A goedoe foe wi na ini tokotoko prapi
„Ma wi abi a goedoe disi na ini tokotoko prapi, so taki a krakti di e pasa san de normaal, ben sa de foe Gado èn no foe wisrefi.” — 2 KORENTESMA 4:7.
1. Fa na eksempre foe Jesus moesoe gi wi deki-ati?
ALA DI Jehovah ben e kweki eigifasi na ini Jesus djaso na grontapoe, Jesus ben ondrofeni den swakifasi foe a libisma famiri langalanga. Na eksempre foe en foe hori en soifri retifasi moesoe gi wi deki-ati troetroe! Na apostel e taigi wi: „Foe taki en leti, foe a sani disi ede den ben kari oenoe, bika srefi Krestes ben pina foe oenoe ede, èn ben libi gi oenoe wan eksempre foe waka soifri na ini en foetoestap” (1 Petrus 2:21). Foe di Jesus ben saka ensrefi foe Jehovah kweki eigifasi na ini en, a ben man wini grontapoe. A ben tranga den disipel foe en toe foe tron winiman (Tori foe den Apostel 4:13, 31; 9:27, 28; 14:3; 19:8). Èn a ben gi den tranga deki-ati troetroe na a kaba foe a lasti taki di a ben taki nanga den! A ben froeklari: „Mi taigi oenoe den sani disi, so taki nanga jepi foe mi oenoe kan abi vrede. Na ini grontapoe oenoe abi banawtoe, ma teki deki-ati!, mi wini grontapoe.” — Johanes 16:33.
2. Sortoe krin leti wi abi, kontrari a breni di grontapoe breni?
2 Na a srefi fasi, baka di a ben poti a breni di „a gado foe a seti foe sani disi” e breni sma, kontrari foe „a krin leti foe a glori boen njoensoe”, dan na apostel Paulus ben taki foe a warti diniwroko foe wi: „Wi abi a goedoe disi na ini tokotoko prapi, so taki a krakti di e pasa san de normaal, ben sa de foe Gado èn no foe wisrefi. Na ala fasi den kwinsi wi, ma den no kwinsi wi na so wan fasi taki wi no man boeweigi moro; wi no sabi san foe doe moro, ma wi no de sondro wan fasi foe komoto; den froefolgoe wi, ma Gado no libi wi na baka sondro jepi; den trowe wi na gron, ma wi no kisi pori” (2 Korentesma 4:4, 7-9). Ala di wi na swaki „tokotoko prapi”, tokoe Gado kweki eigifasi na ini wi nanga jepi foe en jeje so taki wi kan wini a grontapoe foe Satan dorodoro. — Romesma 8:35-39; 1 Korentesma 15:57.
A kweki di Jehovah ben kweki eigifasi na ini na owroeten Israèl
3. Fa Jesaja ben taki foe a kweki di Gado ben kweki eigifasi na ini a djoe nâsi?
3 Jehovah no e kweki eigifasi na ini wanwan sma nomo, ma na ini heri nâsi. Foe eksempre, te na owroeten Israèl ben saka ensrefi so taki Jehovah ben kweki eigifasi na ini en, dan sani ben waka boen gi en. Ma te foe kaba, Israèl ben tranga ensrefi foe tranga-jesi en. Leki wan bakapisi, a Sma di meki Israèl ben tjari „heloe” kon na den tapoe (Jesaja 45:9). Na ini a di foe aiti jarihondro b.G.T., Jesaja ben taki nanga Jehovah foe a takroe sondoefasi foe Israèl, di a ben e taki: „O Jehovah, joe na wi Tata. Wi na a doti, èn joe na wi Patoe-bakriman; èn wi alamala na a wroko foe joe anoe. . . . Ibriwan foe den sani di wi lobi sote, kon tron wan sani di e tjari pori kon” (Jesaja 64:8-11). Israèl ben kon tron wan prapi di ben boen soso foe kisi pori.
