Kownukondre preikiman e fruteri
Den kisi moi bakapisi fu di den hori pasensi èn fu di den horidoro
YESUS KRESTES ben taki na fesi taki ini den lasti dei „a lobi fu furu sma [ben o] kon kowru”. Leki bakapisi fu dati a de so taki na ini furu kondre fu grontapu, furu sma abi wan mi-no-ke fasi te den e yere a bun nyunsu fu a Kownukondre. Son sma e tegu srefi gi sani di abi fu du nanga kerki.—Mateyus 24:12, 14.
Toku Kownukondre preikiman abi bun bakapisi te den e preiki na sma, fu di den preikiman disi e frutrow tapu Gado èn den e sori pasensi. Na ondrofenitori disi di komoto fu a Republiek fu Tyekia e sori dati.
Tu Kotoigi ben taki nanga wan uma di no ben opo a doro fu en oso, ma a ben tanapu na baka a doro e arki. Baka wan pisi ten, na uma opo a doro pikinso, èn a langa en anu fu grabu A Waktitoren nanga Ontwaakt! di den Kotoigi ben pristeri en. Na uma taki „grantangi”, èn a tapu a doro baka. Den Kotoigi ben aksi densrefi efu den ben musu kon baka na a uma disi. Wan fu den Kotoigi disi ben de wan pionier, noso wan furuten preikiman, èn a bosroiti fu go baka na a uma. Ma a srefi sani pasa baka, èn dati go doro wán yari langa.
A pionier sisa kon si taki a ben musu taki na wan tra fasi nanga na uma, èn fu dati ede a begi Yehovah fu yepi en. Wan tra leisi a pristeri den tijdschrift, èn a poti wan tu aksi gi na uma: „Fa yu tan? Fa yu ben feni den tijdschrift?” Na ini a bigin, na uma no ben e piki en, ma baka di a ben go ete wan tu leisi, dan na uma bigin de tra fasi. Wan leisi a opo a doro bradi, ma a taki syatu nomo nanga a pionier sisa.
Fu di na uma no ben wani taki na a fesidoro fu en oso, meki a pionier sisa bosroiti fu skrifi en wan brifi èn fu fruteri fu san ede a ben e kon na en oso. Na ini a brifi a aksi en sosrefi efu a ben wani studeri Bijbel. A pionier sisa hori pasensi èn a tan meki muiti wán yari nanga siksi mun langa. Te fu kaba, a ben man bigin wan bijbelstudie nanga na uma disi. A pionier sisa ben fruwondru fu a sani disi, ma a kisi deki-ati bakaten fu di na uma ben taigi en: „Mi bigin bribi na ini Gado sensi yu bigin tyari tijdschrift gi mi.”
Iya, te wi e hori pasensi èn te wi e horidoro, dan wi kan kisi moi bakapisi na ini a Kownukondre preikiwroko èn ini a wroko di wi e du fu meki disipel.—Mateyus 28:19, 20.