A Dangratori fu wan Takru Gosontu
A YONGU OWMADJI SIKI, A ABI LUSUBERE. Hawa, en mama, frede taki a skin o lasi tumusi furu watra; a ben yere taki tra dei wan famiri fu en na ini a dorpu ben lasi en beibi na a fasi dati. Owmadji en granmama, a mama fu Hawa masra, wani tyari Owmadji go na wan bonuman fu a lo. „Wan ogri yeye e siki a pikin”, a granmama e taki. „¡Yu no ben wani weri wan tapu gi en fu gi en kibri, èn now problema e bigin kon!”
NA FURU presi na grontapu yu e si so wan sani. Hondrohondro milyun sma e bribi taki ogri yeye e siki sma. ¿Disi tru?
Fa a Tron wan Dangratori
Kande yu srefi no e bribi taki yeye di wi no man si e siki sma. Te yu luku en bun, dan yu e aksi yusrefi kande fu san ede wan sma ben sa denki so wan sani, bika sabidensiman sori taki moro furu siki e kon fu virus nanga bakterie. Ma memre, taki a no ala ten sma ben sabi fu den pikin kriaturu disi di e tyari siki kon. A ben de baka di Antonie van Leeuwenhoek ben meki a microscoop na ini a di fu 17 yarihondro, taki sma ben man si den pikinpikin sani di libisma ai no ben man si. Èn srefi na ini a ten dati, a ben de soso nanga yepi fu den sani di Louis Pasteur ben kon feni na ini a di fu 19 yarihondro taki sabidensi ben bigin frustan san den pikin kriaturu di e tyari siki kon, abi fu du nanga a siki di sma e siki.
A moro bigi pisi fu a historia fu libisma den no ben sabi fu san ede sma e siki, èn dati meki sma ben abi wan lo kruktu bribi, so srefi a prakseri taki na ogri yeye e tyari ala siki kon. The New Encyclopædia Britannica e taki fu wán fasi fa a prakseri disi du kon kande. A e taki dati den fositen dresiman ben pruberi fu dresi sikisma nanga wan heri ipi rutu, wiwiri, nanga ibri sani di den ben man gebroiki. Son leisi wan tu fu den sani disi ben wroko. Efu dati ben de so, dan boiti taki a dresiman ben o du sani fu dresi a sikisma, a ben o du wan lo kruktu gwenti tu fu di a no ben wani meki sma kon sabi fa a ben dresi a sma. Na a fasi dati a dresiman ben sorgu taki sma ben musu tan kon na en baka fu a yepi den. Na so fasi, datra sani ben tron wan dangra sani, èn sma ben kisi deki-ati fu suku yepi na wan krakti di no e kon fu libisma.
Te now ete sma na furu kondre e gebroiki den fasi disi fu dresi trawan. Furu sma e taki dati den yeye fu fositen tata di dede e siki sma. Trawan e taki dati na Gado e siki wi èn taki siki na wan strafu di wi e kisi fu den sondu fu wi. Srefi te den sma di kisi skoro e frustan a biologisch fasi fa sma e siki, toku den frede ete gi krakti di no e kon fu libisma.
Towfruman nanga lukuman e gebroiki a frede disi di sma e frede, fu puru moni na sma skin. San wi musu bribi dan? ¿Wi e kisi yepi te wi e suku yepi na den yeye fu kon betre? San Bijbel e taki?