Kolokoe taki Jehovah e sori wi a pasi foe en
„Foe a sei foe a troe Gado, a pasi foe en de volmaakti; den wortoe foe Jehovah meki kon soifri dorodoro.” — 2 SAMUÈL 22:31.
1, 2. (a) San na a sani di ala libisma abi tranga fanowdoe? (b) A ben sa boen foe waka na baka na eksempre foe soema?
ALA libisma abi tiri fanowdoe. Ija, wi abi jepi fanowdoe di kan tiri wi na ini wi libi. A troe, Jehovah gi wi koni nanga wan konsensi foe jepi wi foe sabi san boen èn san ogri. Ma wi moesoe oefen a konsensi foe wi so taki a kan de wan tiri di wi kan froetrow (Hebrewsma 5:14). Èn wi froestan abi a joisti bodoi fanowdoe — èn wi moesoe oefen a froestan foe man ondrosoekoe a bodoi dati — efoe wi wani teki boen bosroiti (Odo 2:1-5). Ma tokoe, foe di a libi no de seiker, meki den bosroiti foe wi no abi a bakapisi di wi ben sa wani kande (Preikiman 9:11). Foe wisrefi wi no abi no wan fasi di wi kan froetrow foe kon sabi fa a tamara sa tan.
2 Foe den sani disi ede èn so srefi foe foeroe tra sani, meki a profeiti Jeremia ben skrifi: „Mi sabi heri boen, o Jehovah, taki a no de na a sma foe grontapoe foe a bepaal en pasi. A no de na wan man di e waka srefi foe bepaal pe foe poti en foetoe na pasi” (Jeremia 10:23). Jesus Krestes, a moro bigi man di oiti ben libi, ben teki tiri. A ben taki: „A Manpikin no kan doe noti foe ensrefi, ma soso den sani di a e si a Tata e doe. Bika ala san a Wan dati e doe, na dati a Manpikin e doe so srefi” (Johanes 5:19). A de wan koni sani foe dati ede, foe waka na baka Jesus eksempre èn soekoe jepi na Jehovah foe tiri wi! Kownoe David ben singi: „Foe a sei foe a troe Gado, a pasi foe en de volmaakti; den wortoe foe Jehovah meki kon soifri dorodoro. A de wan skelt gi ala den sma di e soekoe kibri na en” (2 Samuèl 22:31). Efoe wi e proeberi foe waka a pasi foe Jehovah, na presi foe waka na baka wi eigi koni, dan wi sa abi wan volmaakti tiri. A e tjari rampoe kon te wi no e teki a pasi foe Gado.
Jehovah e sori a pasi
3. Fa Jehovah ben tiri Adam nanga Eva, èn sortoe howpoe a ben gi den?
3 Loekoe a kefal foe Adam nanga Eva. Ala di den no ben abi sondoe, tokoe den ben abi tiri fanowdoe. Jehovah no ben libi Adam foe meki plan gi ensrefi na ini a moi djari foe Eden. Na presi foe dati, Gado ben gi en wroko foe doe. Na a fosi presi, Adam ben moesoe gi den meti wan nen. Baka dati, Jehovah ben gi Adam nanga Eva sani foe doe gi wan langa pisi ten. Den ben moesoe poti grontapoe na den ondro, èn ben moesoe foeroe en nanga pikin, èn den ben moesoe sorgoe gi den meti foe grontapoe (Genesis 1:28). Disi ben o de wan kefalek bigi wroko, ma a bakapisi ben o de taki a heri grontapoe ben o de wan paradijs di foeroe nanga volmaakti libisma di e libi na ini wánfasi nanga den meti. Dati ben de wan kefalek moi howpoe! Boiti dati, te Adam nanga Eva ben waka a pasi foe Jehovah na wan getrow fasi, dan den ben o abi komunikâsi nanga En. (Teki gersi Genesis 3:8.) Dati na wan kefalek moi grani — foe tan abi wan persoonlijk matifasi nanga a Kriaman!
4. Fa Adam nanga Eva ben sori taki den no ben froetrow tapoe Gado èn taki den no ben de loyaal, èn sortoe takroe bakapisi disi ben abi?
