„Luku fa den prenki moi!”

Omeni leisi yu taigi yusrefi noso tra sma a sani disi di yu ben opo wan nyun Waktitoren? Den moi prenki nanga fowtow no poti drape fu soso. Den brada meki furu muiti fu poti den yoisti prenki drape. Nanga yepi fu den prenki wi e kisi leri fu di den e meki wi denki èn frustan a tori moro bun. Den kan yepi wi spesrutu te wi e sreka wisrefi gi a Waktitoren-studie èn te wi e gi piki.

Fu eksempre, prakseri a prenki na a bigin fu ibri studie-artikel. Fu san ede yu denki taki den teki a prenki dati? San a prenki e sori? San a abi fu du nanga a nen fu a studie noso nanga a tekst di e horibaka gi a studie? Luku san ibri prenki abi fu du nanga a tori fu na artikel èn fa yu kan fiti en na ini yu eigi libi.

A brada di e hori a Waktitoren-studie o gi a gemeente na okasi fu taki wan sani fu ibriwan fu den prenki, san den abi fu nanga na artikel noso san densrefi kan leri fu den. Son leisi, a skrifi na ondrosei fu den prenki sortu paragraaf un musu luku. Te dati no skrifi, a brada di e hori a studie kan bosroiti na sortu paragraaf a ben o bun fu taki fu wan prenki. Disi o yepi ala sma fu kisi wini fu a muiti di den brada du fu yepi a leisiman frustan san Gado Wortu e taki.

Wan brada ben taki: „Baka te wi leisi wan moi artikel, wi kan taki dati den prenki e meki a tori kon moro moi.”