¡Sreka Yusrefi gi g Pisi Ten fu Dusun Yari Di De Trutru Prenspari!
A DUSUN Yari Tiri fu Krestes sa tyari bun furu blesi kon gi a libisma famiri. Na ondro Yesus tiri di e sori taki a lobi wi, libisma sa komoto na ini a takru situwâsi pe den de na ini èn den sa kon volmaakti na wan kefalek moi fasi. Prakseri san disi kan wani taki gi yu. ¡Wan tumusi bun gosontu! Prakseri taki ibri mamanten te yu e wiki yu e firi moro bun leki a dei na fesi. Milyunmilyun mansma, umasma nanga pikin-nengre e howpu fu libi na ini a prisiri ten dati. Den e fruwakti en, den e begi fu en. A studeri di den e studeri Bijbel overtoigi den taki den kan prisiri fu den blesi disi.
Ma bifo Yesus Krestes e bigin nanga a Dusun Yari Tiri fu en, a musu puru ala den sma di e gens a tiri fu en, na grontapu. A sa du disi na ini a feti di Bijbel e kari Armagedon (Openbaring 16:16). Trutru Kresten na grontapu no sa feti a feti dati. A de a feti fu Gado. Èn a feti no sa feti na soso wán presi na grontapu nomo. Bijbel e taki dati a sa doro te na a moro farawe presi na grontapu. A sa kiri den feanti fu Krestes tiri. ¡No wan fu den sa man lowe!—Yeremia 25:33.
Dan Yesus sa poti prakseri na Satan Didibri nanga den ogri yeye fu en. Pruberi fu si a tori na yu fesi, leki fa a skrifiman fu a buku Openbaring ben si en: „Èn mi ben si wan engel [Yesus Krestes] e saka komoto na hemel nanga a sroto fu a dipi peti nanga wan bigi keti na en anu. Èn a ben grabu a draak hori, a fosi sneki, di de Didibri nanga Satan, èn ben tai en wan dusun yari” (Openbaring 20:1, 2). Baka ten, Gado sa pori Satan nanga den ogri yeye fu en fu têgo.—Mateus 25:41.
„Wan bigi ipi, di no wan sma . . . man teri,” sa pasa Armagedon libilibi (Openbaring 7:9). Krestes sa tiri den sma disi so taki den kan kisi wini dorodoro fu den „fonten fu watra fu libi” neleki fa wan skapuman e tyari den skapu fu en go na watra di e kibri a libi (Openbaring 7:17). ¡Fu di Satan nanga den ogri yeye fu en no man tapu den sma disi di pasa Armagedon libilibi fu go na fesi na yeye fasi, meki den sa kisi yepi fu wini den sondu firi fu den safrisafri te leki den sa kon de volmaakti te fu kaba!
Na ondro a tiri fu Krestes di e sori taki a lobi wi, a situwâsi pe sma musu libi na ini sa kon betre moromoro. Yehovah Gado, di sa gebroiki Yesus Krestes fu disi, sa puru ala sani di e meki taki sma abi pen nanga sari. A „sa figi puru ala watra na den ai, èn dede no sa de moro, no wan sari, no wan babari, no wan pen no sa de moro” (Openbaring 21:4). A profeiti Yesaya e sori a prenki moro krin, te a e taki: „Na a ten dati den ai fu den breniwan sa kon opo, èn srefi den yesi fu den dofuwan sa kon opo. Na a ten dati a malengriwan sa kren neleki wan dia, èn a tongo fu a babaw-wan sa bari fu prisiri ede” (Yesaya 35:5, 6). ¡Èn den dedewan, „den bigiwan nanga den pikinwan”, sa kon na libi baka nanga a howpu taki den no sa abi fu dede noiti moro!—Openbaring 20:12.
Nownow kaba, den e tyari a „bigi ipi kon na wan” di sa pasa Armagedon libilibi. Den e sreka densrefi gi a Dusun Yari Tiri fu Krestes. Ala di den no sabi o ten a tiri dati sa bigin, toku den sabi seiker taki a sa bigin na a ten di Gado poti. Yu kan de wan fu den, ma yu musu sreka yusrefi tu — no fu di yu e seri den gudu fu yu èn e reis go na wan seiker presi na grontapu, ma fu di yu e teki a soifri sabi fu Yehovah Gado èn den prakseri fu en na ini yu nanga yepi fu a studeri di yu e studeri Bijbel. Sondro taki yu musu pai den noso sondro taki yu de fruplekti, Yehovah Kotoigi sa breiti fu sori yu fa wan studie fu a Bijbel kan gi yu nanga yu osofamiri wini. Den sma di e tyari a tijdschrift disi kon na doro sa breiti fu fruteri yu moro.
[Faki na tapu bladzijde 7]
Den Dusun Yari—A De wan Trutru Sani Noso A De wan Agersi Sani?
Fu di a moro bigi pisi fu a buku Openbaring ben skrifi na wan agersi fasi, meki sma e poti na aksi. Fa a de nanga a Dusun Yari Tiri fu Krestes di den kari na ini Openbaring? ¿A de wan trutru pisi ten noso a de wan agersi pisi ten?
Ala sani e sori taki den e taki fu wan trutru pisi ten fu dusun yari. Prakseri fu disi: Na apostel Paulus e taki fu a Dusun Yari Tiri fu Krestes, leki wan dei pe Krestes sa krutu libisma (Tori fu den Apostel 17:31; Openbaring 20:4). Na apostel Petrus ben skrifi taki wán dei (24 yuru) de gi Yehovah leki wán dusun yari (2 Petrus 3:8). Dati ben sa meki wi denki taki a krutu „dei” disi langa trutru wán dusun yari. Boiti dati, na Openbaring 20:3, 5-7, wi e leisi fo difrenti tron fu „a dusun yari”, èn no fu „wan dusun yari”. A gersi leki disi e sori go na wan pisi ten di skotu.