4 Jehovah ben komanderi a fosi libisma paar foe no njan foe a bon foe sabi boen nanga ogri di ben de na ini Eden, èn disi ben gi den na okasi wantronwantron foe sori taki den e gi jesi na Gado — na angri di den abi foe waka a pasi foe Jehovah (Genesis 2:17). Ma heri esi wan tesi ben kon na tapoe a gi di den ben moesoe gi jesi. Di Satan ben kon nanga den triki wortoe foe en, dan Adam nanga Eva ben moesoe sori taki den de loyaal na Jehovah èn taki den e froetrow na ini den pramisi foe En di den ben o kisi te den ben o tan gi jesi na En. A de wan sari, taki den no ben de loyaal èn taki den no ben froetrow tapoe Jehovah. Di Satan ben pramisi Eva taki a ben o abi srefidensi èn di a ben kroetoe Jehovah na wan falsi fasi taki Jehovah ben e lei, dan Satan ben kori Eva èn Eva ben trangajesi Gado. Adam ben doe a sondoe foe Eva toe (Genesis 3:1-6; 1 Timoteus 2:14). Den sani di den ben lasi foe dati ede, ben bigi srefisrefi. Efoe den ben waka a pasi foe Jehovah, dan dati ben o gi den moro nanga moro prisiri te den ben e go doro foe doe a wani foe en. Na presi foe dati, a libi foe den ben lai nanga lasi-ati èn nanga pen teleki den ben o dede te foe kaba. — Genesis 3:16-19; 5:1-5.
5. San na a prakseri di Jehovah abi gi wan langa pisi ten, èn fa a e jepi den getrow sma foe si a kontroe foe en prakseri?
5 Ma tokoe Jehovah no ben kenki a prakseri foe en taki wan dei grontapoe sa de wan paradijs tanpresi gi volmaakti libisma di no abi sondoe (Psalm 37:11, 29). Èn noiti A tapoe foe gi volmaakti tiri na den wan di e waka En pasi èn di e howpoe foe si a kontroe foe a pramisi dati. Gi wi di abi jesi foe jere, a sten foe Jehovah di de na wi baka, e taki: „Disi na a pasi. Waka na tapoe, oen pipel.” — Jesaja 30:21.
Son sma ben waka a pasi foe Jehovah
6. Sortoe toe man foe fositen ben waka a pasi foe Jehovah, èn nanga sortoe bakapisi?
6 Soleki fa Bijbel e froeteri, soso wan pikin groepoe foe den bakapikin foe Adam nanga Eva ben waka a pasi foe Jehovah. Abel ben de a fosiwan foe den. Ala di a dede toemoesi froekoe, tokoe a ben abi a boen-ati foe Jehovah di a dede èn foe dati ede a abi a seiker howpoe foe kisi so srefi wan „opobaka . . . foe den regtfardikiwan” na a reti ten foe Gado (Tori foe den Apostel 24:15). A sa si a kontroe foe a bigi prakseri foe Jehovah gi grontapoe èn gi a libisma famiri te foe kaba (Hebrewsma 11:4). Wan tra sma di ben waka a pasi foe Jehovah, ben de Heinok, èn a profeititori foe en di abi foe doe nanga a troetroe kaba foe a seti foe sani disi, ben kibri na ini a boekoe Judas (Judas 14, 15). Heinok toe no ben libi so langa leki a ben man libi (Genesis 5:21-24). Tokoe „a ben abi a boeweisi taki a ben plisi Gado” (Hebrewsma 11:5). Di a dede, dan neleki Abel, a ben abi a seiker howpoe foe wan opobaka, èn a sa de na mindri den sma di sa si den prakseri foe Jehovah e kon troe.
