Froetrow kan kon boen baka!

ALA DI a moeilek di a moeilek foe froetrow trawan nojaso na wan marki foe „den lasti dei”, tokoe a mankeri di sma mankeri froetrow ben de foe si so srefi doesoendoesoen jari pasa (2 Timoteus 3:1). A fosi presi pe a ben pasa, na wan presi pe wan sma no ben denki taki a kan pasa drape — na ini wan paradijs. Bijbel e taki foe a presi: „Moro fara, Jehovah Gado ben prani wan djari na ini Eden, na a owstoesei, èn drape a ben poti a libisma di a ben meki. Na so Jehovah Gado ben meki ibri sortoe bon di ben de wan lostoe gi na ai èn boen foe njan gro komopo na a gron èn so srefi a bon foe libi di ben de na mindri a djari èn a bon foe sabi boen nanga ogri.” — Genesis 2:8, 9.

Den vers di e kon baka dati, e trowe leti tapoe san disi abi foe doe nanga a moeilek di a moeilek foe froetrow trawan na ini a ten disi. Wi e leisi: „Èn Jehovah Gado ben gi a libisma a komando disi toe: ’Foe ibri bon foe a djari joe mag njan te joe bere foeroe. Ma foe a bon foe sabi boen nanga ogri, foe dati joe no moesoe njan, bika na a dei di joe sa njan foe dati, joe sa dede nomonomo’ ” (Genesis 2:16, 17). Adam ben abi wan reide foe tweifri na san Jehovah ben taigi en?

Wi e leisi go moro fara: „Now a sneki ben sori foe de a moro trikiwan foe ala den boesimeti di Jehovah Gado ben meki. Ne a ben bigin taigi na oema: ’A de troetroe so, taki Gado ben taki dati oenoe no moesoe njan foe ibri bon foe a djari?’ Baka dati na oema ben taigi a sneki: ’Foe a froktoe foe den bon foe a djari, wi mag njan. Ma foe njan foe a froktoe foe a bon di tanapoe mindrisei foe a djari, Gado taki: „Oenoe no moesoe njan foe dati, nôno, oenoe no moesoe fasi en, so taki oenoe no dede.” ’ Na tapoe dati a sneki ben taigi na oema: ’Oenoe no sa dede kwetikweti. Bika Gado sabi taki na a srefi dei di oenoe sa njan foe en, oen ai sa kon opo seiker èn seiker oenoe sa de leki Gado, oenoe sa sabi boen nanga ogri.’ Ne na oema ben si taki a bon boen foe njan èn taki a ben de wan sani di den ai ben angri foe si, ija, a bon ben wiki a lostoe foe loekoe en. Na so a ben teki a froktoe foe en èn ben njan foe en. Baka dati a ben gi wan pisi na a masra foe en, di a ben de na en, èn a ben bigin njan.” — Genesis 3:1-6.

Foe di Adam nanga Eva no ben gi jesi na a krin warskow foe Gado, meki den ben sori taki den no ben abi nofo froetrow na ini Jehovah. Den ben sori a srefi fasi foe a feanti foe Gado, Satan, di ben taki nanga Eva nanga jepi foe wan troetroe sneki. Satan no ben abi nofo froetrow na ini a fasi fa Jehovah ben e tiri. Foe a san disi ede èn foe di a ben abi wan bigimemre ati di wani kisi bigi nen gi ensrefi, a ben opo ensrefi foe feti teige Gado èn a ben kori libisma foe go doe a srefi sani toe. A ben meki taki den ben denki taki Gado no ben de foe froetrow.

San ben pasa? Matifasi ben kon na ini problema

Kande joe si taki sma di no e froetrow trawan, e feni en moeilek foe tan abi matifasi. Publilius Syrus, wan Latijn skrifiman foe a fosi jarihondro b.G.T., ben skrifi: „Froetrow na a wan-enkri sani di e tai mati na makandra.” Di Adam nanga Eva ben meki oproeroe, den ben sori taki den no ben froetrow Gado. Foe dati ede, seiker Gado no ben abi no wan reide foe froetrow den. Leki a bakapisi foe a broko di a froetrow broko, dan den fosi libisma ben lasi a matifasi nanga Gado. No wan sani e sori taki oiti moro Jehovah ben taki nanga den agen baka di a kroetoe den foe na oproeroe di den ben meki.

A matifasi na mindri Adam nanga Eva no ben waka boen toe. Jehovah ben warskow Eva: „Nanga pen joe sa meki pikin, èn joe sa abi tranga lostoe gi joe masra, èn en sa basi joe.” (Genesis 3:16) The Jerusalem Bible e taki: „En sa prei granmasra na joe tapoe.” Na presi foe Adam ben sori taki a de edeman foe en wefi na wan lobi-ati fasi, soleki fa Gado ben wani, a ben prei granmasra na en tapoe now.

