’Wiki Angri ini na Ati Nanga a Frustan fu Sabi Moro’
„Mi no man taki fa mi e prisiri moro nanga moro te mi e leisi Is er een Schepper die om u geeft? (¿Wan Kriaman De Di E Broko En Ede Nanga Yu?) A e meki wan sma angri — nôno, kisi a lostu — fu sabi moro. Tangi fu di unu ben wiki angri ini mi ati nanga mi frustan fu sabi moro.”
DATI na fa wan Kotoigi fu Yehovah na North Carolina, Amerkankondre, ben denki fu a buku di a Waktitoren Genootschap ben tyari kon na doro na a „Gado Pasi fu Libi” Distrikt Kongres na ini 1998 nanga 1999. Srefi te yu no abi a buku, leisi den sani di tra sma ben skrifi.
Wan tu dei baka di wan man kisi en buku na a kongres na San Diego, California, Amerkankondre, a ben skrifi: „Mi feni taki a buku disi e tranga a bribi trutru. A e furu mi ati nanga dipi warderi gi den sani di Yehovah kria. ¡Mi leisi te na bladzijde 98 kaba, èn mi frede a dei te mi sa doro a kaba! So furu prisiri a e gi fu leisi a buku.”
Wan umasma na wan fu den Owstusei kondre ben skrifi: „A takiman fu a kongres ben gebroiki den wortu ’wan tumusi aparti buku’, èn den wortu dati e sori trutru san de na ini a buku. Wan tumusi aparti sani de taki a buku no e dwengi a leisiman fu bribi taki Gado de, ma toku a e sori wi den tru tori.”
Den tru tori de so srefi den moi sani di sabidensiman kon sabi fu wi universum, fu wi libi, èn fu wi. Disi ben naki na ati fu furu sma. „Fu tru, mi no man taki omeni krakti a pikin buku disi ben abi na mi tapu”, wan uma fu California ben skrifi. „Mi no ben man stop leisi a buku, fu di ibri bladzijde ben taki fu moro sani di den kon sabi fu na universum fu wi èn fu a libi srefi. ¡Mi leri someni sani trutru! Mi sa tan si a pikin buku disi leki wan diri gudu èn mi sa prati en nanga someni sma leki mi kan.”
Wan sani fu a buku di ben prisiri furu sma, na a syatu fasi fa a buku e taki fu Bijbel, èn e poti prakseri na den eigifasi fu a Kriaman. „A luku di den e luku Bijbel syatu, na a lasti pisi fu a buku, na wan fu den moro bun wan di mi leisi”, na wan eksempre fu sani di sma taki. Syatu baka wan fu den fosi kongres na New York, Amerkankondre, wan tra uma ben skrifi: „A músu de so, taki a nyun buku disi trutru e hari sma prakseri moro leki ala tra buku di unu druk. Mi ben lobi den buweisi fu sabidensi di e sori taki wan Kriaman de. A syatu fasi fa unu e taki fu Bijbel srefi, nofo kaba fu fruklari den penti di unu tyari kon na krin èn fu wiki na angri fu leisi moro.”
Sabidensi di sma kan frustan krin
Den sabidensi tori na ini den fosi kapitel muilek fu frustan kande, ma dya na wan tu eksempre fu sani di sma taki.
Wan man fu Kanada ben skrifi: „Disi de heri tra fasi leki den buku di e taki fu tèknik tori fu skrifiman di e pruberi meki bigi nanga den kefalek wortu fu den. Na wan tumusi aparti fasi unu e sori taki unu sabi fa fu meki wi kon frustan tori leki natuurkunde, scheikunde, DNA, den chromosoom, èn go so doro. ¡Mi ben winsi taki na unu ben skrifi den leribuku fu na akademia pe mi ben studeri someni yari pasa kaba!”
Wan profesor tapu a kontren fu natuurkunde na wan akademia ben skrifi: „[A] e sori krin san na den sani di abi fu du nanga a tori disi, sondro taki den fini tori na tèknik sei e meki a e frekti. A buku e rideneri nanga a leisiman èn a e gebroiki sani di furu prenspari sabiman taki. Disi na wan buku di ala sma di wani sabi fa na universum ben bigin, musu leisi awansi den na wan sabidensiman noso wan sma di no de wan sabiman.”
