Kresneti — Gowe libi krestes?

„Noiti mi ben man erken den fesa foe a kresneti ten. A gersi gi mi taki den fesa no e kroederi srefisrefi nanga a libi èn den leri foe Jesus.” — Mohandas K. Gandhi.

FOEROE sma no ben sa agri srefisrefi nanga Gandhi. ’San’, den ben sa aksi densrefi kande, ’wan Hindoe tiriman ben sa kan sabi wan sani troetroe foe wan kresten fesa?’ Ma wi moesoe erken taki kresneti panja na heri grontapoe, èn abi krakti na tapoe ala sortoe koeltoeroe. Ibri december, a gersi taki a fesa de na ini ibri koeltoeroe.

Foe eksempre, pikinmoro 145 miljoen Asiasma e hori kresneti, 40 miljoen sma moro leki tin jari pasa. Èn efoe Gandhi ben kari „den fesa” a grontapoe sei foe a disiten kresneti, a feti di sma e feti foe bai sani èn di wi alamala kan si, dan wi no abi tra fasi leki foe erken taki foeroetron a sei disi foe a fesa de moro pôpi. Asiaweek tijdschrift e taki: „Kresneti na Asia — den fesa leti di e skèin na Hong Kong èn den hei kresneti bon na ini den hotel foe Beijing èn sani di sma meki foe prenki a geborte foe Jesus na ini a moro prenspari bisnis presi na Singapore — de moro foeroe wan grontapoe (bisnis) fesa.”

A disiten kresneti fesa frigiti Krestes? Tapoe papira, den sma teki 25 december leki wan fesadei foe sensi a di foe fo jarihondro G.T., di a Lomsoe Kerki ben poti a dei dati leki wan relisi fesadei foe a geborte foe Jesus. Ma soleki fa wan ondrosoekoe e sori di ben doe no so langa pasa na ini Amerkankondre, dan soso 33 procent foe den sma di den ben aksi, ben bribi taki a geborte foe Krestes na a moro prenspari sani foe Kresneti.

San joe e prakseri? Joe e denki son tron taki te so foeroe serjoesoe reklame e meki, èn sma e feti e bai kado, den e moi den bon, e orga èn e go na fesa, e seni kresneti karta go na makandra — taki den ben gowe libi Jesus?

Foeroe sma e prakseri taki wan fasi fa foe poti Krestes baka na ini kresneti, na foe meki sani di e prenki a Geborte foe Jesus. Seiker joe si den sortoe groepoe popki di e prenki a beibi Jesus na ini wan njanjan baki pe Maria, Josef, nanga wan toe skapoeman, „dri koni man”, noso „dri kownoe”, wan toe meti, èn wan toe sma di e loekoe e tanapoe lontoe en. Foeroe sma e bribi taki den sortoe fasi disi foe prenki a geborte foe Jesus, na foe memre sma san kresneti wani taki troetroe. Soleki fa U.S. Catholic e taki, „wan sani di sma e meki foe prenki a geborte foe Jesus e gi wan moro krin idea, moro leki iniwan foe den Evangelie kan gi, ala di a e sori so srefi taki den tori disi no de akroederi a historia”.

Ma fa wan sani di sma meki foe prenki a Geborte foe Jesus e sori taki den tori na ini den Evangelie foe bijbel no de akroederi a historia? We, wi moesoe taki dati den pikin popki di sma ferfi na wan moi èn koni fasi e meki a geborte foe Krestes gersi wan anansitori. Di wan moniki ben meki a kon pôpi a fosi leisi na ini a di foe 13 jarihondro, dan a sani di sma e meki foe prenki a Geborte foe Jesus no ben abi wan lo pranpran. Na ini a ten disi, soleki nanga foeroe tra sani di abi foe doe nanga a fesa disi, den sani di sma e meki foe prenki a Geborte foe Jesus kon tron wan bigi bisnis. Na ini Napels, Italia, foeroe wenkri e seri popki foe gebroiki na ini a sani di sma e meki foe prenki a Geborte foe Jesus, noso presepi, a heri jari. Wan toe foe den moro pôpi popki no e prenki sma foe den Evangelie, ma den disiten pôpi sma, soleki Prinses Diana, Mama Teresa, nanga krosimekiman Gianni Versace. Na tra presi den e meki presepi foe chocolade, pasta, srefi foe skropoe. Joe kan froestan foe san ede a moeilek foe si a historia na ini den sortoe sani disi di sma e meki.

Fa den sortoe sani disi di sma e meki foe a Geborte foe Jesus kan gi „wan moro krin idea moro leki iniwan evangelie”? Den Evangelie tori no e kroederi troetroe nanga a historia? Srefi sma di e tweifri serjoesoe, moesoe erken taki Jesus ben de wan troetroe sma na ini a historia. So boen, wan dei a ben moesoe de wan troetroe beibi, di gebore na wan troetroe presi. Wan moro boen fasi moesoe de foe sabi soifri san ben pasa na ini a pisi ten di a gebore, leki nomo foe loekoe wan sani di sma meki foe prenki a Geborte foe Jesus!

Foe taki en leti, wan moro boen fasi de. Toe historia skrifiman ben skrifi foe a geborte foe Jesus sondro taki den ben jepi makandra. Efoe joe e denki son tron taki sma no e poti prakseri na tapoe Krestes srefisrefi na a ten foe kresneti, dan foe san ede joe no e ondrosoekoe den tori disi joesrefi? Na ini den tori disi, joe no sa feni anansitori, ma wan span tori — a troetroe tori foe a geborte foe Krestes.

[Sma di abi a reti foe a prenki na tapoe bladzijde 3]

A lanki foe bladzijde 3-6, 8 nanga 9: Fifty Years of Soviet Art