Wan kresten fasi foe si gwenti di abi foe doe nanga a beri foe sma

TE WAN lobiwan dede wantronso sondro foe wan sma ben froewakti dati, dan dati spesroetoe na wan sari sani srefisrefi. A bakapisi na taki a sani dati e seki wan sma, èn baka dati e gi a sma tranga pen na emotioneel sei. A fadon di wan lobiwan e fadon na sribi ini dede baka wan langa pisi ten foe siki nanga foeroe pen, no e froewondroe sma, ma san e tan na a sari di wan sma e sari èn a firi di wan sma e firi taki a lasi wan lobiwan.

A no abi trobi na sortoe fasi wan lobiwan dede, den sma di e sari foe dati abi jepi nanga trowstoe fanowdoe. Wan kresten di lasi wan lobiwan na dede, kan kisi foe doe toe nanga froefolgoe foe den sma di wani hori densrefi nomonomo na gwenti foe beri sma di no e kroederi nanga bijbel. Disi na wan gewoon sani na foeroe kondre na Afrika èn so srefi na son tra presi na grontapoe.

San sa jepi wan kresten di lasi wan lobiwan na dede, foe wai pasi gi gwenti foe beri sma te den gwenti no e kroederi nanga bijbel? Fa kompe bribiman kan gi jepi na ini den sortoe ten disi foe tesi? Den piki tapoe den aksi disi de wan broko-ede gi ala den wan di e soekoe foe plisi Jehovah, bika „a fasi foe anbegi di krin èn di no pori, leki fa wi Gado nanga Tata e si en, na disi: foe loekoe den pikin di no abi papa nanga mama èn den weduwe na ini a banawtoe foe den, èn foe no meki grontapoe flaka joe”. — Jakobus 1:27.

A abi foe doe nanga wan bribi

Wan algemeen sani di abi foe doe nanga foeroe gwenti foe beri sma, na a bribi taki den dedewan e libi go doro na wan presi pe den afo e tan, wan presi di sma no kan si nanga ai. Foe plisi den, dan foeroe lowman e firi taki den de froeplekti foe doe wan toe spesroetoe gwenti. Noso den e frede taki den no sa plisi den sma na den sei di e bribi taki ogri sa kon tapoe a libimakandra efoe den no e doe den gwenti.

Wan troe kresten no moesoe frede libisma èn teki prati na gwenti di no e plisi Gado (Odo 29:25; Mateus 10:28). Bijbel e sori taki den dedewan no sabi noti, bika bijbel e taki: „Bika den libiwan sabi ete, taki den sa dede; ma foe a sei foe den dedewan, den no sabi notinoti . . . No wan wroko noso prakseri noso sabi noso koni no de na ini Sjeol, a presi pe joe e go.” (Preikiman 9:5, 10) Foe dati ede, Jehovah Gado ben warskow en pipel foe owroeten foe no proeberi foe plisi den dedewan noso foe taki nanga den (Deuteronomium 14:1; 18:10-12; Jesaja 8:19, 20). Den bijbel waarheid disi e toeka nanga foeroe pôpi gwenti foe beri sma.

Fa a de nanga „krin joesrefi na seks sei”?

Na son kondre foe Centraal-Afrika den e froewakti taki a trowpatna foe wan sma di dede, moesoe abi seks nanga wan krosibei famiri foe a sma di dede. Efoe disi no pasa, dan den sma e bribi taki a dedewan sa doe ogri na a osofamiri di e libi ete. A gwenti disi den e kari „krin joesrefi na seks sei”. Ma bijbel e taki dati efoe wan sma abi iniwan sortoe seks nanga wan tra sma dorosei foe a trowlibi taki dati na „hoeroedoe”. Foe di kresten moesoe „lowe gi hoeroedoe”, dati meki nanga deki-ati den e kakafoetoe gi a gwenti disi di de teige bijbel. — 1 Korentesma 6:18.

Loekoe wan weduwe di nen Mercy.a Di a masra foe en dede na ini 1989, dan den famiri foe en ben wani taki a ben moesoe krin ensrefi na seks sei nanga wan mansma di ben de wan famiriman. A ben weigri èn ben tjari kon na krin taki a gwenti ben de kontrari a wet foe Gado. Di den famiriman no ben sabi moro san foe doe, den ben kosi en èn den ben gowe libi en. Wan moen na baka, den ben leigi na oso foe en èn ben poeroe den isri plaat foe a daki foe en. „A kerki foe joe kan sorgoe gi joe”, den ben taki.

A gemeente ben trowstoe Mercy èn ben bow wan njoen oso srefi gi en. A sani disi ben naki na ati foe den sma ini a birti drape so kefalek taki sonwan foe den ben bigin jepi nanga a wroko, èn a katolik wefi foe na edeman ben de a fosi sma di ben tjari grasi kon gi a daki. A getrow fasi fa Mercy ben tjari ensrefi ben gi den pikin foe en deki-ati. Fo foe den pikin ben gi densrefi abra na Jehovah Gado sensi a ten dati, èn wán foe den ben fisiti a Bedinari Skoro no so langa pasa.

