Yu de gaw fu seti trobi èn fu suku freide?
YEHOVAH GADO wani taki Kresten e libi na ini freide nanga makandra. A wani taki wi e si freide leki wan prenspari sani. Te wi leki anbegiman lobi fu meki freide, dan freide o de na ini a gemeente. Disi e meki taki sma di no lobi trobi o wani kon na a Kresten gemeente.
Luku na eksempre disi. Wan pôpi bonuman na ini Madagaskar ben si fa den Yehovah Kotoigi ben e libi so switi nanga makandra. A prakseri na ensrefi: ’Efu oiti mi musu go na wan kerki, dan na drape mi o go.’ Baka wan pisi ten a tapu nanga afkodrei èn a seti a trowlibi fu en na wan fasi di e kruderi nanga Bijbel. Na so a tron wan anbegiman fu Yehovah, a Gado fu freide.
Neleki a man dati, dusundusun sma e kon na a Kresten gemeente ibri yari èn den e feni a freide di den e suku. Ma Bijbel e sori krin taki te sma na ini a gemeente abi ’bigi dyarusu èn doronomo den wani meki trobi’, dan dati kan pori a matifasi di den abi nanga makandra èn a kan tyari problema kon (Yak. 3:14-16). Koloku taki Bijbel e gi wi bun rai tu fu sori wi fa wi kan wai pasi gi den problema disi so taki a freide e tan. Meki wi luku wan tu situwâsi pe wi kan fiti den rai disi.
FA FU LUSU PROBLEMA DI E OPO KON
„Mi no ben man feni en nanga wan brada di ben e wroko makandra nanga mi. Wan leisi di mi nanga en ben e meki wán bigi trobi, dan tu sma kon na inisei èn den si fa wi e haritaki nanga makandra.”—CHRIS.
„Wan sisa di mi gwenti wroko nanga en na ini a preikiwroko, no ben wani wroko moro nanga mi. Te fu kaba, a no ben wani taki srefisrefi moro nanga mi. Mi no ben sabi fu san ede.”—JANET.
„Mi ben de na a telefon e taki nanga tu sma na a srefi ten. Wan fu den taki odi èn mi ben denki taki a ben saka a telefon kaba. Ne mi bigin fruteri a tra sma omeni fruferi sani fu en, aladi a ben de na a telefon ete.”—MICHAEL.
„Na ini wi gemeente, tu pionier kisi problema nanga makandra. Wan fu den bigin kosi a trawan. A fasi fa den ben e meki trobi nanga makandra, no ben bun gi a gemeente.”—GARY.
Kande yu no e si den sani disi leki seryusu problema. Toku ibriwan fu den situwâsi disi kan meki taki wan sma e sari wan heri pisi ten noso a kan meki taki a freide na ini a gemeente e lasi gowe. Ma yu sa breiti fu yere taki den brada nanga sisa dati meki en bun baka nanga makandra fu di den alamala fiti den rai fu Bijbel. Sortu Bijbel rai yepi den?
„No mandi nanga makandra te unu de na pasi” (Gen. 45:24). Na a rai disi Yosef ben gi den brada fu en di den ben e drai go baka na a papa fu den. Dati ben de koni rai trutru! Te wan sma no man hori ensrefi èn e atibron esi-esi, dan a kan meki taki tra sma e atibron tu. Chris kon si taki a ben abi heimemre èn taki a no ben lobi fu teki rai. Fu di a ben wani tyari kenki kon, meki a go aksi a tra brada pardon. A du tranga muiti tu fu no atibron so esi moro. Fu di a tra brada si taki Chris ben e meki muiti fu kenki, dan en srefi tyari kenki kon. Now den e prisiri fu wroko makandra na ini a diniwroko fu Yehovah.
„Te sma no e taki krin nanga makandra, ala sani e bruya” (Odo 15:22). Janet kon si taki a ben musu hori a rai disi na prakseri. A bosroiti fu go taki nanga a tra sisa. Di den ben e taki nanga makandra, dan Janet aksi a sisa na wan lespeki fasi fu fruteri en fu san ede a ben e mandi nanga en. Na a bigin a no ben makriki gi den fu taki nanga makandra. Ma te fu kaba den ben man taki krin fu a tori, sondro fu meki trobi. A sisa kon si taki a no ben frustan wan tori bun èn taki a tori no ben abi noti fu du nanga Janet. A aksi Janet pardon èn now den e dini Yehovah baka leki mati.
