Nyan Bun fu „a Trutru Libi”

YEHOVAH GADO gi sma a firi fu têgo ten (Preikiman 3:11). Disi e meki taki sma abi a firi taki den no man du noti te den sabi taki den o dede, ma na a srefi ten, a e wiki a firi doronomo na ini den taki den wani libi.

A Santa Bijbel, a Wortu fu Gado di skrifi nanga yepi fu en santa yeye, e gi wi wan moi howpu (2 Timoteus 3:16). Yehovah, di de lobi srefi, no ben kan meki libisma nanga a frustan fu sabi taki têgo ten de èn dan e gi den a strafu fu libi soso wan tu yari nomo. Gado kwetikweti no de wan sma di a ben o kria wi fu pina fu a situwâsi ede pe wi de na ini. Gado no ben kria wi leki „meti di no abi frustan èn di gebore nomo fu sma fanga den èn kiri den”.—2 Petrus 2:12.

Di Yehovah Gado ben kria Adam nanga Eva nanga wan firi fu têgo ten na ini den, dan a ben meki wan sani di ben de „heri bun”; a ben meki den nanga a krakti fu man libi fu têgo (Genesis 1:31). Ma a sari, taki a fosi trowpaar no ben gebroiki a fri wani fu den bun, fu di den ben trangayesi a krin komando di a Kriaman ben gi èn den ben lasi a volmaaktifasi di den ben abi biginbigin. A bakapisi ben de taki den dede, èn den gi onvolmaaktifasi nanga dede abra na den bakapikin fu den.—Genesis 2:17; 3:1-24; Romesma 5:12.

Bijbel e taki krin san na a marki fu a libi èn san dede wani taki. A e taki dati „no wan wroko noso prakseri noso sabi noso koni no de” na ini dede èn taki dedesma „no sabi notinoti” (Preikiman 9:5, 10). Nanga tra wortu, den dedesma dede. A leri di e taki dati wan sili no man dede, a no wan sani di Bijbel e leri, so bun no wan frekti dangratori de di musu lusu fu kon sabi san e pasa nanga dedesma.—Genesis 3:19; Psalm 146:4; Preikiman 3:19, 20; Esekièl 18:4.a

Gado ben abi wan prakseri; a no ben kria grontapu „fu soso”. A ben meki en „fu [volmaakti] sma libi na tapu” na ini wan kontren di de wan paradijs, èn Gado no kenki a prakseri fu en (Yesaya 45:18; Maleaki 3:6). Fu kan du disi, dan a ben seni en Manpikin kon na grontapu. Fu di Yesus Krestes ben tan getrow te na dede, meki a ben gi a fasi fu frulusu libisma fu sondu nanga dede. Yesus ben taki trutru: „Gado ben lobi grontapu sote, taki a ben gi en wan-enkri gebore Manpikin, so taki ibriwan sma di e sori bribi na ini en, no ben sa kisi pori, ma ben sa abi têgo libi.”—Yohanes 3:16.

Granwe, Gado ben pramisi taki a ben o kria „nyun hemel nanga wan nyun grontapu” (Yesaya 65:17; 2 Petrus 3:13). Dati ben sa wani taki dati a ben o teki wan pikin grupu getrow Kresten fu libi na hemel. Makandra nanga Yesus Krestes, den tron wan pikin grupu di sa tiri. Bijbel e kari en „a kownukondre fu hemel” noso „a kownukondre fu Gado” di sa tiri „den sani na grontapu” (Mateus 4:17; 12:28; Efeisesma 1:10; Openbaring 5:9, 10; 14:1, 3). Baka te Gado puru ala godelowsufasi na a grontapu fu wi èn a krin en, dan a sa tyari wan regtfardiki nyun libimakandra fu libisma kon, noso wan „nyun grontapu”. Disi sa de sma di Gado sa gi kibri so taki den no sa dede ini a pori di a godelowsu seti fu sani disi sa kisi dyonsro (Mateus 24:3, 7-14, 21; Openbaring 7:9, 13, 14). Den sma di sa kon na libi baka nanga yepi fu na opobaka di Gado pramisi, sa moksi densrefi nanga den.—Yohanes 5:28, 29; Tori fu den Apostel 24:15.