Wan yongu uma di e studeri fu tron ati-oso zuster ben taki: „¡Mi no ben man bribi mi ai di mi ben opo kapitel 4 èn ben leisi wan pisi di komoto na a buku di wi e gebroiki na ini klas! Mi ben gi a profesor fu wi a buku èn mi ben taigi en taki mi ben sabi taki a ben o lobi den tori na ini. Mi ben sori en bladzijde 54 di e taki fu na edetonton. A ben leisi en èn a ben taki: ’¡Den sani disi na moi tori! Mi o ondrosuku den.’”
Wan memre fu a parlement fu Belgia ben skrifi: „San ben fruwondru mi èn ben hori mi prakseri ben de den buweisi fu sabidensi di e sori taki disiten sabidensi no de kontrari san Bijbel e leri taki wán Gado nomo de, ma sabidensi e agri nanga a leri disi. Disi na wan tumusi bun fasi fa unu e denki fu sani.”
Kon Sabi a Kriaman Moro Betre
A buku ben yepi sma na furu kondre fu kon sabi Gado moro betre èn fu abi wan moro tranga banti nanga en. Wan leisiman na a foto Fukuwoka, Yapan, ben taki: „A gersi leki na fosi tron mi ben kisi fu si Yehovah moro fini. A buku e overtoigi sma na wan kefalek moi fasi. Mi ben man leri sabi Yehovah na wan fasi di noiti ete mi ben denki so fu en te leki now.” Wan man na El Salvador ben skrifi: „Yu e fruklari krin fa Gado abi sari-atifasi, nanga bunfasi, fa a no e atibron esi, èn fa a abi lobi bun-ati pasa marki. Fu tru, disi na soifri san wi abi fanowdu fu abi wan moro tranga banti nanga En èn nanga en Manpikin. Disi na a fosi buku di e fruklari den firi fu Yehovah èn den libisma firi di en Manpikin, Yesus abi.” Èn wan leisiman na Sambia ben taki: „Now Yehovah wani taki wan heri tra sani gi mi.”
Wi kan frustan taki Yehovah Kotoigi e prisiri fu prati Is er een Schepper die om u geeft? nanga trawan. Wan sma ben skrifi: „Di mi ben kaba leisi kapitel 10 [„Als de Schepper om ons geeft, waarom is er dan zoveel lijden?”], mi ben man taki nomo: ’¡Disi na a buku di wi abi fanowdu na Yapan!’ Mi ben sa wani leri den sani ini a kapitel disi bun, èn moro nanga moro mi wani gebroiki den na ini a velddienst.” Wan tra uma e studeri Bijbel nanga wan umapikin di ben kweki na ini wan tempel pe en papa na a priester. „A muilek gi en fu bribi taki wan Kriaman de. Den fruklari na ini a buku disi no dwengi sma, ma tru tori de na ini, fu dati ede mi denki taki srefi den Budasma kan leisi en sondro fu tweifri. A e meki tu taki wi e firi a lobi fu Yehovah moro.”
Wan uma fu Ingrisikondre ben kon na a bosroiti: „Didyonsro mi kaba leisi a Schepper-buku èn mi de fu bigin baka nanga en. ¡Na wan kefalek moi buku! Wan sma músu lobi Yehovah te a e leisi en. Mi gi wan na wan birfrow fu mi, di ben leisi soso tu kapitel nomo di a ben taki: ’Mi no man stòp leisi a buku, a span srefisrefi.’ Mi sabi taki a sa yepi sma fu kon sabi wi Gran Kriaman èn fu lobi en.”
Wan man na Maryland, Amerkankondre, ben taki: „A naki mi na yeye fasi trutru. Mi abi na prakseri fu gi ala sma pe mi e wroko wan buku. Son leisi a muilek gi mi fu bigin gi kotoigi na den sma dati di abi so furu fu du èn di kisi bun leri. Nanga a buku disi mi sa feni wan moi fasi now fu taki nanga sma na wan bun fasi.”
A de krin, a buku Is er een Schepper die om u geeft? sa abi bun krakti na tapu sma na heri grontapu.
[Sma di abi a reti fu a prenki na tapu bladzijde 25]
Fowtow fu a kafti fu a buku, na tapusei, Eagle Nebula: J. Hester nanga P. Scowen (AZ State Univ.), NASA