Aksi fu Leisiman

¿’A marki di den e marki’ wan sma soleki fa 2 Tesalonikasma 3:14 e taki fu en, na wan sani di a gemeente srefi e du, noso na wan sani di ibri Kresten e du fu ensrefi fu no abi demakandra nanga den wan di trangayesi?

A sani di na apostel Paulus ben skrifi den Tesalonikasma e sori taki den gemeente owruman abi wan spesrutu rol fu „marki” sma. Ma ibri Kresten e du dati fu ensrefi tu, fu di a e hori marki na yeye fasi na prakseri. Wi kan frustan disi moro bun te wi e go luku fa a situwâsi ben de trutru di Paulus ben gi a rai fu en.

Paulus ben yepi fu opo a gemeente na ini Tesalonika, èn a ben yepi man nanga uma fu tron bribiman (Tori fu den Apostel 17:1-4). Baka ten a ben de na ini Korente di a ben skrifi den fu prèise den èn fu gi den deki-ati. Paulus ben gi rai tu di ben de fanowdu. A ben gi den deki-ati ’fu libi na wan tiri fasi, fu bumui nanga den eigi tori, èn fu wroko nanga den anu’. Wan tu sma no ben du dati, èn fu dati ede Paulus ben taki moro fara: „Wi e frumane unu, brada: piri-ai gi den sma di no e tyari densrefi na wan fasi di fiti, fu gi trowstu na den sili di brokosaka, yepi den swakiwan.” A de krin taki sma ben de na den mindri di „no [ben] tyari densrefi na wan fasi di fiti”a èn di ben abi rai fanowdu.—1 Tesalonikasma 1:2-10; 4:11; 5:14.

Wan tu mun na baka, Paulus ben skrifi en di fu tu brifi gi den Tesalonikasma, di ben leri den moro sani fu a denoya fu Yesus di ben musu kon ete. Paulus ben gi moro tiri tu fa fu handri nanga den sma di no ben tyari densrefi na wan fasi di fiti èn di ’no ben e wroko, ma di ben e bumui nanga sani di no ben abi fu du nanga den’. Den sani di den ben du no ben de akruderi na eksempre di Paulus ben gi leki wan wrokoman di ben wroko tranga èn den no ben de akruderi a krin komando di a ben gi taki wan sma ben musu wroko fu sorgu gi ensrefi (2 Tesalonikasma 3:7-12). Paulus ben gi komando taki wan tu spesrutu stap ben musu du. Den stap disi ben du baka te den owruman ben frumane noso ben gi rai kaba na den wan di no ben tyari densrefi na wan fasi di fiti. Paulus ben skrifi:

„Now wi e gi unu komando brada, . . . fu hari unsrefi puru fu ibri brada di no e tyari ensrefi na wan fasi di fiti èn di no e tyari ensrefi akruderi a leri di unu kisi fu wi. Fu unu sei, brada, no tapu fu du bun. Ma efu wan sma no e gi yesi na a wortu fu wi na ini a brifi disi, dan marki a sma disi, no abi demakandra nanga en moro, so taki a kan firi syen. Èn toku no si en leki wan feanti, ma tan frumane en leki wan brada.”—2 Tesalonikasma 3:6, 13-15.

So bun, den tra stap di ben musu du ben de so srefi taki den ben musu hari densrefi puru fu den wan di no ben e tyari densrefi na wan fasi di fiti, den ben musu marki den, den no ben musu abi demakandra nanga den moro, ma toku den ben musu frumane den leki brada. San ben kan meki taki den memre fu a gemeente ben sa teki den stap disi? Fu tyari disi kon na krin, meki wi kari dri situwâsi pe Paulus no ben poti prakseri na tapu dyaso.

