Gebroiki traktaat fu preiki a bun nyunsu
1. Fa a pipel fu Gado gebroiki traktaat?
1 Langa ten kaba, a pipel fu Yehovah e preiki a bun nyunsu nanga yepi fu traktaat di e taki fu Bijbel. Na ini 1880, C. T. Russell nanga den mati fu en bigin meki Bible Students’ Tracts (Bijbel Ondrosukuman traktaat) gi den sma di ben leisi a Watch Tower so taki den ben kan prati dati gi trawan. Na ini 1884, C. T. Russell ben skrifi a nen fu a korporâsi na lanti so taki Kownukondre afersi ben kan go na fesi. Traktaat ben de so prenspari, taki den poti a wortu dati na ini a nen, Zion’s Watch Tower Tract Society, now a nen Watch Tower Bible and Tract Society of Pennsylvania. Na a ten fu 1918, den Bijbel Ondrosukuman ben prati moro leki 300 milyun traktaat. Te nanga now wi e gebroiki den traktaat fu preiki èn wi abi bun bakapisi.
2. Fu san ede a bun fu wroko nanga den traktaat?
2 Fu san ede a bun fu wroko nanga den traktaat: Den traktaat moi fu si fu di den abi furu kloru. A syatu boskopu di de na ini, e hari sma prakseri wantewante èn den kan leri furu. Spesrutu den ososma di no ben o wani leisi wan heri tijdschrift noso buku, lobi den traktaat. Traktaat makriki fu pristeri, srefi gi nyun preikiman nanga pikin-nengre. Boiti dati, den traktaat pikin èn wi kan tyari den na ala sei nanga wi.
3. Fruteri wan ondrofenitori fu yusrefi noso wan di skrifi, di e sori o prenspari den traktaat de.
3 Furu sma kon sabi den tru tori fu Bijbel nanga yepi fu wan traktaat. Fu eksempre, wan uma na ini Haiti ben si wan fu den traktaat fu wi na tapu strati. A piki a traktaat, a leisi en, èn a taki: „Mi feni a tru bribi!” Bakaten a go na wan Kownukondre zaal, a bigin studeri Bijbel, èn a teki dopu. Iya, nanga yepi fu a krin boskopu fu Gado Wortu di ben skrifi na ini wan traktaat, meki na uma disi kon na ini a tru anbegi.
4. San wi o du te den traktaat na a pristeri fu a mun?
4 Na ini na oso fu oso wroko: Fu di den traktaat na bun yepisani fu preiki gi sma, meki bigin nanga november wi o pristeri den na ini son mun. Wi no o langa den traktaat nomo gi ososma, ma wi o gebroiki den traktaat fu bigin takimakandra. Efu a sma wani sabi moro a fosi leisi te yu miti en noso te yu go baka na en, dan yu kan sori a sma fa wan Bijbelstudie e hori na ini a Bijbel leri-buku noso wan tra publikâsi di wi e gebroiki fu studeri nanga sma. Fa wi kan pristeri traktaat na ini na oso fu oso wroko? Ibri traktaat e taki fu wan tra tori, fu dati ede wi musu sabi san skrifi na ini den traktaat di wi e pristeri.
5. Fa wi kan pristeri den traktaat na ini na oso fu oso wroko?
5 A fasi fa wi o pristeri a traktaat musu fiti a kontren fu wi èn a musu fiti a tori di skrifi na ini a traktaat. Wi kan bigin a takimakandra fu di wi o langa a traktaat gi na ososma. A fesisei prenki kan hari a prakseri fu a sma. Noso wi kan sori a sma den difrenti traktaat èn meki a sma srefi luku sortuwan en feni moi. Na ini kontren pe sma e frede fu opo den doro gi trawan, wi kan hori a traktaat so taki a sma kan si a fesisei fu en. Noso wi kan aksi en fu skoifi wan sani gi en ondro a doro èn aksi en fa a e denki fu a traktaat. Efu a nen fu a traktaat na wan aksi, dan wi kan aksi en sortu piki a ben o gi. Noso wi kan poti wi eigi aksi di o hari en prakseri èn di o meki taki a wani taki nanga wi. Baka dati wi kan leisi wan pisi fu a traktaat nanga a sma, wakti na den pisi pe wan aksi skrifi èn aksi a sma fa a ben o piki. Wi kan leisi den moro prenspari Bijbeltekst na ini Bijbel. Te wi taki fu wan pisi fu a traktaat, wi kan tapu a takimakandra èn meki wan bun mofo fu go baka na a sma. Efu a gemeente gwenti poti publikâsi na den oso pe sma no de, dan wi kan poti wan traktaat na wan presi pe tra sma no o si en.
6. Fa wi kan gebroiki den traktaat na ini a stratiwroko?
6 Stratiwroko: Yu gebroiki den traktaat na ini a stratiwroko? Son sma no abi ten fu tanapu taki nanga wi na strati. A kan muilek fu si efu a sma wani sabi wan sani fu Bijbel. Na presi fu gi a sma den nyun tijdschrift sondro fu sabi efu a sma o leisi den, dan a ben o moro bun fu gi en wan traktaat, a no so? Fu di a fesisei fu a traktaat moi fu si èn a boskopu syatu, meki dati kan gi a sma deki-ati fu leisi a traktaat te a abi pikinso ten. A no de fu taki dati efu a sma abi pikinso ten, wi wani taki nanga en fu wan pisi fu a traktaat.
7. Fruteri ondrofenitori di e sori fa wi kan gebroiki traktaat fu preiki gi sma te okasi de.
7 Preiki te okasi de: A makriki fu gebroiki den traktaat fu preiki te okasi de. Wan brada gwenti poti wan tu traktaat na ini en saka fosi a komoto na oso. Te a miti wan sma, soleki wan sma di e wroko na ini wan wenkri, dan a e aksi a sma efu a wani leisi wan sani èn a e langa a traktaat gi a sma. Di wan trowpaar ben go na New York City fu go koiri, den ben sabi taki den ben o miti sma fu difrenti kondre. Fu dati ede den ben tyari a pikin buku Goed nieuws voor mensen uit alle landen nanga wan tu traktaat na ini difrenti tongo. Te den ben yere taki wan sma di e seri sani na sei pasi noso wan sma di ben sidon na den sei e nyan, ben taki wan tra tongo, dan den ben gi a sma wan traktaat na ini en eigi tongo.
8. Na sortu fasi traktaat de leki siri?
8 „Sai yu siri”: Den traktaat de leki siri. Wan gronman e panya bun furu siri fu di a no sabi sortuwan o sutu rutu èn gro. Preikiman 11:6 e taki: „Sai yu siri na mamanten èn no meki yu anu rostu fosi neti tapu, bika yu no sabi pe a siri o gro. A kan de dyaso noso a kan de drape, noso a kan taki a o gro bun na ala tu presi.” Fu dati ede wi e tan panya sabi, fu di wi e „fruteri trawan koni sani” nanga yepi fu a tumusi moi yepisani disi.—Odo 15:7.
[Prenspari pisi na tapu bladzijde 3]
Fu di den traktaat na bun yepisani fu preiki gi sma, meki bigin nanga november wi o pristeri den na ini son mun