Nyun spesrutu dei konmakandra programa

A thema fu a spesrutu dei konmakandra programa gi a dienstyari 2009 na: „Sorgu taki yu e du a diniwroko”, èn a teki puru fu Kolosesma 4:17. Wi leki Kresten e teki a rai dati leki wan seryusu rai. A marki di wi abi, na fu du a diniwroko fu wi na wan getrow fasi èn wi wani klari a wroko dati, neleki fa Yesus ben du dati (Yoh. 17:4). Na apostel Paulus na wan moi eksempre gi wi tu, te a abi fu du nanga a sani disi. A ben du ala san a man fu klari a diniwroko fu en.—Tori. 20:24.

A pisi di a kring-opziener sa hori, o sori wi san difrenti preikiman du so taki sani no tapu den fu du a diniwroko. Baka dati a lezing di nen „Sorgu gi den sani di yu prani”, sa tyari kon na krin fa wi kan yepi den sma trutru di „abi a yoisti denki fu man kisi têgo libi” (Tori. 13:48). A fisiti takiman sa taki fu 2 Korentesma 6:1-10 èn a o taki finifini fu ibriwan fu den vers dati na ini a lezing di nen „Fa wi e buweisi taki wi na dinari fu Gado”. Na bakadina, a sa hori wan tra lezing di nen „Si a diniwroko fu yu leki wan grani”. A no de fu taki dati yu o kisi deki-ati fu den lezing di nen „Yonguwan nanga owruwan abi prisiri na ini a diniwroko”, nanga „Yonguwan di e du a diniwroko”. Den sma di wani sori taki den gi densrefi abra fu di den o teki dopu na wan fu den bigi konmakandra, musu taigi a fesiman-opziener so esi leki a kan. Wan prenspari pisi na den bigi konmakandra fu wi, na te wi o luku A Waktitoren. No frigiti fu tyari yu tijdschrift di wi o luku na ini a wiki fu a spesrutu dei konmakandra.

Wi musu sorgu taki wi e du wi diniwroko, èn dati wani taki dati wi o meki tranga muiti fu no meki tra sani tapu wi fu du a wroko di Yehovah gi wi fu du. Den rai di wi o kisi fu Bijbel nanga yepi fu a spesrutu dei konmakandra programa disi, sa yepi wi alamala fu frustan san wi musu du fu sorgu taki wi e tan poti prakseri na a diniwroko fu wi. Boiti dati, a sa yepi wi tu fu sorgu taki wi e du a diniwroko trutru na so wan fasi taki wi o klari a wroko dati.