1. Wi sabi taki Kresten no de volmaakti èn taki den e meki fowtu. Toku lobi na wan marki fu a tru Kresten bribi, èn disi e aksi fu wi taki wi e frustan den fowtu fu tra sma èn e gi den pardon fu dati. Fu eksempre, wan Kresten ben sa kan kisi wán bigi atibron, soleki san ben pasa na mindri Barnabas nanga Paulus (Tori fu den Apostel 15:36-40). Noso te wan sma weri, a kan taki na wan grofu fasi noso na wan fasi di e hati tra sma firi. Na ini den sortu kefal disi, wi kan sori lobi èn gebroiki Bijbel rai, èn na so fasi wi kan tapu a fowtu dati, tan libi, tan abi demakandra, èn tan wroko nanga wi kompekresten (Mateus 5:23-25; 6:14; 7:1-5; 1 Petrus 4:8). A de krin taki den sortu fowtu disi no ben de san Paulus ben taki fu den na ini 2 Tesalonikasma.

2. Paulus no ben taki fu wan situwâsi pe wan Kresten e bosroiti ensrefi taki a no wani abi furu demakandra nanga wan sma di abi fasi noso maniri di no bun — fu eksempre, wan sma di gersi fu poti tumusi furu prakseri na ontspanning noso na materia sani. Noso wan papa noso mama kan tapu en pikin fu abi furu demakandra nanga yonguwan di no e lespeki a tiri fu den papa nanga mama, di e plèi grofu noso na wan fasi di kan gi den mankeri, noso di no e si a Kresten bribi leki wan seryusu sani. Den sani disi na persoonlijk bosroiti di de akruderi a sani di wi e leisi na Odo 13:20: „A sma di e waka nanga koni sma, sa kon koni, ma a sma di abi fu du nanga den wan sondro frustan, a no sa go bun nanga en.”—Teki gersi 1 Korentesma 15:33.

3. Fu wan heri tra moro seryusu sani, Paulus ben skrifi den Korentesma fu wan sma di ben du seryusu sondu èn di no abi berow. Den sortu sondari disi di no ben abi berow ben musu puru fu a gemeente. A „godelowsu” man ben musu gi abra na Satan, fu taki en so. Baka dati, den loyaal Kresten no ben musu abi demakandra nanga den godelowsu sma disi; na apostel Yohanes ben gi Kresten tranga fu no gi den odi srefi (1 Korentesma 5:1-13; 2 Yohanes 9-11). Ma disi no e fiti a rai fu 2 Tesalonikasma 3:14 tu.

A situwâsi di kari na ini 2 Tesalonikasma fu den sma „di no e tyari densrefi na wan fasi di fiti” de heri tra fasi leki den dri situwâsi di wi kari na tapusei. Paulus ben skrifi taki den sma disi ben de ’brada’ ete, di ben musu kisi frumane èn den ben musu handri nanga den leki brada. So bun, a problema fu den brada „di no [ben] tyari densrefi na wan fasi di fiti” no ben de soso wan persoonlijk problema na mindri Kresten, noso taki a ben seryusu so kefalek taki den gemeente owruman ben musu kon ini a tori èn den ben musu sluit den uit, soleki fa Paulus ben du na ini a situwâsi na ini Korente pe wan sma ben du hurudu. Den wan „di no e tyari densrefi na wan fasi di fiti” no ben du wan seryusu sondu, soleki fa a ben de nanga a man di ben sluit uit na ini Korente.

Den wan na ini Tesalonika di „no [ben] tyari densrefi na wan fasi di fiti” ben du wan lo sani di no ben de akruderi a Kresten bribi. Den no ben wani wroko, kande fu di den ben prakseri taki a ten te Krestes ben o kon baka ben de kefalek krosibei, noso fu di den ben lesi. Boiti dati, den ben tyari bigi problema kon fu di ’den ben bumui nanga sani di no abi fu du nanga den’. Soleki fa a sori, dan den gemeente owruman ben gi den rai furutron, akruderi a rai di Paulus ben gi na ini en fosi brifi èn akruderi tra rai di kon fu Gado (Odo 6:6-11; 10:4, 5; 12:11, 24; 24:30-34). Toku den ben tan tyari densrefi na wan fasi ete di ben tyari syen gi a gemeente èn di ben kan panya go na tra Kresten. Fu dati ede, sondro fu kari den nen fu den sma, a Kresten owruman Paulus ben poti prakseri na publiki na a fasi fa den no ben tyari densrefi na wan fasi di fiti, èn na so fasi a ben tyari a takru pasi fu den kon na krin.

