Jehovah moesoe de a sma di wi kan froetrow
„Jehovah srefi sa boeweisi troetroe taki a de a sma di joe kan froetrow.” — ODO 3:26.
1. Ala di foeroe sma e taki dati den abi froetrow na ini Gado, tokoe san e sori taki a no ala ten den e doe dati?
DEN wortoe „Na tapoe Gado wi e froetrow”, de foe si tapoe a moni foe Amerkankondre. Ma a de so, taki den wan di e gebroiki a moni dati na Amerkankondre noso na wan tra kondre, troetroe e poti den froetrow na tapoe Gado? Noso den e poti moro froetrow na tapoe a moni srefi? So wan sortoe froetrow di sma e poti na tapoe moni foe Amerkankondre noso di foe iniwan tra kondre, no kan tron a srefi leki a froetrow di wan sma e poti na tapoe wan almakti Gado foe lobi, di noiti no e gebroiki en krakti na wan fowtoe fasi èn di no gridi na no wan fasi. Te joe loekoe en boen, dan A e kroetoe gridifasi na wan fasi di sma kan froestan krin. — Efeisesma 5:5.
2. Fa troe kresten moesoe tjari densrefi ini a tori foe a krakti foe goedoe?
2 Troe kresten e poti a froetrow foe den na tapoe Gado, no na tapoe goedoe, nanga a „korifasi” foe en (Mateus 13:22). Den sabi taki a moni no abi foeroe makti foe tjari kolokoe kon èn foe kibri a libi. Disi no de so nanga a makti foe na Almakti Gado (Sefanja 1:18). Foe dati ede, o koni a froemane de: „Meki a fasi fa oenoe e libi de fri foe a lobi gi moni, èn de tevrede nanga den sani foe now. Bika a taki: ’Mi no sa gowe libi joe kwetikweti, èn noiti mi no sa drai mi baka gi joe’ ”! — Hebrewsma 13:5.
3. Fa den wortoe lontoe Deuteronomium 31:6 e trowe leti na tapoe a kari di Paulus ben kari a vers disi?
3 Di Paulus ben skrifi den wortoe na tapoesei gi den Hebrew kresten, a ben kari den bodoi di Moses ben gi den Israèlsma sjatoe bifo a dede: „Abi deki-ati èn de tranga. No frede, noso no krempi kon na wan gi den foe di joe e beifi gi den, bika Jehovah joe Gado na a wan di e hari go nanga joe. A no sa libi joe na baka, a no sa gowe libi joe krinkrin” (Deuteronomium 31:6). Efoe wi loekoe den tra wortoe lontoe a tekst disi, dan dati e sori taki Moses ben gi deki-ati foe abi wan froetrow na ini Jehovah, di e go moro fara leki foe abi froetrow nomo taki A kan gi den san den abi fanowdoe na materia sei. Fa so?
4. Fa Gado ben sori den Israèlsma taki En de wan sma di den kan froetrow?
4 Na ini den 40 jari di den Israèlsma ben waka na ini a gran sabana, Gado ben de getrow ini a gi di A ben gi den san den abi fanowdoe na ini a libi (Deuteronomium 2:7; 29:5). A ben gi den so srefi wan man di ben teki fesi. Wán fasi fa a ben sori disi, ben de nanga wan wolkoe na deiten èn wan faja na neti, di ben tjari den Israèlsma go „na wan kondre pe merki nanga oni e lon” (Exodus 3:8; 40:36-38). Di a ten ben doro foe go na ini a Pramisi Kondre troetroe, dan Jehovah ben teki Josua foe de a sma di ben o kon baka Moses. A teki di den Israèlsma ben o teki a kondre abra, no ben sa feni presi sondro foe den sma foe a kondre ben o kakafoetoe gi dati. Ma Jehovah ben waka nanga en pipel someni tenti jari kaba, so boen a no ben de fanowdoe foe frede. Den Israèlsma ben abi ala boen reide foe sabi Jehovah leki wan Gado di sma kan froetrow!
5. Fa a situwâsi foe kresten na ini a ten disi de a srefi leki di foe den Israèlsma bifo den ben go na ini a Pramisi Kondre?