A gwenti foe krin joesrefi na seks sei, meki taki wan toe kresten gi pasi taki den go trow na ondro druk nanga wan sma di no de na bribi. Foe eksempre, wan man di en wefi dede èn di ben pasa 70 jari, trow hastihasti nanga wan jongoe oema di ben de wan famiri foe a wefi foe en di dede. Foe di a ben doe disi, dan a ben kan taki dati a ben krin ensrefi na seks sei. Ma so wan fasi no e kroederi nanga bijbel rai taki kresten moesoe trow „soso na ini Masra”. — 1 Korentesma 7:39.

Brokodei na dede-oso

Na foeroe kondre den lowman e kon makandra na a oso foe a dedesma èn e tan a heri neti na ai. Foeroetron den dede-oso disi abi so srefi na ini foe hori fesa èn foe prei pokoe tranga. Sma e bribi taki na so wan fasi den e plisi a dedewan èn e kibri na osofamiri di de na libi ete gi ogri jeje krakti. Switi wortoe kan taki foe feni a boen-ati foe a dedewan. Baka a taki, dan den lowman kande e singi kerkisingi, fosi wan tra sma opo tanapoe foe taki. A sani disi kan go doro te leki na dei broko.b

Wan troe kresten no abi wan prati na den sortoe brokodei disi na dede-oso bika bijbel e sori taki den dedewan no man jepi den libiwan èn den no man doe den ogri toe (Genesis 3:19; Psalm 146:3, 4; Johanes 11:11-14). Den Boekoe foe bijbel e kroetoe a doe di wan sma e doe afkodrei (Openbaring 9:21; 22:15). Tokoe, wan kresten weduwe kan feni en tranga son leisi foe tapoe trawan foe bigin nanga afkodrei gwenti. Den sma disi kan taki dati nomonomo den wani hori wan brokodei na en oso. San kompe bribiman kan doe foe jepi wan kresten di lasi wan lobiwan na dede èn di e kisi a tesi disi toe na en tapoe?

Foeroetron den gemeente owroeman ben man jepi wan kresten osofamiri di lasi wan lobiwan na dede, foe di den ben e taki-go-taki-kon nanga famiriman èn nanga den birtisma. Baka so wan taki-go-taki-kon, den sortoe sma disi kan agri foe libi na oso na wan vrede fasi èn foe kon makandra baka foe a beri na wan tra dei, Ma san moesoe pasa efoe wan toe sma de foe soekoe trobi? Foe tan go doro foe proeberi foe taki-go-taki-kon kan meki ogri kon di e doe nanga tranga. ’Wan srafoe foe Masra no abi foe feti, ma moesoe dwengi ensrefi te ogri e pasa.’ (2 Timoteus 2:24) So boen, efoe famiri di no wani wroko makandra ini a tori èn di wani feti srefi, e teki abra, dan wan kresten weduwe nanga den pikin foe en no sa man tapoe disi kande. Ma den no e teki prati na no wan falsi relisi gwenti di e feni presi ini na oso foe den, bika den e gi jesi na a bijbel komando: „No kon na ondro wan tjatjari di no de a srefi nanga sma di no de na bribi.” — 2 Korentesma 6:14.

A gronprakseri disi e fiti so srefi gi a beri. Jehovah Kotoigi no abi prati na ini singi, begi, noso gwenti di wan domri foe falsi relisi e teki fesi na ini. Efoe kresten di de krosibei famiri e prakseri taki a de fanowdoe foe go na a beri, dan den no abi wan prati na den sani dati. — 2 Korentesma 6:17; Openbaring 18:4.

Warti beri

Beri di Jehovah Kotoigi e hori, no abi gwenti na ini foe plisi den dedewan. Wan bijbel-lezing e hori na a Kownoekondre zaal, noso na a lijkenhuis (krei-oso), noso na a oso foe a dedewan, noso na a beripe. A marki foe a lezing disi na foe trowstoe den sma di e sari, foe di wi e tjari kon na krin san bijbel e taki foe dede èn a howpoe foe na opobaka (Johanes 11:25; Romesma 5:12; 2 Petrus 3:13). Wan singi di abi en gron tapoe bijbel kan singi, èn a konmakandra e tapoe nanga wan begi di e trowstoe sma.

No so langa pasa, wan beri soleki disi ben hori gi wan Jehovah Kotoigi di ben de so srefi a moro jongoe sisa foe Nelson Mandela, a presidenti foe Zuid-Afrika. Baka a lezing, a presidenti ben gi a takiman tangi na wan opregti fasi. Foeroe prenspari lantiman nanga hei-hei lantiman ben drape toe. „Disi na a moro warti beri di mi fisiti oiti”, na so wan minister ben taki.

