Yu abi wan engel di e kibri yu?

Bijbel no e leri wi taki ibri sma abi wan engel di e kibri en. A tru taki wan leisi Yesus ben taki: „Luku bun taki unu no e wisiwasi wan fu den pikinwan disi [Krestes disipel], bika mi e taigi unu taki ala ten den engel fu den na ini hemel, e si mi Tata di de na hemel” (Mateyus 18:10). Dyaso Yesus no e taki dati ibri sma abi wan engel di e kibri en. Ma a ben wani sori taki den engel e poti prakseri na ibriwan fu den disipel fu en. Dati meki tru Kresten no e du dondon sani fu di den denki taki den engel fu Gado o kibri den so taki den no kisi mankeri.

Disi wani taki dati engel no e yepi libisma? Nôno (Psalm 91:11). Son sma e bribi tranga taki Gado gebroiki en engel fu kibri den noso fu sori den san den musu du. Kenneth di wi ben taki fu en na ini a fosi artikel, na wan fu den sma dati. Aladi wi no man taki seiker taki na so a de, toku a kan taki a abi leti. Yehovah Kotoigi ondrofeni furu leisi taki engel horibaka gi den na ini a preikiwroko di den e du. Ma fu di wi no man si engel, meki wi no man taki o furu Yehovah e gebroiki den fu yepi sma na ini difrenti situwâsi. Toku a no fowtu fu taigi na Almaktiwan grantangi taki a yepi wi, a no abi trobi na sortu fasi a du dati.​—Kolosesma 3:15; Yakobus 1:17, 18.