„A Trutru Libi” Na Ini a Ten Dati

Fu buweisi taki a tumusi moi fasi fa den taki fu a libi na ini a Paradijs na grontapu sa kon trutru, Gado e taki: „¡Luku! Mi e meki ala sani kon nyun” (Openbaring 21:5). Libisma no man frustan dorodoro san na den kefalek moi sani di Gado sa du gi a libisma famiri. Gado sa kria wan paradijs na heri grontapu, na a fasi fa Eden ben de fosi (Lukas 23:43). Neleki fa a ben de na ini Eden, na so den kloru, geluid, èn den sani di yu kan tesi sa moi èn switi pasa marki. Pôtifasi no sa de moro èn nyanyan no sa mankeri moro, bika Bijbel e taki fu a ten dati: „Den fositen sani pasa kaba” (Openbaring 21:4; Psalm 72:16). No wan sma sa taki moro: „Mi siki”, fu di siki sa puru na pasi fu têgo (Yesaya 33:24). Iya, ala den sani di e meki sma firi pen no sa de moro, so srefi dede, na owru feanti fu libisma (1 Korentesma 15:26). Na ini wan tumusi moi fisyun fu a „nyun grontapu”, a nyun libisma libimakandra na ondro a tiri fu Krestes, na apostel Yohanes ben yere wan sten e taki: „[Gado] sa figi puru ala watra na den ai, èn dede no sa de moro, no wan sari, no wan babari, no wan pen no sa de moro.” Sortu sani kan gi moro trowstu nanga prisiri leki a kontru fu den sani disi di Gado pramisi?

Te Bijbel e taki fu wan libi na ini a ten di o kon, dan a e taki spesrutu fu sani di sa meki taki libisma man du den sani di den wani na moreel sei èn na yeye fasi. Ala den bun prakseri di libisma ben feti na baka fu soso te leki now, sa kon tru (Mateus 6:10). Wan fu den prakseri disi na a angri di sma e angri fu retidu, wan sani di den no ben man kisi fu di ogri-ati tiriman di basi den swakiwan, ben kwinsi libisma (Preikiman 8:9). A psalm singiman ben skrifi na ini wan profeititori fa a situwâsi sa de na ondro a tiri fu Krestes: „Na ini den dei fu en opregtifasi sa de, èn vrede sa de pasa marki.”—Psalm 72:7, The New Jerusalem Bible.

Na abi di sma sa abi den srefi reti, na ete wan sani di sma wani èn furu sma tyari bigi òfer fu disi ede. Na ini a „kria di sani o kria kon nyun baka”, Gado sa tyari wan kaba kon na a desko di sma e desko trawan (Mateus 19:28). Ala sma sa lespeki makandra na a srefi fasi. Disi no sa de a fasi fa ogri-ati tiri e dwengi sma fu abi den srefi reti srefi. Ma den sani di e meki taki sma e desko trawan sa puru na pasi, so srefi gridi nanga bigimemre di e meki taki sma wani basi trawan noso taki den wani bun furu gudu. Yesaya ben taki na ini wan profeititori: „Den sa bow oso trutru èn libi na ini, èn den sa prani droifi-dyari trutru èn nyan fu den froktu fu den. Den no sa bow èn wan tra sma go libi na ini; den no sa prani èn wan tra sma go nyan fu en.”—Yesaya 65:21, 22.

¡Libisma pina trutru fu ala den libi di lasi na ini feti na mindri sma èn na mindri bigi grupu sma! Disi de so sensi di Kain kiri Abel te leki den orloku na ini a ten disi. ¡Langaten kaba libisma howpu èn wakti a ten te vrede sa kon, èn a gersi leki den du disi fu soso! Na ini a Paradijs di sa poti baka, ala sma sa lobi vrede èn abi sakafasi; den sa „feni trutru switi prisiri na ini vrede pasa marki”.—Psalm 37:11.

Yesaya 11:9 e taki: „Grontapu seiker sa kon furu nanga a sabi fu Yehovah, soleki fa watra e tapu se.” Fu di wi gebore nanga onvolmaaktifasi èn fu tra sani ede, meki wi na ini a ten disi no man frustan dorodoro san ala den wortu disi wani taki. O volmaakti a sabi fu Gado sa meki wi kon de wán nanga en èn fa bun furu prisiri sa kon fu dati, wi musu leri ete kande. Ma fu di Bijbel e leri wi taki Yehovah na wan Gado di abi bigi makti, koni, regtfardikifasi nanga lobi, meki wi kan de seiker taki a sa yere ala den begi fu den sma di e libi na ini a „nyun grontapu”.

„A Trutru Libi” Sa Kon Seiker—¡Grabu En Hori!

Furu sma e si têgo libi na ini wan moro betre grontapu leki soso wan dren noso wan anansitori. Ma gi den sma di e bribi a pramisi fu Bijbel trutru, a howpu disi na wan sani di sa kon seiker. A de leki wan ankra na ini a libi fu den (Hebrewsma 6:19). Neleki fa wan ankra e sorgu taki wan sipi no e degedege èn taki a no sa sekiseki, na so a howpu gi wan têgo libi e meki taki sma de kánkan èn abi frutrow èn a e yepi den fu kakafutu gi seryusu problema na ini a libi èn fu lusu den srefi.