7. Fa Noa nanga en osofamiri ben sori taki den de loyaal na Jehovah èn taki den ben e froetrow tapoe en?
7 Foe di a grontapoe di ben de bifo a Froedoe, ben saka go moro dipi na ini ogridoe, meki moro nanga moro a ben tron wan tesi na tapoe a loyaalfasi foe sma, foe gi jesi na Jehovah. Na a kaba foe a grontapoe dati, wan pikin groepoe nomo ben e waka a pasi foe Jehovah. Noa nanga en osofamiri ben arki Gado èn ben froetrow na ini den sani di A ben taki. Na wan getrow fasi den ben doe den wroko di den ben moesoe doe èn den ben weigri foe meki na ogridoe foe a grontapoe na ini a ten dati kori den (Genesis 6:5-7, 13-16; Hebrewsma 11:7; 2 Petrus 2:5). Wi kan de nanga tangi taki den ben gi jesi na wan loyaal fasi èn nanga froetrow tapoe Jehovah. Foe di den ben doe dati, meki den ben pasa a Froedoe libilibi èn ben tron wi fositen tata. — Genesis 6:22; 1 Petrus 3:20.
8. San a nâsi Israèl ben moesoe doe foe waka a pasi foe Gado?
8 Baka ten, Jehovah ben sroto wan froebontoe nanga den bakapikin foe a getrow man Jakob, èn den ben tron en spesroetoe nâsi (Exodus 19:5, 6). Jehovah ben tiri a pipel nanga soema a ben sroto wan froebontoe nanga jepi foe wan skrifi Wet, wan priesterwroko èn nanga profeititori di den ben kisi doronomo di ben tiri den. Ma a ben e didon na den Israèlsma foe waka na baka den tiri dati. Jehovah ben meki en profeiti taigi den Israèlsma: „Loekoe, tide mi e poti blesi nanga floekoe na oen fesi: a blesi, te oenoe sa gi jesi na den komando foe Jehovah oen Gado di mi e komanderi oenoe tide; èn a floekoe, te oenoe no sa gi jesi na den komando foe Jehovah oen Gado èn oenoe e drai baka gi a pasi di mi e komanderi oenoe tide, foe waka na baka tra gado di oenoe no sabi.” — Deuteronomium 11:26-28.
Foe san ede son wan gowe libi a pasi foe Jehovah
9, 10. Sortoe situwâsi ben meki taki den Israèlsma ben moesoe froetrow tapoe Jehovah èn ben moesoe de loyaal na en?
9 Soleki a ben moesoe de nanga Adam nanga Eva, na so den Israèlsma ben moesoe froetrow tapoe Jehovah èn de loyaal na en efoe den ben moesoe tan gi jesi na en. Israèl ben de wan pikin nâsi di ben abi birtikondre lontoe en di ben lobi feti. Na a zuid-westsei den ben abi Egipti nanga Etiopia. Na a noord-owstoesei den ben abi Siria nanga Asiria. Krosibei na ini den birti, den ben abi Filistea, Amon, Moab, nanga Edom. Den alamala ben de feanti foe Israèl wan leisi. Boiti dati, den alamala ben anbegi kroektoe gado, ben doe astrologie, èn na ini wan toe kefal ben doe kefalek takroe seremonia di abi foe doe nanga seks hoeroedoe èn ben òfer pikin-nengre na wan ogri-ati fasi. Den birtikondre foe Israèl ben soekoe jepi na den gado foe den foe abi bigi osofamiri, foe abi boen kotiwroko, èn foe wini den feti foe den.
10 Israèl wawan ben anbegi wán Gado, Jehovah. A ben pramisi den taki a ben o blesi den nanga bigi osofamiri, foeroe kotiwroko, èn taki a ben o kibri den teige den feanti foe den efoe den ben sa gi jesi na den wet foe en (Deuteronomium 28:1-14). A ben de wan sari taki foeroe sma na ini Israèl no ben gi jesi na den wet foe Gado. Foeroe foe den wan di ben waka a pasi foe Jehovah ben ondrofeni takroe bakapisi foe di den ben de loyaal. Son wan foe den kompeIsraèlsma ben meshandri den na wan ogri-ati fasi, ben spotoe den, ben krawasi den, ben poti den na strafoe-oso, ben ston den kiri, èn ben kiri den (Tori foe den Apostel 7:51, 52; Hebrewsma 11:35-38). Dati ben moesoe de wan kefalek hebi tesi gi den wan di ben de getrow! Ma foe san ede so foeroe foe den ben gowe libi a pasi foe Jehovah? Toe eksempre na ini a historia foe Israèl e jepi wi foe si a takroe denki di den ben abi.
