sma dan dati e tjari kolokoe kon
A Waktitoren ben taki wan leisi: „Na presi foe meki wi belangstelling èn wi libi drai lontoe fabrik sani èn koni wrokosani foe a disiten grontapoe, sani di no abi a djaranti taki den sa tan, dan o moro betre èn koni a de foe abi troetroe belangstelling gi sma èn leri foe feni troetroe prisiri te wi e doe sani gi tra sma.” Akroederi dati, Brada Mark Noumair, wan foe den sma di gi leri na a Gileadskoro, ben taki nanga wan groepoe studenti foe den ondrofeni foe den na ini a velddienst èn ben taki: „Te joe e sori persoonlijk belangstelling gi tra sma dan dati sa meki joe tron boen zendeling.”
Den sroto foe feni kolokoe na ini a dorosei veld
San na wan toe sroto foe feni boen bakapisi nanga kolokoe na ini a zendeling wroko? Brada Charles Woody foe a Dienst-Afdeling èn Harold Jackson, di ben de zendeling fosi na ini Latino-Amerika èn e asisteri na Onderwijs Komte, ben interview memre foe den difrenti Bijkantoro Komte di ben e fisiti a di foe neigi klas foe a skoro gi den brada foe den bijkantoro. Disi na wan toe foe den rai di den ben gi.
Albert Musonda foe Zambia ben taki: „Te a zendeling fosi e go èn e gi den brada odi, dan dati e gi den brada deki-ati bika a sa meki den brada kon moro krosibei na a zendeling, èn a zendeling sa kon moro krosibei na den.”
Rolando Morales foe Guatemala ben gi a rai taki te den njoen zendeling e kisi wan sani foe dringi foe sma di abi switifasi, dan den kan piki na wan switi fasi èn nanga koni: „Mi no de langa na ini kondre. Mi ben howpoe taki mi ben kan teki en, ma mi skin no abi a immuunsistema ete di joe skin abi. Mi e howpoe taki wan dei mi kan teki en, èn mi sa prisiri foe doe dati.” San na den bakapisi foe so wan sortoe piki? „A no sa hati den firi foe sma, èn den zendeling sori switifasi gi tra sma.”
San kan jepi den zendeling foe horidoro na ini den toewijzing foe den? Brada Paul Crudass, wan sma di ben klari a di foe 79 klas foe Gilead nanga boen bakapisi èn di ben dini na ini Liberia na ini den 12 jari di pasa, ben taki a sani disi: „Mi sabi taki a troe taki papa nanga mama e misi den pikin foe den. Ma momenti de te den zendeling e proeberi foe kon gwenti nanga a kondre, a kontren, a koeltoeroe, nanga den sma. A kan firi foe gowe libi en toewijzing. Efoe a e kisi wan brifi foe oso, di e taki: ’Wi e misi joe kefalek; wi no sabi san wi moesoe doe sondro joe’, dan dati ben sa kan de nofo gi en foe teki en lai èn go na oso. A de toemoesi prenspari gi den famiri di de djaso tide taki den e hori dati na prakseri.”
Baka den interview, Theodore Jaracz, wan memre foe a Tiri Skin ben pristeri a lasti lezing na tapoe a programa. En thema ben de: „Hori a Kownoekondre tapoe a moro prenspari presi na ini joe libi.” Fa den zendeling kan hori den ai na tapoe sani èn no meki sani poeroe den prakseri foe a wroko foe den? A ben gi den deki-ati foe abi wan schema gi persoonlijk bijbelstudie di sa jepi den foe hori Kownoekondre afersi na tapoe moro prenspari presi na ini den libi. Èn dan a ben gi a froemane disi di ben gi na a reti ten: „Wan toe zendeling misi foe doe persoonlijk studie bika den ben poti foeroe ten na ini elektronis koni wrokosani, E-mail, nanga a computer. Wi moesoe abi a koni foe abi balansi te wi e gebroiki iniwan wrokosani èn wi no moesoe gebroiki kefalek foeroe ten na wan sani di ben kan njan a ten foe wi foe persoonlijk studie foe Gado Wortoe safrisafri.”
Baka a lezing foe Brada Jaracz, dan den ben gi den diploma, èn wan tangi brifi foe a klas ben leisi. A brada di ben teki presi gi a klas ben taki foe a firi foe ala sma na a fasi disi: „Wi ben si troetroe boeweisi foe a lobi di Jesus ben taki dati a ben sa de wan marki foe en disipel, èn disi gi wi a djaranti baka taki awansi pe wi de, wan waran, lobi-ati organisâsi di de leki wan mama, de foe horibaka gi wi. Nanga a sortoe jepi disi wi de klariklari foe go na den kabapisi foe grontapoe.” A ben de wan kaba di ben naki wi ati na tapoe a kolokoe dei foe a di foe 104 klas foe Gilead foe den studenti di klari a skoro nanga boen bakapisi.
[Faki na tapoe bladzijde 24]
Statistiek foe a klas
Nomroe foe kondre di den teki presi gi: 9
Nomroe foe kondre pe den kisi toewijzing foe go: 16
Nomroe foe studenti: 48
Nomroe foe trowpaar: 24
Gemiddeld jari di den abi: 33
Gemiddeld jari di den de na ini waarheid: 16
Gemiddeld jari di den de na ini a foeroeten diniwroko: 12
[Prenki na tapoe bladzijde 25]
A di foe 104 klas di klari a Waktitoren Bijbelskoro Gilead nanga boen bakapisi
Na ini a lijst na ondrosei, den rèi nomroe foe fesi go na baka, èn den nen skrifi foe kroektoe-anoesei go na reti-anoesei na ibri rèi
(1) Romero, M.; Howarth, J.; Blackburne-Kane, D.; Hohengasser, E.; West, S.; Thom, S. (2) Colon, W.; Glancy, J.; Kono, Y.; Drews, P.; Tam, S.; Kono, T. (3) Tam, D.; Zechmeister, S.; Gerdel, S.; Elwell, J.; Dunec, P.; Tibaudo, H. (4) Taylor, E.; Hildred, L.; Sanches, M.; Anderson, C.; Bucknor, T.; Hohengasser, E. (5) Howarth, D.; Ward, C.; Hinch, P.; McDonald, Y.; Sanches, T.; Thom, O. (6) Drews, T.; Tibaudo, E.; Elwell, D.; Dunec, W.; Blackburne-Kane, D.; Ward, W. (7) Anderson, M.; Zechmeister, R.; McDonald, R.; Bucknor, R.; Glancy, S.; Gerdel, G. (8) Romero, D.; Hinch, R.; Hildred, S.; Taylor, J.; Colon, A.; West, W.
[Prenki na tapoe bladzijde 26]
Den brada di ben gi leri na a di foe 104 klas: (foe kroektoe-anoesei) W. Liverance, U. Glass, K. Adams, M. Noumair