Te yu abi a frantwortu fu tiri trawan, dan teki na eksempre fu Krestes
WAN TU yari pasa, sma ben ondrosuku a fasi fa libisma e tyari densrefi, èn na ondrosuku disi ben tyari wan tu moi sani kon na krin. Den sma di ben teki prati na a ondrosuku disi, ben prati na ini tu grupu. Wán grupu ben musu de waktiman èn a tra grupu ben musu de strafuman. Den waktiman ben musu luku den strafuman. San ben pasa?
Soleki fa na ondrosuku sori, dan „baka wan tu dei nomo, furu fu den waktiman ben e kosi den strafuman, den ben e fon den èn den ben e gi den strafu doronomo. Na a tra sei, den strafuman ben kon frede den trutru, èn fu dati ede den ben e du ala san den waktiman aksi den”. A sani disi meki ondrosukuman kon frustan wan sani, namku taki pikinmoro ala sma kan meki a fowtu fu tiri trawan na wan fasi di no fiti.
Sma kan tiri trawan na wan yoisti fasi èn na wan fasi di no fiti
Te sma e tiri trawan na wan yoisti fasi, dan a no de fu taki dati a kan abi bun bakapisi. Sma di e tiri trawan na wan yoisti fasi, kan yepi den fu kon sabi san den musu du. A kan abi wan bun krakti tapu a gosontu èn tapu den firi fu wan sma, èn sosrefi tapu a banti di wan sma abi nanga Gado (Odo 1:5; Yesaya 48:17, 18). Ma soleki fa na ondrosuku ben sori, dan ala ten wi musu luku bun taki wi no e tiri trawan na wan fasi di no fiti. Bijbel e sori taki a sani disi kan pasa trutru. A e taki: „Te wan ogrisma e tiri, dan a pipel e soktu.”—Odo 29:2; Preikiman 8:9.
Te wan sma e tiri trawan na wan fasi di no fiti, dan dati kan abi takru bakapisi, awinsi a sma abi a bun fu trawan na prakseri. Fu eksempre, na ini Ierland yu ben abi wan grupu leriman fu wan kerki, di ben musu luku wan tu pikin-nengre. No so langa pasa, a grupu disi aksi pardon fu a takru fasi fa sonwan fu den leriman ben tiri den pikin. A no de fu taki, dati furu fu den leriman disi ben abi a bun fu den pikin na prakseri, ma a fasi fa sonwan fu den ben e handri, ben takru srefisrefi. Wan koranti ben taki dati „furu pikin no man frigiti a tumusi ogri fasi nanga a grofu fasi fa den leriman fu a kerki ben handri nanga den” (The Irish Times). Ma fa yu kan tiri trawan na so wan fasi taki den o de klariklari fu du san yu aksi? Fa yu kan sorgu taki yu no taki noso du sani di o meki den mandi na yu tapu?—Odo 12:18.
Yesus Krestes kisi „ala makti”
Luku na eksempre fu Yesus Krestes. Syatu bifo a go na hemel, a taigi den disipel fu en: „Mi kisi ala makti na ini hemel èn na grontapu” (Mateyus 28:18). A sani dati ben meki den disipel kon frede? Den ben frede taki Yesus ben o handri now leki den tiriman fu Rome di ben abi a gwenti fu gebroiki a makti fu den fu kwinsi iniwan sma di ben e opo ensrefi teige den?
Bijbel e sori krin taki dati no de so kwetikweti! Yesus Krestes e tiri neleki fa en Tata e du dati. Aladi Yehovah abi a reti fu tiri leki a Moro Heiwan fu hemel nanga grontapu, toku a wani taki sma musu dini en fu di densrefi wani du dati. A no wani taki sma e dini en sondro fu gebroiki den frustan. Sma no musu du dati tu fu di den e frede en, noso fu di den wani hori en bun nomo (Mateyus 22:37). Noiti Yehovah e gebroiki a makti fu en na wan fasi di no fiti. A moi fisyun di Esekièl ben kisi, e tyari disi kon na krin.