A takroe eksempre foe Akas
11, 12. (a) San Akas ben weigri foe doe di Siria ben de wan kefar gi en? (b) Na sortoe toe presi Akas ben go soekoe kibri?
11 Akas ben tiri na ini a zuidsei kownoekondre Juda na ini a di foe aiti jarihondro b.G.T. A no ben tiri na ini vrede. Wan leisi Siria nanga a noordsei kownoekondre Israèl ben moksi kon na wán foe feti nanga en, èn „en ati nanga na ati foe en pipel ben bigin beifi” (Jesaja 7:1, 2). Ma di Jehovah ben wani jepi Akas èn ben aksi Akas foe tesi En, dan Akas ben weigri krinkrin! (Jesaja 7:10-12) Foe dati ede Juda ben lasi na orlokoe èn foeroe sma ben lasi den libi. — 2 Kroniki 28:1-8.
12 Ala di Akas ben weigri foe tesi Jehovah, tokoe a no ben abi bigimemre foe aksi jepi na a kownoe foe Asiria. Tokoe Juda ben tan lasi den feti nanga den birtikondre foe en. Di Asiria srefi ben kon foe feti nanga Akas èn „ben gi en banawtoe”, dan a kownoe „ben bigin tjari ofrandi gi den gado foe Damaskus di ben e naki en, èn a ben taki: ’Bika den gado foe den kownoe foe Siria e jepi den, meki mi sa tjari ofrandi gi den so taki den kan jepi mi.’” — 2 Kroniki 28:20, 23.
13. San Akas ben sori di a ben go soekoe jepi na den gado foe Siria?
13 Baka ten, Jehovah ben sa taigi Israèl: „Mi, Jehovah, na joe Gado, a Sma di e leri joe foe gi joesrefi wini, a Sma di e meki joe waka na tapoe a pasi di joe moesoe waka. O efoe joe troetroe ben sa poti prakseri nomo na tapoe den komando foe mi! Dan a vrede foe joe ben sa tron leki wan liba, èn a regtfardikifasi foe joe leki den skwala foe se” (Jesaja 48:17, 18). Foe di Akas ben go soekoe jepi na den gado foe Siria, a ben sori o fara a ben de foe ’a pasi di a ben moesoe waka’. A denki foe den nâsi ben kori en srefisrefi, foe di a ben soekoe jepi na den presi di no e gi kibri srefisrefi, na presi foe soekoe jepi na Jehovah.
14. Foe san ede Akas no ben abi no wan boen reide foe soekoe jepi na den falsi gado?
14 Den gado foe den nâsi, so srefi di foe Siria, ben sori langa ten kaba taki den „na gado di no warti srefisrefi” (Jesaja 2:8). Bifo dati, na ini a tiri foe Kownoe David, a ben de krin foe si taki Jehovah hei moro den gado foe Siria di den Siriasma ben kon tron foetoeboi foe David (1 Kroniki 18:5, 6). Jehovah wawan, „a Gado foe den gado èn Masra foe den masra, a Gado di bigi èn di abi makti èn di e gi frede”, kan gi troetroe kibri (Deuteronomium 10:17). Ma Akas ben drai en baka gi Jehovah èn ben soekoe jepi na den gado foe den nâsi foe kisi kibri. A bakapisi ben takroe srefisrefi gi Juda. — 2 Kroniki 28:24, 25.
