Kownoekondre preikiman e froeteri
„Ibri dei na wowojo”
NA APOSTEL Paulus ben gebroiki ibri okasi foe prati a Kownoekondre boskopoe. Foe ben man feni den wan di ben warti dati, dan a ben taki-go-taki-kon „na ini a snoga nanga den djoe . . . èn ibri dei na wowojo nanga den sma di ben kon drape”. — Tori foe den Apostel 17:17.
So wan sortoe faja ben de wan marki foe troe anbegiman foe Jehovah sensi a fosi jarihondro G.T. (Mateus 28:19, 20). Na a srefi fasi, na ini a ten disi, Jehovah Kotoigi e gebroiki difrenti fasi te den e jepi opregti sma fajafaja foe kisi wan soifri sabi foe waarheid (1 Timoteus 2:3, 4). Na ondrofenitori di e kon now foe Australia e sori disi.
Feifi dei ibri wiki, Sid nanga Harold, a wan baka a trawan e loekoe wan pikin uitstalling foe bijbel poeblikâsi na wan loko station na Sydney. Den e prati a boen njoensoe foe a Kownoekondre foe Gado na a fasi disi so wan feifi jari now kaba. Sid, di abi 95 jari, e froeteri: „Di mi tapoe 87, misrefi no ben man rèi oto moro. A sani dati ben meki mi lasi-ati bika mi ben lobi foe doe kotoigiwroko na poebliki. Wan dei di mi ben de krosibei foe wan presi pe sma di e rèis lobi foe go èn di abi a nen Echo Point na Katoomba, mi ben si wan kunstenaar e seri skedrei foe pisi kontren. Mi ben loekoe den skedrei boen èn mi ben denki na misrefi, ’Mi abi moro boen fowtow leki den disi, na ini mi boekoetas — èn den no de so diri leki den skedrei!’ So boen, mi ben teki a bosroiti foe meki wan pikin uitstalling, èn poti en na wan presi pe foeroe sma di lobi foe rèis de, èn foe pristeri den bijbel poeblikâsi nanga den heri moi fowtow di Jehovah Kotoigi e prati, na sma di e waka pasa.
Fo jari pasa, mi ben froisi na uitstalling go na Sydney, èn Harold kon makandra nanga mi. A wan baka a trawan wi e loekoe na uitstalling èn e wroko nanga den gemeente foe wi drape.” Harold, di abi 83 jari now, e taki: „Moende te go miti freida foeroe sma no de na oso. So boen, foe di wi e prati a Kownoekondre boskopoe na a fasi disi dan wi de na a presi pe den sma de. A no de foe taki, dati wi abi moro betre bakapisi. A prati di wi e prati den poeblikâsi foe wi, aparti srefisrefi gi a kondre disi.”
„Ala di wi poti na uitstalling foe wi na fo noso feifi difrenti presi na ini den jari di pasa”, na dati Sid e taki, „tokoe a no e teki langa bifo sma kon sabi soema na wi èn pe wi de foe feni. Son sma e kon soekoe poeblikâsi na wi. Tra sma abi aksi di den wani kisi wan piki na tapoe. Èn son wan foe den, na soso taki den wani taki wan toe miniti. Disi na a wan-enkri tron pe den gobaka foe mi e kon na mi”, ala di a e hori a lafoe foe en.
„Foeroe sma abi troetroe belangstelling na ini bijbel”, Harold e taki moro fara. „Na ini wan moen fo sma ben bigin studeri bijbel nanga den Kotoigi leki wan bakapisi foe den poeblikâsi di den ben kisi foe wi èn foe den aksi di wi ben man piki gi den nanga jepi foe bijbel. Ondrofenitori leki den wan dati e gi wi foeroe deki-ati.”
Neleki Sid nanga Harold — èn neleki na apostel Paulus — Jehovah Kotoigi e gebroiki ala fasi di de, foe prati a prenspari boskopoe foe den. Na so a „boen njoensoe” e preiki go doro „na heri grontapoe pe sma e libi”. — Mateus 24:14.