A ben meki a gemeente sabi tu taki a ben sa bun te wan Kresten ben sa ’marki’ den wan di no ben tyari densrefi na wan fasi di fiti. Disi ben wani taki dati ibri sma ben sa musu luku suma na den sma di ben du den sani di kari na ini a warskow di a gemeente ben kisi na publiki. Paulus ben gi a rai taki den musu ’hari densrefi puru fu ibri brada di no e tyari ensrefi na wan fasi di fiti’. Dati no ben kan wani taki kwetikweti taki den ben musu wai pasi krinkrin gi so wan sma, bika den ben musu „tan frumane en leki wan brada”. Den ben musu tan abi Kresten demakandra nanga en na den konmakandra èn kande na ini a diniwroko. Den ben kan howpu taki a brada fu den ben o arki a frumane èn tapu nanga den fasi fu en di ben tyari problema kon.

Na sortu fasi den ben musu ’hari densrefi puru’ fu en? Soleki fa den buweisi e sori, disi ben de te den ben abi prisiri demakandra. (Teki gersi Galasiasma 2:12.) A tapu di den ben o tapu fu abi prisiri demakandra èn ontspanning nanga en, ben sa kan sori en taki den sma di e hori densrefi na gronprakseri no lobi den fasi fu en. Srefi te a no ben e firi syen èn no ben kenki, dan toku tra sma no ben o leri den fasi fu en èn kon tron leki en. Na a srefi ten, den Kresten disi ben sa musu poti prakseri na sani di bun gi den. Paulus ben gi den a rai: „Fu unu sei, brada, no tapu fu du bun.”—2 Tesalonikasma 3:13.

A de krin taki a rai disi fu na apostel no de wan reide fu broko ai gi den brada fu wi noso fu krutu den di den meki wan pikin misteik noso wan pikin fowtu. Na presi fu dati, a marki fu a rai na fu yepi wan sma di tyari ensrefi na wan fasi di e tyari problema kon èn di de kontrari a Kresten bribi srefisrefi.

Paulus no ben meki finifini wet soso fu pruberi fu meki wan frekti sistema di e sori fa wi musu handri. Ma a de krin taki den owruman musu gi rai fosi èn pruberi fu yepi a sma di no e tyari ensrefi na wan fasi di fiti. Efu dati no ben abi bun bakapisi èn a sma e tan tyari ensrefi na wan fasi di e tyari problema kon èn di kan panya go na den tra Kresten, dan den kan bosroiti fu warskow a gemeente meki den de na ai gi kefar. Den kan sreka wan lezing di e taki fu san ede den musu luku bun fu no tyari densrefi na wan fasi di no fiti. Den no sa kari nen, ma a lezing fu den di de wan warskow sa yepi fu kibri a gemeente bika den sma di e arki sa luku moro bun taki den no abi furu prisiri demakandra nanga wan sma di no e tyari ensrefi kwetikweti na wan fasi di fiti.

Wi howpu taki a sma di no tyari ensrefi na wan fasi di fiti sa firi syen fu den fasi fu en èn sa wani kenki. Te den owruman nanga tra sma na ini a gemeente e si taki a kenki, dan den kan bosroiti gi densrefi fu abi prisiri demakandra nanga en baka.

So bun, taki en syatu: Den gemeente owruman e teki fesi fu gi yepi èn rai na wan sma di no e tyari ensrefi na wan fasi di fiti. Efu a sma no e si taki a fasi fu en no bun, ma a e tan go doro fu abi wan takru krakti na tapu sma, dan den owruman kan warskow a gemeente na ini wan lezing di e tyari a prakseri fu Bijbel kon na krin — di abi fu du kande nanga a meki di wan sma meki mofo fu hori nanga wan sma di no de na bribi, noso awansi sortu takru fasi (1 Korentesma 7:39; 2 Korentesma 6:14). Kresten na ini a gemeente di kisi warskow na a fasi disi kan bosroiti gi densrefi fu no abi furu prisiri demakandra nanga den sma di trutru e tan tyari densrefi na wan fasi di no fiti, ma di de brada ete.

[Futuwortu]

[Prenki na tapu bladzijde 31]

Kresten owruman e frumane den sma di no e tyari densrefi na wan fasi di fiti èn toku den e si den leki kompe-bribiman