Pristeri na bun nyunsu — Fu di nanga bun bakapisi yu e meki kobroyki fu den traktaat
1 Na a „Frutrow tapu Yehovah”-distriktkongres fu 1987, fo nyun traktaat ben tyari kon na doro. Den e tyari leki nen: Fu san-ede yu kan bribi na ini na beybri, San Yehovah Kotoygi e bribi?, Libi na ini wan nyun grontapu fu vrede, èn Sortu howpu de gi den lobiwan di dede? Yu kobroyki den traktaat disi na wan tumusi bun fasi na ini na preykiwroko?
2 Furu preykiman e libi traktaat na den doro pe no wan sma no de na oso. Èn den e gi den na sma di abi en druk fu arki na a momenti di wan sma e kon fisiti den. Son sma e feni taki efu den e kobroyki wan traktaat fu presenteri den srefi na a doro, a e wiki na belangstelling fu na sma moro. Trawan e feni en moro bun fu gi den traktaat fu soso na den sma di no e teki buku ofu tijdschrift, ma di e sori pikinso belangstelling.
OTEN ÈN FA FU KOBROYKI DEN
3 Efu yu man fu feni nyunfasi fu du sani, de na ay, dan yu sa feni furu okasi fu pristeri traktaat. Traktaat kan de fu eksenpre heri bun te yu e gi kotoygi na famiriman. Yu kan kobroyki traktaat te yu de nanga fakansi, e du boskopu, e rèys, de na skoro ofu na a presi pe yu e wroko. Yu e poti traktaat pe esi-esi yu kan teki den, kande na ini na saka fu yu dyakti ofu enpi, yu portmoni ofu plata tas pe yu e poti papira? Fu abi alaten traktaat na yu kan gi yu deki-ati fu gi okasi preyki. Fu san-ede yu no sa suku okasi fu pristeri traktaat?
4 Awansi sortu okasi de, yu kan kobroyki den traktaat fu gi wan moro bun kotoygi. Awansi den boskopu di de na ini de syatu, toku san den e taki e overtoygi sma srefisrefi èn abi beybri buweysi di de krin leki fondamenti. Den traktaat abi prenki nanga furu kloru èn kan de heri bun wrokosani fu du furu bun na ini na diniwroko. De srekasreka fu pristeri den alape na sma.
INI NA PREYKIWROKO
5 Yu meki kobroyki kba fu den nen fu den traktaat di e poti sma go denki, fu wiki belangstelling gi na Kownukondreboskopu te yu e wroko oso-fu-oso? Son preykiman wantewante e poti na ini den biginwortu fu den na prakseri na tapu na nen fu na traktaat. Fu san-ede yu srefi no ben sa pruberi na a fasi disi fu bigin fu taki? Yu ben sa kan taki: „Alow. Mi breyti fu miti yu na oso. Nanga mi fri wani mi e teki prati na a tyari fu wan tumusi prenspari boskopu. Dati tanapu na ini na traktaat disi Libi na ini wan nyun grontapu fu vrede. A traktaat disi na fu yu. A de fu soso. [Gi en na a ososma èn poti na prakseri na tapu a fesisey pisi.] Yu no ben sa wani sote fu libi na ini so wan kontren fu vrede?” Efu den situwâsi e gi pasi, go doro dan nanga na Tori fu takimakandra èn go abra na tapu na pristeri fu na mun.
6 A e anga fu na presi pe yu e libi taki yu e feni en kande heri bun fu sori, taki yu boskopu komoto fu na beybri. Na traktaat Fu san-ede yu kan bribi na ini na beybri kan de tumusi bun na ini yu kontren. Yu ben sa kan taki fu eksenpre: „Tide wi e libi wan beybriboskopu di de fu soso gi sma na ini wi birti. Dyaso yu traktaat de. [Gi en na a ososma.] Luku pikinso taki na tori e go fu na beybri. Yu e denki taki na ini na ten disi sma lasi den frutrow na ini na beybri? [Gi okasi fu piki.] Na traktaat disi sa yepi yu fu frustan fu san-ede wi kan bribi san a beybri e taki.” Go doro dan nanga na Tori fu Takimakandra èn sori sortu blesi Gado abi gi na grontapu na ini a ten di de na wi fesi.
7 Na ten di psa sori taki na prati fu den beybri traktaat de wan bun wrokosani fu pristeri na „bun nyunsu” (Mat. 24:14). Den e prey wan prenspari ròl na ini wi publiki diniwroko èn te wi e gi okasi preyki. Meki wi kobroyki den tumusi moy traktaat fu wi na wan bun fasi fu gi wan tumusi bun kotoygi èn fu yepi na so fasi tra sma fu kisi sabi fu Gado kownukondre.