Nyun spesrutu dei konmakandra programa

A thema fu a spesrutu dei konmakandra programa fu a dienstyari 2008 na: ’Wi na a klèidoti, èn Yehovah na wi Patu-bakriman’, èn a teki puru fu Yesaya 64:8. Den Bijbel rai fu a programa disi o meki taki wi o kisi moro warderi gi Yehovah en koni, en retidu, en krakti, nanga en lobi, leki a Gran Patu-bakriman.

A lezing fu a kring-opziener di nen „De leki bun patu te yu e du a diniwroko”, o sori fa moro nanga moro sma e kisi bun furu blesi fu di den kon sabi a tru bribi, èn fu di den e fruteri trawan fu dati. A lezing di nen „Yu sa kibri yusrefi te yu e denki dipi fu sani”, o tyari kon na krin taki a denki di wi e denki dipi fu den regtfardiki gronprakseri fu Yehovah, o kibri wi. A fisiti takiman o hori den lezing di nen „No ’libi leki fa a grontapu sistema disi wani taki un musu libi’”, èn „Meki a Gran Patu-bakriman sreka yu poti leki fa a wani”. Papa nanga mama èn yonguwan o kisi deki-ati fu den pisi „Yonguwan di Yehovah e gebroiki fu du diniwroko gi en”, èn „Papa nanga mama abi a prenspari frantwortu fu yepi den pikin tron sma di a Patu-bakriman feni bun”. Wi sa feni den demonstrâsi nanga den interview heri moi, fu di wi o yere èn wi o si fa wi brada nanga sisa e meki muiti na ini den diniwroko. Den sma di wani teki dopu fu sori taki den gi densrefi abra na Gado, musu taigi a fesiman-opziener so esi leki a kan. No frigiti fu tyari A Waktitoren di wi o studeri na ini a wiki fu a spesrutu dei konmakandra.

Ala sani di a Gran Patu-bakriman abi na prakseri fu du, A o du. Ma a de na ibriwan fu wi fu bosroiti san wi o du te Yehovah e sreka wi poti leki fa a wani. Den sma di koni èn di de klariklari fu meki Yehovah kenki den fu tron moro bun sma, de leki wan pisi klèidoti di a Patu-bakriman e kenki so taki a e tron wan bun patu. Te wi e wroko makandra nanga Yehovah, dan wi e gi en glori leki a Sma di abi a reti fu tiri hemel nanga grontapu, èn wi sa kisi furu blesi.