Kownukondre Preikiman E Fruteri

Den Kotoigi E Go na a Publiki na ini Fransikondre

SENSI fruku mamanten na tapu freida 29 yanuari 1999 èn na tapu satra nanga sonde tu, den Kotoigi fu Yehovah na ini Fransikondre ben de fayafaya fu prati 12 milyun traktaat di abi leki nen People of France, You Are Being Deceived! (¡Pipel fu Fransikondre, Den E Kori Unu!) na tapu strati èn baka ten oso fu oso. Fu san ede den ben meki a propaganda disi?

Na wan nyunsuman konmakandra na ini Parijs a freida mamanten dati, den ben taki fu san ede den ben meki a propaganda disi. Wan takiman fu den Kotoigi ben fruklari: „San wi wani du tide na fu meki sma kon sabi fa wi de èn fu tapu a pori di sma di e pori wi nen na ala presi. Wi no abi trobi te sma e krutu wi, ma wi no sa arki den lei nanga sani di sma e taki fu pori a nen fu wi moro langa.”

Ala di den Kotoigi fu Yehovah na a di fu dri moro bigi Kresten relisi na ini Fransikondre, toku sma afrontu èn tanteri furu fu den pikin fu Kotoigi na skoro. Bigisma lasi den wroko fu den èn sma pramisi den fu du den ogri fu den relisi ede. A no de fu bribi taki den naki 60 procent belasting na tapu den relisi bijdrage srefi di den kisi. Fa a propaganda disi ben handri nanga a desko di sma e desko den Kotoigi?

A traktaat e fruklari: „Den 250.000 Kotoigi fu Yehovah nanga den kompe fu den di e libi na ini Fransikondre NO E AGRI nanga na oneerlijk fasi fa sma kari a Kresten relisi fu den, di de na Fransikondre fu sensi a yari 1900, na a srefi fasi leki den kefalek sekte fu sensi a yari 1995. . . . NO E AGRI nanga a tanteri di sma e tanteri den doronomo.” Den ben tyari den ogri-ati lei di den ben lei gi den Kotoigi na ini Fransikondre èn den triki fasi fa den leiman ben pruberi fu gi den wan takru nen na a publiki, kon na krin. A traktaat e taki na a kaba: „Nownow, moro leki tu milyun Kotoigi fu Yehovah nanga den kompe fu den e libi na ini Europa. Den e lespeki den wet fu Lanti pe den de borgu, fu di den e hori den markitiki fu na Evangelie hei. Pipel fu Fransikondre, disi na trutori. ¡A de wi plekti fu fruteri unu den leki fa den de!”

Sma Ben Handri Esi-esi èn na wan Bun Fasi

Furu milyun traktaat ben prati tapu a fosi dei. Na ini Parijs wawan, moro leki 7000 Kotoigi ben prati moro leki 1,3 milyun traktaat na den sma na brekten. Fu si so furu Kotoigi e prati traktaat na den strati seiker ben de a fosi sani di a pipel ben si. A media, so srefi den koranti nanga telefisi fu a heri kondre èn fu den moro pikin kontren, ben handri bun na tapu a propaganda disi fu meki wan sani bekènti. A koranti Le Progrès de Lyon ben taki: „A sani disi di den du . . . e sori a fowtu prakseri di sma abi fu wan wortu. Na ini den lasti tin yari, a wortu ’sekte’ . . . ben kisi wan takru, kefalek, èn ogri prakseri. . . . den Kotoigi fu Yehovah a no sma di e du trawan ogri èn sma di kan broko a libimakandra.”

Den sma di sabi den Kotoigi fu Yehovah sabi taki den na sma di lobi vrede èn taki den abi dipi lespeki gi a sistema na ini a libimakandra. Fu dati ede furu sma na tapu strati ben taki dati den e warderi èn den e horibaka gi den furu tindusun Kotoigi di ben du a propaganda disi. No langa baka dati, sma ben e bel, ben e seni faks nanga brifi fu taki tangi gi a traktaat. Na tapu fu dati, den opregti sma ben kisi na okasi fu yere den tru tori di abi fu du nanga den Kotoigi, taki sma fruteri lei èn don sani fu den, èn den sma di trawan gi a bribi fu den wan takru nen, ben man sori san den e denki fu a sani di den lobi.