Wi kan de seiker taki Gado sa du san a pramisi. A gi wan dyaranti srefi di a ben meki wan sweri, wan pramisi di no man kenki moro. Na apostel Paulus ben skrifi: „Di a ben abi na prakseri fu sori den erfgenaam fu a pramisi moro krin taki a rai fu en no e kenki, Gado ben kon na mindri nanga wan sweri, so taki nanga yepi fu den tu sani di no kan kenki, èn di Gado no man lei kwetikweti, wi . . . kan kisi wan tranga deki-ati fu grabu a howpu di poti na wi fesi” (Hebrewsma 6:17, 18). Den „tu sani di no kan kenki” èn di Gado noiti man puru na a pramisi fu en èn a sweri fu en, di de a fondamenti fu den sani di wi e fruwakti.

Bribi na ini den pramisi fu Gado e trowstu wi srefisrefi èn e gi wi krakti na yeye fasi. Yosua, wan fesiman fu a pipel fu Israèl, ben abi a bribi dati. Di Yosua ben taigi den Israèlsma wan tu lasti wortu, dan a ben kon owru èn a ben sabi taki a ben o dede. Toku a ben sori taki a ben tranga ete èn taki a loyaalfasi fu en no ben degedege, fu di a ben frutrow den pramisi fu Gado dorodoro. Baka di Yosua ben taki dati a ben o go „a pasi fu ala grontapu sani”, a pasi di e tyari ala libisma go na dede, dan a ben taki: „Unu sabi heri bun nanga un heri ati èn nanga un heri sili, taki no wán wortu fu ala den bun wortu di Yehovah, un Gado, taigi unu, tan sondro fu kon tru. Den alamala kon tru gi unu. No wán wortu fu den tan sondro fu a kon tru.” Iya, dri leisi Yosua ben taki dati Gado e hori ala den pramisi fu en ala ten.—Yosua 23:14.

So srefi yu kan bribi na a srefi fasi na ini a pramisi di Gado pramisi wan nyun grontapu di sa kon dyonsro. Te yu e studeri Bijbel fayafaya, dan yu sa kon frustan suma na Yehovah èn fu san ede yu musu frutrow en dorodoro (Openbaring 4:11). Abraham, Sara, Isak, Yakob, nanga tra getrow sma fu owruten ben abi wan tranga bribi, fu di den ben sabi a tru Gado Yehovah bun. Den ben tan abi wan tranga howpu, ala di den „no ben kisi a kontru fu den pramisi” di den ben de na libi. Toku „den ben si den fu farawe èn ben bari den wan switi kon”.—Hebrewsma 11:13.

Fu di wi e frustan den profeititori fu Bijbel, meki wi e si now taki „a bigi dei fu Gado na Almaktiwan” e kon krosibei, te a sa krin grontapu fu di a sa puru ala godelowsufasi (Openbaring 16:14, 16). Neleki den getrow sma fu owruten, wi musu tan fruwakti den sani di sa pasa na ini a ten di e kon, fu di wi abi bribi èn fu di wi lobi Gado èn a „trutru libi”. A de di a nyun grontapu de krosibei de wan bigi krakti gi den sma di e bribi na ini Yehovah èn di lobi en. So wan bribi nanga lobi musu gro, so taki Gado kan feni wi bun èn a kan gi wi kibri na ini a bigi dei fu en, di no de fara moro.—Sefanya 2:3; 2 Tesalonikasma 1:3; Hebrewsma 10:37-39.

¿So bun, yu lobi a libi? ¿Èn moro srefi, yu wani „a trutru libi” — wan libi leki wan futuboi fu Gado di a feni bun, nanga a howpu fu abi wan koloku tamara, iya, nanga têgo libi na prakseri? Efu dati na a sani di yu e suku, dan poti prakseri na a frumane di na apostel Paulus gi, di ben skrifi taki wi ’no musu poti wi howpu tapu gudu di no e gi seikerfasi, ma tapu Gado’. Paulus ben go doro: „De gudu ini bun wroko” di e gi Gado grani, so taki unu kan „hori a trutru libi steifi”.—1 Timoteus 6:17-19.

Te yu e teki wan bijbelstudie nanga Yehovah Kotoigi, dan yu kan kisi a sabi di „wani taki têgo libi” (Yohanes 17:3). Nanga lobi, Bijbel e skrifi fu a kari disi di de gi ala sma, neleki a di fu wan papa: „Mi manpikin, no frigiti mi wet, èn meki yu ati gi yesi na mi komando, bika yu sa kisi furu dei nanga furu yari nanga vrede na tapu.”—Odo 3:1, 2.

[Futuwortu]