A Bigi Patoe-bakriman nanga a wroko foe en
„[Tron] wan prapi gi wan warti marki, . . . di meki gi ibri boen wroko.” — 2 TIMOTEUS 2:21.
1, 2. (a) Fa a kria di Gado ben kria a man nanga na oema ben de wan kefalek moi wroko di a ben doe? (b) Foe san dede a Bigi Patoe-bakriman ben meki Adam nanga Eva?
JEHOVAH na a Bigi Patoe-bakriman. Wan kefalek moi sani di a ben kria ben de wi fosi papa, Adam. Bijbel e taigi wi: „Jehovah Gado ben go moro fara foe teki doti foe a gron meki libisma èn foe bro a libibro na ini en noso-olo, èn libisma ben tron wan libi sili”, dati wani taki, wan „kriatoeroe di e bro” (Genesis 2:7, foetoewortoe). A fosi libisma kriatoeroe dati ben de volmaakti, foe di a meki na a troetroe prenki foe Gado, wan boeweisi foe En koni èn En lobi gi troetroe regtfardikifasi nanga geregtighèit.
2 Di a ben gebroiki wan lebriki foe Adam, Gado ben meki so srefi wan fitipisi nanga wan jepi gi a man — wan oema. A moifasi foe Eva di no ben abi fowtoe srefisrefi ben boen srefisrefi moro leki a moro moi oema na ini a ten disi (Genesis 2:21-23). Moro fara, Gado ben gi a fosi libisma paar a skin nanga a bekwaamfasi di meki na wan volmaakti fasi foe man doe a wroko di den kisi foe doe, foe meki a grontapoe disi tron wan paradijs. Gado ben gi den so srefi a makti foe doe a komando di Gado ben gi den èn di skrifi na Genesis 1:28: „Oen meki pikin èn kon foeroe èn foeroe grontapoe èn poti en na oen ondro, èn abi na oen ondro den fisi foe se nanga den kriatoeroe foe hemel di e frei, nanga ibri libi kriatoeroe di e boeweigi na grontapoe.” Te foe kaba, a djari disi na heri grontapoe ben moesoe foeroe nanga miljardmiljard libisma di abi prisiri, èn di tai na makandra na ini a lobi di de „wan volmaakti banti foe wánfasi”. — Kolosesma 3:14.
3. Fa wi fosi papa nanga mama ben tron prapi gi wan marki di no warti, èn nanga sortoe bakapisi?
3 A de wan sari sani taki wi fosi papa nanga mama foe espresi ben froekisi foe opo densrefi teige a tirimakti foe a Soeverein Kriaman foe den, a Bigi Patoe-bakriman. A fasi fa den ben tjari densrefi ben kon de leki fa a ben skrifi na Jesaja 29:15, 16: „Heloe foe den sma di e go dipi srefisrefi foe kibri a rai foe Jehovah, èn di doe sani na doengroe presi, ala di den e taki: „Soema e si wi, èn soema sabi sani foe wi?’ . . . Wi moesoe si a patoe-bakriman a srefi leki a tokotoko? Bika a mekisani moesoe taki foe a mekiman foe en: „A no ben meki mi”? Èn a sani di seti moesoe taki troetroe foe a setiman foe en: „A no ben sori froestan”? A tranga-ede foe den ben tjari rampoe kon — a strafoe foe têgo dede. Boiti dati, a heri libisma famiri di ben kon foe den, ben kisi sondoe nanga dede (Romesma 5:12, 18). A moifasi foe den sani di a Bigi Patoe-bakriman ben kria, ben kon pori srefisrefi.
4. Gi sortoe warti marki wi kan dini?
4 Ma srefi na ini na onvolmaakti situwâsi foe wi, wi leki bakapikin foe a sondari Adam kan prèise Jehovah nanga den wortoe foe Psalm 139:14: „Mi sa prèise joe foe di joe ben meki mi na wan froewondroe fasi di e gi lespeki frede. Den wroko foe joe moi srefisrefi, soleki fa mi sili sabi dati heri boen.” Ma a de wan sari sani, taki den fosi sma di a Bigi Patoe-bakriman ben meki, kon flaka na so wan takroe fasi!