Na ini a fisyun disi, Esekièl ben si fo engel di ben e horibaka gi Gado leki a moro hei tiriman. Ibriwan fu den ben abi fo fesi. Esekièl skrifi: „Fu a fasi fa den fesi fu den ben gersi, den ala fo ben abi wan fesi fu wan libisma nanga wan fesi fu wan lew na a retisei, èn den ala fo ben abi wan fesi fu wan mankaw na a kruktusei; èn den ala fo ben abi wan fesi fu wan aka tu” (Esekièl 1:10). Den fo fesi disi e prenki den fo prenspari fasi fu Gado, di a e sori na wan yoisti fasi ala ten. Soleki fa Gado Wortu e sori, dan a libisma fesi e prenki lobi, a fesi fu a lew e prenki retidu, èn a fesi fu na aka e prenki koni. Gado e sori den dri fasi disi makandra nanga a di fu fo fasi di a fesi fu a mankaw e prenki, namku krakti. San ala den sani disi wani taki? A fisyun e sori taki noiti Yehovah e gebroiki a kefalek bigi makti fu en sondro fu sori den tra prenspari fasi fu en.
Ala ten Yesus Krestes ben e gebroiki en makti na wan lobi-ati fasi, na wan koni fasi, èn na wan reti fasi, neleki en Tata. Te Yesus ben e tiri den disipel fu en, dan den ben e firi bun trutru (Mateyus 11:28-30). A moro prenspari fasi di Yehovah Gado nanga Yesus Krestes e sori, a no krakti noso makti, ma na lobi!—1 Korentesma 13:13; 1 Yohanes 4:8.
Fa yu e tiri trawan?
Fa yu e tiri trawan? Fu eksempre, fa yu e du dati na ini yu osofamiri? A de so taki fu di yu na edeman, meki yu e dwengi yu osofamiri fu du soso san yu feni bun? Den sma na ini yu osofamiri e du san yu taki fu di den frede yu, noso fu di den lobi yu? A de so taki den e saka densrefi na yu ondro fu di yu tranga moro den? Den aksi disi kan yepi famiri edeman fu tiri na osofamiri fu den soleki fa Gado wani dati.—1 Korentesma 11:3.
Fa a de te yu musu kisi a frantwortu fu tiri a Kresten gemeente? Fu kon sabi efu yu e tyari a frantwortu fu yu na wan yoisti fasi, dan luku efu yu e hori yusrefi na den gronprakseri disi di Yehovah Gado gi wi. Luku na eksempre fu Yesus Krestes tu.
„Wan srafu fu Masra . . . musu abi switifasi gi ala sma, . . . èn te ogri e miti en, dan a musu man hori ensrefi; nanga safri-ati a musu gi leri na den sma di no wani arki.”—2 Timoteyus 2:24, 25.
Na ini a fosi yarihondro, son sma ben abi a bigi frantwortu fu tiri a Kresten gemeente. Fu eksempre, Timoteyus ben abi a reti srefi fu „warskow son sma taki den no musu kon nanga wan tra leri” (1 Timoteyus 1:3). Ma wi kan de seiker taki Timoteyus ben sori den srefi fasi fu Gado na ini ala san a ben e du, bika a no de fu taki dati a gi yesi na a rai fu Paulus fu gi leri „nanga safri-ati” èn fu „abi switifasi gi ala sma” te a ben e teki fesi na ini a Kresten gemeente. Fu di Timoteyus ben moro yongu leki furu fu den owruman na ini a ten dati, meki a ben musu tyari ensrefi leki wan pikin di abi lespeki gi den moro owruwan, èn leki wan brada di e broko en ede nanga den moro yonguwan na ini a gemeente (1 Timoteyus 5:1, 2). Te brada e teki fesi na so wan lobi-ati fasi, dan a gemeente sa de neleki wan osofamiri pe trutru lobi de. A no sa de leki wan bigi bisnis pe sma no e broko den ede nanga trawan.—1 Korentesma 4:14; 1 Tesalonikasma 2:7, 8.
„Den tiriman fu den grontapusma, e basi den èn den bigiman abi makti na den tapu. A no de so nanga unu, ma efu wan sma wani de wan bigiwan na un mindri, dan a musu de un dinari.”—Mateyus 20:25, 26.
Den tiriman fu grontapu „e basi” trawan. Den e dwengi trawan fu gi yesi na den èn fu du sani na a fasi di den feni bun. Den e tapu skreki gi trawan, fu di den e taki dati den o strafu den efu den no gi yesi. Ma Yesus Krestes ben sori o prenspari a de fu no kwinsi sma, ma fu dini den (Mateyus 20:27, 28). Ala ten a ben e handri nanga den disipel fu en na wan lobi-ati fasi. Te yu e teki na eksempre fu Yesus, dan a moro makriki gi trawan fu du san yu e aksi fu den (Hebrewsma 13:7, 17). A o moro makriki gi den tu fu saka densrefi na yu ondro, èn fu du moro srefi leki san yu aksi fu den. Den o du sani gi yu fu di den wani du dati. Den no o du dati soso fu di den frede yu.—Mateyus 5:41.