Baka di den ben sondoe, dan Adam ben proeberi foe skoifi a fowtoe poti na tapoe en wefi. Soleki fa Adam ben denki dan na foe den sani di na oema ben doe, meki Gado ben poeroe den foe a volmaakti djari go na ini wan grontapoe di no ben kaba ete, èn den ben kisi kroetoe leki srafoe na ondro onvolmaakti situwâsi bifo den drai go baka tron doti (Genesis 3:17-19). Wi kan prakseri boen taki disi ben de wan sani di ben tjari trobi kon na mindri den toe sma disi. A kan dati Adam prei kefalek man, e taki dati noiti moro a ben sa arki Eva agen. Kande Adam ben firi taki a ben abi a reti foe taigi na oema: ’Bigin foe now, mi na a basi!’ Na a tra sei, a kan, taki Eva ben si taki Adam ben misi foe doe en ròl leki osofamiri edeman, èn ben meki taki Eva ben lasi froetrow na ini Adam. Awansi fa a no fa, foe di den libisma ben sori taki den no ben froetrow Gado nofo, dan dati meki den ben lasi a matifasi nanga en èn ben pori a matifasi di den ben abi nanga makandra.

Soema wi kan froetrow?

A no ala sma e froedini a froetrow foe wi, soleki fa na eksempre foe Adam nanga Eva e sori. Fa wi kan sabi soema e froedini a froetrow èn soema no e froedini dati?

Psalm 146:3 e gi wi leki rai: „No poti oen froetrow tapoe heiheisma, noso tapoe a manpikin foe libisma na grontapoe, di froeloesoe no de na en.” Èn na Jeremia 17:5-7, wi e leisi: „Froefroektoe a man de di gosontoe èn tranga na skinfasi, di e poti en froetrow na ini libisma na grontapoe èn di troetroe e meki libisma skin tron en anoe èn di na ati foe en drai libi Jehovah srefi.” Na a tra sei, „blesi foe a man di gosontoe èn tranga na skinfasi, di e poti en froetrow na ini Jehovah, èn di kon froetrow tapoe Jehovah srefi”.

A troe, taki a no ala ten a fowtoe foe poti froetrow na ini libisma. Den tekst dati e sori nomo taki foe poti froetrow na ini Gado noiti no de wan fowtoe sani, ma foe poti froetrow na ini onvolmaakti libisma kan tjari rampoe kon wanwan leisi. Foe eksempre, sma di e poti den froetrow na ini libisma foe doe san Gado nomo kan doe — tjari froeloesoe èn dorodoro vrede nanga seikerfasi kon — den sma dati sa lasi-ati. — Psalm 46:9; 1 Tesalonikasma 5:3.

Troetroe, libisma nanga den seti foe den e froedini froetrow soso te den e handri na ini wánfasi nanga den prakseri di Gado abi èn te den e sori taki den e horibaka gi den gronprakseri foe Gado. So boen, efoe wi wani taki tra sma moesoe poti den froetrow na ini wi, dan wi moesoe taki waarheid, èn de eerlijk (Odo 12:19; Efeisesma 4:25; Hebrewsma 13:18). Soso te wi e tjari wisrefi na ini akroederi nanga bijbel gronprakseri, dan a froetrow di trawan e poti na ini wi sa de nanga reti èn a sa sori taki a de wan fonten foe krakti nanga deki-ati gi wi nanga den.

Meki froetrow kon boen baka

Jehovah Kotoigi abi wan steifi fondamenti foe poti froetrow na ini Gado èn foe gi trawan deki-ati foe doe a srefi sani. Jehovah de getrow èn loyaal, wan sma di ala ten wi kan bow na en tapoe foe doe san a taki, bika „Gado no kan lei kwetikweti”. A froetrow di wan sma poti na ini a Gado foe lobi, noiti sa meki taki a sma kon lasi-ati. — Hebrewsma 6:18; Psalm 94:14; Jesaja 46:9-11; 1 Johanes 4:8.

Sma di de na ini wánfasi ini na abi di den abi froetrow na ini Jehovah èn di e libi akroederi den gronprakseri foe En, e kisi foeroe krakti di e boeweigi den foe poti froetrow na ini makandra. Na ini wan grontapoe di e pina foe a moeilek di a moeilek foe froetrow trawan, dan fa dati na troetroe wan prisiri foe feni sma di joe kan froetrow! Prakseri fa grontapoe ben o de heri tra fasi efoe wi ben kan abi froetrow dorodoro tapoe den sani di ibri tra sma e taki noso e doe! Na so a sa de na ini a njoen grontapoe di e kon èn di Gado pramisi. Noiti moro a sa de so taki a moeilek foe froetrow trawan!

Joe ben sa wani libi na ini a pisi ten dati? Efoe na so a de, dan Jehovah Kotoigi e gi joe a kari foe meki joe froetrow kon moro tranga na ini Gado èn na ini den pramisi foe en foe di joe e leri moro foe den sani di A e aksi foe wi foe kisi libi. Wan studie foe bijbel e gi boeweisi taki Gado de, taki a abi belangstelling gi a boen foe a libisma famiri, èn taki heri esi a sa handri foe loesoe den problema foe grontapoe nanga jepi foe a Kownoekondre foe en. Miljoenmiljoen sma leri kaba foe poti den froetrow na tapoe Gado èn na tapoe en Wortoe, bijbel. Jehovah Kotoigi sa breiti foe sori joe fa den e hori bijbelstudie na sma sondro foe joe abi foe pai foe dati. Noso joe kan skrifi go na den sma di tjari a tijdschrift disi kon na doro foe kisi moro bodoi.

[Prenspari pisi na tapoe bladzijde 5]

Te libisma no e poti froetrow na ini Gado, dan dati e pori a matifasi na mindri den

[Prenspari pisi na tapoe bladzijde 6]

Libisma de warti foe wi froetrow den, soso efoe den e handri na ini wánfasi nanga den gronprakseri foe Gado.