A Patoe-bakriman e go doro nanga en wroko
5. Fa a koni foe a Bigi Patoe-bakriman ben moesoe gebroiki?
5 Kolokoe taki wi Kriaman no ben o gebroiki en koni leki Patoe-bakriman soso foe meki den libisma di A ben kria na ini a bigin. Na apostel Paulus e taigi wi: „O libisma, soema na joe dan, taki joe e piki Gado baka? A sani di sma meki sa taigi a sma di meki en: ’Foe san ede joe meki mi na a fasi disi?’ San! A patoe-bakriman no abi makti na tapoe a tokotoko, foe meki foe a srefi tokotoko wan prapi foe gebroiki na wan warti fasi èn wan trawan foe gebroiki na wan fasi di no warti?” — Romesma 9:20, 21.
6, 7. (a) Fa foeroe sma na ini a ten disi e froekisi foe kweki eigifasi na ini den gi wan marki di no warti? (b) Fa Jehovah e kweki eigifasi na ini den regtfardikiwan di a kan gebroiki na wan warti fasi?
6 Ija, son wan foe den sani di a Bigi Patoe-bakriman meki a sa gebroiki na wan warti fasi, èn son wan na wan fasi di no warti. Den sma di e froekisi foe go nanga grontapoe ala di a e saka go moro nanga moro na ini a swampoe foe godelowsoefasi, e kweki den eigifasi na so wan fasi taki den sa poti aparti foe kisi pori. Te a glori Kownoe, Krestes Jesus, e kon foe kroetoe sma, dan den sortoe prapi disi di no warti sa de ala den tranga-ede libisma di wi kan gersi nanga bokoboko, di, soleki fa Mateus 25:46 e taki, sa „go na ini a têgo koti poeroe”. Ma den „regtfardikiwan” di wi kan gersi nanga skapoe, di meki foe gebroiki na wan „warti fasi”, sa kisi „têgo libi”.
7 Den regtfardikiwan disi saka densrefi nanga sakafasi foe meki Gado e kweki den eigifasi na ini den. Den go na tapoe Gado pasi foe libi. Den teki a rai di de na ini 1 Timoteus 6:17-19: „No poti [joe] howpoe na tapoe goedoe di no e gi seikerfasi, ma na tapoe Gado, di e gi wi ala sani foeroe foe njan boen foe den.” Den doe moeiti „foe doe boen, foe de goedoe ini boen wroko, foe lobi foe gi, foe de klariklari foe prati nanga trawan, èn foe kibri leki wan goedoe gi densrefi wan boen fondamenti gi a tamara, so taki den kan hori a troetroe libi steifi”. A waarheid foe Gado e kweki eigifasi na ini den èn den e sori tranga bribi na ini a sani di Jehovah seti nanga jepi foe Krestes Jesus, di „ben gi ensrefi leki wan srefi sortoe loesoe-paiman” foe meki ala sani di ben lasi bika foe a sondoe foe Adam, kon boen baka (1 Timoteus 2:6). Wi moesoe de klariklari foe dati ede foe saka wisrefi na ondro a rai foe Paulus foe „weri [gi wisrefi] a njoen persoonlijkheid, di e meki kon njoen nanga jepi foe soifri sabi akroederi a prenki foe a Sma di ben kria en”! — Kolosesma 3:10.
Sortoe prapi joe sa de?
8. (a) San e bepaal sortoe prapi wan sma o tron? (b) Sortoe toe sani e kweki eigifasi na ini wan sma?
8 San e bepaal sortoe prapi wan sma e tron? A fasi fa a e denki èn a fasi fa a e tjari ensrefi. Fosi, den lostoe nanga den firi foe na ati e meki den toe sani disi. A koni kownoe Salomo ben taki: „Na ati foe libisma kan prakseri en pasi, ma Jehovah srefi e tiri den foetoestap foe en” (Odo 16:9). A di foe toe, den sani di den jere èn si, den kompe nanga den ondrofeni foe den, e meki den. Foe dati ede a prenspari taki wi e gi jesi na a rai: „A sma di e waka nanga koni sma, sa kon koni, ma a sma di abi foe doe nanga den wan sondro froestan, a no sa go boen nanga en” (Odo 13:20). Soleki fa 2 Petrus 1:16 e warskow wi, wi no moesoe waka na baka „leitori di sma froeteri na wan koni fasi”, noso soleki fa Lomsoe Katolik vertaling foe Knox e taki, „anansitori di libisma meki”. Disi ben sa de so srefi foeroe foe den leri nanga relisi fesa foe krestenhèit di fadon komoto na bribi.