Wan sma mag weri lowkrosi?

Jehovah Kotoigi e low te wan lobiwan foe den dede. Neleki Jesus, den kan krei toe (Johanes 11:35, 36). Ma den no feni taki a de fanowdoe foe sori na poebliki, taki den e sari nanga wan sani di sma moesoe si (Teki gersi Mateus 6:16-18.) Na foeroe kondre, weduwe moesoe weri wan spesroetoe lowkrosi foe plisi a dedewan. Den krosi disi moesoe weri difrenti moen noso srefi wan jari baka a beri foe a sma, èn te den sa tapoe foe weri a krosi, dan dati na a okasi foe hori wan tra fesa.

Efoe wan sma no e sori taki a e low, dan trawan e si disi leki wan afrontoe di den afrontoe a dede sma. Foe dati ede, na wan toe presi na Swasikondre, den edeman foe den lo ben jagi Jehovah Kotoigi poeroe foe den eigi oso nanga kondre. Ma ala ten den getrow kresten disi kisi jepi foe den jeje brada di e libi na tra presi.

A hei kroetoe bangi foe Swasikondre taki dati Jehovah Kotoigi abi leti, èn ben taki dati den moesoe kisi primisi foe go baka na den oso èn na den kondre foe den. Ini wan tra kefal, wan kresten weduwe ben kisi primisi foe tan tapoe en djari baka di a ben sori wan brifi nanga wan cassette-lolo pe a masra foe en di ben dede ben taki krinkrin taki en wefi no moesoe weri lowkrosi. Na so fasi a weduwe ben man boeweisi taki a ben lespeki en masra foe troe.

A abi foeroe wini foe sori krin fa a beri moesoe de bifo wan sma dede, spesroetoe na presi pe a gwenti de foe doe sani kontrari bijbel. Loekoe na eksempre foe Victor, wan sma di ben libi na Kameroen. A ben skrifi san sma ben moesoe doe na a beri foe en. Na ini en famiri joe ben abi foeroe sma di abi makti èn di ben abi wan koeltoeroe nanga tranga gwenti ini a tori foe den dedewan, so srefi na anbegi foe edekrabasi. Foe di Victor ben de wan lespeki memre foe a famiri, dati meki a ben sabi taki, soleki fa a sori, den ben o handri na a srefi fasi nanga a edekrabasi foe en. Foe dati ede a ben sori krin fa Jehovah Kotoigi ben moesoe hori a beri foe en. Disi ben meki en moro makriki gi a weduwe nanga den pikin foe en, èn wan boen kotoigi ben gi na a libimakandra drape.

No waka na baka gwenti di de kontrari bijbel

Wan toe sma di abi sabi foe bijbel, frede foe sori taki den e difrenti foe trawan. Foe no kisi foe doe nanga froefolgoe, den proeberi foe plisi den birtisma foe den foe di den ben sori leki den ben hori densrefi na a gwenti foe hori dede-oso gi a dedesma. Ala di a de foe prèise te wan sma e fisiti a sma di e sari foe ensrefi gi en trowstoe, tokoe a no de fanowdoe foe hori wan dede-oso na a oso foe a dedewan ibri neti te leki a ten doro foe beri en. Te wan sma e doe disi, dan dati kan meki trawan di e si disi, naki foetoe foe di a kan gersi gi den taki den sma di e teki prati no e bribi troetroe san bijbel e taki foe a situwâsi foe den dedewan. —1 Korentesma 10:32.

A bijbel e gi kresten tranga foe poti na anbegi foe Gado na a fosi presi ini den libi èn foe gebroiki a ten foe den na wan koni fasi (Mateus 6:33; Efeisesma 5:15, 16). Tokoe, na son presi den gemeente aktiviteit ben tapoe wan wiki langa noso moro langa srefi foe di wan beri ben de. A problema disi no e pasa na Afrika wawan. Wan verslag foe Zuid-Amerika e taki foe wan beri: „A nomroe foe fisitiman na dri kresten konmakandra ben lagi srefisrefi. Den preikiman no ben hori baka gi a velddienst gi tin dei langa. Srefi sma dorosei foe a gemeente nanga bijbelstudenti ben froewondroe èn ben sari foe si taki wan toe foe wi brada nanga sisa ben teki prati na den gwenti foe beri sma.”

Na son libimakandra, wan osofamiri di lasi wan lobiwan na dede, kan gi wan kari na krosibei mati foe kon na den oso foe njan èn dringi wan pikin sani baka a beri. Ma na foeroe presi na Afrika, hondrohondro sma di e go na a beri e go na a oso foe a sma di dede èn den e froewakti wan fesa pe meti e òfer foeroetron. Son wan na ini a kresten gemeente teki a gwenti disi abra, èn gi trawan na idea taki den e hori den sortoe fesa disi foe plisi den dedewan.

