Aksi-boksoe

◼ Te sma e aksi a gemeente foe jepi sreka sani gi wan beri, dan den aksi di e kon now kan opo ede kon:

Soema moesoe hori a beri-lezing? Disi na wan bosroiti di a famiri moesoe teki. Den kan teki iniwan dopoe brada di abi wan boen nen. Efoe den aksi a skin foe owroeman foe sorgoe gi wan takiman, dan soleki fa a gwenti de, den sa teki wan bekwaam owroeman foe hori wan lezing di abi en gron tapoe a schema foe a Genootschap. Ala di wi no moesoe go so fara taki wi e prèise a dedesma toemoesi, tokoe a kan de wan joisti sani foe poti prakseri na tapoe eigifasi di a sma ben abi, di sma kan waka na baka.

Den kan gebroiki a Kownoekondre zaal? A kan, efoe a skin foe owroeman gi primisi foe doe dati èn efoe dati no e broeja a konmakandra schema di de. Den kan gebroiki a zaal efoe a dedesma ben abi wan boen nen èn ben de wan memre foe a gemeente noso efoe a ben de a pikin foe wan memre foe a gemeente, di akroederi wet ben de na ondro en papa nanga mama ete. Efoe a sma ben pori en nen na ini a libimakandra foe di a ben tjari ensrefi na wan fasi di no fiti gi wan kresten, noso efoe tra sani de di ben sa kan gi a gemeente wan takroe nen, dan den owroeman kan bosroiti foe no gi primisi foe gebroiki a zaal.​—Loekoe a Bediening-boekoe, bladzijde 64 nanga 65.

A no de a gwenti foe gebroiki Kownoekondre zaal gi a beri foe sma di no de na bribi. Wi ben sa kan doe dati soso efoe den famiri foe a dedewan di libi na baka, de aktief memre di e dini leki dopoe preikiman, noso efoe nofo preikiman na ini a gemeente ben sabi a dedesma leki wan sma di ben de positief foe a waarheid èn di ben abi wan boen nen ini a joisti fasi fa a ben e tjari ensrefi na ini a libimakandra, èn efoe grontapoe gwenti no de na ini a programa.

Te den owroeman e gi primisi foe gebroiki a Kownoekondre zaal, dan den sa loekoe efoe a de a gwenti taki sma e froewakti dati den tjari a kisi go na a beri-lezing. Efoe dati de so, den owroeman ben sa kan gi primisi taki den famiri tjari a kisi go na ini a zaal.

Fa a de nanga bere gi grontapoe sma? Efoe a dedesma ben abi wan boen nen na ini a libimakandra, wan brada ben sa kan hori wan lezing di abi en gron tapoe bijbel èn di e gi trowstoe, na a oso pe a dede de noso na a beripe. A gemeente no sa hori wan beri-lezing gi wan sma di ben de bekènti leki wan jajosma, wan sma di ben tjari ensrefi na wan loesoe fasi noso wan sma di ben abi wan fasi foe libi di de krinkrin teige bijbel gronprakseri. Wan brada seiker no ben sa abi wan prati makandra nanga wan kerki fesiman foe hori wan dienst na ini wan programa pe tra kerki abi prati na ini noso na wan beri-lezing di hori na ini wan kerki foe Babilon a Bigiwan.

Fa a de efoe a dedesma ben de wan sma di ben sluit uit foe a gemeente? A gwenti de taki a gemeente no ben sa abi noti foe doe nanga dati. A gemeente no ben sa gebroiki a Kownoekondre zaal gi dati. Efoe a sma ben sori berow èn ben sori taki a ben wani foe a gemeente teki en baka, dan a konsensi foe wan brada ben sa kan meki a hori wan lezing di abi en gron tapoe bijbel, na a oso pe a dede de noso na a beripe, foe gi kotoigi na den sma di no de na bribi èn foe gi trowstoe na den famiri. Ma fosi a brada e teki a bosroiti disi, a ben sa de wan koni sani foe en foe taki nanga a skin foe owroeman èn poti prakseri na tapoe den sani di den kan rikomanderi. Na ini situwâsi pe a no ben sa de wan koni sani taki a brada abi wan sani foe doe nanga a beri, kande a fiti taki wan brada di de wan memre foe a famiri foe a dedesma hori wan lezing foe trowstoe den famiri.

Moro rai de foe feni na ini den uitgave foe De Wachttoren foe 15 oktober 1990, bladzijde 30, 31; 1 december 1981, bladzijde 25, 26; 15 juni 1980, bladzijde 5-8; 1 december 1977, bladzijde 727, 728; 15 juni 1970, bladzijde 382, 383; nanga The Watchtower foe 1 juni 1978, bladzijde 5-8; nanga Ontwaakt! foe 8 september 1990, bladzijde 22, 23; 22 september 1978, bladzijde 8-12; nanga 22 juli 1977, bladzijde 13-17.