9. Fa wi kan handri boen na tapoe a kweki di a Bigi Patoe-bakriman e kweki eigifasi na ini wi?
9 Foe dati ede, akroederi a fasi fa wi e handri, Gado kan kweki eigifasi na ini wi. Nanga sakafasi bifo Jehovah, wi kan begi a begi foe David toe: „Ondrosoekoe mi, o Gado, èn sabi mi ati. Ondrosoekoe mi, èn sabi den prakseri foe mi di e trobi mi, èn loekoe efoe wan sari pasi de na ini mi, èn tjari mi na tapoe a pasi foe ten di no skotoe” (Psalm 139:23, 24). Jehovah e meki taki a Kownoekondre boskopoe e preiki. Wi ati ben warderi a boen njoensoe èn den tiri di a e gi moro fara. Nanga jepi foe en organisâsi a e gi wi difrenti grani di abi foe doe nanga a preiki foe a boen njoensoe; meki wi hori den steifi, èn warderi den. — Filipisma 1:9-11.
10. Fa wi moesoe doe moeiti foe hori wisrefi na programa foe jeje sani?
10 A prenspari srefisrefi taki wi e poti prakseri na tapoe a Wortoe foe Gado dorodoro, èn taki wi abi wan aladei programa foe leisi bijbel èn e meki den Boekoe foe bijbel èn a diniwroko foe Jehovah tron wan fondamenti foe den takimakandra na ini wi osofamiri èn nanga den mati foe wi. A mamanten anbegi programa di e hori na a ten foe a mamanten njanjan na ibri Bethelfamiri nanga zendeling-oso foe Jehovah Kotoigi, abi nofotron baka ibri wiki, a leisi di den e leisi bijbel sjatoe, noso a njoen Jaarboek. Joe osofamiri ben kan abi so wan srefi sortoe seti? Wi alamala e kisi foeroe wini toe na den demakandra foe wi na ini a kresten gemeente, na den konmakandra foe wi, èn spesroetoe te wi abi wan prati na a alawiki Waktitoren-studie!
A e kweki den eigifasi foe wi foe kakafoetoe teige tesi
11, 12. (a) Fa wi kan gebroiki a rai foe Jakobus di abi foe doe nanga den tesi na ini wi aladei libi? (b) Fa na ondrofenitori foe Job e gi wi deki-ati foe hori wi soifri retifasi?
11 Na ini wi aladei libi, Gado e gi pasi meki son situwâsi opo kon, èn wan toe foe den kan moeilek gi wi. Fa wi moesoe si den situwâsi disi? Soleki fa Jakobus 4:8 e gi a rai, noiti wi moesoe abi bita-ati, ma meki wi kon krosibei na Gado, èn froetrow en nanga wi heri ati, nanga a froetrow taki efoe wi ’kon krosibei na en, dan a sa kon krosibei na wi’. A troe, wi sa abi foe horidoro na ondro problema nanga tesi, ma Gado e gi den pasi foe kweki eigifasi na ini wi, nanga wan prisiri bakapisi. Jakobus 1:2, 3 e gi wi a djaranti: „Si en leki wan troetroe prisiri nomo, mi brada, te oenoe e miti difrenti tesi, foe di oenoe sabi taki na eigifasi disi foe oen bribi di kisi tesi, abi horidoro leki bakapisi.”
12 Jakobus e taki toe: „No meki no wan sma, te tesi miti en, taki: „Na Gado e tesi mi.” Bika sma no kan tesi Gado nanga ogri sani, èn ensrefi no e tesi no wan sma toe. Ma ibriwan sma e kisi tesi foe di en eigi lostoe e hari en èn e kori en” (Jakobus 1:13, 14). Wi kan kisi foeroe èn difrenti tesi kande, ma soleki fa a ben de nanga Job, den alamala e doe wan sani foe kweki eigifasi na ini wi. Foe dati ede den Boekoe foe bijbel e gi wi wan bigi djaranti na Jakobus 5:11: „Loekoe! Wi e froeklari den wan kolokoe di horidoro. Oenoe jere foe a hori di Job horidoro èn si a bakapisi di Jehovah ben gi, taki Jehovah abi foeroe safoe lobi firi èn a abi sari-atifasi.” Leki prapi na ini na anoe foe a Bigi Patoe-bakriman, meki a de so taki wi e hori wi soifri retifasi ala ten, nanga wan froetrow na ini a bakapisi leki Job! — Job 2:3, 9, 10; 27:5; 31:1-6; 42:12-15.