5 Na ini a ten disi, kresten e waka na ini a gran sabana foe na ogri grontapoe foe now èn den de na pasi e go na a njoen grontapoe foe Gado. Sonwan foe den kresten disi ben waka a pasi disi moro leki 40 jari kaba. Now den e tanapoe na a lanki foe a njoen grontapoe foe Gado. Tokoe, den feanti e tapoe a pasi ete, èn den wani tapoe a pasi gi ibriwan sma foe no go na a presi di sa kon tron leki wan Pramisi Kondre, moro moi leki di foe owroeten pe merki nanga oni ben lon. So boen, fa den wortoe foe Moses di Paulus ben teki den taki ete wan tron baka e fiti srefisrefi gi kresten na ini a ten disi: „Mi no sa gowe libi joe kwetikweti, èn noiti mi no sa drai mi baka gi joe”! Ala sma di e tan tranga èn abi deki-ati, di foeroe nanga bribi èn di e poti den froetrow na tapoe Jehovah, de seiker taki den sa kisi wan paiman.
Froetrow di abi en gron tapoe sabi nanga matifasi
6, 7. (a) San ben meki a froetrow di Abraham ben abi na ini Jehovah, kisi tesi? (b) Fa Abraham ben kan firi di a ben teki waka go na a presi pe a ben o òfer Isak?
6 Wan leisi, Abraham, a fositen tata foe den Israèlsma, ben kisi a komando foe òfer en manpikin Isak leki wan bron-ofrandi (Genesis 22:2). San ben meki a lobi-ati fositen tata disi abi so wan froetrow na ini Jehovah di no kan broko, so taki a ben de klariklari foe gi jesi? Hebrewsma 11:17-19 e piki: „Wi kan taki dati, nanga bribi Abraham ben òfer Isak, di Gado ben tesi en, èn en di ben prisiri foe kisi a pramisi, ben proeberi foe òfer en wan-enkri gebore manpikin, ala di den ben taigi en: ’San den sa kari „joe siri”, sa de nanga Isak.’ Ma a ben hori na prakseri taki Gado ben man opo en baka na dede srefi, èn foe drape a kisi en toe na wan agersi fasi.”
7 Memre taki a ben teki dri dei foe Abraham nanga Isak doro na a presi pe den ben o tjari na ofrandi (Genesis 22:4). Boen foeroe ten ben de gi Abraham foe go denki baka foe a sani di Gado ben aksi en foe doe. Wi kan prakseri fa a ben firi? Di Isak ben gebore, dan dati ben de so wan prisiri di den no ben froewakti taki den ben o abi moro. A boeweisi taki Gado ben de ini a tori, ben meki a matifasi kon moro tranga na mindri Gado nanga Abraham nanga en wefi Sara di no ben man kisi pikin fosi. Seiker baka dati Abraham nanga Sara ben aksi densrefi san ben o pasa nanga Isak nanga den pikin foe en na ini a ten di ben o kon. A ben de so, taki wantronso ala den froewakti dati ben e kon na wan kaba, soleki fa a ben gersi te den ben loekoe a sani di Gado ben aksi now?
8. Fa a froetrow di Abraham ben abi na ini Gado, ben go moro fara leki bribi nomo taki Jehovah ben kan gi Isak wan opobaka?
8 Tokoe ete, Abraham ben abi froetrow di ben gron tapoe persoonlek sabi di toe boenboen mati abi foe makandra. Leki „a mati foe Jehovah”, Abraham „ben sori bribi na ini Jehovah, èn foe a sani disi ede den ben si en leki regtfardiki” (Jakobus 2:23). A froetrow di Abraham ben froetrow na tapoe Jehovah ben e go moro fara leki bribi nomo taki Gado ben sa man gi Isak wan opobaka. So Abraham ben abi na overtoigi toe taki san Jehovah ben aksi en foe a doe ben de wan joisti sani, ala di Abraham no ben sabi ala troe tori. A no ben abi no wan reide foe aksi efoe Jehovah ben regtfardiki foe aksi so wan sani. Baka dati, a froetrow di Abraham ben abi ben kon moro tranga di Jehovah engel ben kon na mindri èn ben sorgoe taki Isak no ben o dede leki ofrandi. — Genesis 22:9-14.
9, 10. (a) O ten Abraham ben sori wan leisi kaba, taki a ben abi froetrow na ini Jehovah? (b) Sortoe prenspari lès wi kan leri foe Abraham?
9 Abraham ben sori a srefi froetrow disi na ini Jehovah en regtfardikifasi so wan 25 jari na fesi. Di Abraham ben jere a warskow taki Sodom nanga Gomorra ben sa kisi pori, a no de foe taki, a ben broko en ede nanga fa sani ben sa waka nanga ibri regtfardiki sma di e libi drape, so srefi a neef foe en, Lot. Abraham ben soekoe reti na Gado nanga den wortoe: „Mi no man denki taki joe e handri na a fasi disi, foe kiri a regtfardiki man nanga a godelowsoewan, so taki a srefi sani moesoe pasa nanga a regtfardiki man neleki fa a e pasa nanga a godelowsoewan! Mi no man denki en foe joe. A Kroetoeman foe heri grontapoe no sa doe san reti?” — Genesis 18:25.
