Opziener di e teki fesi — A Waktitoren studieleider
1 A Waktitoren — A e bariwroko gi Jehovah Kownoekondre, na a moro prenspari sani di „a getrow èn koni srafoe” seti foe gi wi jeje njanjan „na a reti ten” (Mat. 24:45). Na owroeman di e hori a Waktitoren-studie abi wan prenspari frantiwortoe leki wan bekwaam leriman di e poti wan boen eksempre na ini a kresten fasi foe libi. — Rom. 12:7; Jak. 3:1.
2 Foe kan gi leri na wan boen fasi, dan a Waktitoren studieleider moesoe doe troetroe moeiti ini a sreka di a e sreka ensrefi ibri wiki. A e doe dati na ondro begi èn foe di a e sreka ensrefi finifini. A e sori taki a abi troetroe belangstelling gi a gemeente foe di na wan opregti fasi a e proeberi foe doro wi ati nanga a materiaal di wi e studeri. A e poti prakseri na tapoe den moro prenspari penti foe a lès èn a e jepi wi foe si san den penti disi abi foe doe nanga a thema foe na artikel.
3 Efoe a wani sreka ensrefi finifini, dan dati wani taki, dati a moesoe soekoe den tekst na fesi so taki a sabi fa den e fiti na a lès. A e sori taki a Wortoe foe Gado de toemoesi prenspari, foe di a e gi a gemeente deki-ati foe gebroiki bijbel na wan boen fasi na a ten te a studie e hori. Te a gemeente no e taki foe wan prenspari penti te den e gi komentaar, noso te den no taki fa foe fiti wan prenspari tekst, dan a sa poti wan tra aksi foe meki den bodoi dati kon na fesi. Na a fasi disi, a e jepi wi foe kon na den joisti bosroiti èn foe kon sabi fa foe gebroiki san wi e leri, na ini wi libi.
4 A Waktitoren studieleider safrisafri e proeberi foe meki a koni di a abi foe gi leri, kon moro boen. A no e taki toemoesi foeroe, ma a e gi wi deki-ati foe gi komentaar — nanga wi eigi wortoe, sjatoe, èn a moesoe abi foe doe nanga a lès. Wanwan leisi a kan memre wi taki, a sma di e gi a fosi piki na tapoe wan paragraaf, moesoe gi wan sjatoe piki, di langalanga abi foe doe nanga na aksi di skrifi. Tra komentaar foe a poebliki kan poti prakseri na tapoe a fasi fa foe fiti den tekst, den kan taki tra sani di e horibaka gi a lès, noso den kan sori fa foe fiti a materiaal na wan praktis fasi. A Waktitoren studieleider e horibaka gi ala sma di wani abi wan prati, foe di a e gi den deki-ati foe sreka densrefi persoonlijk èn foe sreka densrefi leki osofamiri.
5 Leki „sma di Jehovah gi leri”, wi e warderi den „presenti ini libisma”, soleki den Waktitoren studieleider, di „e wroko tranga . . . foe gi leri”. — Jes. 54:13; Ef. 4:8, 11; 1 Tim. 5:17.