Kweki eigifasi na ini den jongoewan foe wi
13, 14. (a) O ten papa nanga mama moesoe bigin foe kweki eigifasi na ini den pikin foe den, èn nanga sortoe bakapisi te foe kaba, na prakseri? (b) Sortoe moi bakapisi joe kan kari?
13 Papa nanga mama kan abi wan prati foe kweki eigifasi na ini den jongoewan foe den, na a pikin-nengreten kaba, èn den jongoewan foe wi kan tron kefalek boen sma di e hori den soifri retifasi! (2 Timoteus 3:14, 15) Disi de troe srefi te den e kisi kefalek hebi tesi. Wan toe jari pasa, di froefolgoe ben hebi srefisrefi na ini wan Afrikan kondre, dan wan getrow osofamiri ben sorgoe gi den drukwroko foe A Waktitoren di ben doe na wan kibri fasi na ini wan maksin na a bakadjari. Wan dei den sroedati ben de na strati e ondrosoekoe ibri oso foe feni jonkoeman foe poti den na ini a legre. Ten ben de ete gi den toe jongoe boi foe na osofamiri disi foe go kibri, ma a finifini soekoe di den sroedati ben sa soekoe seiker ben sa meki den feni a drukpers. Disi ben kan abi leki bakapisi taki a heri osofamiri ben o kisi kefalek skin-ati noso dede srefi. San den ben sa kan doe? Den toe boi ben taki sondro frede di den ben kari Johanes 15:13: „No wan sma abi moro foeroe lobi leki disi, taki wan sma gi en sili abra gi a boen foe den mati foe en.” Den ben wani nomonomo foe tan na ini a foroisi. Den sroedati ben o feni den èn seiker ben sa gi den kefalek skin-ati noso kiri den srefi efoe den ben weigri foe go na ini a legre. Ma dan den no ben o soekoe moro fara. Dan a drukpers nanga den tra memre foe na osofamiri ben sa kisi kibri. Ma wan kefalek moi bakapisi ben de. Den sroedati troetroe ben pasa na oso disi, èn ben e go doro na den tra oso! Den libisma prapi dati di Jehovah ben meki foe gebroiki na wan warti fasi ben tan na libi, makandra nanga a drukpers, foe tan tjari jeje njanjan kon na doro na a reti ten. Wan foe den toe boi nanga en sisa e dini now na Bethel; a e gebroiki na owroe masjin te now ete.
14 Den jongoewan kan leri fa foe begi èn Gado e piki den begi foe den. Wan kefalek moi eksempre foe disi ben feni presi na a ten di sma ben kiri trawan na ipi-pi na ini Rwanda. Di oproeroeman ben de klariklari foe kiri wan meisje di abi siksi jari nanga a papa nanga mama foe en nanga wan handgranaat, dan na oemapikin ben begi nanga tranga sten èn fajafaja taki noti ben sa pasa nanga den so taki den kan tan dini Jehovah moro fara. Dati ben boeweigi na ati foe den man di ben o kiri den foe no doe na osofamiri noti, di den ben taki: „Wi no man kiri oenoe, foe a pikin meisje disi ede.” — 1 Petrus 3:12.
15. Gi sortoe sani di kan abi wan pori krakti na tapoe sma, Paulus ben warskow?
15 Moro foeroe foe den jongoewan foe wi no abi foe miti nanga den sortoe moeilek situwâsi disi soleki den wan di wi kari na tapoesei, ma foeroe tesi de di den e miti na skoro èn na ini a kroeka libimakandra na ini a ten disi: dotitaki, sani di abi foe doe nanga seks, lagi fasi foe abi prisiriten, èn druk foe den speri foe doe fowtoe sani, de kefalek foeroe na ala sei. Foeroe tron na apostel Paulus ben warskow teige den sortoe sani disi di abi krakti na tapoe sma. — 1 Korentesma 5:6; 15:33, 34; Efeisesma 5:3-7.
16. Fa wan sma kan kon tron wan prapi di Jehovah kan gebroiki na wan warti fasi?
16 Baka di Paulus ben taki foe prapi di ben meki, „sonwan gi wan warti marki, ma trawan gi wan marki di no warti”, a e taki: „Efoe foe dati ede wan sma tan farawe foe a lastiwan, a sa de wan prapi gi wan warti marki, santa, di en eiginari man gebroiki, srekasreka gi ibri boen wroko.” So boen, meki wi gi den jongoewan foe wi a deki-ati foe loekoe boen soema na den kompe foe den. Meki den „lowe gi den lostoe di jongoe sma abi, ma feti na baka regtfardikifasi, bribi, lobi, vrede, makandra nanga den sma di e kari Masra nanga wan krin ati” (2 Timoteus 2:20-22). Wan programa na ini na osofamiri foe „bow makandra” kan de wan kefalek warti sani foe kweki eigifasi na ini den jongoewan foe wi (1 Tesalonikasma 5:11; Odo 22:6). Foe leisi bijbel ibri dei èn studeri en, ala di wi e gebroiki den poeblikâsi foe a Genootschap, ben kan de wan moi jepi.