4. Sortoe agersi Jeremia ben doe?
4 Wan jarihondro na baka, ala di a dei pe sma moesoe gi frantiwortoe ben kon moro krosibei, Jehovah ben taigi Jeremia foe teki wan tokotoko batra èn foe go nanga wan toe foe den owroeman foe Jerusalem go na a Lagipresi foe Hinom, èn a ben komanderi en: „Joe moesoe broko a batra na fesi den man di e go nanga joe. Èn joe moesoe taigi den: ’Disi na san Jehovah foe den legre taki: „Na a srefi fasi mi sa broko a pipel disi èn a foto disi leki fa wan sma e broko a prapi foe a patoe-bakriman so taki a no man meki kon boen moro.” ’ — Jeremia 19:10, 11.
5. O bigi a strafoe foe Jehovah ben de na tapoe Israèl?
5 Na ini 607 b.G.T. Nebukadnesar ben pori Jerusalem nanga a tempel foe Jerusalem èn ben tjari den djoe di ben tan na libi go na ini katibo na ini Babilon. Ma baka 70 jari di den ben de na ini katibo, den djoe di ben abi berow ben man drai go baka na Jerusalem foe bow Jerusalem nanga en tempel baka (Jeremia 25:11). Ma na ini a fosi jarihondro G.T., a nâsi ben drai den baka agen gi a Bigi Patoe-bakriman, èn te foe kaba a nâsi ben lagi ensrefi so kefalek taki a ben doe a moro takroe ogri foe kiri na eigi Manpikin foe Gado. Na ini 70 G.T. Gado ben gebroiki a Gran Tirimakti Rome leki kroetoeman foe figi a djoe sistema poeroe, èn foe broko Jerusalem nanga a tempel na pisipisi. Noiti moro Jehovah ben o kweki eigifasi na ini a nâsi Israèl kon tron wan sani di „santa èn moi”.a
A kweki di Gado ben e kweki eigifasi na ini wan jeje nâsi
6, 7. (a) Fa Paulus e taki foe a kweki di Gado ben e kweki eigifasi na ini a jeje Israèl? (b) San na a joisti nomroe foe den „prapi foe sari-ati”, èn fa a ben seti?
6 Den ben meki den djoe di ben erken Jesus kon tron memre foe a fondamenti foe wan njoen nâsi, a jeje „Israèl foe Gado” (Galasiasma 6:16). Foe dati ede den wortoe foe Paulus e fiti: „San! A patoe-bakriman no abi makti tapoe a tokotoko, foe meki foe a srefi tokotoko wan prapi foe gebroiki na wan warti fasi èn wan trawan foe gebroiki na wan fasi di no warti? . . . Gado, ala di a wani sori en atibron èn a wani meki en krakti bekènti, tokoe ben froedrage den prapi foe atibron nanga foeroe langa pasensi, di ben sreka kon so taki a fiti foe kisi pori, so taki a ben sa meki den goedoe foe en glori bekènti na tapoe den prapi foe sari-ati, di a ben sreka na fesi foe kisi glori.” — Romesma 9:21-23.
7 Jesus di ben opo baka na dede ben meki bekènti baka ten taki den „prapi [disi] foe sari-ati” ben sa de 144.000 sma (Openbaring 7:4; 14:1). Foe di a troetroe Israèl no ben doro a heri nomroe dati, meki Jehovah ben gi en sari-ati so srefi na sma foe den nâsi (Romesma 11:25, 26). A njoen kresten gemeente ben gro esi-esi. Na ini 30 jari a boen njoensoe ben „e preiki na ala kriatoeroe di de na ondro hemel” (Kolosesma 1:23). Disi ben meki a de fanowdoe taki foeroe birti gemeente di ben panja na ala sei ben moesoe tjari kon na ondro wan joisti tiri.