Den Djoe nanga Jeremia na ini Egipti
15. Na sortoe fasi den Djoe na ini Egipti ben sondoe na ini a ten foe Jeremia?
15 Bika a pipel foe Jehovah no ben de loyaal srefisrefi na en, meki Jehovah ben gi pasi na ini 607 b.G.T. foe meki den sma foe Babilon pori Jerusalem nanga a tempel foe en. Moro foeroe foe a nâsi ben tjari go na ini katibo na Babilon. Ma wan toe foe den ben libi na baka, èn wan foe den ben de a profeiti Jeremia. Di sma ben kiri a Granman Gedalia, dan a groepoe disi ben lowe go na Egipti èn den ben tjari Jeremia go nanga den toe (2 Kownoe 25:22-26; Jeremia 43:5-7). Drape den ben bigin tjari ofrandi gi den falsi gado. Jeremia ben rideneri serjoesoe nanga den Djoe di no ben getrow, ma den ben tranga-ede. Den ben weigri foe drai go na Jehovah èn den ben wani nomonomo foe tan tjari smoko-ofrandi gi na „oemakownoe foe hemel”. Foe san ede? Bika na dati den nanga den fositata foe den ben doe ’na ini den foto foe Juda èn na tapoe den strati foe Jerusalem, di den ben gwenti foe njan brede èn ben abi en boen, èn den no ben si no wan rampoe srefisrefi’ (Jeremia 44:16, 17). Den Djoe ben froeklari toe: „Foe sensi a ten di wi ben tapoe foe tjari smoko-ofrandi gi na ’oemakownoe foe hemel’ èn wi ben tapoe foe tjari dringi-ofrandi gi en, wi ben mankeri ala sani, èn wi ben dede nanga a feti-owroe èn nanga angriten.” — Jeremia 44:18.
16. Foe san ede a denki foe den Djoe na ini Egipti ben fowtoe srefisrefi?
16 Foe troe, a froestan e memre soso den sani di wisrefi wani! Ma fa sani ben de troetroe? A ben troe taki den Djoe ben tjari ofrandi gi den falsi gado na ini a kondre di Jehovah ben gi den. Son tron, soleki na ini a ten foe Akas, den ben ondrofeni pina bika den ben fadon komoto na bribi. Ma Jehovah „no [ben] atibron esi-esi” nanga a pipel foe en di a ben sroto wan froebontoe nanga den (Exodus 34:6; Psalm 86:15). A ben seni den profeiti foe en foe gi den deki-ati foe abi berow. Son tron, te a kownoe ben getrow, dan Jehovah ben blesi en, èn a pipel ben abi wini foe a blesi dati, srefi ala di moro foeroe foe den no ben de getrow (2 Kroniki 20:29-33; 27:1-6). Den Djoe dati na ini Egipti ben fowtoe srefisrefi di den ben froeklari taki iniwan boen di den ben miti na ini a mamakondre foe den, ben kon foe den falsi gado foe den!
17. Foe san ede Juda ben lasi en kondre nanga en tempel?
17 Bifo a jari 607 b.G.T., Jehovah ben gi a pipel foe Juda a deki-ati: „Gi jesi na mi sten, èn mi sa tron oen Gado, èn oenoe srefi sa tron mi pipel; èn oenoe waka a heri pasi di mi sa komanderi oenoe, so taki a sa go boen nanga oenoe” (Jeremia 7:23). Den Djoe ben lasi a tempel foe den nanga a kondre foe den, joisti foe di den ben weigri foe waka ’a heri pasi di Jehovah ben komanderi den’. Meki wi de seiker taki wi no e meki a serjoesoe fowtoe dati.
Jehovah e blesi den wan di e waka a pasi foe en
18. San den sma di e waka a pasi foe Jehovah moesoe doe?
18 Na ini a ten disi, soleki fositen, loyaalfasi de fanowdoe foe waka a pasi foe Jehovah — wan fasti bosroiti foe dini en wawan. A de fanowdoe foe abi froetrow — foe bribi dorodoro taki den pramisi foe Jehovah de foe froetrow èn taki den sa kon troe. A de fanowdoe foe gi jesi na Gado efoe wi wani waka a pasi foe Jehovah — foe waka na baka den wet foe en sondro foe lasi pasi èn foe hori den hei markitiki foe en. „Jehovah regtfardiki; a lobi sani di doe na ini regtfardikifasi.” — Psalm 11:7.