Beri di Jehovah Kotoigi e hori no e poti wan hebi tapoe den sma di lasi wan lobiwan na dede. So boen a no de fanowdoe foe seti sani spesroetoe so taki den wan di drape gi moni foe tapoe den foeroe kostoe di abi foe doe nanga a beri. Efoe pôti weduwe no kan tapoe den kostoe di de fanowdoe, dan sondro tweifri trawan ini a gemeente sa prisiri foe jepi. Efoe a jepi disi no nofo, dan den owroeman kan seti sani so taki den sma di warti foe dati kan feni jepi na materia sei. — 1 Timoteus 5:3, 4.

A no ala ten den gwenti foe beri sma no e kroederi nanga bijbel. Te den no e kroederi, dan kresten abi a fasti bosroiti foe handri akroederi bijbel gronprakseri (Tori foe den Apostel 5:29).c Ala di disi kan tjari moro banawtoe kon gi den, tokoe foeroe foetoeboi foe Gado kan boeweisi taki den pasa den sortoe tesi disi nanga boen bakapisi. Den doe disi nanga a krakti foe Jehovah, „a Gado foe ala trowstoe”, èn nanga a lobi-ati jepi foe kompe bribiman di trowstoe den na ini a banawtoe foe den. — 2 Korentesma 1:3, 4.

[Foetoewortoe]

[Faki na tapoe bladzijde 23]

Den kisi blesi foe di den tanapoe kánkan

Sibongili na wan kresten weduwe di abi deki-ati èn di e libi na Swasikondre. Baka di en masra dede no so langa pasa, dan a ben weigri foe waka baka gwenti di foeroe sma e denki taki dati e plisi den dedewan. Foe eksempre, a no ben sker a wiwiri foe en ede poeroe (Deuteronomium 14:1). Aiti memre foe na osofamiri ati bron foe dati ede èn nanga tranga den ben sker a wiwiri foe en ede. Den ben tapoe Jehovah Kotoigi toe foe go na a oso foe Sibongili foe gi en trowstoe. Ma tra sma di ben abi belangstelling gi a Kownoekondre boskopoe ben breiti foe fisiti en nanga brifi di den owroeman ben skrifi foe gi en deki-ati. Tapoe a dei di Sibongili ben moesoe weri spesroetoe lowkrosi, dan wan sani pasa di a no ben froewakti. Wan memre foe na osofamiri di abi foeroe makti ben hori wan konmakandra foe taki foe a weigri di Sibongili ben weigri foe hori ensrefi na den low gwenti.

Sibongili e skrifi: „Den ben aksi mi efoe a bribi foe mi ben gi mi pasi foe sori sari foe di mi ben sa weri wan blaka lowkrosi. Baka di mi ben taigi den fa a tori de nanga mi, dan den ben taigi mi taki den no ben sa dwengi mi. Mi ben froewondroe srefisrefi di alamala ben aksi pardon foe di den ben handri grofoe nanga mi èn foe di den ben sker mi wiwiri foe mi ede sondro foe mi ben wani dati. Alamala ben aksi mi foe gi den pardon.” Baka ten, wan sisa foe Sibongili ben taigi en taki a e bribi taki Jehovah Kotoigi abi a troe relisi, èn a ben aksi foe wan bijbelstudie.

Loekoe wan tra eksempre: Wan man foe Zuid-Afrika di nen Benjamin ben abi 29 jari, di a ben jeri taki en papa dede wantronso. Na a ten dati, Benjamin ben de a wan-enkri Kotoigi ini en osofamiri. Di a beri ben feni presi, dan den ben froewakti foe ibri sma taki den ben o waka pasa a grebi èn teki santi nanga den anoe trowe go na a dedekisi tapoe.d Baka a beri, ala sma di ben de krosibei famiri foe a dedewan, ben sker a wiwiri foe den ede. Foe di Benjamin no ben abi wan prati na den gwenti disi, meki den birtisma nanga den famiri ben taki dati a jeje foe a dede papa foe en ben o strafoe en.

„Foe di mi ben poti mi froetrow tapoe Jehovah, meki noti no ben pasa”, Benjamin e taki. Memre foe na osofamiri ben si fa sani ben waka nanga en. Baka ten, wan nomroe foe den ben bigin studeri bijbel nanga Jehovah Kotoigi èn den ben teki dopoe leki wan simbôl foe a gi den ben gi densrefi abra na Gado. Èn Benjamin? A ben go na ini a foeroeten preikiwroko. Na ini den lasti jari di pasa, a ben abi a moi grani foe dini gemeente foe Jehovah Kotoigi leki wan opziener di e rèis.

[Foetoewortoe]