8. Soema ben de na ini a fosi tiri skin, èn fa sani ben go moro fara nanga a tiri skin disi?
8 Jesus ben sreka 12 apostel foe tron a fosi tiri skin, di a ben leri den èn so srefi tra sma gi a diniwroko (Lukas 8:1; 9:1, 2; 10:1, 2). Na a Pinksterfesa na ini 33 G.T., a kresten gemeente ben seti kaba, èn baka wan pisi ten a tiri skin foe en ben kon moro bigi nanga so srefi „den apostel nanga den owroeman na ini Jerusalem”. A gersi taki wan langa pisi ten na afoe brada foe Jesus, Jakobus, ala di a no ben de wan apostel, ben dini leki fesiman (Tori foe den Apostel 12:17; 15:2, 6, 13; 21:18). Akroederi a historia skrifiman Eusebius, den apostel ben tron sma di trawan ben froefolgoe spesroetoe èn den ben panja go na tra kontren. A fasi fa a tiri skin ben seti ben kenki akroederi a fasi fa a ben de fanowdoe.
9. Fa sani ben o waka na wan sari fasi soleki fa Jesus ben taki na fesi dati a ben o feni presi?
9 Na a kaba foe a fosi jarihondro, ’a feanti, Didibri’, ben bigin „sai takroe wiwiri” na mindri den erfgenaam foe „a kownoekondre foe hemel” di gersi tarwe. Jesus ben taki na fesi taki a sari fasi disi fa sani ben o waka, ben o kisi pasi foe pasa te leki a ten foe a kotiwroko na „a kaba foe a seti foe sani”. Dan, ete wan tron, „den regtfardiki sma sa skèin krin neleki son na ini a kownoekondre foe a Tata foe den” (Mateus 13:24, 25, 37-43). O ten dati ben o de?
Jehovah e kweki eigifasi na ini na Israèl foe Gado na ini a ten disi
10, 11. (a) Fa a kweki di Gado ben e kweki eigifasi na ini a disiten Israèl foe Gado, ben e feni presi? (b) Sortoe leri ben de foe feni na ini krestenhèit di ben de kontrari den leri foe den opregti Bijbel Ondrosoekoeman?
10 Na ini 1870, Charles Taze Russell ben seti wan bijbelstudie groepoe na ini Pittsburgh, Pennsylvania, na ini Amerkankondre. Na ini 1879 a ben bigin tjari ibri moen a tijdschrift di wi sabi now leki A Waktitoren, kon na doro. Den Bijbel Ondrosoekoeman disi, soleki fa sma ben kari den, ben froestan heri esi taki krestenhèit ben teki heiden leri abra di no de akroederi bijbel, soleki a dede di a sili no man dede, hèlfaja, vagevuur, wan Dri-wánfasi gado, nanga a dopoe foe beibi.
11 Ma a ben moro prenspari taki den sma disi di lobi waarheid foe bijbel ben meki den prenspari bijbel leri kon boen baka, soleki a froeloesoe di sma e kisi nanga jepi foe Jesus en froeloesoe-ofrandi nanga na opobaka foe kisi libi na ini wan paradijs na grontapoe pe vrede de, na ondro Gado Kownoekondre. Na tapoe foe dati, den ben poti krakti na tapoe a regtfardiki di Jehovah Gado sa kon regtfardiki leki Soeverein Masra foe na universum, èn di de heri krosibei. Den Bijbel Ondrosoekoeman ben bribi taki a Begi foe Masra ben o kon troe esi-esi: „Wi Tata na hemel, meki joe nen kon santa. Meki joe kownoekondre kon. Meki joe wani pasa, soleki na hemel, so toe na grontapoe” (Mateus 6:9, 10). A santa jeje foe Gado ben kweki eigifasi na ini den foe tron wan libimakandra foe kresten na heri grontapoe di lobi vrede.
12. Fa den Bijbel Ondrosoekoeman ben kon froestan wan prenspari datum?
12 Wan finifini studie foe Danièl kapitel 4 nanga tra profeititori ben gi den Bijbel Ondrosoekoeman na overtoigi taki a denoja foe Jesus leki Mesian Kownoe ben moesoe de krosibei. Den ben froestan taki 1914 ben de a ten te „den fasti ten foe den nâsi” moesoe kon na wan kaba (Lukas 21:24; Esekièl 21:26, 27). Esi-esi den Bijbel Ondrosoekoeman ben meki a wroko foe den kon moro bigi, èn den ben meki bijbel klas (di den ben kari gemeente baka ten) na heri Amerkankondre. Na a bigin foe a di foe 19 jarihondro, a bijbel-leriwroko foe den ben bradi go na ini Europa nanga Austraal-Asia. A ben kon de fanowdoe taki sani moesoe orga boen.
