No broko joe ede pasa marki

„NO BROKO joe ede noiti nanga tamara, bika tamara sa abi en eigi broko-ede. Ibri dei abi nofo na en eigi ogri” (Mateus 6:34). A de seiker, taki wi alamala di e libi na ini a disiten libimakandra pe ala sani e go so esi èn di lai nanga problema, kan gebroiki a rai dati di Jesus Krestes gi, heri boen.

Ma soleki fa a situwâsi de troetroe, dan a kan taki wi no e broko wi ede nanga den problema, den bosroiti, den froeplekti, nanga den frantiwortoe foe wi? Miljoenmiljoen sma lasi-ati, e firi brokosaka, èn a gersi leki wan hebi de na den tapoe. Dati meki bisnis e meki miljoenmiljoen Amerkan dala nanga sani leki senwedresi nanga sribiperki.

Fa foe hori wi balansi

Wi moesoe sidon prakseri fa wi o doe den froeplekti foe wi, nanga den wroko di wi kisi foe doe, fa wi o teki bosroiti, èn fa wi o loesoe den problema foe wi èn wi moesoe sreka wisrefi gi den sani disi — awansi den serjoesoe efoe no. Bijbel e gi wi deki-ati foe „go sidon fosi foe teri den kostoe” bifo wi e bigin wan bigi wroko (Lukas 14:28-30). Disi wani taki so srefi, dati wi moesoe prakseri boen sortoe bosroiti wi ben sa man teki, ondrosoekoe finifini san na a bakapisi di ben sa kon foe dati, èn loekoe omeni ten, krakti, nanga moni dati ben sa teki foe wi.

Ala di wan sma moesoe loekoe finifini san ben sa kan pasa, tokoe a no man denki foe ala sani di kan pasa èn a no boen toe foe doe dati. Foe eksempre, foe joe osofamiri no kisi mankeri, dan joe ben sa kan loekoe san foe doe te joe oso o teki faja. Joe ben sa kan bai poti alarmsistema di e bari te smoko de èn poti pikin branspoiti toe. Oenoe ben sa kan sreka oensrefi pe foe na oso oenoe kan lowe komoto èn oefen dati nanga makandra. Ma san na a difrenti na mindri te wan sma e sreka ensrefi boen so taki dati kan jepi en, èn te a e bigin broko en ede pasa marki, sondro taki dati de fanowdoe? Den broko-ede dati e bigin te joe e bigin prakseri wan lo sani di ben sa kan pasa, èn foeroe foe den sani dati de soso na ini joe prakseri. Prakseri di e troeboe joe kan basi joe, èn meki joe denki taki a moesoe de taki joe frigiti wan sani noso taki joe no doe nofo foe gi joe osofamiri kibri. A pina disi di joe e pina joesrefi nanga broko-ede pasa marki kan tron so wan bigi hebi gi joe, taki joe kan lasi sribi foe disi ede.

Moses e go na Farao

Jehovah Gado ben aksi en profeiti Moses wan moeilek sani foe doe. Na a fosi presi, Moses ben moesoe go na den Israèlsma èn overtoigi den taki Jehovah ben gi en a wroko foe tjari den komoto na Egipti. Baka dati, Moses ben moesoe go na Farao èn aksi en foe seni den Israèlsma gowe. Te foe kaba, Moses ben abi foe tjari wan bigi ipi sma di ben teri miljoenmiljoen na ini a gran sabana meki den go na wan kondre pe sma ben libi di ben abi feantifasi (Exodus 3:1-10). A kan taki ala den sani disi ben frede Moses troetroe, ma a ben meki a frantiwortoe disi foeroe en prakseri nanga toemoesi foeroe broko-ede?

Soleki fa a sori, dan Moses ben broko en ede nanga wan toe sani. A ben aksi Jehovah: „Kon wi taki dati now mi kon na den manpikin foe Israèl èn taki mi e taigi den troetroe: ’A Gado foe oen fositen tata seni mi kon na oenoe’, èn taki den e taigi mi troetroe: ’Fa a nen?’ San mi sa taigi den dan?” Jehovah ben gi en a piki (Exodus 3:13, 14). Moses ben broko en ede toe nanga san ben kan pasa efoe Farao no ben wani bribi en. Agen, Jehovah ben gi a profeiti wan piki. Wán problema ben de ete — Moses ben erken taki a „no ben de wan boen takiman”. Sortoe loesoe ben de gi a problema disi? Jehovah ben meki Aron taki gi Moses. — Exodus 4:1-5, 10-16.

