Joe abi wan engel di e kibri joe?
JOE e bribi taki joe abi wan engel di e kibri joe? Foeroe sma e denki taki den abi wan engel di e kibri den. Foe na afersi dati, sma e taki foe wan oema di e tan na a westsei foe Kanada, taki na oema abi spesroetoe presenti di abi foe doe nanga engel. Efoe joe e gi na oema disi ala den nen foe joe makandra nanga 200 Kanada dala, dan a e taki dati a sa meki joe miti na engel di e kibri joe. A fosi sani di a e doe na taki a e prakseri dipi ala di a e poti ala en prakseri na tapoe a faja foe wan kandra. Baka dati, a e kisi wan fisjoen pe na engel foe joe e gi en wan boskopoe foe froeteri joe. Leki wan baksis, na oema e froeteri joe soema na engel foe joe gersi.
Gi wan toe sma, a sani disi kan gersi a tori foe a Fransi Kownoe Lodewijk IX. Soleki fa sma e denki, dan a ben bai kefalek diri wiwiri di fadon foe den frei foe a Gran engel Mikaèl. Ala di foeroe sma kan aksi densrefi efoe so wan sani pasa, tokoe den no ben sa tweifri srefisrefi na a sani di na oema e taki.
A hari di sani foe engel e hari sma
Na ini den jari di pasa no so langa ete, sma ben abi kefalek foeroe belangstelling gi engel. Na tapoe telefisi nanga na ini kino, boekoe, tijdschrift, nanga koranti, wi e kisi foe jere foe engel di e trowstoe den sma di siki serjoesoe, èn den sma di e sari foe di den lasi wan lobiwan na ini dede; so srefi wi e kisi foe jere foe engel di e gi koni, èn di e poeroe sma na dede. Na Amerkankondre, so wan 20 miljoen sma e loekoe sani na telefisi ibri wiki di e sori fa engel e kon na ini a libi foe sma. Wan boekoe wenkri e kari so wan 400 boekoe di e taki foe engel.
Wan boekoe foe no so langa pasa, e froeteri foe engel di e kibri sma èn di ben kibri a libi foe sroedati di ben de na feti. Papira di sma kan plak na tapoe wagi, e taki dati den sma di e rei a wagi nanga so wan papira na tapoe, e kisi kibri foe engel di e kibri den. Organisâsi, konmakandra, nanga stoeka groepoe, e horibaka gi a studie foe engel èn e taki dati den e jepi sma foe taki nanga den engel.
Eileen Freeman skrifi dri boekoe di e taki foe engel, èn a tjari wan tijdschrift kon na doro di e taki soso foe engel. Eileen e froeklari: „Mi e bribi taki a nomroe foe engel di de na hemel, na a srefi nomroe foe engel na Grontapoe di e kibri sma, dati na libi sani di a wroko foe den a no soso foe prèise Gado na ini hemel, ma den moesoe sorgoe troetroe toe gi libisma nanga tra sortoe libi na Grontapoe. Wan engel di e kibri wi e kisi a wroko foe loekoe wi te wi e bigin libi ini wi mama bere, te wi e gro ini wi mama bere, te wi gebore, te wi e libi na a grontapoe disi, te leki na engel e poeroe wi foe den skotoe foe a grontapoe disi èn tjari wi go ini a glori foe hemel.” A sani disi e sori heri boen a pôpi prakseri di sma abi foe engel di e kibri den.
Na ini den hebi ten disi di moeilek, a e gi trowstoe foe bribi taki wi abi wi eigi engel di e kibri wi, di abi a wroko foe kibri wi. San Gado Wortoe, bijbel, e taki foe a sani disi? Wi moesoe proeberi foe kon ini kontakti nanga engel? Den engel e broko den ede nanga wi moreel markitiki èn den sani di wi e bribi? Sortoe jepi wi kan froewakti foe den engel? Wi sa piki den aksi disi na ini na artikel di e kon now.