13. Sortoe posisi na ini wet den Bijbel Ondrosoekoeman ben kisi, èn sortoe kefalek boen wroko a fosi presidenti foe a Genootschap ben doe?
13 Foe meki den Bijbel Ondrosoekoeman de akroederi wet, meki den ben opo a Zion’s Watch Tower Tract Society na ini 1884 na Amerkankondre, èn a ben abi en edekantoro na ini Pittsburgh, Pennsylvania. Den memre foe a bestuur ben de leki wan Tiri Skin di de na wán presi, èn di ben e tiri a preikiwroko foe Gado Kownoekondre na heri grontapoe. A fosi presidenti foe a Genootschap, Charles T. Russell, ben skrifi siksi pisi foe Studies in the Scriptures èn ben meki foeroe preikiwaka. A ben gi kefalek foeroe moni toe di a ben meki bifo a ben e bigin studeri bijbel, leki bijdrage gi a Kownoekondre wroko na heri grontapoe. Na ini 1916, di a Bigi Orlokoe ben e rigeri na ini Europa, dan Brada Russell di ben weri srefisrefi, dede di a ben de na wan preikiwaka. A ben gi ala sani di a ben abi foe meki a kotoigiwroko foe Gado Kownoekondre kon moro bigi.
14. Fa J. F. Rutherford ben „feti a heri boen feti”? (2 Timoteus 4:7)
14 Joseph F. Rutherford di ben de wan kroetoeman wan pisi ten na ini Missouri, ben tron a njoen presidenti. Leki wan bakapisi foe a hori di a ben horibaka gi bijbel waarheid sondro foe frede, meki den kerki tiriman foe krestenhèit ben poti anoe makandra nanga den politikman foe „meki problema nanga jepi foe wet”. Na tapoe 21 juni 1918, den ben poti Brada Rutherford nanga seibi tra bijbelstudenti di ben teki fesi, na ini strafoe-oso, èn na a srefi ten den ben leisi strafoe foe 10 te go miti 20 jari gi ibriwan foe den. Den Bijbel Ondrosoekoeman ben soekoe wan loesoe nanga jepi foe wet (Psalm 94:20; Filipisma 1:7). Di den ben tjari na afersi go na kroetoe, den ben fri den na tapoe 26 maart 1919, èn baka ten den ben krin den nen foe ala den falsi kragi di sma ben kragi den taki den ben meki oproeroe.b Na ondrofeni disi ben meki den tron kefalek loyaal sma di ben horibaka gi waarheid. Nanga a jepi foe Jehovah den gebroiki ibri fasi di den man foe wini a jeje feti di den e feti foe meki a boen njoensoe bekènti, ala di Babilon a Bigiwan e gens den. A feti dati e go doro te na a jari 1999 disi. — Teki gersi Mateus, kapitel 23; Johanes 8:38-47.
15. Foe san ede a jari 1931 ben de wan prenspari jari na ini a historia?
15 Na ini den jari 1920 te go miti 1940, a salfoe Israèl foe Gado ben tan meki a Bigi Patoe-bakriman kweki eigifasi na ini den. Den Boekoe foe bijbel ben e tan skèin profeitis leti, èn ben gi Jehovah grani èn ben e poti prakseri na tapoe a Mesian Kownoekondre foe Jesus. Na ini 1931, den Bijbel Ondrosoekoeman ben prisiri foe teki a nen Jehovah Kotoigi. — Jesaja 43:10-12; Mateus 6:9, 10; 24:14.
16 So srefi a boksoe tapoe bladzijde 19. O ten a joisti nomroe foe 144.000 ben doro kaba, èn sortoe boeweisi wi abi gi disi?