10 A famiri-edeman Abraham ben abi na overtoigi taki Jehovah noiti no e doe wan onregtfardiki sani. A psalm singiman ben singi baka ten: „Jehovah de regtfardiki na ini ala den pasi foe en Èn a de loyaal na ini ala den wroko foe en” (Psalm 145:17). Wi e doe boen foe aksi wisrefi: ’Mi e teki san Jehovah e gi pasi taki a e pasa nanga mi sondro taki mi e tweifri na en regtfardikifasi? Mi abi na overtoigi taki awansi san Jehovah e gi pasi foe pasa nanga mi, sa kon de foe a boen foe mi èn foe trawan?’ Efoe wi kan piki nanga ija, dan wi leri wan prenspari lès foe Abraham.
Sori froetrow na ini den wan di Jehovah teki
11, 12. (a) Sortoe sani foe froetrow ben de fanowdoe gi den foetoeboi foe Gado? (b) San kan de wan problema gi wi son tron?
11 Den wan di e si Jehovah leki a sma di den kan froetrow, e sori froetrow toe na ini den man di Jehovah teki foe doe wroko di abi foe doe nanga san A abi na prakseri. Gi den Israèlsma, disi ben wani taki dati den ben moesoe poti froetrow na tapoe Moses èn baka ten na tapoe Josua, a sma di ben kon baka Moses. Gi den fositen kresten, disi ben wani taki foe sori dati den abi froetrow na ini den apostel nanga den owroeman foe a gemeente foe Jerusalem. Gi wi na ini a ten disi, a wani taki dati wi e poti froetrow na tapoe „a getrow èn koni srafoe” di salfoe foe gi wi jeje „njanjan na a reti ten”, èn so srefi wi moesoe poti froetrow na tapoe den wan na den mindri di de a Tiri Skin. — Mateus 24:45.
12 Troetroe, foe poti a froetrow foe wi na tapoe den wan di e teki fesi na ini a kresten gemeente, na foe wi eigi boen. Wi e kisi foe jere: „Gi jesi na den wan di e teki fesi na oen mindri èn saka oensrefi na den ondro, foe di den e loekoe den sili foe oenoe leki sma di sa gi frantiwortoe, so taki den kan doe disi nanga prisiri èn no nanga soktoe, bika disi ben sa doe oenoe ogri.” — Hebrewsma 13:17.
No go denki tra sani foe den wan di Jehovah froekisi leki en foetoeboi
13. Foe san ede wi kan froetrow den wan di kisi a wroko foe teki fesi?
13 Bijbel e jepi wi foe abi wan balansi fasi te wi e sori froetrow na ini den wan di e teki fesi na mindri a pipel foe Jehovah. Wi ben sa kan aksi wisrefi: ’Oiti a ben de so, taki Moses ben meki fowtoe? A ben de so, taki ala ten den apostel ben sori a kresten fasi di Jesus ben wani taki den ben moesoe sori? Den piki de makriki. Jehovah bosroiti foe gebroiki den loyaal man di gi densrefi ini a dini foe En, foe tiri En pipel, ala di den man disi de onvolmaakti. So srefi, ala di owroeman de onvolmaakti na ini a ten disi, tokoe wi moesoe erken den leki sma „di santa jeje ben poti [den] foe wroko leki opziener na [wi] mindri, foe wei a gemeente foe Gado”. Den e froedini a horibaka nanga lespeki foe wi. — Tori foe den Apostel 20:28.
14. San boen foe si ini a tori foe a froekisi di Jehovah ben froekisi Moses leki tiriman na presi foe Aron noso Miriam?
14 Aron ben owroe dri jari moro Moses, ma ala toe ben moro jongoe leki a sisa foe den, Miriam (Exodus 2:3, 4; 7:7). Èn foe di Aron ben man taki moro grati leki en brada Moses, meki Gado ben poti en na wroko foe dini leki a takiman foe en brada (Exodus 6:29–7:2). Tokoe, foe tiri den Israèlsma, Jehovah no ben teki a moro owroewan, Miriam, noso a sma di e taki moro grati, Aron. Jehovah ben froekisi Moses foe di A ben loekoe ala den troe tori èn den sani di ben de fanowdoe na a momenti dati. Di, wan pisi ten, Aron nanga Miriam no ben abi a krin loekoe disi, dan den ben kragi: „Nanga jepi foe Moses wawan Jehovah e taki? A no ben taki nanga jepi foe wi so srefi?” Miriam, di kande ben de a fosiwan di bigin a sani, ben kisi strafoe gi a sori di a no ben sori lespeki gi a wan di Jehovah froekisi; Miriam nanga Aron ben moesoe si taki Moses ben de „a moro safri-ati wan foe ala libisma na grontapoe”. — Numeri 12:1-3, 9-15.