„Fu dati ede, te yu e tyari yu ofrandi go na a altari èn drape yu e memre taki yu brada abi wan sani nanga yu, dan libi yu ofrandi drape na fesi na altari èn go meki en bun nanga yu brada fosi” (Mat. 5:23, 24). Kande yu sabi a rai disi ete di Yesus ben gi na ini a prenspari lezing di a ben hori tapu wan bergi. Di Michael kon frustan taki a hati a tra brada, dan a no ben firi bun srefisrefi. A bosroiti taki a ben o du iniwan sani di ben de fanowdu fu meki en bun baka nanga en brada. A sori sakafasi èn a go taki nanga a brada. A begi en fu gi en pardon. San ben de a bakapisi? Michael e taki: „Mi brada gi mi pardon nanga en heri ati.” Na so den tron mati baka.
„Tan frudrage makandra èn gi makandra pardon nanga un heri ati, srefi te wan sma feni taki wan trawan du wan hati sani nanga en” (Kol. 3:12-14). Yu sabi den tu pionier ete di ben meki trobi na ini a preikiwroko? Wan owruman di ben abi switifasi gi den a rai fu aksi densrefi den sani disi: ’Wi abi a reti fu meki trawan na ini a gemeente firi sari fu di wi no man agri nanga makandra? Fu san ede wi no ben o meki muiti fu frudrage makandra èn fu dini Yehovah na ini freide?’ Den teki a rai fu na owruman. Now den man feni en nanga makandra aladi den e preiki a bun nyunsu.
Efu wan sma du wan hati sani nanga yu, dan a kan yepi te yu e fiti a Bijbel rai di skrifi na Kolosesma 3:12-14. Furu sma kon si taki te den abi sakafasi, dan dati e meki en makriki gi den fu gi trawan pardon èn fu frigiti san den du. Ma efu den si taki a muilek gi den fu gi a trawan pardon, dan kande den kan fiti a rai di skrifi na Mateyus 18:15. A rai di Yesus e gi drape e sori wi san musu pasa te wan sma du wan seryusu sondu teige wan trawan. Ma toku a kan de fanowdu taki yu fiti a rai disi tu. Go taki nanga yu brada noso sisa èn aksi en nanga sakafasi fu taki fu a tori èn fu lusu a problema.
A no de fu taki dati Bijbel e gi tra bun rai tu. Ma fu man abi bun bakapisi, dan wi musu de klariklari fu sori „den fasi di a yeye e meki sma kisi”. Dati na ’lobi, prisiri, freide, langa pasensi, switifasi, bun-ati, bribi, safri-ati, nanga a dwengi di wan sma man dwengi ensrefi’ (Gal. 5:22, 23). Neleki fa oli e meki wan masyin drai moro bun, na so den sma di abi den fasi fu Gado o man meki freide moro makriki.
A SWITI TE DIFRENTI SORTU SMA DE NA INI A GEMEENTE
Ibriwan fu wi de tra fasi. Wi alamala e si sani tra fasi èn wi e du sani tra fasi tu. Den difrenti disi e meki taki a switi fu de mati fu makandra. Ma den kan tyari trobi kon tu. Wan lepi owruman e fruteri fa a sani disi kan pasa: „Wan sma di e syensyen kan feni en muilek fu moksi nanga wan sma di lobi taki tori nanga ala sma. Kande disi e gersi wan lawlaw sani, ma toku a kan tyari bigi problema kon.” Ma yu denki taki sma di e difrenti fu makandra no o man feni en nanga makandra noiti? We, luku na eksempre fu tu fu den apostel. Kande yu e si Petrus leki wan sma di ben e taki iniwan sani di a ben e denki. Ma fa a de nanga Yohanes? Kande wi e si en leki wan lobi-ati brada di ben e denki bun fosi a ben e du noso taki sani. Kande wi abi leti pikinso fu denki so fu den tu apostel disi. Soleki fa a sori, dan den tu man disi ben e difrenti fu makandra. Toku den ben man wroko bun nanga makandra (Tori 8:14; Gal. 2:9). Disi e sori taki Kresten man wroko makandra, awansi den e difrenti fu makandra.