Now di Moses ben de srekasreka foe di den aksi foe en ben kisi piki èn a ben bribi na ini Gado, meki a ben doe soleki fa Jehovah ben komanderi. Na presi foe Moses pina ensrefi nanga prakseri di ben kan frede en èn meki en denki san ben kan pasa te a ben o miti Farao, Moses ’ben doe leti so’ (Exodus 7:6). Efoe a ben broko en ede pasa marki, dan dati ben kan swaki a bribi foe en èn a deki-ati di a ben abi fanowdoe foe doe a wroko di a ben kisi foe doe.

A balansi fasi fa Moses ben doe a wroko foe en, na wan eksempre foe san na apostel Paulus ben kari „gosontoe foe froestan” (2 Timoteus 1:7; Titus 2:2-6). Efoe Moses no ben abi wan gosontoe froestan, dan makriki a bigi wroko di a ben abi foe doe ben kan moro en so, taki kande a no ben o teki en.

Dwengi den prakseri foe joe

San joe e doe te joe bribi e kisi tesi noso te problema e miti joe na ini na aladei libi? Joe e broeja soso foe di joe e prakseri den problema nanga tjalensi wawan di kan kon? Noso joe e prakseri foe den na wan balansi fasi? A de soleki son sma ben o taki: ’No abra a broki efoe joe no doro drape ete.’ Kande a no de fanowdoe kwetikweti foe abra a broki dati di de ini joe prakseri nomo! So boen, foe san ede joe e pina joesrefi nanga broko-ede foe wan sani di kande noiti no pasa? Bijbel e taki: „Broko-ede na ini na ati di e broeja wan man, na dati sa meki na ati boigi go na ondro” (Odo 12:25). Nofotron a bakapisi de taki wan sma sa wakti foe teki wan bosroiti, a sa draidrai te leki a lati toemoesi.

Ma moro serjoesoe na a ogri di toemoesi foeroe broko-ede kan doe na jeje fasi. Jesus Krestes ben sori taki a bedrigi falsi krakti di goedoe abi na tapoe sma èn „den broko-ede foe a seti foe sani disi” kan tjokro krinkrin a warderi di wan sma abi gi „a wortoe foe a kownoekondre” (Mateus 13:19, 22). Neleki fa maka kan tapoe jongoe bon foe gro kon bigi èn tjari froktoe, na so a kan pasa taki te wi e broko wi ede pasa marki, èn wi no man dwengi wi prakseri dan wi no e go na fesi na jeje fasi èn abi boen bakapisi di e plisi Gado. Foe di son sma ben pina densrefi nanga broko-ede di kan doe sma ogri, meki den no ben gi densrefi abra na Jehovah. Den e broko den ede èn e aksi densrefi: ’Ma efoe mi no man libi akroederi a gi di mi gi misrefi abra na Gado dan?’

Na apostel Paulus ben taigi wi taki te wi e feti a feti foe wi na jeje fasi, dan wi e meki moeiti foe „tjari ibri prakseri kon na ini katibo, foe meki en gi jesi na Krestes” (2 Korentesma 10:5). Satan Didibri, a moro bigi feanti foe wi, ben o prisiri troetroe foe meki den broko-ede foe wi sori moro bigi leki den de, soso foe meki wi lasi-ati èn foe meki wi kon swaki na skin sei, na emotioneel sei, èn na jeje fasi. Satan abi a koni foe gebroiki tweifri foe kori den sma di no de na ai. Dati meki Paulus ben warskow kresten toe foe no „meki presi gi Didibri” (Efeisesma 4:27). Leki „a gado foe a seti foe sani disi” Satan ben man „breni a froestan foe sma di no e bribi” (2 Korentesma 4:4). Meki wi no gi en pasi noiti foe a basi a prakseri foe wi!