„Luku den skapu fu Gado di a gi unu fu sorgu, . . . un no musu prei basi . . . gi den wan di de wan gudu fu Gado, ma un musu tron eksempre gi den skapu.”—1 Petrus 5:2, 3.
Na ini a ten disi, den brada di e teki fesi sabi taki den abi fu gi frantwortu na Gado fu a fasi fa den e sorgu den wan na ini a gemeente. Den musu luku taki ala brada nanga sisa e meki en bun na ini na anbegi fu Gado. Den e si disi leki wan seryusu frantwortu. Te den e sorgu gi na ipi fu Gado, dan den e suku fu du dati nanga den heri ati, nanga prisiri, èn na wan lobi-ati fasi. Neleki na apostel Paulus, den brada disi di e teki fesi, e du furu muiti fu tranga a bribi fu den brada nanga sisa na ini a gemeente. Den no e prei basi fu a bribi fu den.—2 Korentesma 1:24.
Te owruman musu gi rai, dan den e du dati na wan safri-ati fasi, so taki a sma di e du wan sani di no bun, kan kon na tapu a reti pasi baka, noso so taki den kan yepi wan tra Kresten fu go na fesi na ini a diniwroko fu Gado. Den e hori na prakseri san na apostel Paulus ben taki: „Brada, srefi efu wan sma meki wan fowtu bifo a sabi, dan unu di na lepi Kresten musu pruberi na wan safri-ati fasi fu tyari so wan sma kon na tapu a reti pasi baka, ma unsrefi musu luku bun tu taki unu no kisi tesi.”—Galasiasma 6:1; Hebrewsma 6:1, 9-12.
„Tan frudrage makandra èn gi makandra pardon nanga un heri ati . . . Un musu abi lobi, èn a musu de leki wan krosi na un skin, bika lobi na wan volmaakti banti di e meki sma kon de wán.”—Kolosesma 3:13, 14.
San yu e du te sma no e hori densrefi na ala den Kresten markitiki? Yu e hori na prakseri taki den na sondusma, soleki fa Yehovah nanga Yesus Krestes e du dati? (Yesaya 42:2-4) Noso yu e krutu den fu di yu feni taki den no hori densrefi finifini na a wet fu Gado? (Psalm 130:3) Memre taki a fiti fu du ala muiti fu sori switifasi, ma fu gi trangaleri te dati de fanowdu. Te yu e du sani na wan lobi-ati fasi, dan dati o meki taki den wan di de na yu ondro sa frutrow yu èn yu sa man frutrow den.
Te yu kisi a frantwortu fu tiri trawan, dan meki tranga muiti fu teki na eksempre fu Yehovah Gado nanga Yesus Krestes. Memre san a psalm skrifiman ben taki fu a fasi fa Yehovah e tiri a pipel fu en. David ben singi: „Yehovah na mi Skapuman. Mi no sa mankeri noti. Na ini wei di furu nanga grasi a e meki mi didon; na presi fu rostu pe furu watra e lon, a e tyari mi go. A e meki mi sili kisi krakti baka. A e tyari mi na tapu den pasi fu regtfardikifasi fu en nen ede.” Na wan srefi sortu sani wi e leisi fu Yesus: „Mi na a tumusi bun skapuman; mi sabi mi skapu èn mi skapu sabi mi, neleki fa a Tata sabi mi èn mi sabi a Tata; mi o gi mi libi gi den skapu.” Iya, Yehovah Gado nanga Yesus Krestes e tiri trawan na wan lobi-ati fasi, èn fu di den gi wi a moro bun eksempre disi, meki a fiti fu teki na eksempre fu den!—Psalm 23:1-3; Yohanes 10:14, 15.
[Prenspari pisi na tapu bladzijde 18]
Ala ten Yehovah e gebroiki a makti fu en na wan reti fasi, na wan koni fasi, èn na wan lobi-ati fasi
[Prenki na tapu bladzijde 18]
Son leisi, owruman musu gi rai na wan lobi-ati fasi te wan sma meki wan fowtu
[Prenki na tapu bladzijde 19]
Paulus ben gi Timoteyus a rai fu tyari ensrefi leki wan pikin di e sori lespeki gi moro owruwan èn leki wan brada di e broko en ede nanga moro yonguwan
[Prenki na tapu bladzijde 20]
Yesus Krestes e tiri na wan koni fasi, na wan reti fasi, èn na wan lobi-ati fasi