19. Sortoe gado foeroe sma na ini a ten disi e anbegi, èn nanga sortoe bakapisi?
19 Akas ben soekoe kibri na den gado foe Siria. Den Israèlsma di ben de na ini Egipti ben howpoe taki na „oemakownoe foe hemel”, wan oemagado di sma ben e anbegi na foeroe presi na a owroeten Mindri Owstoesei, ben o tjari boen gi den na materia sei. Na ini a ten disi, foeroe gado a no troetroe gado. Jesus ben warskow foe no dini „Goedoe” na presi foe dini Jehovah (Mateus 6:24). Na apostel Paulus ben taki foe „bigi-ai, di de a dini foe kroektoe gado” (Kolosesma 3:5). A ben taki toe foe sma di a „gado foe den na den bere” (Filipisma 3:19). Ija, moni nanga materia sani na den prenspari gado di sma e anbegi na ini a ten disi. A de troetroe so, taki moro foeroe sma — so srefi foeroe sma di abi wan relisi — e „poti den howpoe tapoe goedoe di no e gi seikerfasi” (1 Timoteus 6:17). Foeroe sma e wroko kefalek tranga foe dini den gado disi, èn wan toe foe den e kisi wini foe dati — foe di den e tan na ini den moro boen oso, den abi diri sani, èn e njan kefalek diri njanjan. Ma a no den alamala abi den goedoe disi. Èn srefi den wan di abi den goedoe disi e si te foe kaba taki den sani disi no e gi troetroe satisfaksi. Den sani disi no e gi seikerfasi, èn den de gi wan sjatoe ten nomo, èn den no e gi sma den sani di den abi fanowdoe na jeje fasi. — Mateus 5:3.
20. Sortoe balansi wi moesoe abi?
20 A troe, wi moesoe handri na wan praktisch fasi foe di wi e libi na ini den lasti dei foe a seti foe sani disi. Wi moesoe doe reidelek sani foe man sorgoe gi wi osofamiri na materia sei. Ma efoe a moro prenspari gi wi foe libi wan bigi libi, foe feti na baka moni, noso foe abi den sortoe sani disi, na presi foe dini Gado, dan wi fadon na ini na anbegi foe kroektoe gado èn wi no e waka a pasi foe Jehovah moro (1 Timoteus 6:9, 10). Ma fa a de te wi kisi siki, moni problema, noso tra problema? No meki wi de leki den Djoe na ini Egipti di ben taki dati den ben abi problema foe di den ben e anbegi Gado. Na presi foe dati, meki wi tesi Jehovah, wan sani di Akas no ben doe. Meki wi soekoe tiri na Jehovah Gado na wan loyaal fasi. Gebroiki den rai foe en nanga froetrow, èn begi gi krakti nanga koni foe man handri na ini ibri situwâsi. Baka dati, wakti nanga froetrow tapoe den blesi foe Jehovah.
21. Sortoe blesi den sma di e waka a pasi foe Jehovah sa kisi?
21 Na ini a heri historia foe Israèl, Jehovah ben gi foeroe blesi na den wan di ben waka en pasi. Kownoe David ben singi: „O Jehovah, tjari mi na ini joe regtfardikifasi foe mi feanti ede” (Psalm 5:8). Jehovah ben meki David wini den birtikondre foe en na ini feti, èn den ben de den kondre di ben tanteri Akas baka ten. Na ondro a tiri foe Salomo, Israèl ben blesi nanga a vrede èn a boen libi di den Djoe na ini Egipti ben angri gi. Jehovah ben meki a manpikin foe Akas, Hizkia, wini a makti Asiria srefi (Jesaja 59:1). Ija, na anoe foe Jehovah no ben sjatoe gi den loyaalwan foe en di no ben tanapoe na tapoe „a pasi foe sondari”, ma di ben prisiri nanga a wet foe Gado (Psalm 1:1, 2). Na so a de ete na ini a ten disi. Ma fa wi na ini a ten disi kan de seiker taki wi e waka a pasi foe Jehovah? Wi sa taki foe disi na ini a tra artikel.
Joe e memre disi ete?
◻ Sortoe eigifasi de toemoesi prenspari foe waka a pasi foe Jehovah?
◻ Foe san ede a denki foe Akas no ben boen?
◻ San ben fowtoe nanga a denki foe den Djoe na ini Egipti?
◻ Fa wi kan tranga a bosroiti foe wi foe waka a pasi foe Jehovah?
[Prenki na tapoe bladzijde 13]
Akas ben soekoe jepi na den gado foe Siria na presi foe soekoe jepi na Jehovah