16 Na ini den jari 1930 te go miti 1940, a ben gersi taki a nomroe foe „den wan di kisi a kari èn di a froekisi èn di de getrow”, den 144.000 sma, ben doro kaba. (Openbaring 17:14; loekoe a boksoe na tapoe bladzijde 19.) Wi no sabi o foeroe foe den salfoewan ben tjari kon makandra na ini a fosi jarihondro èn o foeroe foe den „takroe wiwiri” ben tjari kon makandra na ini den doengroe jarihondro foe a bigi fadon di krestenhèit ben fadon komoto na bribi. Ma na ini 1935, na heri grontapoe 52.465 preikiman ben de, nanga wan heimarki foe 56.153, di ben sori a hemel howpoe foe den di den ben gebroiki den simbôl na a Memrefesa. San ben o de a tamara foe den foeroe trawan di ben moesoe tjari kon na makandra ete?
„Loekoe! wan bigi ipi”
17. Sortoe prenspari sani na ini a historia ben feni presi na ini a jari 1935?
17 Na wan kongres di ben hori na tapoe 30 mei te go miti 3 juni 1935, na Washington, D.C., Amerkankondre, Brada Rutherford ben gi wan lezing di ben abi a titel „A Bigi groepoe sma”c, di ben tjari wan bigi kenki kon. A groepoe disi „di no wan sma ben man teri”, ben o de foe si te a kaba ben o doro foe poti a lakstampoe na tapoe den wan foe den 144.000 sma foe a jeje Israèl. Den disi toe ben sa sori bribi na ini a „broedoe foe a Pikin Skapoe” di abi krakti foe gi froeloesoe, Jesus, èn ben sa doe santa diniwroko na ini a tempel seti foe na anbegi foe Jehovah. Leki wan groepoe den ben sa „komoto na a bigi banawtoe” libilibi, foe kisi a paradijs na grontapoe pe „dede no sa de moro”. Foeroe jari bifo a kongres dati, den ben kari a groepoe disi den Jonadabsma. — Openbaring 7:9-17; 21:4; Jeremia 35:10.
18. Na sortoe fasi a jari 1938 ben de toemoesi prenspari?
18 A jari 1938 ben de wan prenspari jari foe kon sabi krinkrin soema ben de den toe groepoe disi. The Watchtower foe 15 maart nanga 1 april 1938 ben pristeri a studie „En ipi”, di abi toe pisi, èn ben tjari kon na krin san a salfoe fikapisi nanga den kompe, a bigi ipi, abi foe doe nanga makandra. Dan den eksemplaar foe 1 juni nanga 15 juni ben abi studie artikel di ben taki foe „Organisâsi”, èn di ben gron tapoe Jesaja 60:17. Den ben aksi ala gemeente foe aksi a Tiri Skin foe poti dinari na ini den gemeente, èn na so fasi den ben bigin wan moro boen theokratis seti foe Gado. Den gemeente ben doe leti so.
19 Nanga a foetoewortoe. Sortoe troetori e boeweisi taki a kari di den „tra skapoe” ben e kari, e feni presi now moro leki 60 jari kaba?
19 A verslag na ini a Yearbook of Jehovah’s Witnesses foe 1939 ben taki: „Den salfoe bakaman foe Krestes Jesus di de now na grontapoe de pikinso nomo, èn noiti moro a nomroe foe den sa kon moro foeroe. Na ini den Boekoe foe bijbel den e kari den ’a fikapisi’ foe den pikin foe Sion, na organisâsi foe Gado (Openb. 12:17). Now Masra e tjari en ’tra skapoe’ kon na makandra, di sa de a „bigi groepoe sma’ (Johanes 10:16). Den wan di e tjari kon makandra now de kompe foe a fikapisi, di e wroko makandra nanga a fikapisi. Bigin nanga now, den wan di de foe den ’tra skapoe’ sa kon moro foeroe te leki a ’bigi groepoe sma’ tjari kon makandra kaba.” Gado ben kweki eigifasi na ini a salfoe fikapisi foe sorgoe gi a bigi ipi di e tjari kon makandra. Now Gado moesoe kweki eigifasi na ini a bigi ipi disi toe.d