Kande wan brada na ini yu gemeente e du noso taki sani di yu no lobi. Toku yu sabi taki Krestes dede gi a sma dati, èn taki yu musu sori lobi gi en (Yoh. 13:34, 35; Rom. 5:6-8). Sobun, na presi taki yu e weigri fu tron mati nanga a sma dati noso na presi taki yu e koti pasi gi en, a bun fu aksi yusrefi a sani disi: ’Mi brada e du wan sani di no e kruderi nanga Bijbel? Na fu espresi a e du sani di mi no lobi? Noso mi no lobi en fu di a de tra fasi leki mi?’ Boiti dati, wan prenspari sani di wi musu aksi wisrefi na disi: ’A abi wan moi fasi di mi wani kon abi tu?’
A lasti aksi dati prenspari srefisrefi. Efu wan sma lobi taki ma yu no e taki so furu, dan prakseri fa a makriki gi a sma dati fu bigin wan takimakandra na ini a preikiwroko. Kande yu kan aksi a sma dati fu wroko nanga en fu si san yu kan leri fu en. Noso kande a sma disi lobi gi trawan sani, aladi yu no de so. Yu no e si fa a e prisiri fu di a lobi gi sani na den owruwan, den sikiwan, noso den wan di de na nowtu? San wi musu hori na prakseri, na taki awansi yu nanga yu brada de tra fasi, toku unu o man feni en bun nanga makandra te unu e tan poti prakseri na den bun fasi fu makandra. Kande unu no o tron bunbun mati te unu e fiti a rai disi, ma unu o man feni en moro bun nanga makandra. Èn boiti taki yu o abi freide, a heri gemeente o abi freide tu.
Eyodia nanga Sentike ben e difrenti tu fu makandra. Toku na apostel gi den deki-ati „fu meki a denki fu den kruderi nanga makandra te den e du a wroko fu Masra” (Fil. 4:2). Yu o meki muiti tu fu du a srefi èn fu kon abi freide?
NO DRAIDRAI FU LUSU WAN TROBI
Neleki fa takru wiwiri e gro makriki na ini wan bromki dyari, na so yu kan kisi moro atibron nanga wan sma te yu no e rutu den firi dati puru na ini yu ati. Te wan sma kon abi bita-ati, dan dati kan abi krakti tu tapu a gemeente. Efu wi lobi Yehovah nanga den brada nanga sisa fu wi, dan wi o du ala san wi man fu no meki trobi pori a freide di de na mindri a pipel fu Gado.
Efu yu e saka yusrefi èn efu yu e suku fu meki freide, dan yu o abi moi bakapisi
Te wi e pruberi fu lusu trobi so taki freide kan de baka, dan a o gi wi prisiri fu si den bun bakapisi di dati e tyari kon. Luku san ben miti wan Kotoigi sisa. A e taki: „Mi ben feni taki wan sisa ben e teki mi leki wan pikin-nengre. Mi no ben lobi a sani dati kwetikweti. Mi ben e mandi na en tapu èn fu dati ede mi no ben e firi fu taki langa nanga en. Mi ben e denki: ’A no abi lespeki gi mi, sobun mi no o lespeki en tu.’”
A Kotoigi sisa disi bigin prakseri san en srefi ben du. A e taki: „Mi bigin si taki mi srefi ben abi fowtu èn mi ben e sari taki mi ben tyari misrefi na a fasi dati. Mi ben musu kenki a fasi fa mi ben e denki. Baka di mi begi Yehovah fu a tori, dan mi bai wan pikin kado gi a sisa èn mi skrifi wan karta gi en fu aksi en pardon gi a fasi fa mi ben tyari misrefi. Wi brasa makandra èn wi bosroiti fu libi a tori. Wi no kisi trobi moro.”
A tru taki freide prenspari srefisrefi. Ma te wan sma e firi taki trawan no e lespeki en, dan nofo tron a kan taki noso du sani di kan pori a freide. Na so a de nanga furu sma di no e anbegi Yehovah, ma na mindri den anbegiman fu Yehovah, freide nanga wánfasi musu de. Gado ben meki Paulus skrifi a sani disi: „Mi . . . e begi unu fu tyari unsrefi na wan fasi di fiti den wan di Gado kari. Ala ten un musu abi sakafasi nanga safri-ati. Un musu abi pasensi èn un musu abi lobi, so taki un man frudrage makandra. Un musu libi bun nanga makandra èn un musu du ala muiti fu tan abi a wánfasi di unu kisi nanga yepi fu a santa yeye” (Ef. 4:1-3). A „wánfasi” dati warti srefisrefi. Meki wi du ala san wi man fu lusu iniwan problema di e opo kon na wi mindri. Na so wánfasi o tan.