Jepi de

Te wan pikin e kisi foe doe nanga problema, dan a kan go na wan papa di lobi en èn a papa e jepi en èn e trowstoe en. Na so wi kan go toe na Jehovah, wi hemel Tata, nanga den problema foe wi. Te joe e loekoe en boen, dan Jehovah e gi wi wan kari foe trowe den hebi nanga den broko-ede foe wi na en tapoe (Psalm 55:22). Neleki wan pikin di no e broko en ede moro nanga den problema foe en baka te en papa trowstoe en, na so wi no moesoe trowe den hebi foe wi na tapoe Jehovah nomo, ma wi moesoe libi a tori gi en toe. — Jakobus 1:6.

Fa wi e trowe den broko-ede foe wi na Jehovah tapoe? Filipisma 4:6, 7 e piki: „No broko oen ede nanga noti, ma meki Gado kon sabi den faja begi foe oenoe na ini ala sani nanga jepi foe begi nanga tranga begi makandra nanga tangi; èn a vrede foe Gado, di e pasa ala prakseri, sa kibri oen ati nanga oen krakti foe denki nanga jepi foe Krestes Jesus.” Ija, Jehovah kan gi wan piki na tapoe den tranga èn serjoesoe begi foe wi di wi e begi doronomo, foe di a e kowroe wi ati èn dati e kibri wi froestan foe a no broeja foe soso. — Jeremia 17:7, 8; Mateus 6:25-34.

Ma efoe wi wani doe soleki fa wi begi, dan wi no moesoe wai pasi gi sma, na skin sei noso na froestan sei (Odo 18:1). Na presi foe dati, a boen foe go loekoe san bijbel gronprakseri nanga rai di e taki foe den problema foe wi, èn na so fasi wi no e froetrow tapoe wi eigi froestan (Odo 3:5, 6). Jongoe sma nanga owroe sma kan go leisi bijbel nanga poeblikâsi foe a Waktitoren Genootschap di abi someni sani foe leri sma fa foe teki bosroiti èn fa foe kakafoetoe gi problema. Boiti dati, na ini a kresten gemeente, Gado blesi wi nanga koni owroeman di abi ondrofeni èn tra lepi kresten di de klariklari ala ten foe taki nanga wi (Odo 11:14; 15:22). Den sma di den problema foe wi no abi krakti na den tapoe èn di e prakseri foe wan tori soleki fa Gado e prakseri foe en, kan jepi wi foe si den problema foe wi na wan heri tra fasi. Èn ala di den no sa teki bosroiti gi wi, tokoe den kan gi wi foeroe deki-ati èn jepi.

„Wakti Gado”

Ala sma moesoe erken taki nofo stress de kaba te wi moesoe kakafoetoe gi den troetroe problema ini wi libi, èn a no de fanowdoe foe meki den problema kon moro foeroe nanga broko-ede di de soso na ini wi prakseri nomo. Efoe wi e broko wi ede foe san ben sa kan pasa, èn dati meki wi e frede èn e firi froeferi, dan meki wi begi Jehovah èn seni serjoesoe begi gi en. Go na en Wortoe èn na en organisâsi foe kisi tiri, koni, èn wan gosontoe froestan. Wi sa kon si taki awansi sortoe situwâsi e miti wi, jepi de foe man kakafoetoe gi dati.

A psalm singiman di ben firi broeja èn neleki wan hebi ben de na en tapoe, ben singi: „Foe san ede joe lasi-ati, o mi sili, èn foe san ede joe e broeja so na inisei foe mi? Wakti Gado, bika mi sa prèise en ete leki a bigi froeloesoe foe mi leki sma èn leki mi Gado” (Psalm 42:11). Meki wi firi so toe.

Ija, sreka joesrefi gi sani di joe kan froewakti troetroe, èn libi den sani di joe no ben froewakti gi Jehovah. „Trowe ala oen broko-ede na en tapoe, bika a e sorgoe gi oenoe.” — 1 Petrus 5:7.

[Prenki na tapoe bladzijde 23]

Joe e trowe den hebi nanga den broko-ede foe joe na Jehovah tapoe, neleki David?