20. Sortoe kenki na ini na organisâsi ben feni presi foe sensi a jari 1942?
20 Na ini januari 1942, di a di foe Toe Grontapoefeti ben doro en heimarki, Joseph Rutherford dede èn Nathan Knorr ben kon na en presi leki presidenti. Sma abi moi prakseri foe a di foe dri presidenti foe a Genootschap di a ben seti a theokrasia skoro na ini den gemeente nanga a Gileadskoro foe gi zendeling leri. Na a ala-jari konmakandra foe a Genootschap na ini 1944, a ben meki bekènti taki a handvest foe a Genootschap ben o kenki so taki a no ben de so dati den bijdrage na materia sei ben o bepaal soema na den memre, ma a ben o de a jejefasi foe den memre. Na ini den 30 jari na baka, a nomroe foe sma di ben wroko na ini velddienst ben gro foe 156.299 sma te 2.179.256 sma na heri grontapoe. Na ini den jari 1971 te go miti 1975, moro sani ben moesoe kenki na ini na organisâsi. Wán man nomo di ben de presidenti no ben man gi boen tiri moro na a Kownoekondre wroko na heri grontapoe. A Tiri Skin, di abi fesiman di e kenki ibri tron, ben kon abi 18 salfoe memre, èn pikinmoro afoe foe den ben kaba a libiwroko foe den na grontapoe.
21. San ben meki taki den memre foe a pikin ipi ben doro a marki foe kisi a Kownoekondre?
21 Den tesi na ini foeroe tintenti jari kweki eigifasi na ini den memre foe a pikin ipi di tan abra. Den kon tranga, foe di den kisi „a kotoigi foe a jeje’ troetroe. Jesus taigi den: „Oenoe na den wan di tan nanga mi di mi kisi tesi; èn mi e sroto wan froebontoe nanga oenoe, soleki fa mi Tata sroto wan froebontoe nanga mi, foe wan kownoekondre, so taki oenoe kan njan èn dringi na mi tafra na ini mi kownoekondre, èn sidon na tapoe kownoestoeroe foe kroetoe den twarfoe lo foe Israèl.” — Romesma 8:16, 17; Lukas 12:32; 22:28-30.
22, 23. Fa Gado e kweki eigifasi na ini a pikin ipi èn na ini den tra skapoe?
22 Di a nomroe foe a fikapisi di salfoe nanga santa jeje na grontapoe kon moro mendri, dan lepi brada foe a bigi ipi kisi a wroko foe tiri pikinmoro ala den gemeente na heri grontapoe na jejefasi. Èn ala di den lastiwan foe den owroe salfoe kotoigi e kaba den libiwroko na grontapoe, dan den sa·rimʹ, edeman, foe den tra skapoe sa kisi boen leri kaba foe doe tiriwroko leki na edeman groepoe na grontapoe. — Esekièl 44:3; Jesaja 32:1.
23 Gado e tan kweki eigifasi na ini a pikin ipi èn so srefi na ini den tra skapoe, kon tron prapi foe gebroiki na wan warti fasi (Johanes 10:14-16). Awansi wi abi howpoe na ini a „njoen hemel” noso na ini „wan njoen grontapoe”, meki a de so, taki nanga wi heri ati wi e teki a kari foe Jehovah: „Oen breiti pasa marki, èn oen de nanga prisiri foe têgo foe den sani di mi kria. Bika loekoe, mi e kria Jerusalem foe kon de wan reide foe abi prisiri èn a pipel foe en wan reide foe breiti pasa marki” (Jesaja 65:17, 18). Meki a de so, taki wi alamala leki swaki libisma ala ten e dini nanga sakafasi, èn meki „a krakti di e pasa san de normaal” — Gado en santa jeje — e kweki eigifasi na ini wi! — 2 Korentesma 4:7; Johanes 16:13.