Jehovah e kweki eigifasi na ini ala sma
17. Fa a kisi di wi e kisi tranga leri sa kweki eigifasi na ini wi, èn nanga sortoe prisiri bakapisi?
17 Foe kweki eigifasi na ini wi, Jehovah e gi wi rai na ini en Wortoe èn nanga jepi foe en organisâsi. Noiti no kakafoetoe teige a rai disi foe Gado! Teki en nanga koni, èn meki a meki joe na wan fasi di Jehovah kan gebroiki na wan warti fasi. Odo 3:11, 12 e gi a rai: „No trowe, o mi manpikin, a tranga leri foe Jehovah; èn no tegoe gi a piri-ai foe en, bika a sma di Jehovah lobi, na en a e piri-ai gi, neleki fa wan papa e doe nanga wan manpikin di a e prisiri nanga en.” Moro rai di e kon foe wan papa skrifi na Hebrewsma 12:6-11: „Jehovah lobi a sma di a e gi tranga leri . . . A troe taki no wan tranga leri na wan prisiri sani na a momenti di wi e kisi en, ma a e gi sari; tokoe, baka ten a e meki froktoe foe vrede gi den wan di oefen densrefi nanga dati, namkoe regtfardikifasi.” A moro prenspari presi foe kisi a tranga leri disi, moesoe de a Wortoe foe Gado di skrifi nanga jepi foe Gado en santa jeje. — 2 Timoteus 3:16, 17.
18. San wi e leri foe Lukas kapitel 15, di abi foe doe nanga berow?
18 Jehovah abi sari-ati toe (Exodus 34:6). Te sma e sori troetroe berow gi srefi a moro serjoesoe sondoe, A e gi pardon. Srefi disiten sma di ’lasi’, kan meki kon tron prapi di kan gebroiki na wan warti fasi (Lukas 15:22-24, 32). Kande den sondoe foe wi no serjoesoe leki di foe a manpikin di ben lasi. Ma a fasi fa wi e handri nanga sakafasi na tapoe bijbel rai, ala ten sa meki taki Jehovah e meki wi kon tron prapi di A kan gebroiki na wan warti fasi.
19. Fa wi kan tan dini leki prapi gi warti marki na ini na anoe foe Jehovah?
19 Di wi ben leri a waarheid na ini a bigin, dan wi ben sori taki wi de klariklari foe meki Jehovah meki wi kon tron a sma di wi de. Wi ben tapoe nanga den grontapoe sani, ben bigin weri a njoen fasi fa wan sma de, èn ben tron kresten di gi densrefi abra na Gado èn ben teki dopoe. Wi ben gi jesi na a rai foe Efeisesma 4:20-24, foe ’poeroe na owroe fasi fa wi de, di de akroederi a waka nanga libi di wi ben abi fosi èn di e pori akroederi den bedrigi lostoe foe en, èn weri a njoen fasi fa wi de, di ben kria akroederi a wani foe Gado na ini troetroe regtfardikifasi nanga loyaalfasi.’ Meki ibriwan foe wi, tan de leki wrokosani na ini na anoe foe Jehovah, a Bigi Patoe-bakriman, foe di wi e dini ala ten leki prapi di A kan gebroiki na wan warti fasi!
Foe loekoe sani sjatoe baka
◻ San na a prakseri di a Bigi Patoe-bakriman abi nanga a grontapoe foe wi?
◻ Fa Jehovah kan kweki eigifasi na ini joe di A kan gebroiki na wan warti fasi?
◻ Fa wi kan kweki eigifasi na ini den pikin foe wi?
◻ Fa wi moesoe prakseri foe trangaleri?
[Prenki na tapoe bladzijde 10]
Jehovah sa kweki eigifasi na ini joe di a kan gebroiki na wan warti fasi, noso a sa trowe joe?
[Prenki na tapoe bladzijde 12]
Papa nanga mama kan kweki eigifasi na ini den jongoewan foe sensi pikin-nengreten