15, 16. Fa Kaleb ben sori taki a ben poti froetrow na tapoe Jehovah?
15 Di den ben seni 12 spion go foe loekoe a Pramisi Kondre, dan 10 foe den ben tjari wan boskopoe kon baka di no ben moi srefisrefi. Foe di den 10 man disi ben taki foe den Kanansma taki den ben de „mansma di bigi pasa marki”, meki na ati foe den Israèlsma ben kon frede. Disi baka, ben meki den Israèlsma „kroetoe Moses nanga Aron”. Ma a no ala den spion ben sori taki den no ben abi froetrow na ini Moses èn na ini Jehovah. Wi e leisi: „Ne Kaleb ben proeberi foe tiri na ati foe a pipel teige Moses, èn a ben taki baka dati: ’Meki wi go wantewante, èn seiker wi sa teki a presi, bika wi kan wini en troetroe’ ” (Numeri 13:2, 25–33; 14:2). A kompe spion foe Kaleb, Josua, ben teki a srefi krakti bosroiti toe di Kaleb ben teki. Ala toe ben sori taki den ben meki Jehovah tron a sma di den e froetrow, di den ben taki: „Efoe Jehovah prisiri nanga wi, dan seiker a sa tjari wi go na ini a kondre disi èn gi wi dati, wan kondre pe merki nanga oni e lon. Soso, . . . no frede gi a pipel foe a kondre, . . . Jehovah de nanga wi. No frede den” (Numeri 14:6-9). A froetrow disi di den ben poti na tapoe Jehovah, ben kisi pai. Foe den bigisma foe a geslakti di ben de na libi na a ten dati, soso Kaleb, Josua, nanga wan toe Leifisma ben kisi a grani foe go na ini a Pramisi Kondre.
16 Wan toe jari na baka, Kaleb ben taki: „Mi foe mi sei, mi ben waka na baka Jehovah mi Gado dorodoro. Èn now, loekoe, Jehovah hori mi na libi fotenti na feifi jari kaba, joisti so, leki fa a ben pramisi, sensi Jehovah ben gi Moses a pramisi disi di Israèl ben waka na ini a gran sabana, èn loekoe, now mi owroe aititenti na feifi jari. Tokoe, tide mi tranga a srefi leki na a dei di Moses ben seni mi go. Soleki fa mi krakti ben de ini a ten dati, na so mi krakti de now” (Josua 14:6-11). Loekoe a positief fasi fa Kaleb ben tjari ensrefi, a getrowfasi foe en, èn a man di a ben man doe sani nanga en skin. Tokoe, Jehovah no ben froekisi Kaleb foe tron a sma di ben o tiri baka Moses. Na Josua ben kisi a grani disi. Wi kan de seiker taki Jehovah ben abi reide foe san ede a ben froekisi Josua, èn a ben de a moro boen sani di A ben doe.
17. San ben sa kan meki taki a gersi dati Petrus no ben bekwaam nofo foe teki frantiwortoe?
17 Na apostel Petrus ben taki dri leisi taki a no sabi en Masra. Nanga tranga a ben wani doe sani fa a ben denki, di a ben koti wan jesi poeroe foe a srafoe foe a granpriester (Mateus 26:47-55, 69-75; Johanes 18:10, 11). Son sma ben sa kan taki dati Petrus ben de wan sma di e fredefrede, di no abi balansifasi èn di no boen foe kisi grani srefisrefi. Ma tokoe, soema ben kisi den sroto foe a Kownoekondre, soema ben kisi a grani foe opo a pasi foe wan hemel kari gi dri groepoe? A ben de Petrus. — Tori foe den Apostel 2:1-41; 8:14-17; 10:1-48.
18. Sortoe fowtoe, di Judas e kari, wi no wani meki?
18 Den eksempre disi e sori wi taki wi moesoe loekoe boen foe no kroetoe wan sma foe den sani di wi e si na dorosei foe a sma. Efoe wi e poti wi froetrow na tapoe Jehovah, dan wi no sa tweifri na den wan di En e froekisi. Ala di a gemeente foe En na grontapoe meki foe onvolmaakti libisma, di no e taki dati den no kan meki fowtoe, tokoe Jehovah e gebroiki den na wan makti fasi. Judas, na afoe-brada foe Jesus, ben warskow den fosi jarihondro kresten gi den sma di „no e lespeki tirimakti èn den e taki na wan skempi fasi foe den santawan” (Judas 8-10). Noiti wi no moesoe de leki den.