[Foetoewortoe]
a Meki wan srefi sortoe strafoe foe Jehovah de wan warskow gi krestenhèit di drai baka gi Gado, di na owroeten Israèl ben e prenki. — 1 Petrus 4:17, 18.
b Kroetoebakra Manton, wan Lomsoe Katolik, di ben weigri foe loesoe den Bijbel Ondrosoekoeman nanga loesoe moni, ben poti srefi na strafoe bakaten, foe di den ben kroetoe en taki a ben e teki tjoekoe.
c A New World Translation of the Christian Greek Scriptures, di tjari kon na doro na ini 1950, gebroiki „bigi ipi” leki wan moro boen vertaling foe a Griki wortoe di skrifi nanga jepi foe Gado en santa jeje.
d Na ini 1938, na heri grontapoe 73.420 sma ben fisiti a Memrefesa èn 39.225 sma — 53 procent foe den sma di ben drape — ben gebroiki den simbôl. Na ini 1998 den sma di ben fisiti ben gro kon doro 13.896.312 sma, èn nomo 8756 sma ben abi wan prati, wan gemiddeld foe moro mendri leki 1 sma di ben teki prati, na ini ibri 10 gemeente.
Joe e memre disi ete?
◻ Fa Jesus ben de wan Eksempre gi wi, di a ben saka ensrefi foe meki en Tata kweki eigifasi na ini en?
◻ Fa Gado ben kweki eigifasi na ini na owroeten Israèl?
◻ Fa Gado ben kweki eigifasi na ini „na Israèl foe Gado” te leki a ten disi?
◻ Foe san ede Gado kweki eigifasi na ini den „tra skapoe”?
[Faki na tapoe bladzijde 18]
Krestenhèit e kweki eigifasi ete
Wan njoensoe foe Associated Press na Athene, Grikikondre, ben froeteri foe na edeman foe a Griki Orthodox Kerki di ben poti no so langa ete: „A ben moesoe de wan boskopoeman foe vrede. Ma a fesiman foe a Griki Orthodox Kerki e taki moro foeroe leki wan generaal di e sreka ensrefi foe go feti.
’Efoe a de fanowdoe, wi de klariklari foe trowe broedoe èn foe tjari òfer. Wi leki wan kerki e begi gi vrede . . . Ma wi e blesi den santa fetisani te a de fanowdoe’, na Edeman Beskopoe, Christodoulos ben taki no so langa pasa na a santa dei foe a Tenhemelgaan foe a Njoenwenke, di de so srefi a fesadei foe den Griki fetilegre.”
[Faki na tapoe bladzijde 19]
„No wan sma moro e poti na ini!”
Na a kaba foe wan Gileadskoro na ini 1970, Frederick Franz, a vice-presidenti foe a Waktitoren Genootschap na a ten dati, ben taigi den studenti efoe a kan taki den, di alamala ben de memre foe den tra skapoe, di abi a howpoe foe libi na grontapoe, ben sa kan dopoe wan sma di kande ben sa froeklari taki a de foe a salfoe fikapisi. Dati kan? We, a ben froeklari taki Johanes a Dopoeman ben de foe den tra skapoe èn taki a ben dopoe Jesus nanga wan toe foe den apostel. Dan a ben aksi efoe moro sma ben e tjari kon ete na ini a fikapisi. „Nôno, no wan sma moro e poti na ini!” a ben taki. „A kari dati ben kaba langa ten kaba na ini 1931 te nanga 1935! Sma no e poti na ini moro. Ma soema na den wan toe sma di no so langa pasa ben abi demakandra nanga wi èn di e njan foe den simbôl foe a Memrefesa? Efoe den na foe a fikapisi, dan den na sma di kon na ini a presi foe trawan! Den a no sma di e poti moro na ini a fikapisi, ma den na sma di kon na ini a presi foe den wan di kande fadon gowe.”
[Prenki na tapoe bladzijde 15]
Wi e warderi a goedoe foe wi diniwroko troetroe!
[Prenki na tapoe bladzijde 16]
Owroeten Israèl ben tron wan prapi di boen soso foe kisi pori