19. Foe san ede wi no abi reide foe denki tra sani foe den wan di Jehovah froekisi?
19 Soleki fa a sori, dan Jehovah e froekisi gi spesroetoe sortoe frantiwortoe wroko, den sma di abi spesroetoe eigifasi di de fanowdoe foe tiri En pipel na a fasi di En wani taki den moesoe go na a spesroetoe momenti dati. Wi moesoe meki moeiti foe si a troe tori disi, èn no go denki tra sani foe den wan di Gado froekisi, ma wi moesoe de tevrede èn abi sakafasi foe dini pe Jehovah poti wi foe dini. Na so wi e sori taki wi e poti wi froetrow na tapoe Jehovah. — Efeisesma 4:11-16; Filipisma 2:3.
Sori froetrow na ini a regtfardikifasi foe Jehovah
20, 21. San wi ben sa kan leri foe a fasi fa Gado ben handri nanga Moses?
20 Efoe son tron wi e poti toemoesi foeroe froetrow na tapoe wisrefi èn pikinso nomo na tapoe Jehovah, dan meki wi leri wan sani foe Moses. Di Moses ben abi 40 jari, ensrefi ben go foe fri den Israèlsma foe katibo na Egipti. Sondro tweifri, na soso boen Moses ben wani doe di a ben doe den moeiti disi, ma den moeiti disi no ben fri den Israèlsma wantewante, èn so srefi en eigi situwâsi no ben kon moro boen. Foe taki en reti, Moses ben abi foe lon gowe. Nomo di a ben kisi leri 40 jari langa na wan doroseikondre, a ben kon bekwaam foe de a sma di ben sa kan doe san a ben wani foe doe fosi. Disi leisi Moses ben kan abi na overtoigi taki Jehovah ben horibaka gi en, bika sani ben pasa now leki fa Jehovah ben wani den foe pasa èn na tapoe a ten di fiti gi Jehovah. — Exodus 2:11–3:10.
21 Ibriwan foe wi ben sa kan aksi ensrefi: ’A kan taki son tron mi e lon na fesi Jehovah nanga den owroeman di A poti na wroko ini a gemeente, foe di mi e proeberi foe doe sani moro gaw noso foe doe sani fa mi wani? Na presi foe mi feni taki den brada no gi mi spesroetoe grani, mi de klariklari foe teki fanowdoe leri gi wan pisi ten?’ Troetroe, wi leri wan prenspari lès foe Moses?
22. Ala di Moses ben lasi wan bigi grani, tokoe fa a ben denki foe Jehovah?
22 Boiti dati, wi kan leri wan tra lès foe Moses. Numeri 20:7-13 e froeteri wi foe wan fowtoe di a ben meki èn di a ben abi foe pai diri foe dati. A ben lasi a grani foe tjari den Israèlsma go na ini a Pramisi Kondre. A ben taki dati a bosroiti di Jehovah ben teki no ben reti? A ben hari ensrefi poeroe go de en wawan, èn e knoroe foe di Gado ben handri nanga en na wan toemoesi ogri fasi? Moses ben lasi a froetrow di a ben poti na tapoe Jehovah regtfardikifasi? Wi kan feni a piki na ini den wortoe di Moses srefi ben taigi den Israèlsma sjatoe bifo a dede. Moses ben taki foe Jehovah: „Volmaakti en wroko de, bika ala den pasi foe en na retidoe. Wan Gado foe getrowfasi, di na en no wan kroektoedoe de; regtfardiki èn opregti a de” (Deuteronomium 32:4). Seiker Moses ben tan abi froetrow na ini Jehovah te na a kaba. Fa a de nanga wi? Ibriwan foe wi e doe sani foe meki a froetrow di wi abi na ini Jehovah èn na ini en regtfardikifasi, kon moro tranga? Fa wi kan doe dati? Meki wi go loekoe dati.
San joe ben sa piki?
◻ Sortoe reide den Israèlsma ben abi foe froetrow na tapoe Jehovah?
◻ San wi kan leri foe Abraham ini a tori foe froetrow?
◻ Foe san ede wi no moesoe denki tra sani foe den wan di Jehovah froekisi?
[Prenki na tapoe bladzijde 13]
Foe froetrow na ini Jehovah abi so srefi na ini foe lespeki den wan di e teki fesi na ini a gemeente